Read Awing Filemunə 1 Bible Online

Filemunə 1 - Awing bible

Filemunə 1

¹Aŋwaʼlə zɨ lə́ ŋwaʼlə̂ Pɔl páʼ á pə́ nə́ ngaŋətsáŋ ńté Yeso Klisto, lə́ ŋwaʼlə̂ pó ndim əwɛ̂n Timotiə. Zə́ələ́ á ghɛnə̂ lə́ á mbô ngaŋəko əwɛ̂n Filemun páʼ pɛ̌npo faʼ nə́,

²ńkə́ ńgɛnə̂ á mbô nkyeetə pɔ́ pə́ Əsê páʼ ə́ jwánə nə́ á ndɛ̂ yə́, ńgɛnə̂ á mbô ndim əwɛ̂n yi məngyě páʼ á pə́ nə́ Afya, ńkə́ ḿbɨ́ ḿbə́ nə́ Akipus ngaŋə́maʼə́ntsoolə ándó pɛnə̂, ḿbóʼnə ńté nkɨ yi əshîʼnə:

³Ńgə́ Tǎ əwɛ̂n Əsê ndzoŋ ḿbə́ nə́ Mmaʼmbî Yeso Klisto a fɛ̂ apɔŋə́ntɨ́ pó mbwɔ́dnə á mbô pəənə́.

⁴Ndimə́ mə Filemun, əghâ atsəm maŋ tə́ nə́ ńchaʼtə́sê lə́ maŋ kwúmtə gho, ə́fɛ̂ ndǎ á mbô Əsê ńté gho.

⁵Ńté ńgə́ maŋ nə̈ ńdzóʼə anu ńté akɔŋnə pópə mbimə́ páʼ gho túg nə́ nə́ Mmaʼmbî Yeso ńkə́ ńtúg nə́ pɨ pə́ Əsê pətsəmə.

⁶Maŋ chaʼtə́sê ńgə́ ndzaŋ ghö ghab nə́ atsáb ńté mbimə́ əzo ándó mɔ́ Əsê lə́, mbɔʼ a ghɛd nə́ zə́ənə afoʼə atsəm páʼ pəg túg nə́ zə́ələ́ á mə́m nchîmbî əzəgə́ á mə́m Klisto.

⁷Ńté ńgə́ ḿbə́ ndim əgha, akɔŋnə azô á kə ghɛd maŋ kɔŋtə̂ á kə́ néŋ ntə́əmə mə. Gho ghɛd məntɨ́ mə́ pɔ́ pə́ Əsê mə́ chî əshîʼnə.

⁸Ńté zəənə́ anu, maŋ chîə á mə́ túg nə́ ntə́əmə a mə́ tsáb nə́ á mbô gho ándó ndim əgho á mə́m Klisto, ə́sóŋ ńgə́ gho faʼə̂ anu páʼ a koʼnə̂ á mə́ faʼ nə́.

⁹Maŋ yǐ kə̈ póʼə tsɔʼə mbô á mbô gho ńté ńgə́ maŋ kɔŋə̂ gho. Lə́ maŋ Pɔl páʼ maŋ tsáb nə́ aliʼ Klisto Yeso, nə́ pə́ əghâ nə́ maŋ chîə atsáŋ ńté yə́.

¹⁰Mäŋ póʼmbô á mbô gho ńté lə́ Onisimusə, á pə́ nə́ móonə mə á mə́m Yeso. Maŋ nə ḿbímə Tǎ əyə́ á mə́m Klisto ə́fɛ́d əghâ maŋ nə chî nə́ atsáŋə.

¹¹A nə ḿbə́ nə́ ndɛd yitsə̌ lə́ a kě atûə anu yətsə́ á mbô gho chî pô, lə́ nə́ əghâ nə́ a chîə atûə anu[1] á mbô pɔ̌ pətsəmə.

¹²Maŋ pɨnkə̂ yə́ á mbô pɨ əghâ nə́, lə́ yǐ ntə́əmə mə á mbô pəənə́.

