Read Awing 2 Timotiə 4 Bible Online

2 Timotiə 4 - Awing bible

2 Timotiə 4

¹Nə́ əlɛ́n Əsê pó yǐ Klisto Yeso páʼ a yǒ nə́ tsɔ́ʼtə əsáʼ pɨ pó chî nə́ á mbî pópə yi pɨ pó kwû nə́, ńdzoŋ ḿbeg ńgə́ a tə́ ńgyǐəə nə́ anuə nəfoonə ají, maŋ póʼmbô á mbô gho ńgə́

²gho tə́ sóŋə anǔəsê ńkə́ sóŋə zɨ́d nətəənə, (kəənə á pěʼ ḿbə́ ndɛd pə́ chî nə́ mə́ sóŋ nə́ kɨ ńkě ndɛd pə́ chî nə́ mə́ sóŋ nə́ pô), lɔgə̂ alegtə, ə́sáʼə pi pə́ wǔ nə́ anuə, ńkə̈ ńnéŋə məntɨ́ mə́ pəənə. Túgə awaamə́ntɨ́ əghâ gho tə́ nə́ ńdzéʼkə.

³Ńté ńgə́ ndɛd ə́ tə́ ńgyǐəə ándó pɨ pə́ yǒ nə́ kě kɔŋə̂ á mə́ zóʼ nə́ ndzeʼkə́ páʼ ə́ koʼnə̂ nə́ pô, ə́ pə́ kɔŋə̂ á pə́ azóobə́ anu pó tsɔ́ʼ nə́, ə́ tíʼ ńnáŋ pəpɔ́b pəzéʼkə á ngǎ pó tə pə́ nə́ənə, pǐə ándó pó yǐ nə́ fiʼtə̂ ághɔ́b nə́ anu mbɨ əzɔb ə́ tə́ nə́ ńdzogə̂ á mə́ zóʼ nə́,

⁴ə́ tíʼ kǐə ághóobə́ á mə́ jwə́ʼtə nə́ á ndə̌ŋdəŋə́ atsáb, ə́ kɔŋə̂ á pə́ mə́ jwə́ʼtə nə́ pəpóʼ páʼ pə́ kě nə́ nə́ anu yətsə́ chî pô.

⁵Ńgɛn nə́ gho, gho chîə á mə́ shib nə́ wam mbɨ əzo əghâ ətsəmə, ə́ túgə asəgə́ndzɔʼ əghâ atsəm gho chî nə́ á mə́m ngə́ʼə, ə́faʼə̂ afaʼə ŋwu páʼ á náŋkə nə́ Nkɨ yi Əshîʼnə, ə́ kə́ faʼə̂ afaʼə azô atsəmə ándó ngaŋəfaʼ Əsê.

⁶Lə́, ńgɛn nə́ maŋ, ndɛd ə́ koʼ páʼ pə́ yǐ nə́ lɔgə̂ á mə ə́fyaʼə́nu ə́wə́ á mbô Əsê; ndɛlə́ mə ə́ koʼə̂ á mə́ mɛdtə̂ nə́ mbî zəənə́.

⁷Maŋ póʼnə məláʼ mimə əshîʼnə, maŋ məgtə̂ ndə̌ yi wɨ́ ńkə́ ńtɨ́ ńtyantə̂ á mə́m mbimə́;

⁸Əghâ nə́ Mmaʼmbî a lɔʼkə̂ aŋkəndɔ́ʼə́ mə, á pə́ nə́ mə tɨ́ nə́ ndə̌ŋdəŋə́. Ntsɔ́ʼəfaʼ páʼ Mmaʼmbîə páʼ a tsɔ́ʼtə nə́ əsáʼ pɨ ndə̌ŋdəŋ a yǒ nə́ fɛ̂ nə́ maŋə Alě yə́ wə́, ə́ kě lə́ tsɔʼə nə́ maŋ fɛ̂ pô, ə́ kə́ fɛ̂ á mbô ŋwu ntsəm páʼ a náanə nə́ ńtúgə akɔŋnə ńtə́ ḿbyáb ndzaŋ á yǒ nə́ ghabkə̂ əyǐə.

