Read Awing 2 Tesalonyanə 2 Bible Online

2 Tesalonyanə 2 - Awing bible

2 Tesalonyanə 2

¹Ndzaŋə ándó Mmaʼmbî əwɛ̂n Yeso klisto a yǒ nə́ yǐ lə́, ńkə́ ḿbə́ nə́ ndzaŋ pə́ yǒ nə́ kyeetə̂ áwɛ̂n táʼə aliʼ pɛ̌npo lə́, maŋ póʼmbô ə́sóŋ nə́ pɨ ńgə́ ḿbə́ pəlimə́ mə,

²kɔ nə́ zaŋkə̂ ńjwaʼlə̂ á mə́mə akwaŋə anuə azə́ənə́, kɨ kɔ ŋwu tsə̌ a kə́ fɨgə̂ áwɨ́ ńgə́ Alěmbî a Mmaʼmbîə á pɛ́dtə ńgyǐəə. Əghâ tsə̌ lə́ nə sóŋ ŋwu tsə̌ páʼ a nə ńtə́ nə́ náŋkə nkɨ Əsê kɨ ŋwu tsə̌ páʼ a nə ńtə́ nə́ ə́sóŋə anǔəsê. Kɨ əghâ tsə̌ pə́ kwaŋ ńgə́ pəg kə sóŋə zɨ əghâ pəg kə tə́ nə́ fiʼtə̂ atséebə Əsê, ńtə́ ə́sóŋə anǔəsê kɨ ńgə́ pəg kə ŋwaʼlə̂ zə́ələ́ á mə́mə aŋwaʼlə.

³Kɔ nə pí ŋwu tsə̌ a fɨgə̂ áwɨ́ nə́ ndú yitsə̌. Ńté ńgə́ Alě yə ə́wə́ á yǒ kě yǐ tə ghə́ ndɛd ə́ koʼ páʼ pɨ pipə nɨ́ nə́ pó tyantə̂ nə́ atûə nkǐ Əsê pô, Ŋwu Təpɔŋə wə́ aliʼə́ yə́ á chî nə́ á mə́m móg tə láʼ měe lə́ a tíʼ ńgabkə̂ ńgyǐəə.

⁴A yǒ kǐə ajúmə atsəm páʼ pɨ pə́ mbî pə́ fóŋ nə́ nə́ əsê, pópə ajúmə atsəm páʼ pó ghóʼkə nə́. A yǒ náakə mbɨ əjǐə á nətû pɨ́d pətsəmə, ə́ kə́ ghɛn tə ə́ kwú náanə á Tə́kɔʼndɛ̂sê ə́ tíʼ sóŋ ńgə́ yí lə́ Əsê.

⁵Nə́ kě pɛ́lə ńkwúmtə ńgə́ á nə ḿbə́ nə́ ndɛd pɛ́n nə ńchî nə́ lə́, maŋ fiʼtə̂ áwɨ́ nə́ mənu mɨ tsɔʼə mətsəm?

⁶Ajú tsə̌ á chî ə́wɨ́ páʼ á ghɛd nə́ ńgə́ kɔ mənu mɨ mə́ lɔgə̂ aliʼ əghâ nə́, pɨ jîə ajú yə ə́wə́. Chigə ndɛd yǒ koʼə̂, yi páʼ a pə́ nə́ Ŋwu Təpɔŋ lə́ a fɛ́lə.

⁷Mətɨ mimə təpɔŋ pɛn kě nə́ jí ndzaŋ mə́ faʼ nə́ pó mə́ pɛ́dtə ńchîə afaʼə. Lə́, anu páʼ á chî nə́ á mə́ lɔg nə́ aliʼə́, á kě aliʼ yi lɔg pô, tə ńdéʼtə ŋwu páʼ a wam nə́ zɨ́d pə́ fógə yə́ alaŋə́ ndúmə.

⁸Əghâ yi ə́wɨ́ Ŋwu Təpɔŋ wə́ a tíʼ ńgabkə̂ ńgyǐəə, lə́ yí Mmaʼmbî Yeso Klisto a yǐ nə́ yǐ jwítə yí nə́ ajwiə a fɛ́d nə́ ntso yí ə́ kə́ tsəŋkə̂ yí nə́ nkyaʼ ə́ yǐ nə́ fɛ́lə mbɨ yə́.

