Read Awing 1 Timotiə 6 Bible Online

1 Timotiə 6 - Awing bible

1 Timotiə 6

¹Pɨ pətsəm páʼ pó pə́ nə́ əpoʼ pó chîə á mə́ zóʼnə nə́ Pətǎ pə́ afaʼ pɔ́b nə́ ndú ətsəmə, ńjî ńgə́ kɔ ŋwu tsə̌ a yǐ ńtséebə a təpɔŋ ńté əlɛ́n Əsê ńkə́ ńté ndzeʼkə́ əzɛnə̂.

²Əpoʼ páʼ pətǎ pə́ afaʼ pɔ́b pó pə́ nə́ pɨ pó néŋ nə́ ntɨ́ nə́ Əsê, kɔ pó tyantə̂ atû ńté ńgə́ pó tíʼ ḿbə́ lə́ pəlimə́. Pó pɨ ńchîə pə́ mə́ faʼ nə́ əshîʼnə á mbô pətǎ pə́ afaʼ póobə́, ńté ńgə́ pɨ páʼ pö jî nə́ ape afaʼə azɔ́b lə́ pɨ pó néŋ nə́ ntɨ́ nə́ Əsê ńkə́ ḿbə́ pɨ pó pyádnə nə́ ńkɔŋə̂. Gho chîə á mə́ shib nə́ zéʼkə ə́ kə́ ghɛd pó zoŋ mənu məənə́.

³Ŋwu ntsəm páʼ a zéʼkə nə́ ntəgə́ yi ndaʼ, páʼ ə́ kě nə́ pímnə nə́ ndə̌ŋdəŋə́ atsáb Mmaʼmbî əwɛ̂n Yeso Klisto pó, ndzeʼkə́ páʼ ə́ túg nə́ apɔ́gə Əsê,

⁴ŋwu wɨ́d ghɛnə́ a chî lə́ ándó ŋwunə a kɔ́ʼkə nə́ mbɨ əjǐ ḿbə́ ńkě anu yətsə́ jî pô. A túg ntɨ́ təpɔŋə, ə́fyaʼnə̂ ńté atséebə, ńdaŋ ə́lɨ́d mənuə ándó mɨ mə́ zoŋə̂ yə́: ŋwéetə́, azɔŋə, ndzɔmnə, əkwaŋ təpɔŋ ńté pəənə,

⁵ḿbɨ ḿbə́ nə́ afyaʼə́ əghâ ətsəmə á mə́m pɨ páʼ pó túg nə́ ntɨ́ yi pəg nə́, ndə̌ŋdəŋə́ á kě tətɨ pó kə́ ḿbɛ́d pô. Pó kwaŋ ńgə́ mə túg nə́ apɔ́gə Əsê lə́ ndúmə á mə́ laŋ nə́ əwɨ́ túgə afoʼə.

⁶Lə́ təmbɔʼ anǔəsê a pɛ́d ńgɛd ŋwunə a túgə afoʼ ńdaŋ ə́lɨ́d, páʼ təmbɔʼ ngaŋə lɔg ńgə́ ajú páʼ a túg nə́ a koʼnə̂ nə́ yə́.

⁷Pɛn nə ńkě nə́ ajûtsə́ á ndu ndəsê ghɛn yǐ pô, ə́ yǒ kě kə́ lɔgə̂ ajûtsə́ ghɛn nə́ zɨ́d əghâ pɛn kwû nə́ pô.

⁸Lə́ pə́ ńgə́ təmbɔʼ pɛn túg tsɔʼə məjî pópə ətsəʼ, á koʼnə̂ á mbô pɛnə̂.

⁹Lə́ pɨ páʼ pó lɔ nə́ á mə́ pə́ nə́ pəfoʼ pó wǔəə á mə́mə akwaʼlə, ńgwǔəə á mə́m ətéemə, ńdoonə̂ á mə́ faʼ nə́ əkəkóg mənu pipə nɨ́ nə́ páʼ pɨ̈d néŋ nə́ ngə́ʼə á mbɨ pó, ə́shaʼtə̂ nchîmbî əzɔb ńkə́ ńtsəŋkə̂ ághóobə́.

¹⁰Ńté ńgə́ mə kɔŋ nə́ nkáb lə́ ndú páʼ mbô təpɔŋ ətsəm ə́ fɛ́d nə́ ə́wə́. Pɨ pətsə́ pó lɔ nə́ ndú ətsəmə á mə́ túg nə́ zɨ́d pó laŋ ə́lɨ́d ḿmyaʼ mbimə́ əzoobə́, pó jwaʼ məntɨ́ mɔ́b, ńtíʼ ńtúg əfɨnə pipə nɨ́ nə́ a ntɨ́ pó.

¹¹Lə́ ḿbə́ ńgɛn nə́ gho, gho páʼ gho pə́ nə́ ŋwu Əsê, gho chîə á mə́ kə nə́ ndɛn mənu wɨ́d ghɛn ətsəmə, ə́ tə́gə atûə pə́ nə́ mə faʼ nə́ mənu páʼ mə́ tɨ́ nə́ ndə̌ŋdəŋə́, ḿbɔ́g Əsê, ńtúg mbimə́, ńtúgə akɔŋnə, ńtúgə awaamə́ntə́əmə, ḿbɨ́ ḿbwɔ́dnə.