¹³Maŋ pěʼ ńkɔŋə̂ á mə́ mɛdtə̂ nə́ yə́ aliʼə́ nə́ pəg yə́, ńjî ńgə́ təmbɔʼ a kwáalə mə nə́ aliʼə́ azɨ́ ndɛlə́ ándó maŋ chî nə́ atsáŋ ńté nkɨ yi əshîʼnə wə́.

¹⁴Lə́ maŋ kě kɔŋə̂ á mə́ fyád nə́ gho ńgə́ gho kwáalə mə pô, lə́ maŋ pěʼ ńkɔŋ lə́ ńgə́ gho faʼə̂ zə́ələ́ á pə́ ńkɔŋ gho. Lə́ pə́ ńgə́ maŋ kě yǐ faʼə̂ anu yətsə̌ tə ńdéʼtə gho pímə.

¹⁵Əghâ tsə̌ anuə a nə ńgɛd nə́ ńgə́ a fɛ́lə á nəpɛnə́ pɨ nə́ mɔ́ akəmə ndɛd lə́ ńgə́ a yǐ ńtíʼ ḿbəənə̂ á mbô pɨ nə́ nkóŋə.

¹⁶Ńkě pɨ ḿbə́ tsɔʼə apoʼ pô, ḿbɨ ńchî tə ńtsɛɛlə̂ apoʼə: Lə́ ndim pɛn kɔŋ nə́ á mə́m Klisto, tə ḿbyádnə ḿbə́ pə́ á mbô maŋə ńkə́ ḿbə́ á mbô pəənə́. Ńkě tsɔʼə ndimə́ á mə́m na mbɨ pó ńkə́ ḿbə́ ndimə́ á mə́m Mmaʼmbîə.

¹⁷Lə á pə́ ńgə́ təmbɔʼ gho lɔgə̂ mə ándó ŋwu pɔ̌ faʼ nə́, gho kwáalə yí tsɔʼə ndzaŋ təmbɔʼ gho pěʼ ńkwáalə mə.

¹⁸Təmbɔʼ a nə ńgwǔəə anuə á mbô gho kɨ ńgwaamə̂ gho á pə́ nə́ ajûtsə́, gho néŋə zɨ́d nə́ əlɛ́nə mə.

¹⁹Maŋ Pɔl, lə́ ŋwaʼlə̂ maŋ ŋ́ŋwaʼlə̂ azɨ́ nə́ apô mə, maŋ yǐ tûə á mbô gho maŋ kě chîə mə́ kwúmtə gho ńgə́ gho tə́ ńgwaamə̂ mə tə ńgwaamə̂ mə pə́ nə́ nchîmbî əzo pô.

²⁰Ndimə́ mə, maŋ póʼ mbô ńgə́ gho ghɛlə̂ akwá zəənə́ á mbô maŋə ńté Mmaʼmbîə, ghɛd mbəəmə mə pɔŋə̂ ándó ndimə́ á mə́m Klisto.

²¹Ndzaŋə ándó maŋ ŋwaʼlə̂ nə́ ə́lɛ̌ lə́, maŋ pyádnə ńjî ńgə́ gho yǐ faʼə̂ anu maŋ pítə nə́, ə́faʼ tə laŋ ndzaŋ maŋ pěʼ nə́ ńdoonə̂.

²²Á mə́ pegtə̂ nə́, maŋ póʼ mbô ńgə́ gho tsoŋkə̂ atɔ́gə ndɛ̂ pəghəənə á mbô maŋ ńté ńgə́ maŋ kwaŋ ńgə́ Əsê a yǐ zóʼə achaʼtə́sê azɨ́ pətsəm ə́ pɨ fɛ̂ mə á mbô pəənə́.

²³Ɛpaflasə páʼ a chî nə́ atsáŋ pəg yí ńté atûə Klisto Yeso, a túmə achaʼtə ajíə á mbô pəənə́,

²⁴ńdzoŋ ḿbɨ ḿbə́ nə́ Mag, Alistakusə, Dɛmasə ḿbéenə Lukasə páʼ pəg pö faʼ nə́.

²⁵Ńgə́ apɔŋə́ntə́əmə Mmaʼmbî Yeso Klisto a chîə á mə́m pɨ pətsəmə.