Read Awing 2 Tesalonyanə 1 Bible Online

2 Tesalonyanə 1 - Awing bible

2 Tesalonyanə 1

¹Aŋwaʼlə zɨ lə́ ŋwaʼlə̂ Pɔl, ḿbéenə Silas pó Timotiə. Á mbô nkyeetə pɔ́ pə́ Əsê á Tesalonika, ándó pó pə́ nə́ pɔ́ pə́ Tǎ əwɛ̂n Əsê ńkə́ ḿbə́ pɔ́ pə́ Mmaʼmbî Yeso Klisto.

²Ńgə́ Tǎ əwɛ̂n Əsê pó Mmaʼmbî Yeso klisto pó nəələ̂ áwɨ́ nə́ apɔŋə́ntɨ́ ńkə́ ə́fɛ̂ mbwɔ́dnə nə́ pəənə́.

³Pəlim, lə́ aliʼə́nuə azə́gə́ á mə́ tə́ nə́ láʼkə Əsê əghâ ətsəm ńté áwə́ənə́. Á koʼnə̂ á mbô pəgə́ á mə́ faʼ nə́ ə́lɨ́d ńté ńgə́, mbimə́ əzɨ ə́ tə́ ḿbyádnə ńkwíŋə, akɔŋnə nə́ kə́ nə́ ńtúg nə́ pəlim pɨ á kə́ ńtə́ ḿbyádnə ńkwíŋə.

⁴Lə́ ghɛd ə́lɨ́d pəg təələ̂ ńté áwə́ənə́ á mə́m mənkyeetə mə́ pɔ́ pə́ Əsê. Pəg təələ̂ ńté ńgə́ pɨ pǎtə ńchîə á mə́mə atsaŋkə pópə ngə́ʼ lə́, ḿbɛ́d ńgɛn nə́ mbiə á mə́ wam nə́ ntɨ́, ə́ tɨ́ tyantə̂ ə́ kə́ néŋ ntɨ́ nə́ Yeso Klisto.

⁵Zəənə́ á nəələ̂ ńgə́ Əsê a tɨ́ ndə̌ŋdəŋ nə́ ndú páʼ a tsɔ́ʼtə nə́ məsáʼ mə́ pɨ ə́wə́, ńdaŋ ə́lɨ́d pɨ koʼnə̂ á mə́ kwú nə́ nə́ anuə nəfoonə Əsê yi páʼ nə́ zɨ́ nə́ ngə́ʼ ńté lə́,

⁶Əsê a yǒ faʼə̂ anu páʼ á koʼnə̂, a yǒ néŋ ngə́ʼə atû pɨ páʼ pö ghɛd nə́ nə́ zɨ́ ngə́ʼ lə́.

⁷A yǒ ghɛd pəənə́ ándó pɨ nə́ jɨ́ nə́ ngə́ʼ pɨ jwitə̂, pəg kə́ ńjwitə̂ azə́g tsɔʼə ə́lə́ələ́. A yǒ faʼə̂ zəənə́ anu lə́ əghâ ándó páʼ Mmaʼmbî Yeso a yǒ nə́ lǒo nəpó ə́ tsó pópə ətyǎntə pətseŋpə́ndɛ́pə́sê píə, á mə́mə alə́əmə mógə́,

⁸á mə́ néŋ nə́ ngə́ʼə atû pɨ páʼ pó kě nə́ Əsê jî pô ńkě kə̈ ńdzóʼnə Nkɨ yi Əshîʼnə Mmaʼmbî Yeso Klisto wə́ pô.

⁹Pó yǒ zɨ́ ngə́ʼ páʼ ə́ láʼ nə́ kě měe pô, pó yǒ kě yǐ páatə Mmaʼmbî pô, ə́ kě kə́ yǐ páatə aliʼ páʼ mətɨ mí mə́ túg nə́ nəgháʼ mə́ chî nə́ ə́wɨ́ pô.

¹⁰Əghâ páʼ a yǒ nə́ ńgyǐəə alě yi ə́wə́ á mə́ kwá nə́ nəgháʼ əyǐə á mbô pɨ pí pətsəm ə́ kə́ kwá ngóʼkə əjǐə á mbô ŋwu ntsəm páʼ a néŋ nə́ ntɨ́ nə yí, Pɨ yǒ kə́ chîə á ndzɔʼ pó, ńté ńgə́ pɨ pí nkɨ páʼ pəg nə fiʼtə̂ nə́ áwə́ənə́.

¹¹Lə́ ghɛd ə́lɨ́d pəg zá ńchaʼtə́sê atû pəənə́. Pə̈g pítə Əsê əzəg ńgə́ a fɛ̂ məntɨ́ nə pɨ nə chî nchîmbî páʼ ä lɔ nə́. A lɔg mətɨ mí, ńgɛd nə́ faʼə̂ afaʼ yə əshîʼnə atsəm páʼ pɨ lɔ nə́ mə́ faʼ nə́, ńkə́ ńgɛd ńgə́ pɨ məgtə̂ afaʼə mbimə́ azə́ənə́ atsəmə.

¹²Ńdaŋ nə́ ndú wɨ́d ghɛn, əlɛ́n Mmaʼmbî əwɛ̂n Yeso Klisto ə́ yǐ kwáalə nəgháʼə á mbô pəənə́, nə́ kə́ ńkwáalə nəgháʼə á mbô yə́, ńdaŋ nə́ apɔŋə́ntə́əmə Tǎ əwɛ̂n Əsê pó Mmaʼmbî Yeso Klisto.