Read Awing 1 Timotiə 5 Bible Online

1 Timotiə 5 - Awing bible

1 Timotiə 5

¹Kɔ gho sáʼə ntəŋkaŋə́, tséebə mbô yə́ ándó tǎ əgho. Túg nkaŋŋwu yi mbyâŋnə ándó pəlim pô,

²ńtúg pətəkaŋ pə́ pəngyě ándó pəmǎ pô, ńkə́ ńtúg nkaŋŋwu pəngyě ándó pəlim pô pipə́ pəngyě tə kɔntə yitsə̌.

³Pəkogə́ ándó pó pə́ nə́ chigə pəkog gho nɨd ngóʼkə nə́ pó.

⁴Təmbɔʼ nkogə́ á túg pɔ́ kɨ pɔ́ pə́ pɔ́, pó peg ńdzéʼ ndzaŋ mbɔʼ pó faʼə̂ anuə aŋwaʼlə Əsê á sóŋ nə́, á mə́ lɔg nə́ ndɛd nə́ məngwud mɔ́b ə́laŋ nə́ ndú ghɛn pɨ tû pətǎ pɔ́b pópə pətǎ pə́ pətǎ póobə́, ńté ńgə́ lə́ anu páʼ Əsê ä kɔŋtə̂ nə́ ńté.

⁵Nkog páʼ a pə́ nə́ chigə nkog, ńkě nkwá yitsə̌ túg pô, a néŋə akwaŋə ajíə atsəm lə́ nə́ Əsê ńtə́ ḿbyáabə, ńchaʼtə́sê ḿbítə akwáalə á mbô yí nətúʼ pópə ənumnə.

⁶Lə́ nkog páʼ a fɛ̂ nə́ mbɨ əjǐ nə́ əpú mbî a pɛ́dtə ńkwûə, páʼə a pə́ nə́ mbǎtə ḿbɛ́lə mbî lə́.

⁷Fɛ̂ ntəgə́ zəənə́ á mbô po ńjî ńgə́ kɔ ŋwu əghɔb yitsə̌ á yi ńtúgə filə.

⁸Mbɔʼ ŋwunə a chî pəlim pí kwá pô, tə ḿbə́ pə́ nə́ pɨ pə́ chî nə́ nə́ əjǐ ndɛ̂, a pə́ ńgə́ a tsɔ́ʼ mbô mí nə́ mbimə́, ḿbə́g tə ńtsɛɛlə̂ ŋwu páʼ a kě nə́ ntɨ́ əyí nə́ Əsê néŋ pô.

⁹Kɔ sháŋə ŋwu tsə̌ ándó nkog tə ghə́ a laŋ ngoʼ məghə́m mɛ́n ntogə́. Á mə́ pegtə̂ nə́, a pə́ məngyě a kə zɔ́ʼ nə́ lə́ tsɔʼə táʼ ndúmə[4],

¹⁰ḿbə́ məngyě pə́ jî nə́ yí ńgə́ ä faʼə̂ mənu mimə əshîʼnə; ńkə́ ńkɔ́ʼkə pɔ́ pí əshîʼnə, ńdɔgə̂ pəghəənə á ndɛ̂ yə́, ə́sogə̂ məko mə́ pɨ pə́ Əsê, ńkwáalə pɨ pó chî nə́ á mə́m ngə́ʼə, mbɨ ə́fɛ̂ ndɛd əjǐə á mə́ faʼ nə́ mənu mimə əshîʼnə nə́ ndú ətsəmə.

¹¹Lə́ kɔ peg məlɛ́n mə́ pəkog páʼ pó pɛ́d nə́ pɔ́ pə́ pəngyě, ńté ńgə́ əghâ zogə á yǐ nə́ lǒo á mbɨ pó lə́ pó loonə̂ á mə́ zɔ́ʼ nə́ ághóobə́, ńtíʼ ḿbəənə̂ ághɔ́b nə́ ndzəmə á mə́m Klisto,

¹²ńdaŋ ə́lɨ́d pó wǔ əsáʼ ńté ńgə́ pó tsəŋkə̂ ntsɛɛmbi ndaʼnə pó kə ghɛd nə́ áwɨ́d pó po lə́.

¹³Pó kə́ ḿbɨ́ ńdzéʼ ndzaŋ mbɔʼ pó tɔ ndɛd əzɔb ńnyinə̂ á ntso məláʼ mə́ pəənə, yə á kwéʼnə nə́ ḿbə́g lə́ ńgə́ pó zéʼə asoŋə́, ńkə̈ ńnéŋ ntso nə́ mənu páʼ mə́ kě nə́ məmɔ́b pô, ə́sóŋə mənu páʼ pó pěʼ nə́ ńkě chîə á mə́ sóŋ nə́ pô.

