Read Awing 1 Tesalonyanə 5 Bible Online

1 Tesalonyanə 5 - Awing bible

1 Tesalonyanə 5

¹Əghâ nə́ nə́ pəlimə́ mə, pə kě chîə mə́ tə́ nə́ ŋwaʼlə̂ á mbô pɨ ńté alěmbî kɨ ndɛd páʼ ndɛn mənu ghɛn ə́ ghɛd nə́ lɔgə̂ aliʼ pô.

²Ńté ńgə́ nə́ pyádnə ńjî ńgə́ alěmbî Mmaʼmbîə a yǒ nə́ yǐ á yǒ ghabkə̂ yǐ lə́ ándó ndzə̌lə ä yǐəə nətúʼə.

³Əghâ pɨ pə́ yǒ nə́ tə́ sóŋə ńgə́, “Əliʼ ə́ pwɔ́dnə, ngə́ʼ yi ndaʼ ə́ kě ə́wɨ́ chî pô,” tsɔʼə əghâ yi wɨ́ ngə́ʼ ə́ ghabkə̂ ńtsóolə a ndu pó. Ə́ yǒ yǐ tsɔʼə tə kaʼə ándó məngyě nəpəmə a zóʼə mɔ́ lə̂, pó kě chî təmbɔʼ pó lə́ʼ pô.

⁴Lə́ pɨ nə́ pəlimə́ mə, pɨ kě lə́ á mə́m ndzəmə́ chî təmbɔʼ alě yəwə́ á yǒ ńgabkə̂ ńgyǐəə á mbô pəənə́ ándó ndzə̌ pô.

⁵Pɨ lə́ pɨ pə́ nkyaʼə, ḿbə́ pi pə́ əliʼ pə́ ŋwaʼ nə́. Pɛn kě lə́ á mbô nətúʼ pópə əliʼ pipə sɛ́n nə́ chî pô.

⁶Lə́ələ́ á pə́ ńgə́ kɔ pɛn tə́ ńdê ándó pətsə́ pəənə. Pɛn tə́ ńjwə́ʼtə əliʼə́, atûə azɛ̂nə a kə́ ńdá əghâ atsəmə.

⁷Ńté ńgə́ pɨ pö lê nə́ pó lê lə́ á nətúʼə, pɨ pö pɛ́ nə́ məloʼ pó kə́ ḿbɛ́ɛlə lə́ á nətúʼə.

⁸Lə́ ndzaŋ páʼ pɛn pə́ nə́ pɨ pə́ əliʼ pipə ŋwaʼ nə́ lə́, atûə azɛ̂nə a tə́ ńdá əghâ atsəmə, pɛn lɔg mbimə́ pó akɔŋnə ándó kɨ́ʼ ntso ghaŋə, ḿbɨ ńdɔgə̂ akwaŋə́nuə azɛ̂n ńtə́ ḿbyáabə á mə́ chwád nə́ ándó akáŋə́tûə.

⁹Əsê a nə ńkě áwɛ̂n tsɔ́ʼ lə́ ńgə́ pɛn jɨ́ ngə́ʼ ńté azáŋə́ndé ají pô, a kə tsɔ́ʼə áwɛ̂n lə́ ńgə́ pɛn chwád ńdaŋ nə́ Mmaʼmbî əwɛ̂n Yeso Klisto,

¹⁰páʼə a kə kwû nə́ ńté atûə azɛ̂n ńjî ńgə́ mbɔʼ pɛ̌npo nɔd ńchîə, kəənə a tə́ ńgyǐəə pɛn chîə atǐ kɨ ńtə́ ńdê.

¹¹Lə́ələ́ á pə́ ńgə́ néŋ nə́ məntɨ́ mə́ ŋwu ntsəmə á mə́m pɨ ńkə́ ńkwáalə ŋwu ntsəmə á kwíŋ tsɔʼə ndzaŋ nə̈ ghɛd nə́ əghâ nə́ lə̂.

