Read Awing 1 Timotiə 1 Bible Online

1 Timotiə 1 - Awing bible

1 Timotiə 1

¹Aŋwaʼlə zəənə́ á lǒo lə́ á mbô Pɔlə páʼ a nə ḿbə́ nə́ ntú Yeso klisto, lə́ nə sóŋ Əsê páʼ a nə ḿbə́ nə́ Nchwádkə əwɛ̂n, pó Yeso Klisto páʼ a pə́ nə́ akwaŋ ńtə́ ḿbyáabə azɛ̂nə.

²Aŋwaʼlə zəənə́ á ghɛnə̂ lə́ á mbô Timoti páʼ a pə́ nə́ ndə̌ŋdəŋ móonə mə á mə́m mbimə́. Ńgə́ Əsê páʼ a pə́ nə́ Tǎ pó Yeso Klisto páʼ a pə́ nə́ Mmaʼmbî əwɛ̂n pó fɛ̂ á gho nə́ apɔŋə́ntɨ́, pópə akóolə́mə́lə́ŋ ḿbɨ ḿbə́ nə́ mbwɔ́dnə.

³Əghâ ándó maŋ nə ńtə́ nə́ ńgɛnə̂ a Masedonya lə́, maŋ nə ḿbóʼmbô á mbô gho ńgə́ gho chîə á Ɛfesusə, ńjî ńgə́ gho zɔŋə̂ á mbô pɨ pətsə́ ńgə́ kɔ pó tə́ ńdzéʼkə ndzeʼkə́ məfɨgə

⁴kɔ pó tə́ ńtɔ ndɛd əzɔb á mə́ tə́ nə́ sóŋə mənu mə́ kətaŋ kɨ tə́ tɨ́ntə məlɛ́n mə́ pəmaʼ pə́ ngwud pə́ tə měe, ńté ńgə́ zə́ələ́ a yǐ kə́ yǐ lə́ tsɔʼə nə́ azɔŋə, zəənə́ á kě túgə anu yətsə̌ ńté anu Əsê kə lɔ́btə nə́, páʼ pə̈ jî nə́ zɨ́d ńdaŋə̂ á mə́m mbimə́ pô.

⁵Chigə nətɛ́n nə́ anu zɨ́d zɨ lə́ mə lookə̂ nə́ akɔŋnə páʼ a fɛ́d nə́ á mə́m ntɨ́ yi ŋwaʼ nə́, ntɨ́ yi əshîʼnə pó ndə̌ŋdəŋ mbimə́.

⁶Pɨ pətsə́ pó nə́ fɛ́lə ághóobə́ á mə́m ndɛn mənu ghɛnə́, ńtíʼ ḿbéŋkə ndú əghóobə́ á mə́m əkəkóg ətséebə.

⁷Pó loonə̂ á mə́ tə́ nə́ zéʼkə pənoŋkə pə́ Əsê, lə́ pó nə́ nkɔ̌ʼmbɨ əghɔ́b atûə azóobə́ a kě lá nə́ anu pó sóŋ nə́ pô, ńkě kə́ ńdá nə́ mənu pó pǎ nə́ tə ńtséebə nə́ mətɨ ńté mɨ́d lə́ pô.

⁸Pɛn jî ńgə́ noŋkə á pɔŋə̂, páʼ təmbɔʼ ŋwu ntsəmə túgə áwɨ́d nə́ ndú pə́ pěʼ nə́ ńchîə á mə́ túg nə́.

⁹Pɛn chîə á mə́ shib nə́ kwúmtə ńgə́, pə́ ghɛd pənoŋkə, ńkě ghɛd lə́ á mbô pɨ pipə əshîʼnə pô, pə́ ghɛd lə́ á mbô ngaŋə́wuə pənoŋkə pó pətəzóʼntə́gə́, ḿbeg pətəpɔ́gsê wɨ́ pópə ngaŋə́ghɛlə təpɔŋə, nə́ pɨ pə́ kě nə́ ŋwaʼ pô, pópə pɨ pə́ wágnə nə́ ajúmə atsəm páʼ á ŋwaʼ nə́, nə́ pɨ pó jwítə nə́ pətǎ pɔ́b pópə mǎ póobə́, pópə pɨ pó jwítə nə́ pəənə,

¹⁰á mbô pɨ pó zɔ́ʼ nə́ ndzɔʼə́ tə apímnə, á mbô mbyâŋnə ə́ zɔ́ʼ nə́ mbyâŋnə, á mbô ndzə̌ pəənə, á mbô pɨ pó tsɨd nə́ ntsəələ, ńkə́ ḿbəənə̂ ḿbímə tə zə́ənə kɨ ḿbəənə̂ ńgɛlə̂ mənu mətsə́ mə́ kě nə́ á mə́m məntəgə́ mə́ Əsê koʼ pô.

