Read Awing 2 Timotiə 2 Bible Online

2 Timotiə 2 - Awing bible

2 Timotiə 2

¹Ńgɛn nə́ gho nə́ móonə mə, tɨ́ ńtyantə̂ ńdaŋə̂ á mə́mə apɔŋə́ntə́əmə Əsê páʼ á pə́ nə́ azɛ̂n, pɛn pə́ nə́ táʼə á mə́m Yeso Klisto lə́.

²Lɔg mənu páʼ gho nə ńdzóʼ nə́ maŋ sóŋə mə́ələ́ á mbi pɨ pipə nɨ́ nə́ páʼ pó nə́ ńdzɨ́ nə́ ńkə́ ḿbí ńgə́ lə́ ndə̌ŋdəŋ lə́, ə́fɛ̂ mə́ələ́ á mbô pɨ gho jî nə́ ńgə́ mbɔʼ pó faʼə̂ anu pə́ sóŋ nə́ ńgə́ pó faʼə̂, ńkə́ ńchî mbɔʼ pó pɨ ńdzéʼkə pətsə́ pəənə.

³Kə́ ńchîə azô á mə́m ngə́ʼ pəg zɨ́ nə́ lɛ̌, ándó mmaʼntso Klisto Yeso yi əshîʼnə.

⁴Mmaʼntso páʼ a chî nə́ afaʼ, a fóg mbɨ əjǐə á mə́m mənu mə́ pɨ páʼ pó kě nə́ ngaŋə́maʼə́ntso pô, ńté ńgə́ á loonə̂ lə́ á mə́ ghɛd nə́ mbɨ ŋwu páʼ a lɔg nə́ yə́ á afaʼ ə́ pɔŋə̂.

⁵Təmbɔʼ nkəndə̌ a kě kwáalə aŋkəndɔ́ʼə́ təghə́ a zoŋ pənoŋkə pə́ ndə̌ pô.

⁶Ndíʼə alíʼ páʼ a tə́g nə́ atû nə́ afaʼə ají, lə́ chî yə́ mə́ peg nə́ jî ntû məjîə.

⁷Néŋə anu páʼ mäŋ sóŋ nə́ á mə́mə akwaŋə, ńté ńgə́ Mmaʼmbîə a yǐ ghɛd atûə azô á tsɔ́ʼnə nə́ mənu məwɨ́ mətsəmə.

⁸Kwúmtə nə́ Yeso Klisto a nə ńjúmnə nə́ nəwû lə́, a nə fɛ́d nə́ əla Debid, ándó maŋ sóŋ nə́ anu ńté yə́ á mə́m Nkɨ yi Əshîʼnə mäŋ náŋkə nə́ lə́.

⁹Mäŋ zɨ́ ngə́ʼ ńté ńgə́ maŋ tə́ náŋkə Nkɨ yi Əshîʼnə, pə́ tíʼ ńkwúlə mə ándó ngaŋəfanə, lə́ ḿbə́ ńkě atséebə Əsê kwúd pô.

¹⁰Ńdaŋ ə́lɨ́d maŋ səg ndzɔʼə á mə́mə anuə atsəm ńté pɨ páʼ Əsê a tsɔ́ʼ nə́; ńjî ńgə́ təmbɔʼ pó yǒ ńkə́ ńjîə azɔ́b nchwadkə́ páʼ ə́ lǒo nə́ á mbô Klisto Yesö, ńgyǐəə nə́ nəgháʼ páʼ á mɛdnə̂ nə́.

¹¹Lɛ̌ ndə̌ŋdəŋə́ atsáb ńgə́: Təmbɔʼ pɛn kwû pɛn po, tə ḿbə́ pɛn yǒ kə́ chîə á mbî pɛn po.

¹²Təmbɔʼ pɛn ghɛn nə́ mbiə á mə́ səg nə́ ndzɔʼ tə ḿbə́ pɛn yǒ kə́ sáʼ mbî pɛn po, təmbɔʼ pɛn kǐə yí tə ḿbə́ a yǒ kə́ kǐə áwɛ̂nə.

¹³Təmbɔʼ pɛn tə́ sóŋə mənu ńchîə mɨ́d tə́ faʼə̂ pô, tə ḿbə́ anuə ä sóŋ nə́ lə́ zɨ́d a yǐ nə́ faʼə̂, ńté ńgə́ təmbɔʼ a kě mbɨ əjǐ kǐ pô.

¹⁴Tə́ ńkwúmtə pɨ pô nə́ mənu məənə́, ńdánə ńchígə́ ńkwantə̂ ághóobə́ á mbi Mmaʼmbî[1] ńgə́ kɔ pó tə́ ńdzɔŋə̂ ńté anu əliʼ atsáb ə́ sóŋ nə́. A kě chîə á mə́ kwú nə́ anu yətsə́ pô, lə́ á yǐ tsəŋkə̂ pɨ pó tə́ nə́ ńjwə́ʼtə lə́ tsəŋkə̂ nə́.

