Read Awing Taatusə 1 Bible Online

Taatusə 1 - Awing bible

Taatusə 1

¹Aŋwaʼlə zəənə́ á lǒo lə́ á mbô pɔlə, ngaŋəfaʼ Əsê, ḿbə́ ntú Yeso Klisto. Pə́ kə tsɔ́ʼə á mə ńtú lə́ ńgə́ maŋ kwáatə ńgɛd mbimə́ pɨ pə́ Əsê páʼ a tsɔ́ʼ nə́, zɨ́d kwéŋə, ńkə́ ńgɛd pó túgə ajíənuə ńté ndə̌ŋdəŋ páʼ ä ghɛd nə́ pó pɔ́g Əsê,

²ndə̌ŋdəŋ ghɛnə́ á chî lə́ á ndumə akwaŋ ńtə́ ḿbyáabə ńté nchîmbî páʼ zɨ́d mɛdnə̂ nə́ ngǎ mɔʼə́. Əsê páʼ a kě nə́ ntsɨd tsəələ̂ pô, a nə ńdaʼnə̂ áwɛ̂n nə́ nchîmbî zɨ́d zɨ ə́fɛ́lə ngoʼ pəchə́.

³Əghâ chigə ndɛd yi wɨ́ nə ńkoʼ nə́ lə́ a nəələ̂ áwɛ̂n nə́ zə́ələ́ á mə́m nkɨ əyə́. Pə́ nə fɛ̂ nkɨ wɨ́d ghɛnə́ á mbô maŋə, maŋ kə́ ńnáŋkə áwɨ́d nə́ ndú páʼ Əsê páʼ a pə́ nə́ Nchwádkə əwɛ̂nə a nə ńdɔ nə́.

⁴Mäŋ ŋwaʼlə̂ aŋwaʼlə zɨ lə́ á mbô Taatusə, ndə̌ŋdəŋ móonə mə á mə́m mbimə́ páʼ pəg yí nɔd nə́ ńchî ə́wə́. Ńgə́ Əsê páʼ a pə́ nə́ Tǎ pó Klisto Yeso páʼ a pə́ nə́ Nchwádkə əwɛ̂n, pó fɛ̂ á gho nə́ apɔŋə́ntɨ́ pó mbwɔ́dnə.

⁵Maŋ kə ḿmɛdtə̂ a gho á mə́mə aláʼə Kəletə lə́ ńgə́ gho shitə̂ mənu páʼ mə́ nə́ ḿbɛ́d nə́ tə tyáŋtə, ńkə́ ḿbɨ́ ńtsɔ́ʼtə mətûə á mə́m pətɔ̂ŋ pətsəmə, tsɔʼə ndzaŋ maŋ kə tə́gtə nə́ gho lə́:

⁶Nətû nə́ shib ḿbə́ ŋwu pə́ jî nə́ yə́ ándó ŋwu yi əshîʼnə, a shib ńtúg tsɔʼə táʼ məngyě, pɔ́ pí pə́ kə́ ḿbə́ pɨ pó néŋ nə́ məntɨ́ mɔ́b nə́ Əsê, ńkě ntɨ́ təpɔŋ pópə atyǎntə atû túg pô.[1]

⁷Ndzaŋə ándó nətû nə́ nkyeetə pɔ́ pə́ Əsê nə́ pə́ nə́ ŋwunə a tə́ nə́ ńnáŋə afaʼə Əsê lə́, a pə́ ŋwu pə́ jî nə́ yə́ ándó ŋwu yi əshîʼnə. Kɔ a pə́ ŋwunə á chánə nə́ kɨ ńtúgə atsə́gə́ntə́əmə, kɨ ḿbə́ apɛ̌lə məloʼə, ḿbóʼnə məlaʼə́, kɨ ńtúg əfóʼńdé nə́ nkéebə.