¹⁴Ńdaŋ ə́lɨ́d maŋ kwaŋə̂ azá ńgə́ təmbɔʼ pəkog pə́ pɔ́ pə́ pəngyě pó zɔ́ʼə, ńtúg pɔ́ ńkə́ ńtə́ ńnáŋə məndɛ̂ móobə́. Mbɔʼ pó ghɛd ə́lɛ̌ pó kě əsa yitsə̌ á mbô ngaŋkə́pa əzɛ̂n fɛ̂ mbɔʼ pó tséebə təpɔŋ yitsə̌ ńté áwɛ̂n pô.

¹⁵Ńté ńgə́ pəkog pətsə́ po pɛ́dtə ə́sɛdnə̂ ńtíʼə ńdzoŋə̂ ághóobə́ pə́ Satanə.

¹⁶Lə́ mbɔʼ məngyě ntsəm páʼ a néŋ nə́ ntɨ́ əyí nə́ Yeso á túg pəkog páʼ pó pə́ nə́ pəlim pí, a shib ńtə́ ńkwáalə ághóobə́, ńkě apeʼ yəwə́ pə́ atû nkyeetə pɔ́ pə́ Əsê tə́g pô, ńjî ńgə́ tə mbɔʼ nkyeetə ə́ kwá pəkog páʼ pó kě nə́ nkwá yi ndaʼ túg pô.

¹⁷Mətûə ándó pó faʼ nə́ afaʼ yə əshîʼnə, ándó mətû, pó chîə mə́ kwá nə́ ntsɔ́ʼəfaʼ nga pɛ̌, tə ḿbə́ pə́ nə́ pǐə ándó pó sóŋ nə́ anǔəsê ńkə́ ńdzéʼkə.

¹⁸Ńté ńgə́ aŋwaʼlə Əsê á sóŋ ńgə́, “Kɔ néŋə atəənə́ á ntso njakasə á əghâ zɨ́d tə nə́ ńkəblə̂ ngəsáŋə́,” ḿbɨ́ ńgə́, “ngaŋəfaʼə a chîə mə́ kwá nə́ ntsɔ́ʼəfaʼ əjǐə.”

¹⁹Kɔ jwə́ʼtə anu pə́ sóŋ nə́ ńté nətû tə ńdéʼtə lə́ sóŋ pɨ pɛ́n pɛ̌ kɨ pɛ́n teelə́ páʼ pó jɨ́ nə́ ńkə́ ḿbí ńgə́ lə́ ndə̌ŋdəŋə́.

²⁰Sáʼə ŋwu ntsəmə á əshîsaŋ páʼ ä ghɛn nə́ nə́ mbîə á mə́ ghɛd nə́ təpɔŋ ńjî ńgə́ apuʼə pəənə á pɔ́gə.

²¹Á mbi Əsê pó Klisto Yeso ḿbɨ́ ḿbə́ nə́ pətseŋpə́ndɛ́pə́sê páʼ pó ŋwaʼ nə́, maŋ sóŋə á mbô gho ńgə́ gho zoŋ pənoŋkə pɨ tsɔʼə tə kɔŋə̂ ŋwu tsə̌ ə́ tsɛɛlə̂ yitsə̌, ńkě anu yətsə́ faʼə̂ nə́ ŋwu ńté pə́ ńgə́ lə́ ŋwu əgho pô.

²²Kɔ ghə́glə á mə́ noŋkə̂ nə́ apô á ndu ŋwu ə́sóŋ ńgə́ a koʼnə̂ mə́ faʼ nə́ afaʼə Mmaʼmbîə, kɔ gho néŋə apô azô á mə́m təpɔŋ ŋwu ndaʼə. Ghɛd mbɨ əzo ə́ chî tə kɔntə.

²³Kɔ kə̈ nô tsɔʼə nkǐə, nô mɔ́ məloʼ mimə tyantə̂ nə́ ńté nəpəm zô ńkə́ ńté ndzaŋ gho zá nə́ ńgoonə̂ lə́.

²⁴Pətəpɔŋ pə́ pɨ pətsə́ pə́ chîə á əshîsaŋ pə́ tə ńdzə́ənə, ńnəələ̂ ńgə́ pə́ yǒ néŋə atsáŋə á mbɨ pó. Lə́ pətəpɔŋ pə́ pətsə́ pɨ pə́ yǒ nɨd mbɨ əzɔb lə́ á ndzəmə.

²⁵Tsɔʼə nə́ ndú yi wɨ́, məfaʼ mimə əshîʼnə mə̈ nɨd mbɨ əzɔb lə́ á əshîsaŋə, tsɔʼə mi páʼ mə́ kě nə́ á əshîsaŋ chî pô, mbɔʼ mə́ kě mɛdnə̂ á nəlyaŋnə́ pô.