Read Awing 1 Tesalonyanə 3 Bible Online

1 Tesalonyanə 3 - Awing bible

1 Tesalonyanə 3

¹Pəg nə ńkě chî təmbɔʼ pəg wam məntɨ́ mə́g ńchî tə zəənə́ áwɨ́ pô, ńtíʼ ḿbímnə ńgə́ pəg yǐ ghɔ́ŋə Atɛnsə á ngǎ pəgə́,

²ńtíʼ ńtúmə ndim əwɛ̂n Timoti páʼ a faʼ nə́ pə̌gpo á mbô Əsê, á mə́ náŋkə nə́ nkɨ yi əshîʼnə ńté Yeso Klisto. Pəg nə ńtúmə yí ńgə́ a yǐ ńgɛd məntɨ́ mɨ́ mə́ tyantə̂ ńkə́ ńkwáalə wɨ́ ńgɛd mbimə́ əzɨ ə́ tyantə̂,

³ńjî ńgə́ kɔ ŋwu əwɨ yitsə̌ a yǐ ḿbɨ nə́ ndzəm ńté á pə́ ńgə́ pə́ tə́ ńtsaŋkə̂ yə́. Pɨ nə́ nkɔ̌ʼmbɨ ə́wɨ́ pɨ jî ńgə́ pɛn chîə á mə́ tsaŋnə̂ nə́ ə́leenə́, ndzaŋ Əsê lɔ nə́ á mbô pɛnə̂.

⁴Á nə ḿbə́ əghâ pɛn nə ńchî nə́ lə́, pəg nə ńkə́ ə́fiʼtə̂ áwɨ́ tə ndɛd tə koʼ ńgə́ pə́ chîə á mə́ yǒ nə́ tsaŋkə̂ áwə́gə́. Tsɔʼə ndzaŋ pɨ jî nə́ lə́, lə́ ndə̌ŋdəŋ ndzaŋ páʼ á nə ńdaŋ nə́.

⁵Lə́ nə ńgɛd anu yə wɨ́ maŋ tíʼ ńtúmə Timotiə. Maŋ nə ńkě chî təmbɔʼ maŋ pɨ ńgwam ntɨ́ pô, lə́ kə ghɛd ə́lɨ́d maŋ tíʼ ńtúmə Timoti ńgə́ a yǐ ńnáŋ ńgə́ mbimə́ əjɨ pɛ́d ńtyantə̂ əshîʼnə kɨ ńgə́ Satanə a kwaʼlə̂ áwɨ́ nə́ wǔəə, afaʼə azə́gə́ á tíʼ ńdaŋə̂ yí kətaŋə?

⁶Əghâ nə́ Timotiə a mɛdtə̂ áwɨ́ ḿbəənə̂ á mbô pəgə́, a pɨ nə́ nkɨ yi əshîʼnə á mbô pəg ndzaŋ mbimə́ zɨ tyantə̂ nə́ pɨ kə́ ńtúgə akɔŋnə. A fiʼtə̂ áwə́g ńgə́ nə zá náanə ńkwúmtə áwə́g əshîʼnə, ńkə́ ńdoonə̂ á mə́ zɨ́ nə́ áwə́g ndzaŋ pəg kə́ nə́ ńdoonə̂ á mə́ zɨ́ nə́ áwɨ́ lə́.

⁷Ńdaŋ ə́lɨ́d nə́ pəlim, á mə́m məngə́ʼ mə́g pópə nətáŋ əwəg, pəg nə́ ńtúgə atyǎntə ntə́əmə. Lə́ kə pə́ mbimə́ əzɨ páʼ ə́ kə néŋ nə́ ntɨ́ əwə́gə́.

⁸Ńté ńgə́ nə́ pə́ əghâ nə́ nchîmbî əzəg pɔŋə́, páʼ təmbɔʼ nə́ pyádnə ńtɨ́ ńtyantə̂ nə́ Mmaʼmbîə.

⁹Əghâ nə́ pəg chîə á mə́ tə́ nə́ láʼkə Əsê ńté áwə́ənə́. Pəg láʼkə yí ńté akɔŋnə páʼ pəg túg nə́ á mbi yí ńté áwə́ənə́.

¹⁰Pəg chaʼtə́sê á nətúʼ ntsəm pó nənumnə ńgə́ mbɔʼ pəg zəənə́ áwɨ́ ńtíʼ ə́fɛ̂ ajúmə atsəmə á mbô pɨ páʼ á tə́ nə́ ḿbóŋə á mə́m mbimə́ əzəənə́.

¹¹Tíʼ əsê páʼ a pə́ nə́ Tǎ əwɛ̂n nə́ nkɔ̌ʼmbɨ əyí, pó Mmaʼmbî əwɛ̂n Yeso pó tyáŋtə ndúmə á mbô pəgə́ á mə́ yǐ nə́ ghéenə áwə́ənə́.

¹²Tíʼ Mmaʼmbîə a ghɛd pɨ kɔŋ məmbɨ mɨ́ ńkə́ ńkɔŋə̂ ŋwu ntsəm, ńjî ńgə́ akɔŋnə azə́ənə́ á ghɛn nə́ mbi ńkə́ ńtíʼ ńkwíŋ tsɔʼə nə́ ndú pəg kɔŋ nə́ áwɨ́ əwɨ́ lə́.

¹³Ńdaŋ ə́lɨ́d a yǐ ghɛd məntɨ́ mɨ́ mə́ tyantə̂, nə́ ŋwaʼ tsɔʼə tə kɔntə yitsə̌ á mbi Əsê páʼ a pə nə́ Tǎ, nə́ ndɛlə ándó Mmaʼmbî əwɛ̂n Yeso Klisto a yǒ nə́ yǐ pópə pɨ pí tsɔʼə pətsəm.