Read Awing 2 Timotiə 3 Bible Online

2 Timotiə 3 - Awing bible

2 Timotiə 3

¹Kwúmtə ńgə́ ngə́ʼ yǒ chîə á mə́m ndwigtə əlěmbîə.

²Pɨ pə́ yǒ kɔŋ mbɨ əzoobə́, ə́ kɔŋ nkéebə, ə́ túgə akɔ́ʼkə mbəəmə, ə́ túgə achánə, ə́ zɔmtə̂ pəənə, ə́ kě pətǎ pɔ́b pó pəmǎ pɔ́b zóʼnə pô, ə́ kě ndǎ fɛ̂ pô, ə́ faʼə̂ mənu páʼ Əsê kě nə́ pí pô,

³ə́ kě ntɨ́ yi əshîʼnə túg pô, ə́ kě akóolə́mə́lə́ŋ túg pô, ə̈ néŋ əsóomə atû pəənə, ə́ kě awaamə́mbɨ túg pô, ə́ póʼnə məlaʼə́, ə́ pa əshîʼnə

⁴təmbɔʼ ŋwunə a kě ntɨ́ nə́ pó néŋ pô, təmbɔʼ ŋwunə a kě ághɔ́b tə́gtə pô, pó lwɛ́nkə nə́ aŋáŋkə mbəəmə, ńkɔŋ əpú mbî ńtsɛ Əsê,

⁵ńchîə ándó pɨ pó jî nə́ anǔəsê lə́ ḿbə́ ńkǐə ághɔ́b mətɨ mə́ Əsê, kɔ tə́ ńgyǐəə ḿbáatə ntê pɨ zə̂.

⁶Lə́ ntê pɨ zɨ páʼ pö kwú nə́ á məláʼ mə́ pɨ ńkɔ́ʼ náanə á ndu pəngyě páʼ ntɨ́ əghɔ́b pwɔ́d nə́, pəngyě akwaŋ ńté pətəpɔŋ pó ghɛd nə́ á tə́ nə́ ńjwaʼə̂ ághɔ́b pó tíʼə ńdɔ mbô təpɔŋ ntsəmə á mə́ ghɛd nə́.

⁷Lə́ pəngyě páʼ pó lɔ nə́ əghâ atsəmə á mə́ zéʼ nə́ ḿbə́ ńkě láʼ ńchî təmbɔʼ pó jîə ndə̌ŋdəŋ pô.

⁸Ndzaŋə ándó Janɛsə pó Jambəlɛsə kə́ kǐ nə́ atséebə Mosisə lə́, lə́ tsɔʼə ndzaŋə ándó ntê pɨ zɨ kə́ nə́ ńkǐə ndə̌ŋdəŋə́, lə́ pɨ páʼ ajîə azóobə́ a kě nə́ əshîʼnə tə́ faʼə̂ pô, pó kě ndə̌ŋdəŋ mbimə́ kə́ ńtúg pô.

⁹Lə́ pó yǒ kě ghɛn ndi sag pô, ńté ńgə́ ŋwu ntsəmə a yǒ jɨ́ ńgə́ pó lə́ əkəkóg pəənə, lə́ tsɔʼə ndzaŋə a nə ńdaŋ nə́ nə́ Janɛsə pó Jambəlɛsə lə́.

¹⁰Nə́ əghâ nə́, gho zoŋ ndzeʼkə́ mə, ńjîə mbóomə mə nə́ anu páʼ maŋ lɔ nə́ á mə́m nchîmbîə mə, ńjî mbimə́ mə, ńjîə awaamə́ntə́əmə mə, nə́ akɔŋnə mə, ńkə́ ńjî ndzaŋ mäŋ tɨ́ nə́ ńtyantə̂,

¹¹ḿbɨ́ ńkə́ ńjî ndzaŋ pə́ nə̈ ńtsaŋkə̂ nə́ mə, ndzaŋ maŋ kə jɨ́ nə́ ngə́ʼə, ńjîə anuə a kə ghɛd nə́ mə á Antiokə, pó Ikonum nə́ Lista, mbô atsaŋkə maŋ kə túg nə́ asəgə́ndzɔʼə á mə́m wə́. Lə́ Mmaʼmbîə a nə ńchwádkə mə á mə́m ndɛn mənu ghɛn ətsəmə.

¹²Ŋwu ntsəm páʼ a lɔ nə́ á mə́ chî nə́ nchîmbî páʼ zɨ́d túg nə́ apɔ́gə́sê á mə́m Klisto Yeso, pə́ chîə a mə́ tsaŋkə̂ nə́ yə́.

¹³Lə́ ngaŋ ntɨ́ təpɔŋ pópə pɨ pö sóŋ nə́ ńgə́ pó lə́ ajú pó kě nə́ zɨ́d pô, təpɔŋ əghoobə́ á yǐ pɨ ghɛnə̂ pə́ nə́ mbi ə́ tsɛ ndzaŋ páʼ a kə peg nə́ ńchîə̈, pó fɨgə̂ pɨ ńkə́ fɨg mbɨ əzoobə́

¹⁴Lə́ ńgɛn nə́ gho, ghɛn nə́ mbiə á mə́mə anu gho kə zéʼ nə́ lə́, ńkə́ ńchígə́ néŋ ntɨ́ əghô ə́wɨ́, ńjîə ŋwu ndzéʼkə gho kə pə́ nə́ wə́ələ́,

¹⁵ńtə́ ńkwúmtə ńgə́ ə́fɛ́d ndzaŋ gho nə ḿbɛ́d nə́ pɔ̂nkə̂ gho nə ńjîə Aŋwaʼlə Əsê á Ŋwaʼ nə́ lə́, páʼ zə́ələ́ chî nə́ mbɔʼ á fɛ̂ ayáŋə á mbô gho, ayáŋ páʼ á nɨd nə́ ndú mbɔʼ ŋwunə chwád ńdaŋ nə́ mbimə́ á mə́m Klisto Yeso.

¹⁶Anuə atsəm páʼ pə́ ŋwaʼlə̂ nə́ á mə́m aŋwaʼlə Əsê, lə́ sóŋ Əsê ńgə́ pə́ ŋwaʼlə̂, zə́ələ́ a kə́ ńkoʼnə̂ á mə́ zéʼkə nə́ ndə̌ŋdəŋ ə́wə́, ə́lɔg sáʼ pɨ páʼ pó fankə̂ nə́ anuə, ə́shitə̂ mənu mə́ tə́ŋkə nə́, ńkə́ ńnəələ̂ pɨ nə́ ndú ə́ tɨ́ nə́ ndə̌ŋdəŋə́,

¹⁷ńjî ńgə́ ŋwu Əsê, a yǐ ḿbə́ ngaŋəfaʼ páʼ a koʼnə̂ nə́, ńkə́ ńtúgə ajúmə atsəm mbɔʼ a lɔg faʼə̂ afaʼ yə əshîʼnə atsəm ə́wə́.