Read Awing Taatusə 3 Bible Online

Taatusə 3 - Awing bible

Taatusə 3

¹Kwúmtə pɨ pô ńgə́ pó zóʼnə mətûə, ńkə́ ńdzóʼnə pɨ pó túg nə́ mətəənə, ńdzóʼnə ághɔ́b ńkə́ ḿbímə á mə́ faʼ nə́ əshîʼnə nə́ ndú ətsəmə.

²Fiʼtə̂ ághɔ́b ńgə́ kɔ pó tə́ ńtséebə atséebə təpɔŋ ńté ŋwu tsə̌, ńgə́ pó túgə pə́ mbwɔ́dnə ńkə́ ńgɛd əshunə́, ńkə́ ńtúgə mbɔ́ páʼ á pwɔ́dnə nə́ á mbô ŋwu ntsəmə.

³Ńté ńgə́ pɛn nə́ nkɔ̌ʼmbɨ əwɛ̂n, pɛn kə ghəənə̂ əghâ tsə́, ńtyantə̂ atûə, ńkə́ ḿmyaʼə̂ alaŋə́ azɛ̂nə; pɛn kə pə́ lə́ əpoʼə á mbô mənu páʼ mbɨ əzɛ̂n lublə̂ nə́ nə́ pə́ələ́ pópə ntê əpɔŋ mənu ətsəmə. Pɛn kə laŋkə̂ nchîmbî əzɛ̂nə á mə́m mənu mə́ təpɔŋə, ńnáŋ əpú pɨ ńgə́ mbɔʼ ə́ pěʼ ḿbə́ əpɛ́nə, pɨ pə̈ peenə̂ áwɛ̂n, pɛn kə́ ḿbeenə̂ ághóobə́.

⁴Əghâ ándó pə́ kə nɨd nə́ ntɨ́ yi əshîʼnə pópə akɔŋnə Əsê páʼ a pə́ nə́ Nchwádkə əwɛ̂n lə́,

⁵a kə chwádkə áwɛ̂nə, ńkě té pə́ anu yə əshîʼnə yətsə́ páʼ pɛn nə́ nkɔ̌ʼmbɨ əwɛ̂n kə faʼ nə́ pô, lə́ ńté pə́ akóolə́mə́lə́ŋə ajíə, ńdaŋə̂ á mə́m Ajwǐəsê päʼ a ghɛd nə́ pə́ pîə áwɛ̂n ngǎ yitsə̌, ə́fɛ̂ nchîmbî yi fîə á mbô pɛn ńdaŋ nə́ mə́ sog nə́ áwɛ̂nə.

⁶Əsê a kə kwɛlə̂ Ajwǐəsê a mbɨ pɛn tə a nə́ənə, ńdaŋ nə́ Yeso Klisto páʼ a pə́ nə́ Nchwádkə əwɛ̂nə,

⁷ńjî ńgə́ ńdaŋə̂ á mə́mə apɔŋə́ntə́əmə ají təmbɔʼ pə́ ghɛd pɛn tɨ́ ndə̌ŋdəŋə́ á mbi Əsê ńkə́ ńtúg nchîmbî páʼ ə́ mɛdnə̂ nə́ ngǎ mɔʼə́, nchîmbî pɛn kwaŋ nə́ ńtə́ ḿbyáabə lə́.

⁸Lɛ̌ lə́ ndə̌ŋdəŋə́ atsáb wɨ́d wə́. Maŋ lɔ ńgə́ gho tə́gə atû nə́ mənu məənə́, ńjî ńgə́ pɨ páʼ pə́ néŋ nə́ ntɨ́ əghɔ́b nə́ Əsê, təmbɔʼ pó fɛ̂ ndɛd əzoobə́ á mə́ tə́ nə́ faʼə̂ mənu mimə əshîʼnə, mənuə ándó mə́ pɔŋ nə́ ńkə̈ ńkwáalə ŋwu ntsəmə.

⁹Lə́, lə́ʼə akəkógə́ afyaʼə́, ńdə́ʼə á mə́ tə́ nə́ tɨ́ntə pəmaʼ pə́ ngwulə, ńdə́ʼə afyaʼə́ pópə məlaʼ ńté pənoŋkə. Ndɛn mənu ghɛn ətsəm ə́ kě atûə anu yətsə́ chî pô, ńkě kə́ ńtə́ ńtûə pô.

¹⁰Fɛ̂ nə́ əkwantə ándó pɛn pɛ̌ á mbô pəənə ándó pö ghɛd nə́ pɨ pə́ chîə á mənchwa mənchwa, mbɔʼ pó chî zóʼ, kɔ nə́ pɨ ńtúgə áwə́ənə́ anu yətsə́ pɨ pó.

¹¹Nə́ jî ńgə́ ntê pɨ zə́ pó jîə ḿbəglə̂, pətəpɔŋ pɔ́b pə́ kə́ nɨd ńgə́ pó fankə̂.

¹²Mbɔʼ a yǐ ḿbə́ əghâ maŋ tú nə́ Altɛmas kɨ Taakikus á mbô gho lə́, gho fǔəlóʼə á mə́ tég nə́ mə Nikopolisə, ńté ńgə́ maŋ kwaŋ ńgə́ maŋ yǐ chî lə́ ə́wə́ á ndɛd əfə́gə.[2]

¹³Fǔəlóʼə a mə́ kwá nə́ Zɛnas páʼ a pə́ nə́ ndzoŋ məsáʼ lə́, pó Apolos ńjî ńgə́ pó chwáakə nənyi əghoobə́, gho pɨ ńkə́ ńnáŋ ńdzɨ́ ńgə́ pó túgə ajúmə atsəmə a koʼnə̂ nə́ á mbô pó.[3]

¹⁴Pəpɛ́n pɨ pó chîə a mə́ shib nə́ zéʼ ndzaŋ təmbɔʼ pó laŋkə̂ ndɛd əzoobə́ a mə́ faʼ nə́ mənu mimə əshîʼnə ńjî ńgə́ təmbɔʼ pó kwáalə á əghâ páʼ chigə anuə á tɨ́ nə́ á əsê, kɔ pó laŋkə̂ nchîmbî əzoobə́ a mə́ faʼ nə́ mənu mə́ kě nə́ atûə anu yitsə̌ chî pô.

¹⁵Ŋwu ntsəmə a chî nə́ pə̌gpo aliʼə́ nə́ a tə́ chaʼtə̂ gho. Fɛ̂ achaʼtə azə́gə́ á mbô pəshu pə́gə́ á mə́m mbimə́. Apɔŋə́ntə́əmə Əsê á chîə a mbɨ pɨ pətsəmə.