¹⁵Faʼ əshîʼnə á mə́ nɨd nə́ mbɨ əzo á mbô Əsê ándó ngaŋəfaʼ páʼ a koʼnə̂ nə́, ngaŋəfaʼ páʼ a kě nə́ əshɨ́ yitsə̌ túg ńté afaʼə ají pô, yə ándó ä zéʼkə nə́ nkɨ páʼ wɨ́d túg nə́ ndə̌ŋdəŋ ńté Əsê nə́ ndú yi əshîʼnə.

¹⁶Lə́ʼə gho ətsáb pə́ páʼ ə́ kě nə́ apɔ́gə Əsê túg lə́, ńté ńgə́ pɨ́d ghɛlə̂ pɨ pə́ pəənə̂ ḿbóŋə apɔ́gə Əsê lə́ póŋ nə́ ńgɛnə̂ nə́ mbiə.

¹⁷Ńtê ndzeʼkə́ zə́ ə́ chî lə́ ándó nəfəŋ nə́ təjúm páʼ nə́ kə́ nə̈ ńjîə aliʼə́ nô ŋwu ńgɛnə̂ tsɔʼə nə́ mbiə. Imenasə pó Filitus lə́ pɨ páʼ pó zéʼkə nə́ ntê məndzeʼkə́ yi wə́.

¹⁸Pó mɛdtə̂ əsê ndú páʼ ə́ túg nə́ ndə̌ŋdəŋ ńtíʼə ə́sóŋə ńgə́ mə́ júmnə nə́ nəwû mə́ pɛ́dtə ńdɔgə̂ aliʼə́, ńtíʼə maʼə̂ ajwaʼlə á mə́m mbimə́ pɨ pətsə́

¹⁹Lə́, achîəndɛ̂sê páʼ á tɨ́ nə́ ńtyantə̂, a túgə aleŋkə zɨ ńgə́, “Mmaʼmbîə a jî pɨ páʼ pə́ pə́ nə́ pəpíə” yətsə́ á kə́ ḿbɨ ḿbə́ ńgə́ “Ŋwu ntsəm páʼ a sóŋ nə́ ńgə́ yí lə́ ŋwu Mmaʼmbî a mɛdtə̂ á mə́ tə́ nə́ ghɛlə̂ təpɔŋə.”[2]

²⁰Á mə́m mɛ́ tə́kɔʼ ndɛ̂, əkáŋ pópə məkəŋ chî əwɨ́ lə́ á ntê ńtê, lə́ kě tsɔʼə seleba po gôl pô, pə kə́ ńtsoŋkə̂ pətsə́ nə́ nkwə́ŋ pópə atsaʼə́ nəkəŋə́, Pətsə́ chî pə́ néŋə ajú ə́wɨ́ lə əghâ páʼ chigə anuə á chî nə́, pətsə́ pə́ néŋə ajú ə́wɨ́ lə əghâ ətsəmə.

²¹Təmbɔʼ ŋwu ntsəmə a sog mbɨ əjǐ ə́ ŋwaʼə̂ á mə́m mənu mə́ təpɔŋ mɨ, tə ḿbə́ yí lə́ ajúmə afaʼ yə səglə̂ nə́, pə́ tsɔ́ʼ nə́ yí ńtə́g ńgə́ a koʼnə̂ lə́ á mbô Tǎ ndɛ̂, ńtɨ́ ńkoʼnə̂ á mə́ faʼ nə́ anu yə əshîʼnə atsəm wə́.

²²Kəələ̂ gho alublə páʼ nkaŋŋwu túg nə́ lə́, ńtíʼ ńdɔ ndú ətsəmə á mə́ tɨ́ nə́ ndə̌ŋdəŋə́, túg mbimə́, túgə akɔŋnə ńkə́ túg mbwɔ́dnə, tíʼ tsɛntə̂ pɨ̌pə pɨ ntɨ́ əghɔ́b ə́ ŋwaʼ nə́ ə́fóŋ Əsê ńgə́ a kwáalə wə́ənə́.

²³Kɔ túgə gho apô yətsə́ á mə́m əkəkóg əzɔŋ páʼ ə́ kě nə́ ajíənu yətsə́ túg pô; gho jî ńgə́ mbô mənu zə̂ lwigtə̂ lə́ tsɔʼə nə́ afyaʼə́.

²⁴Ngaŋəfaʼ Mmaʼmbîə a kě chîə á mə́ tə́ nə́ fyaʼə̂ afyaʼə́ pô, a shib ḿbə́ ŋwunə ä ghɛd nə́ əshîʼnə á mbô ŋwu ntsəmə, ḿbə́ ndzéʼkə yi əshîʼnə, ńtúgə asəgə́ndzɔʼə,

²⁵ḿbə́ ŋwu páʼ a tə́gtə nə́ pɨ pö kǐ nə́ atséebə ají nə́ atsóokə́mbəəmə. Əghâ tsə́ Əsê a yǒ fɛ̂ əsa pó kwúblə ə́fɛ́lə á mə́m təpɔŋ əghɔb ńtíʼ ńjîə ndə̌ŋdəŋə́,

²⁶ńdaŋ ə́lɨ́d ńdə́ʼə atəənə́ Dɛbəələ, páʼ a nə ńgwam nə́ ághɔ́b ńtíʼ ńgɛd pö faʼə̂ mənu páʼ a lɔ nə́.