¹²Póʼnə məlaʼ mɨ mə́ pə́ nə́ mimə́ mbimə́ lə́ əshîʼnə, ńtíʼ ńtúg nchîmbî ə́ mɛdnə̂ nə́ ngǎ mɔʼə́ ándó Əsê kə fóŋ nə́ gho ə́fɛ̂ nə́ gho, əghâ gho kə tɨ́ nə́ á mbi pɨ pipə nɨ́ nə́ ə́sóŋ ńgə́ gho túg mbimə́ nə́ Yeso Klisto, pó kə́ ńdzɨ́ ńkə́ ḿbí ńgə́ lə́ ndə̌ŋdəŋ lə́.

¹³Á mbi Əsê páʼ a fɛ̂ nə́ nchîmbîə á mbô ajúmə atsəmə, ńkə́ ḿbə́ á mbi Klisto Yeso páʼ a nə ńtɨ́ nə́ ńtyantə̂ á mbi Pɔŋtus Payilɛd ə́fiʼtə̂ yi nə́ mbimə́ əjǐə,

¹⁴maŋ sóŋə á mbô gho ńgə́ gho lɔʼkə̂ məntəgə́ mi əshîʼnə, kɔ ŋwu tsə̌ tsáb təpɔŋ ńté gho, tə koʼ nə́ ndɛlə́ ándó Mmaʼmbî əwɛ̂n Yeso Klisto a yǒ nə́ yǐəə.

¹⁵Lə́ Əsê páʼ a yǒ nə́ ghɛd a yǐ nə́ ndɛd páʼ ə́ koʼnə̂ nə́, lə́ yí páʼ a túg nə́ afoʼə, ńkə́ ḿbə́ ndaʼ yí páʼ a sáʼ nə́ mbî, ḿbə́ əfo pəfo ḿbɨ́ ńkə́ ḿbə́ Mmaʼmbî pəmaʼpə́mbîə.

¹⁶Lə́ tsɔʼə yí páʼ mbɔʼə a kě kwû pô, ńchîə á mə́m nkyaʼ páʼ mbɔʼə ŋwu tsə̌ a kě ńnyi tə ḿbáatə pô; Ŋwu tsə̌ a kě yí kə́ láʼə zə́ənə pô, mbɔʼ ŋwu tsə̌ a kě yí zɨ́ pô. Lə́ yí páʼ a túg nə́ ngóʼkə ńkə́ ńtúg mətɨ páʼ mə́ láʼ nə́ kě měe pô. Amɛn.

¹⁷Sóŋ nə́ pɨ pó túg nə́ afoʼə á ndu mbî zɨ ńgə́ kɔ pó tə́ ńkɔ́ʼkə mbɨ əzoobə́, kɔ pó túgə akwaŋ ńtə́ ḿbyáabə á pə́ nə́ nkáb páʼ mbɔʼ zɨ́d měe yí ndɛd ətsəmə. Lə́, pɛn túgə akwaŋ ńtə́ ḿbyáabə á pə́ nə́ Əsê páʼ ä fɛ̂ nə́ ajúmə atsəmə á mbô pɛn ńgə́ pɛn tə́ ńkɔŋtə̂ nə́ zə́ələ́.

¹⁸Sóŋə á mbô pó ńgə́ pó tə́ faʼə̂ məfaʼ mimə əshîʼnə, afoʼə azóobə́ á pə́ mənu mimə əshîʼnə pö faʼ nə́, ńgeebə̂ apô, ńkə̈ ńkwáalə pətsə́ pəənə.

¹⁹Nə́ ndú wɨ́d ghɛn pó lɔʼkə̂ afoʼə azɔ́b yi páʼ á pə́ nə́ achîəndɛ̂ yə tyantə̂ nə́ ńdɔg ḿbyáb ndɛd páʼ ə́ tə́ nə́ ńgyǐəə wə́. Ńjî ńgə́ pó yǐ ńtúg nchîmbî páʼ ə́ pə́ nə́ ndə̌ŋdəŋ nchîmbîə.

²⁰Timoti, lɔg ndɛd əshîʼnə nə́ ajú pə́ kə fɛ̂ nə́ á mbô gho lə́. Lə́ʼə gho ətsáb páʼ ə́ kě nə́ apɔ́gə Əsê túg pó, pópə əjwaʼlə ətsáb páʼ pɨ pətsə́ pə́ fɨg nə́ ntsɨd ə́fóŋə nə́ “ajíənuə.”

²¹Ńté ńgə́ pɨ pətsə́ pó zoŋ nə́ zɨ́d pó laŋ ə́lɨ́d ḿbéŋkə alaŋə́ ndúmə mbimə́. Apɔŋə́ntə́əmə Əsê á chîə á mbɨ pəənə́.