Read Awing 1 Timotiə 4 Bible Online

1 Timotiə 4 - Awing bible

1 Timotiə 4

¹Ajwǐəsê á sóŋə á ŋwaʼ ńgə́ a yǒ pə́ ndwegtə əlě mbî lə́ pɨ pətsə́ pó myaʼ mbimə́, ńtíʼə ńdzóʼnə əjwi məfɨgə, ńdzöŋ ndzeʼkə́ pɛ̌sê.

²Mbô ndzeʼkə́ zɨ ə́ fɛ́lə lə́ á mbô ngǎŋntsəələ, pɨ páʼ məntɨ́ mɔ́b mə́ kwû nə́ ńtíʼ ńchîə ándó pə́ lɔgə̂ atəənə́ ńtɔ ə́wə́.

³Mbô pɨ zə́ ə́ zéʼkə ńgə́ á kě koʼnə̂ á mə́ zɔ́ʼ nə pô, ńkě kə́ ńkoʼnə̂ á mə́ jî nə́ ətû məjî pətsə́ pô, lə́ Əsê a kə pə́ ńtsoŋkə̂ ətû məjî piwɨ́ lə́ ńgə́ pə́ jîə. Mbɔʼ ŋwunə a néŋ ntɨ́ yí nə́ Əsê ńkə́ ńjîə ndə̌ŋdəŋ, a chî mbɔʼ á jîə pɨ́d əghâ a chaʼtə̂ nə́ Əsê fɛ̂ ndǎ á mbô Əsê.

⁴Ajúmə atsəm Əsê a kə tsoŋkə̂ nə́ á pɔŋə̂, pə́ kě chîə á mə́ myaʼ nə́ yətsə́ pô, lə́ pə́ pə́ ńchîə mə́ kwá nə́ ajúmə atsəm nə́ achaʼtə́sê ndǎ,

⁵ńté ńgə́ atséebə Əsê, ndzoŋ ḿbə́ nə́ achaʼtə́sê á ghɛd Əsê á pímə zə́ələ́.

⁶Mbɔʼ gho fɛ̂ məntəgə́ məənə́ á mbô pəlim pɛn, gho yǐ ḿbə́ lə́ ngaŋəfaʼ Klisto Yeso yi əshîʼnə, ndzaŋ gho zə́g nə́ mbɨ əzo nə́ ajwi, nə́ atséebə mbimə́, mbi ḿbə́ nə́ ndzéʼkə ndə̌ŋdəŋ páʼ gho zoŋ nə́.

⁷Kɔ nə́ túgə anu yitsə̌ nə́ mənu páʼ pɨ pə̈ sóŋ nə́ ńgə́ mə́ kə laŋə̂, əkəkóg mənu ə́ kě nə́ apɔ́gə́sê túg pô. Zéʼkə nə́ məmbɨ mɨ́ nə́ apɔ́gə́sê.

⁸Mə zéʼkə nə́ na mbɨ mə́ pɔŋ nə́ ndú yitsə̌, lə́ mə zéʼ nə́ apɔ́gə́sê Əsê mə pə́ ḿbɔŋ nə́ ndú ətsəmə, ńté ńgə́ ə́ laʼnə̂ áwɛ̂n nə́ nchîmbî yi əghâ nə́ pó yi páʼ ə́ yǐ nə́ yǐəə.

⁹Lɛ̌ ndə̌ŋdəŋə́ atsáb páʼ mbɔʼ pə́ pímə áwɨ́d nə́ ntɨ́ ətsəmə, ńkə́ néŋ ntɨ́ ə́wə́.

¹⁰Lɛ̌ anu páʼ á ghɛd nə́ pɛn táŋnə[3] ńkə́ faʼə̂ təjwitə, ńté ńgə́ pɛn néŋə akwaŋə azɛ̂n ńtə́ ḿbyáabə lə́ nə́ Əsê páʼ ə́ chî nə́ mbîə, Əsê zɨ lə́ nchwádkə ŋwu ntsəmə, tə ḿbə́ pə́ nə́ yi pɨ pó néŋ nə́ ntɨ́ nə́ yə́.

¹¹Fɛ̂ məntəgə́ məənə́ á mbô pó, pópə məndzeʼkə́ məənə́.

¹²Kɔ pí ŋwu tsə̌ á náŋə gho ńgwág ńté ńgə́ gho lə́ Mɔ̂nkə̂, lə́ gho chîə ándó afiʼkə á mbô pɨ pó néŋ nə́ ntɨ́ əghɔ́b nə́ Əsê, nə́ atséebə ntsoolə azô, nə́ ngɛdmə́nu əghô, nə́ akɔŋnə azô, nə́ mbimə́ əzo ḿbɨ́ ḿbə́ nə́ ndzaŋ gho chî nə́ gho tə kɔntə.

¹³Fɛ̂ ndɛd əzo pópə mətɨ mô á mə́ fóŋ nə́ aŋwaʼlə Əsê aliʼə́ ənoonə, á mə́ náŋkə nə́ nkɨ yi əshîʼnə pópə mə zéʼkə nə́ tə ńkoʼ ndɛd páʼ maŋ yǐ nə́ yǐəə.

¹⁴Kɔ wágnə məfɛ̂nə mə́ Ajwi mə́ páʼ gho túg nə́ lə́, páʼ pə́ kə fɛ̂ nə́ nə́ gho əghâ məntúmə́sê mə́ kə tsáb nə́, mətû mə́ mənkyeetə mə́ tíʼ noŋkə mbô móobə́ atû gho lə́.

¹⁵Néŋ mənu məənə́ á mə́mə afaʼə, ńkə́ əfɛ̂ mbɨ əzo ntsəm nə́ mə́ələ́, ńjî ńgə́ ŋwu ntsəmə á jɨ́ ndzaŋ ghö kwéŋ nə́.

¹⁶Chaʼ mbɨ əzo pópə ndzeʼkə́ əzo. Ghɛn nə́ mbiə á mə́ faʼ nə́ mənu məənə́, ńté ńgə́ mbɔʼ gho faʼ ə́lɨ́d gho chwádkə mbɨ əzo pópə pɨ pó zóʼnə nə́ anu ghö sóŋ nə́.