Read Awing 2 Timotiə 1 Bible Online

2 Timotiə 1 - Awing bible

2 Timotiə 1

¹Aŋwaʼlə zɨ lə́ ŋwaʼlə̂ maŋ Pɔlə páʼ Əsê a nə ńgɛd nə́ ńgə́ maŋ pə́ ntú Klisto Yeso ndzaŋ a lɔ nə́. Pə́ nə ńtúmə mə lə́ ńgə́ maŋ tə́ náŋkə anu ńté nchîmbî páʼ pə́ kə laʼnə̂ nə́, nchîmbî pɛn túg nə́ á mə́m klisto Yeso lə́;

²Aŋwaʼlə zəənə́ á ghɛnə̂ lə́ á mbô Timoti móonə mə páʼ maŋ pyádnə nə́ ńkɔŋə̂: Əsê páʼ a pə́ nə́ Tǎ pó Klisto Yeso páʼ a pə́ nə́ Mmaʼmbî, pó fɛ̂ apɔŋə́ntɨ́ pó akóolə́mə́lə́ŋ ḿbɨ ḿbə́ nə́ mbwɔ́dnə á mbô gho.

³Mäŋ láʼkə Əsê páʼ maŋ faʼ nə́ á mbô yí nə́ ntə́əmə mə yi ŋwaʼ nə́, tsɔʼə ndzaŋə ándó pətǎ pə́ pətǎ mə pó nə faʼ nə́. Maŋ láʼkə yí əghâ ándó maŋ kwúmtə nə́ gho á mə́m achaʼtə́sê mə.

⁴Əghâ ətsəmə ándó maŋ kwúmtə nə́ á nəkyéŋ əgho lə́, á nətúʼ pó ənumnə maŋ loonə̂ á mə́ zɨ́ nə́ gho, ńjî ńgə́ təmbɔʼ ntə́əmə mə lwɛ́nkə nə́ akɔŋtə.

⁵Maŋ kwúmtə ndzaŋ mbimə́ əzo pə́ nə́ ndə̌ŋdəŋə́, tsɔʼə ándó yi mǎpəmǎ gho Loyisə pó yi mǎ gho Unisə kə chî nə́ lə́, maŋ jî ńgə́ gho kə́ ńtúg lə́ tsɔʼə mbô mbimə́ yi wə́.

⁶Ńté anu zɨ maŋ kwúmtə gho ńgə́ gho ghɛn nə́ mbiə á mə́ peg nə́ móg nə́ məfɛ̂nə mimə əshîʼnə, məfɛ̂nə páʼ Əsê a kə fɛ̂ nə́ á mbô gho əghâ ándó maŋ nə noŋkə̂ nə́ mbô mə á ndu gho lə́.

⁷Ńté ńgə́ Ajwi páʼ Əsê a fɛ̂ nə́ á mbô pɛn lə́, ä kě ghɛlə̂ ńgə́ pɛn pɔ́gə lə́ pɔ́g nə́ pô, ä ghɛlə̂ lə́ pə́ ńgə́ pɛn túg mətəənə, pópə akɔŋnə nə́ asəgə́ndzɔʼə.

⁸Lə́ pə́ ńgə́ kɔ gho kó əsə́ənə á mə́ tə́ nə́ sóŋə anu ńté Mmaʼmbî əwɛ́nə, kɨ ńté mə, ngaŋətsáŋ əyǐə. Lə́, kə́ ńchîə azô á pə́ mə́m ngə́ʼ ńté Nkɨ yi Əshîʼnə wə́ ndzoŋ ndzaŋ páʼ Əsê a fɛ̂ nə́ mətɨ nə́ gho.

