Read Awing 2 Tesalonyanə 3 Bible Online

2 Tesalonyanə 3 - Awing bible

2 Tesalonyanə 3

¹Á mə́ lwigtə̂ nə́ nə́ pəlim, tə́ nə́ ńchaʼtə́sê atû pəg ńjî ńgə́ nkɨ Mmaʼmbî ə́ ghɛnə̂ aliʼə́ aliʼ nə́ mətɨ, pɨ pə́ kə́ ńkwáalə wɨ́d nə́ ngóʼkə tsɔʼə ándó pɨ kə kə́ nə ńkwáalə á mə́m pɨ lə́.

²Kə́ nə ńtə́ ńchaʼtə́sê ńgə́ Əsê a chwádkə áwə́gə́ á mə́m mbô mə́ ngaŋə́ghɛlə təpɔŋ pó ngǎŋntɨ́ təpɔŋə, ńté ńgə́ lə́ kě ŋwu ntsəm páʼ a túg nə́ mbimə́ pô.

³Lə́, anu Mmaʼmbîə a sóŋ nə́ lə́ á yǐ faʼə̂ zə́ələ́, a yǐ néŋ məntɨ́ mɨ́ mə́ tyantə̂ ə́ kə́ chwádkə áwə́ənə́ á mə́m mbô mə́ Ŋwu Təpɔŋ wə̂.

⁴Mmaʼmbîə a ghɛd pəg kě anu yitsə̌ tə́ ḿbɔ́gə ntê wɨ́ pô, pəg kə́ ńjî ńgə́ nə́ tə́ faʼə̂, ńkə́ ńgɛn nə́ mbi tsɔʼə mə́ faʼ nə́ anu páʼ pəg kə fiʼtə̂ nə́ áwɨ́ lə́.

⁵Ńgə́ Mmaʼmbîə a ghɛd nə́ túgə akɔŋnə Əsê ńkə́ ńtúgə awaamə́ndzɔʼ páʼ klisto a nə fɛ̂ nə́ nə́ pɨ lə́.

⁶Pəlim, nə́ əlɛ́n Mmaʼmbî Yeso Klisto pəg sóŋə á mbô pɨ ńgə́; kɔ nə́ wam əshu pɨ̌pə pɨ páʼ pó pə́ nə́ pəlɔŋ, ńkě ághɔ́b məntəgə́ páʼ pəg nə́ fɛ̂ nə́ á mbô pɨ lə̈ zoŋə̂ pô.

⁷Pɨ nə́ nkɔ̌ʼmbɨ ə́wɨ́ nə́ chígə́ ńjî ńgə́ nə́ chîə á mə́ faʼ nə́ lə́ tsɔʼə ndzaŋ pəg nə̈ faʼ nə́. Á nə ḿbə́ əghâ pə́g nə ńchî nə́ pɛn lə́ pəg nə ńkě lə́ pəlɔŋ pô.

⁸Pəg nə ńkě ajúmə ŋwu tsə̌ jî təghə́ pəg tû pô. Pəg nə́ mbɨ faʼə̂ lə́ pə́ faʼ nə́ ńkə́ ńtáŋnə, nətúʼ pópə ənumnə ńjî ńgə́ kɔ pəg pə́ atûə apeʼə á mbô ŋwu ə́wɨ́ yitsə̌.

⁹Pəg nə faʼ lɛ̌ lə́ ńkě té lə́ ńgə́ lə́ nə ńkě aliʼə́nuə azə́gə́ á mə́ pítə nə́ akwáalə á mbô pɨ pô, pəg nə ńgɛd ə́lɨ́d ńdoonə̂ lə́ pə́ ńgə́ á pə́ fiʼə̂ á mbô pɨ ńgə́ nə́ tə́ ńdzoŋə̂.

¹⁰Á nə ḿbə́ əghâ pəg nə ńchî nə́ pɛn lə́, pəg nə fiʼtə̂ áwɨ́ ńgə́, “Ŋwu tsəm páʼ a kě nə́ kɔŋə̂ á mə́ faʼ nə́ pô a kě kə́ ńchîə á mə́ jî nə́ pô.”

¹¹Pəg sóŋə anu zɨ lə́ ńté ńgə́ pəg zóʼ ńgə́ pɨ pətsə́ pó chîə á mə́m pɨ páʼ pó túg nə́ nchîmbî pəlɔŋə́, ńkě ajûtsə́ faʼə̂ pô tə ńdéʼtə ńgə́ pó kwúnə á mə́m mənu mə́ pɨ pə́ ndaʼə.

¹²Nə́ əlɛ́n Mmaʼmbî Yeso Klisto pəg sáʼ pɨ pɨ ńkə́ ńkwantə̂ ághóobə́, pó chîə á mə́ túg nə́ nchîmbî páʼ ə́ koʼnə̂ nə́, ə́faʼə̂ nə́ mbwɔ́dnə ńjî ńgə́ mbɔʼ pó túgə ajú yə jî nə́.

¹³Lə́, ńgɛn nə́ pɨ nə́ pəlim, kɔ nə́ kéenə á mə́ tə́ nə́ faʼ əshîʼnə.

¹⁴Təmbɔʼ ŋwu tsə̌ a chîə á mə́m pɨ páʼ a kě nə́ nkɨ páʼ pəg tú nə́ á mə́mə aŋwaʼlə zɨ̈ zóʼnə pô, nə́ leŋkə̂ ngaŋ ńkě kə́ ńtúgə anu yitsə̌ á mə́ faʼ nə́ pɨ po pô, ńjî ńgə́ əsɨ́ ə́ kóolə yə́.

¹⁵Lə́ kɔ nə lɔgə̂ yə́ ándó ngaŋkəpa əwəənə́, kwantə̂ nə́ yə́ á pə́ ándó ndim əwəənə́.

¹⁶Ńgə́ Mmaʼmbî nə́ nkɔ̌ʼmbɨ əyí, yí páʼ á pə́ nə́ ŋwunə a fɛ̂ nə́ mbwɔ́dnə, a fɛ̂ mbwɔ́dnə nə́ pɨ əghâ ətsəm, nə́ məsê mə́ ndú mətsəmə. Mmaʼmbîə a chî nə́ pɨ pətsəmə.

¹⁷Maŋ Pɔl, lə́ ŋwaʼlə̂ maŋ ŋwaʼlə̂ zɨ nə́ apô mə. Maŋ chaʼtə̂ áwə́ənə́. Lɛ̌ ndzaŋ páʼ maŋ ŋwaʼlə̂ nə́ əlɛ́nə mə á ndwigtə aŋwaʼlə atsəmə; lə́ ndú maŋ ŋwaʼlə̂ nə́ əŋwaʼlə mə.

¹⁸Ńgə́ apɔŋə́ntə́əmə Mmaʼmbî əwɛ̂n Yeso Klisto á chî nə́ pɨ pətsəm.