Read Awing 1 Timotiə 3 Bible Online

1 Timotiə 3 - Awing bible

1 Timotiə 3

¹Atsáb zɨ lə́ ndə̌ŋdəŋ ńgə́ təmbɔʼ ŋwunə a tə́ ńdoonə̂ á mə́ pə́ nə nətûə á mə́m nkyeetə pɔ́ pə́ Əsê, tə ḿbə́ a lɔ lə́ afaʼ yə əshîʼnə.

²Nətû nə́ nkyeetə pɔ́ pə́ Əsê lə́ ŋwu páʼ pə́ kě nə́ tséebə ńté mənu mə́ təpɔŋə á mə́m nchîmbî əjǐ pô; a shib ńtúgə táʼ məngyě, ńtúgə atsóokə́ntə́əmə, ńtúgə ajíənu, pə́ jî ńgə́ lə́ ŋwu yi əshîʼnə, ńchîə á mə́ shib nə́ ŋ́ŋáʼ ndɛ̂ əjǐə á mbô pəghəənə; ḿbə́ ŋwu mbɔʼ á zéʼkə əshîʼnə,

³ńkɔ á pə́ ŋwunə ä pɛ́ nə́ məloʼ, a pə́ pə́ ŋwunə a lɔg nə́ mənu ndǎ ndǎ ńkə́ ńtúg mbwɔ́dnə; ńkě afyaʼə́ loonə̂ pô, ḿbɨ́ ḿbə́ ŋwunə ándó a kě nə́ nkáb kɔŋ pô;

⁴a shib ḿbə́ ŋwunə ándó a túg nə́ ndɛ̂ əjǐ əshîʼnə ńkə́ ńchî mbɔʼ á ghɛd pɔ́ pí pó zóʼnə ńkə́ fɛ̂ ngóʼkə, á mə́mə anuə atsəmə.

⁵Təmbɔʼ ŋwunə a chî jîə á mə́ kyeetə̂ nə́ ngwud əjǐ pô, a pə́ ńtíʼ ńtúg nkyeetə páʼ ə́ pə́ nə́ yi Əsê lə́ ə́lɛ́?

⁶Kɔ a shib ḿbə́ ŋwu páʼ a pɛ́d nə́ ńkwúblə ntɨ́ ńdzoŋ Əsê tsɔʼə əghâ yi wə́, təmbɔʼ a pə́ ə́lɨ́d tə ḿbə́ a yǐ ŋáŋkə mbɨ əjǐ ə́ kə́ túgə kətɨd ə́ tíʼ wǔ əsáʼə ándó Dɛbəələ.

⁷A pə́ ŋwunə ándó pɨ pə́ kě nə́ á mə́m nkyeetə pɔ́ pə́ Əsê chî pô, pó kə́ nə́ ńtúg ngóʼkə nə́ yə́, ńjî ńgə́ kɔ a yǐ ńtwá əsɨ́ ńgwǔəə á mə́mə atəənə́ Dɛbəələ.

⁸Ngaŋə́faʼə á mə́m nkyeetə pɔ́ pə́ Əsê ə́ shib ńtúgə mbɔ́ yi əshîʼnə ńkə̈ ńtséebə ndə̌ŋdəŋə́; pó shib ńkě məloʼ tə́shú nô pô ńkě kə́ ńtúgə tɔ́gndě tə́shúnə́ a mə jî nə́ ape pô.

⁹Pó waamə̂ á ndə̌ŋdəŋ páʼ pə́ kyaʼ nə́ á mbô pó ńté mbimə́ nə́ ńtɨ́ əghɔ́b yi ŋwaʼ nə́.

¹⁰Pə́ peg ńkwaʼlə̂ ághɔ́b záʼə, pó laŋə̂ akwaʼlə yə wɨ́, pó koʼnə̂ á mə́ faʼ nə́.

¹¹Pəngyě pɔ́b pó kə́ ńchîə á mə́ shib nə́ túgə á mbɔ́ yi əshîʼnə, ńkě ngaŋə́soŋə́ pô: pó shib ńtsóokə mbɨ əzɔb ńkə̈ ńtséebə ndə̌ŋdəŋə́ á mə́m anuə atsəmə.

¹²Ngaŋəfaʼə á mə́m nkyeetə pɔ́ pə́ Əsê a chîə á mə́ shib nə́ túg lə́ tsɔʼə táʼ məngyě, ńchî təmbɔʼ a túg pɔ́ pí pópə ngwud əjǐ əshîʼnə.

¹³Ngaŋə́faʼ ándó pö faʼ nə́ afaʼ yə əshîʼnə, pɨ pə́ tsáb əshîʼnə ńté ághóobə́, pó kə́ ńchî təmbɔʼ pó tsáb tə apɔ́g ńté mbimə́ əzoobə́ á mə́m Klisto Yeso.

¹⁴Ndzaŋ maŋ ŋwaʼlə̂ nə́ aŋwaʼlə zəənə́ á mbô gho lə́, ńtúgə akwaŋ ńtə́ ḿbyáabə á mə́ yǐ nə́ zə́ənə a gho tsɔʼə əghâ yi wə́.

¹⁵Lə́ mbɔʼ maŋ lɛ́ɛlə, aŋwaʼlə zəənə́ á yǐ ńnəələ̂ a gho ndzaŋ mbɔʼ pɛn faʼ mənuə á mə́m ngwud Əsê, páʼ ə́ pə́ nə́ nkyeetə pɔ́ pə́ Əsê, Əsê páʼ ə́ chî nə́ mbîə, ḿbə́ ntɔ̂ndɛ̂, ḿbə́ ntɔ́mtə ndə̌ŋdəŋə́.

¹⁶Ŋwu tsə̌ a kě chîə á mə́ kǐ nə́ ndzaŋə anuənə́lyáŋnə́ ńté anuə əsê azɛ̂nə gháʼ nə́ pô: A nə ńgyǐ nə́ na mbɨ ŋwu mbîə, Ajwiə nɨd ńgə́ a kə koʼnə̂, Pətseŋpə́ndɛ́pə́sê pó zə́ənə yə́. Pə́ náŋkə nkɨ əyə́ á mbô Pətəjǐsê, pɨ pə́ néŋ ntɨ́ nə́ yə́ á mə́m mbîə, pə́ tíʼ ńdɔgə̂ yí ńkɔ́ʼ ńgɛn nə́ yə́ á nəpóolə.