⁹A nə ńchwádkə áwɛ̂n ńkə́ ə́fóŋə áwɛ̂n ńgə́ pɛn pə́ pɨ pipə ŋwaʼ nə́. A nə ńkě áwɛ̂n fóŋ lə́ ńté məfaʼ mimə əshîʼnə pɛ̈n faʼ nə́ pô, a kə fóŋ ńté lə́ ajíə anuə a kə lɔ́btə nə́ pópə apɔŋə́ntə́əmə ají páʼ a nə nɨd nə́ áwɛ̂n ə́wɨ́ ńdaŋə̂ á mə́m Klisto Yeso, á ngoʼ pəchə́ tə záʼ mbî yǒ ḿbɔŋə̂ chwáakə.

¹⁰Lə́ nə́ pə́ əghâ nə́ pə́ nəələ̂ zə́ələ́ á mbô pɛn ńdaŋ nə́ mə yǐ nə́ mə́ Nchwádkə əwɛ̂n Klisto Yeso. A lwigtə̂ mətɨ mə́ nəwûə, ńdaŋə̂ á ndzəm Nkɨ yi Əshîʼnə a nəələ̂ áwɛ̂n ńgə́ pɛn yǐ túg nchîmbî páʼ pɛn láʼ nə kě pɨ kwû pô.

¹¹Ńté Nkɨ yi Əshîʼnə ghɛn, Əsê a tsɔ́ʼə mə ńgə́ maŋ pə́ ə́sóŋə anǔəsê ńkə́ ḿbə́ ntú Yeso ḿbɨ ńkə́ ḿbə́ ndzéʼkə,

¹²lə́ ghɛlə̂ anu zɨ́d zɨ maŋ lánə̈ ńdzɨ́ ngə́ʼ ndzaŋ maŋ zɨ́ nə́ lɛ̌. Lə́ maŋ kě əsɨ́ tə́ ńkóolə pô, ńté ńgə́ maŋ jîə ŋwu páʼ maŋ néŋ nə́ ntə́əmə mə nə́ yə́, ńkə́ ḿbyádnə ńjî ńgə́ a yǐ tə́ pyáabə ajú pə́ kə fɛ̂ nə́ á mbô maŋ lə́ tə koʼ nə́ Alě mbî yəwə́.

¹³Wam mənu mə́ ndə̌ŋdəŋ mə́ páʼ maŋ nə́ ńdzéʼkə nə́ gho əwɨ lə́ ńtyantə̂, waamə̂ ándó fiʼnəghɔlə anu gho chî nə́ á mə́ zoŋ nə́, ńkə́ ḿmɛdnə̂ á mə́m mbimə́ pó akɔŋnə á pə́ nə́ azɛ̂n ńdaŋə̂ á mə́m Klisto Yeso.

¹⁴Lɔʼkə̂ ndə̌ŋdəŋ ghɛn páʼ pə́ nə fɛ̂ nə́ á mbô gho lə́, ńdaŋ nə́ mətɨ mə́ Ajwǐəsê páʼ mə́ chî nə́ á mə́m pɛnə̂.

¹⁵Gho pyádnə ńjî ńgə́ ŋwu ntsəm páʼ a chî nə́ mboʼ Esya a nə ńkǐə mə, ḿbéenə Figɛlusə pó Emogɛnɛsə.

¹⁶Ńgə́ Mmaʼmbîə a nəələ̂ akóolə́mə́lə́ŋə á mbô ngwud Onesifolusə, ńté ńgə́ a kə ńnéŋ ntə́əmə mə ngǎ yi nɨ́ nə́. Əsɨ́ nə ńkě yí kó ńgə́ maŋ chîə á nkáʼə́tsáŋ pô,

¹⁷lə́ əghâ páʼ a nə ńgyǐ nə́ ńkwúnə á aláʼə Lom lə́, ḿbyádnə ńchwaalə̂ mə, tə ńgyǐ ńdzə́ənə mə.

¹⁸Ńgə́ Mmaʼmbîə á kwáalə yí ńjî ńgə́ mbɔʼ á yǒ ńtúgə akóolə́mə́lə́ŋə á lǒo nə́ á mbô Mmaʼmbî á Alě wə́! Gho chigə ńjî ndɛn mənu páʼ a kə faʼ nə́ á mbô maŋə á Ɛfesusə.