¹²Pəg póʼ mbô nə́ pɨ nə́ pəlim ńgə́ nə ghóʼkə pɨ páʼ po chígə́ nə́ ə́faʼə̂ á mə́m pəənə́, pɨ páʼ Mmaʼmbîə a tsɔ́ʼ nə́ ńgə́ pó tə́ ńnáŋə áwɨ́ ńkə̈ ńtə́gtə áwə́ənə́.

¹³Fɛ̂ nə́ tə́kɔʼ ngóʼkə pópə akɔŋnə á mbô pó ńté afaʼ pö faʼ nə́. Chî nə́ nə́ mbwɔ́dnə á tətɨ pəənə́

¹⁴Pəlim, pəg póʼmbô nə́ pəənə́, kwantə̂ nə́ pɨ páʼ pö lɔ́ŋnə nə́, ńnéŋ məntɨ́ mə́ pɨ pó pɔ́g nə́ əliʼə́, ńkwá pɨ páʼ pó pwɔ́d nə́, ńtúgə awaamə́ntɨ́ nə́ ŋwu ntsəmə.

¹⁵Kɔ nə́ pí ńgə́ ŋwunə a kwígə təpɔŋ nə́ təpɔŋə, lə́ néŋ nə́ á mə́m ntɨ́ pəənə́ á mə́ tə́ nə́ ghɛd əshîʼnə əghâ ətsəmə á tətɨ pɨ, ńkə́ ḿbə́ á mbô ŋwu ntsəmə.

¹⁶Tə́ nə́ ńkɔŋtə̂ əghâ ətsəmə,

¹⁷ńchaʼtə́sê əghâ ətsəmə,

¹⁸ə́fɛ̂ a ndǎ nə́ anuə atsəm, ńté ńgə́ lə́ anu páʼ Əsê ä lɔ nə́ á mbô pɨ á mə́m Yeso Klisto.

¹⁹Kɔ nə́ pə́gtə mógə́ Ajwǐəsê;

²⁰Kɔ sóŋ ńgə́ nkɨ Əsê páʼ ntûsê a náŋkə nə́ lə́ ənukə́taŋə.

²¹Jwə́ʼ nə́ mənu mətsəm mə́ yǐ nə́ á mbô pəənə́, mimə́ pɔŋ nə́ pɨ wam ńtyantə̂.

²²Lə́ʼ nə́ ndzaŋ təpɔŋ ntsəmə.

²³Ńgə́ Əsê páʼ ä fɛ̂ nə́ mbwɔ́dnə a ghɛd nə́ ŋwaʼ nə́ ndú ətsəmə, ńkə́ ńdɔʼkə̂ ajwiə ajɨ́ pópə ntɨ́ wɨ́ nə́ mbɨ əjɨ əshîʼnə tə fid yitsə̌ tə ńkoʼ əghâ páʼ Mmaʼmbî əwɛ̂n Yeso Klisto a yǒ nə́ ńgyǐəə.

²⁴Yí páʼ ä fóŋ nə́ áwɨ́ lə́ a yǐ faʼə̂ zɨ́d zə̂, ńté ńgə́ lə́ ŋwu páʼ mbɔʼ á sóŋ ńgə́ a yǐ faʼə̂ anu á faʼə̂ zə́ələ́.

²⁵Pəlim, chaʼtə̂ nə́ Əsê á atû pəgə́.

²⁶Chaʼtə̂ nə́ pəlim pɨ́ pətsəmə á mə́m Yesö, ńchwegə̂ ághɔ́b nə́ ndu páʼ ə́ ŋwaʼ nə́.

²⁷Maŋ póʼmbô á mbô pɨ nə́ əlɛ́n Mmaʼmbî ńgə́ nə fóŋə aŋwaʼlə zəənə́ á mbô pəlim pətsəmə.

²⁸Apɔŋə́ntə́əmə Mmaʼmbî Yeso Klisto á chî nə́ pɨ pətsəmə.