⁹Náŋ ndú ətsəmə á mə́ yǐ nə́ zə́ənə mə tsɔʼə əghâ nə́.

¹⁰Dɛmasə a kɔŋə̂ yə́ á pə́ əpú mbî zɨ əghâ nə, ńtíʼ ḿmyaʼə̂ mə, ńgɛnə̂ yə́ á Tɛsalonika. Kələsɛnə a ghɛnə̂ yə́ á Galesya, Taatusə a ghɛnə̂ á Dalematya.

¹¹Lə́ tíʼ ńchî tsɔʼə pəg Lukasə, gho tə́ ńgyǐəə gho lɔgə̂ Mag pɨ yí yǐəə, ńté ńgə́ təmbɔʼ a kwáalə mə nə́ afaʼə.

¹²Maŋ túmə a Taakikusə á Ɛfesusə.

¹³Əghâ gho tə́ nə́ ńgyǐəə, gho yǐ nə́ tə́kɔʼə atsəʼ páʼ maŋ nə mɛdtə̂ nə́ á Təlowasə á mbô Kapusə lə́; lə́, kə́ ńgyǐ nə́ əŋwaʼlə pə̂, ḿbə́ pə́ nə́ kɔ ləgnə̂ pi ə́ pə́ nə́ əŋwaʼlə ngwub lə́.

¹⁴Alekzanda páʼ a pə́ nə́ ntwî ətəənə́ lə́, a nə ḿbyádnə ńdímkə mə, Mmaʼmbîə á yǒ tsɔ́ʼə afaʼə ají zoŋ lə́ ndzaŋ á kə̈ ghɛd nə́ mənu.

¹⁵Kə́ ńtə́ ńdɔg ndɛd nə́ yí ńté ńgə́ a tɨ́ nə́ pəteenə̈, ńtséebə təpɔŋ ńté nkɨ páʼ pɛ̈n náŋkə nə́ lə́.

¹⁶Á nə ḿbə́ á ntsɛɛmbiə alě maŋ nə ńtsáb nə́ á mə́ tɔ́mtə nə́ mbəəmə mə lə́, ŋwu tsə̌ a kə kě ndzəm maŋ chî pô, ŋwu ntsəmə a nə myaʼə̂ mə; kɔ Əsê a néŋ ngə́ʼə mbɨ pó ńté anu zəənə́!

¹⁷Lə́, Mmaʼmbîə a nə ńtə́əmə á nəpɛnə́ maŋ ńkə́ ə́fɛ̂ mətɨ nə́ maŋ ńgə́ maŋ náŋkə nkɨ yi wɨ́ ətsəm, ńjî ńgə́ Pətəjǐsê pətsəm pó zóʼə áwə́ələ́. Ńdaŋ ə́lɨ́d pə́ tíʼ ńchwádkə mə á mə́m ntso sáambaŋə.

¹⁸Mmaʼmbîə a yǒ fógə mə á mə́m təpɔŋ ntsəmə, ə́ chwádkə mə ńjî ńgə́ maŋ kwúnə á mə́m nəfɔ jíə á nəpóolə. Á mbô yí, nəgháʼə á chî ə́wɨ́ páʼə á mɛdnə̂ nə́! Amɛn.

¹⁹Maŋ chaʼtə̂ Plisila pó Akwila ḿbɨ́ ḿbə́ nə́ ngwud Unisifolusə.

²⁰Ɛlastusə a nə ńgɔ́ŋə á Kɔlinə, maŋ nə́ ḿmɛdtə̂ Təlofimusə á Miletusə ńté ńgə́ a nə ńtə́ ńgoonə̂.

²¹Lɔ ndú ətsəmə a mə́ yǐ nə́ záʼ ndɛd əfə́g ə́ pɔŋə̂ koʼə̂. Ibulusə pó Puden ḿbɨ́ ḿbə́ nə́ Layinusə ḿbéenə kəlɔdya ḿbɨ́ ḿbə́ nə́ pəlim pətsəm, pó túmə achaʼtə.

²²Mmaʼmbîə a chî pópə ajwiə azô. Apɔŋə́ntə́əmə Əsê á chîə á mə́m pəənə́.