Read Awing 1 Timotiə 2 Bible Online

1 Timotiə 2 - Awing bible

1 Timotiə 2

¹A mə́ chwáakə nə́ maŋ póʼmbô ńgə́ pɛn chaʼtə́sê ḿbítə əpú nə́ əlɛ́n ŋwu ntsəmə, ńchaʼtə́sê á atû ŋwu ntsəmə, ḿbóʼmbô á mbô Əsê ńté pɨ pipə́ ndaʼ, ńkə́ fɛ̂ ndǎ ńté ŋwu ntsəmə,

²Ghɛd leenə́ á mbô pəfo pópə pɨ pətsəm pə́ chî nə́ á nətû, ńjî ńgə́ mbɔʼ pɛn túg nchîmbî ə́ kě nə́ ajwaʼlə túg pô ńkə́ ḿbwɔ́dnə, ḿbɨ ḿbɔ́g Əsê ńkə́ ńtúg ńgóʼkə nə́ ndú ətsəmə:

³A pɔŋ leenə́, ńkə́ ńgɛd Əsê páʼ a pə́ nə́ Nchwádkə əwɛ̂nə á kɔŋtə̂.

⁴A lɔ ńgə́ ŋwu ntsəmə a chwád ńkə́ ńjîə ndə̌ŋdəŋə́.

⁵Ńté ńgə́ lə́ chî tsɔʼə táʼ Əsê wə́ lə́ kə́ ńchî táʼ ŋwu mɔʼə́ əwɨ́ páʼ a tɨ́ nə́ á tətɨ Əsê pópə pɨ pə́ mbîə, ŋwu wɨ́d wə́ lə́ Klisto Yeso,

⁶lə́ yí páʼ a kə fɛ̂ nə́ nchîmbî əjǐə á mə́ tsóʼ nə́ atûə ŋwu ntsəmə. Lə́ anu páʼ a kə nɨd nə́, tsɔʼə nə́ chigə ndɛd əjǐ ńgə́ Əsê a tə́ ńdoonə̂ ńgə́ ŋwu ntsəmə a chwáalə.

⁷Lɛ̌ anu páʼ á nə ńgɛd nə́ pə́ túmə mə ándó ntú Yeso ḿbɨ ńkə́ ḿbə́ ándó ŋwunə ä zéʼkə nə́ Pətəjǐsê, ńgə́ maŋ ghɛn ńnáŋkə nkɨ ńté mbimə́ pó ndə̌ŋdəŋə́! Maŋ kě lə́ ntsɨd tsəələ̂ pô, maŋ tséebə lə́ ndə̌ŋdəŋə́.[1]

⁸Maŋ lɔ ńgə́, aliʼə́ atsəm mbyâŋnə chîə mə́ chaʼtə́sê nə́ Əsê, ŋ́ŋáŋkə mbô mimə ŋwaʼ nə́ atǐ, kě azáŋə́ndé kəənə afyaʼə́ túg pô.

⁹Ḿbɨ ńkə́ ńdɔ ńgə́ pəngyě pó lɔ́btə lɔ́btə nə́ ńgwê ətsəʼ əpóobə́ ándó pɨ pó túg nə́ ajíənü, ńgwê ətsəʼ pɔ́b nə́ ndú yi əshîʼnə, kɔ nə́ ghɛd məshumə́ atû tə́shúnə́, kɔ nə́ wê gôlə kɨ əpú ə́ ŋwaŋkə̂ nə́ tə́shúnə́, kɨ ətsəʼ nkéebə,

¹⁰lə́ pó lɔgə̂ pə́ məfaʼ mimə əshîʼnə ándó məmɔ́b məshumə́, ándó pəngyě pó sóŋ nə́ ńgə́ pó jî Əsê.

¹¹Məngyě ntsəmə a naʼ nə́ ntso yí ńkə́ ńdzóʼnə əghâ páʼ a tə́ nə́ ńdzéʼə.

¹²Maŋ kě əsa yitsə̌ á mbô məngyě fɛ̂ ńgə́ a zéʼkə kɨ ńtúg mətəənə á ndú mbyâŋnə pô, pó shib ńnaʼ nə́ ntso əghóobə́.

¹³Ńté ńgə́ pə́ nə ḿbeg ńtsoŋkə̂ lə́ Adam záʼ ḿbɔŋə̂ tsoŋkə̂ Ifə.

¹⁴Lə́ nə ńkě kə́ ḿbə́ Adam páʼ pə́ nə fɨg nə́ pô, pə́ nə fɨg lə́ a məngyě a wǔəə á noŋkə Əsê.[2]

¹⁵Lə́ məngyě a yǒ chwád laŋ lə́ nə́ mə tə́ nə́ pǐə póonə, páʼ mbɔʼ a ghɛn nə́ mbiə á mə́m mbimə́ pó akɔŋnə, ńkə́ ŋwaʼə̂ á mbi Əsê ńkə́ ńtsóokə mbɨ əjǐə.