¹¹Ndzéʼkə zɨ́d zɨ ə́ chîə á mə́m Nkɨ yi Əshîʼnə páʼ pə́ nə fɛ̂ nə́ á mbô maŋ ńgə́ maŋ tə́ ńnáŋkə áwə́ələ́, Nkɨ yi Əshîʼnə wɨ́d ghɛn ə́ nə fɛ́d lə́ á mbô Əsê páʼ a túg nə́ nəgháʼ pó afoʼə.

¹²Maŋ fɛ̂ ndǎ á mbô Klisto Yeso Mmaʼmbî əwɛ̂n páʼ a fɛ̂ nə́ mətɨ nə́ maŋ ńgə́ maŋ tə́ faʼə̂ afaʼ zɨ wə́. Maŋ fɛ̂ ndǎ á mbô yí ńté ńgə́ a nə ńdzɨ́ ńgə́ maŋ koʼnə̂ a kə ńtsɔ́ʼə a mə ńgə́ maŋ tə́ faʼə̂ á mbô yə́,

¹³maŋ nə ḿbǎtə ńtséebə á təpɔŋ ńté yə́, ńtsaŋkə̂ yí ńkə́ ńdzɔmtə̂ yí lə́, Əsê a pə́ ńtúgə akóolə́mə́lə́ŋ nə́ maŋ ńté ńgə́ maŋ nə́ ńkě mbimə́ kə̂ túgə pô ńkě kə́ ńjîə anu maŋ nə́ faʼ nə́ pô.

¹⁴Lə́ Mmaʼmbî əwɛ̂nə a nə ḿbə́ ḿbyádnə ńnəələ̂ apɔŋə́ntə́əmə ají nə́ maŋə, ńtíʼ ə́fɛ̂ mbimə́ pópə akɔŋnə nə́ maŋ, páʼ ə́ pə́ nə́ əpɛ́nə á mə́m Yeso klisto.

¹⁵Lɛ̌ lə́ ndə̌ŋdəŋə́ atsáb páʼ təmbɔʼ ŋwunə a pí nə́ ntɨ́ ətsəm ńkə́ néŋ ntɨ́ əyí ə́wɨ́ ńgə́, Yeso Klisto a nə ńgyǐəə á ndu ndəsê lə́ á mə́ chwádkə nə́ ngaŋə́ghɛlə təpɔŋə, lə́ maŋ pə́ ḿbə́ túʼ əghoobə́.

¹⁶Əsê a kə́ nəələ̂ akóolə́mə́lə́ŋə ajíə á mbô maŋ lə́ ńjî ńgə́ təmbɔʼ Yeso Klisto a nəələ̂ awaamə́ntə́əmə ajíə atsəm á mbô maŋ, maŋ pə́ nə́ túʼ ngɛdtəpɔŋə, ándó fiʼə á mbô pɨ pətsəm pó yǒ nə́ néŋ ntɨ́ nə́ yí ə́ kə́ túg nchîntɨ páʼ ə́ mɛdnə̂ ngǎ mɔʼə́.

¹⁷Á mbô əfo páʼ a mɛdnə̂ nə́ ngǎ mɔʼə́, ńkë kwûə pô, pə́ kě yï zə́ənə pô, ndaʼ yə́ á pə́ nə́ Əsê, ngóʼkə pó nəgháʼ ə́ chîə á mbô yí tə mɛdnə̂. Amɛn!

¹⁸Móonə mə Timoti, maŋ néŋ məntəgə́ məənə́ á atéelə́pô gho páʼ mə́ zoŋ nə́ lə́ tsɔʼə atsáb páʼ məntúmə́sê mə́ nə ńtsáb nə́ ńté gho. Lɔgə̂ atsáb yəwə́ ándó məkɔŋ mə́ ntso ńjî ńgə́ təmbɔʼ gho póʼnə ntso yi əshîʼnə,

¹⁹ńgwam mbimə́ əzo ə́ tyantə̂ ńkə́ ńgɛd ntɨ́ əghô ə́ ŋwaʼə̂. Pɨ pətsə́ pó kě anu páʼ ntɨ́ əghɔ́b ə́ sóŋ nə́ ághɔ́b jwə́ʼtə pô ńdaŋ ə́lɨ́d ńtsəŋkə̂ mbimə́ əzoobə́.

²⁰Á mə́m ntê pɨ zɨ lɛ gho zə́ənə ŋwunə ándó Ɛmenawus pó Alɛkzanda páʼ maŋ fɛ̂ nə́ ághóobə́ á mbô mətɨ mə́ Satanə. Zəənə́ a yǐ zéʼkə ághɔ́b ńgə́ kɔ pó pɨ ńtə́ ńdzɔmtə̂ Əsê.