⁹Ŋwu Təpɔŋə a yǒ yǐ nə́ mətɨ mə́ Satan ə́ tíʼ ghɛd ntê əkɨʼnəmə́nu ətsəmə, pópə əkyeʼmə́nu məfɨgə nə mənu mə́ yɛ́d nə́ yɛ́d nə́ mimə məfɨgə.

¹⁰A yǒ lɔg ntê ntsɨd ntsəm á mə́ fɨg nə́ pɨ páʼ pó tə́ nə́ ḿbéŋə, pó yǒ péŋ té ńgə́ pó nə ńkě ndə̌ŋdəŋ pí pô, ə́ kə́ péŋ ə́ té ńgə́ pó nə́ ńkě ndə̌ŋdəŋ kɔŋ ńjî ńgə́ pə́ laŋə̂ á ndzəm wɨ́d ńchwádkə ághɔ́b pô.

¹¹Ńdaŋ ə́lɨ́d Əsê a tú mətɨ mə́ məfɨgə ńgə́ mə́ yǐ fɨgə̂ ághɔ́b pó pímə anu páʼ á kě nə́ pə́ ndə̌ŋdəŋ pô.

¹²Ńjî ńgə́ pɨ páʼ pó kě nə́ á ndə̌ŋdəŋ pí pô, ḿbə́ ńkɔŋə̂ á pə́ təpɔŋ, pə yǒ tsəŋkə̂ ághóobə́.

¹³Pəg chîə á mə́ tə́ nə́ láʼkə Əsê əghâ ətsəm ńté áwə́ənə́ á ḿbə́ pəlim, pɨ páʼ Mmaʼmbîə a kɔŋ nə́. Ńté ńgə́ Əsê a tsɔ́ʼə áwə́ənə́ á mə́ chwádkə nə́ wɨ́ ə́fɛ́lə nəfɛdnə́, ńdaŋə̂ á ndzəmə Ajwi ńgɛd pɨ pə́ pɨ pə́ Əsê pipə ŋwaʼ nə́ ńté ńgə́ pɨ néŋ ntɨ́ wɨ́ nə́ ndə̌ŋdəŋə́.

¹⁴Əsê a fóŋə áwə́ənə́ á mə́mə anu zɨ lə́ ńdaŋ lə́ á ndzəm nkɨ yi əshîʼnə pəg kə sóŋ nə́ á mbô pəənə́. A kə fóŋə áwɨ́ ńgə́ nə́ túgə azə́ənə́ aliʼə́ á mə́m nəgháʼ Mmaʼmbî əwɛ̂n Yeso Klisto.

¹⁵Pəlim, lə́ələ́ á pə́ ńgə́ nə́ tɨ́ ńtyantə̂ nə́ ndə̌ŋdəŋ páʼ pəg nə́ ńdzéʼkə nə́ áwɨ́ ə́wɨ́ ńdaŋə̂ á ndzəm anǔəsê pəg nə́ sóŋ nə́ á mbô pɨ pópə yi pəg kə ŋwaʼlə̂ nə́ nə́ aŋwaʼlə á mbô pəənə́.

¹⁶Ńgə́ Mmaʼmbî əwɛ̂n Yeso Klisto pó Tǎ əwɛ̂n Əsê páʼ a kə kɔŋ nə́ áwɛ̂n ńdaŋə̂ á ndzəm apɔŋə́ntə́əmə ají a ghɛd ńgə́ pɛn túgə atyǎntə ntɨ́ ńkə́ ńtúgə akwaŋ ńtə́ ḿbyáabə páʼ zə́ələ́ tɨ́ nə́ ńtyantə̂,

¹⁷a yǐ néŋ ntɨ́ wɨ́ ə́ kə́ kwáalə wɨ́ əghâ ətsəm ńgə́ anuə atsəm pɨ̈ faʼ nə́ kɨ ə́sóŋə nə́ faʼə̂ ńkə̈ sóŋə pə́ yi páʼ zə́ələ́ pɔŋ nə́.