⁸A chîə mə́ shib nə́ ŋ́ŋáʼ ndɛ̂ əjǐə á mbô ngaŋnə́ghéenə, ə́ kə́ kɔŋə̂ anu páʼ á pɔŋ nə́, ə́ tɨ́ ndə̌ŋdəŋə́, ə́ ŋwaʼə̂, ə́ kə́ túgə awaamə́mbəəmə.

⁹A chîə á mə́ tɨ́ nə́ ə́ tyantə̂ á mə́m nkɨ wə́ páʼ wɨ́d pə́ nə́ nkɨ tə fɨgə̂ ŋwu lə́, ńjî ńgə́ a chî mbɔʼ a fɛ̂ ndzeʼkə́ páʼ ə́ koʼnə̂ nə́, ńkə́ ńchî mbɔʼ a nɨd ńgə́ pɨ páʼ pó zéʼkə nə́ ajúmə ndaʼ lə́ pó ghɛlə̂ lə́ anuə təkoʼə.

¹⁰Pɨ pipə nɨ́ nə́ pó chî ə́wɨ́ tə ḿbə́ pə́ nə́ pɨ pó mɛdtə̂ nə́ anǔəsê Pəjus ńdzoŋə̂ áwɛ̂n, páʼ pó kǐ nə́ mə zóʼnə nə́ ńtíʼə ə́fɨgə̂ pəənə.

¹¹Pə́ chîə mə́ shib nə́ naʼkə̂ ntso əghóobə́, ndzaŋə ándó pö maʼ nə́ ajwaʼlə á mə́m məngwud mimə nɨ́ nə́ nə́ ndzeʼkə́ ape əzɔb zə́ lə̂, lə́ kě aliʼə́nuə azóobə́ mə́ zéʼkə mbô ndzeʼkə́ zə́ pô.

¹²Táʼ ŋwunə á mə́m pó páʼ a nə ḿbə́ nə́ ntûsê əghoobə́ a nə sóŋ ńgə́, “Pɨ pə́ Kəletansə kə́ ḿbə́ lə́ tsɔʼə ngǎŋntsəələ, məna mə́ nəyeŋə́ ntɨ́ əghɔ́b pə́g nə́, pəlɔŋə̈ ńkə́ ńjîə tə́shúnə́.”

¹³Atsáb zɨ lə́ ndə̌ŋdəŋə́, lə́ pə́ ńgə́ gho chîə á mə́ chigə nə́ sáʼə ághɔ́b ńté təpɔŋ əghɔb ńjî ńgə́ mbɔʼ pó túg mbimə́ ə́ tyantə̂ nə́,

¹⁴ńkě pɛ́d ńgwaamə̂ pə́ pəpóʼ pə́ Pəjus pópə məntəgə́ mə́ lǒo nə́ á mbô pɨ pó kǐ nə́ ághóobə́ ndə̌ŋdəŋ pô.

¹⁵Ajúmə atsəmə á ŋwaʼə̂ á mbô pɨ páʼ pó kə́ nə́ ŋ́ŋwaʼə̂ azɔ́b nə́ nkɔ̌ʼmbɨ əghóobə́. Lə́ ajûtsə́ á pə́ ńkě ŋwaʼə̂ á mbô pɨ páʼ pö féŋkə nə́ mbɨ əzɔb pô, ńkě kə́ néŋ ntɨ́ əghɔ́b nə́ Əsê pô, ńté ńgə́ akwaŋə azɔ́b pópə məntɨ́ (ajúmə ä ghɛd nə́ ŋwunə kó əsə́ənə) mɔ́b mə́ pɛ́dtə ə́féŋə.

¹⁶Pó sóŋə ńgə́ pó jî Əsê ḿbə́ ńkǐə yi nə́ ngɛdmə́nu əghóobə́. Pó túgə kəpa pópə atyǎntə atûə, ńkě chîə á mə́ ghɛd nə́ anu yə əshîʼnə yətsə́ pô.