Read Awing 1 Tesalonyanə 4 Bible Online

1 Tesalonyanə 4 - Awing bible

1 Tesalonyanə 4

¹Á mə́ lwigtə̂ nə́ nə́ pəlim, pəg nə̈ ńdzéʼkə áwɨ́ ndzaŋ páʼ nə́ chî nə́ mə́ túg nə́ nchîmbî páʼ Əsê a kɔŋ nə́, lə́ pɛn ḿbə́ ndzaŋ pɨ ghɛd nə́. Pəg póʼmbô á mbô pɨ nə́ əlɛ́n Mmaʼmbî Yeso Klisto ńgə́ nə́ ghɛn nə́ mbiə á mə́ ghɛd nə́ ə́lɨ́d tə laŋə̂.

²Ńté ńgə́ nə́ jî məntəgə́ páʼ pəg nə fɛ̂ nə́ á mbô pɨ ńdaŋ nə́ mətɨ mə́ Mmaʼmbî Yeso.

³Lɛ̌ anu páʼ Əsê lɔ nə́, ńgə́ nə́ ŋwaʼə̂, ńkə́ ə́fóg mbɨ əzɨ tsɔʼə ntsəm ntsəmə á mə́m ndzɔʼə́ tə apímnə.

⁴Ŋwu əwɨ ntsəmə a zéʼə á mə́ wam nə́ mbɨ əjǐ nə́ ndú páʼ ə́ ŋwaʼ nə́ ńkə́ ńtúg ngóʼkə.

⁵Ńkɔ tə́ ńdublə̂ a ndzəm pəngyě ándó Pətəjǐsê páʼ po kě nə́ ághɔ́b Əsê jî pô.

⁶Á mə́mə anuə ndzɔʼə́, kɔ ŋwunə a fankə̂ apô ajíə á mbô mɔ́mɛ́ əyǐə kɨ ńgwágə yə́, pəg kə pɛ́dtə fiʼtə̂ wɨ́ nə́ anu zəənə́, ńkə́ ńdánə ə́fiʼtə̂ əwɨ́ ńgə́ Mmaʼmbîə a yǒ néŋ ngə́ʼə á mbɨ ŋwu ntsəm páʼ a ghɛd nə́ ndzaŋə anu zəənə́.

⁷Əsê a nə ńkě áwɛ̂n fóŋ lə́ ńgə́ pɛn tə́ ńgɛlə̂ anuə ndzɔʼə́ tə apímnə pô, ḿbə́ ə́fóŋə áwɛ̂n lə́ ńgə́ pɛn chî nchîmbî páʼ jɨ́d ə́ ŋwaʼ nə́.

⁸Lə́ələ́ á pə́ ńgə́ ŋwu páʼ a kǐ nə́ ntəgə́ zəənə́, a kě lə́ ŋwu kǐ pô; a kǐ lə́ Əsê páʼ ä fɛ̂ nə Ajwiə ajíə á mbô pəənə́.

⁹Mbɔʼ pəg kě pɨ ńtə́ ŋwaʼlə̂ á mbô pɨ ńté akɔŋnə á tətɨ pɨ páʼ pɨ pí nə́ nə́ Yeso pô. Əsê a kə zéʼkə áwɨ́ nə́ nkɔ̌ʼmbɨ wɨ́ ndzaŋ mbɔʼ nə́ kɔŋ məmbɨ mə́ənə́.

¹⁰Pɨ pɛn ńkə́ ńkɔŋ pəlim pə́ənə́ á mə́m Masedonya tsɔʼə nə́ ndú ghɛnə́. Lə́ pəg pə́ ḿbɛ́d ə́sóŋ ńgə́ nə ghɛn nə́ mbiə á mə́ ghɛd nə́ ə́lɨ́d tə ḿbegtə̂.

¹¹Ghɛd nə́ á pə́ ajú nə́ lɔ nə́ ńgə́, nə́ chî nchîmbî páʼ ə́ pwɔ́dnə nə́. Ńtə́ ńnáŋə mənu páʼ mə́ pə́ nə́ pə́ məmə́ənə́ ńkə́ ńtə́ ə́faʼə̂ nə́ mbô mə́ənə́ ándó pəg nə sóŋ nə́ nə́ pəənə́.

¹²Təmbɔʼ nə́ faʼ ə́lɨ́d, pɨ páʼ pó kě nə́ Əsê jî pô pó yǐ ə́fɛ̂ ngóʼkə á mbô pəənə́. Nə kě pɨ ńchî təmbɔʼ nə́ tə́ ḿbyáabə ajûtsə́ á mbô ŋwu tsə̌ pô.

¹³Pəlim, pəg loonə̂ ńgə́ nə́ jîə ndə̌ŋdəŋ ńté pəkwû ńjî ńgə́ kɔ nə́ tə́ ə́fɨnə̂ ándó pɨ páʼ pó kě nə́ akwaŋə́nu túg ńtə́ ḿbyáabə pô.

¹⁴Pɛn pí ńgə́ Yeso a nə ńkwû ḿbɨ ńjúmnə; ńdaŋ ə́lɨ́d pɛn kə́ ḿbí ńgə́ Əsê a yǒ júmkə Yeso pópə pɨ pó nə ńkwû nə́, ńtə́ ńkwûə ḿbí nə́ yə́.

¹⁵Lɛ̌ lə́ ndzeʼkə́ Mmaʼmbî páʼ pə̈g fiʼtə̂ nə́ áwɨ́ ə́wɨ́ əghâ nə́ ńgə́, pɛn páʼ pɛn yǒ nə́ pɛ́lə á mbî əghâ páʼ Mmaʼmbîə a yǒ nə́ yǐ, pɛn yǒ kě á mbi pəkwû peg ghɛn pô.

¹⁶Ńté ńgə́ Mmaʼmbî nə́ nkɔ̌ʼmbɨ əyə́ a yǒ lǒo á nəpó tsóolə, ə́ tɔ́ŋnə nə́ tə́kɔʼ ngye, əfo pətseŋpə́ndɛ́pə́sê a tɔ́ŋnə fóŋnə, pə́ tíʼ ńtɔ́ŋ nəpaŋ nə́ Əsê. Pɨ pə́ nə ńtə́ nə́ ńkwûə ńjîə Yeso Klisto pó peg ńjúmnə.

¹⁷Ńdǒ ə́wɨ́ pɛn páʼ pɛn pɛ́d nə́ á mbî ńkě kə́ kwúkə pô, pə́ kyeetə̂ áwɛ̂n pô atǐə á mə́mə alə́m ńjî ńgə́ pɛn tégə Mmaʼmbîə á mə́m əfə́gə. Ńdaŋ ə́lɨ́d pɛ̌npə Mmaʼmbî ə́ tíʼə ńchî əghâ atsəmə.

¹⁸Lə́ələ́ á pə́ ńgə́ nə́ néŋ məntɨ́ mə́ ŋwu ntsəmə á mə́m pɨ nə́ ətsáb pəənə́.