Read Awing Iblus 1 Bible Online

Iblus 1 - Awing bible

Iblus 1

¹Á nə ḿbə́ ntsɛɛmbi lə́ Əsê ä tséebə á mbô pətǎ pə́ pətǎ pɛn ngǎ yi nɨ́ nə́, nə́ məndú mimə́ nɨ́ nə́ ńdaŋə̂ á mbô məntúmə́sê,

²lə́ nə́ ndwigtə əlě mbî pɨ lə́, a tséebə á mbô pɛn ńdaŋ lə́ á mbô Mɔ́ Əyǐə. Lə́ yí páʼ Əsê a nə tsoŋkə̂ nə́ mbî ńdaŋə̂ a ndzəm yə́, ḿbə́ yí páʼ Əsê a kə fɛ̂ nə́ ajúmə atsəm nə́ yə́.

³Mɔ́ əyǐ wɨ́d ghɛnə̂ a ŋwaŋkə̂ nə́ nəgháʼ Əsê á mbɨ yə́, ńkə́ ńchîə ándó Əsê. A túg mbî lə́ nə́ mətɨ mə́ chî nə́ nə́ atséebə ajíə. Əghâ ándó a kə məgtə̂ nə́ mə sog nə́ təpɔŋ ŋwu ntsəm lə́, ńtíʼ ńnáanə á nəpóolə á əlá apô Əsê yə təənə, Əsê páʼ a túg nə́ mətəənə á ndumə ajúmə atsəmə.

⁴Əsê a kə ghɛd ńgə́ Mɔ́ Əsê á túg mətɨ ńtsɛ pətseŋpə́ndɛ̂ píə, tsɔʼə ndzaŋə ándó əlɛ́n páʼ Əsê kə fɛ̂ nə́ nə́ Mɔ́ əyǐ ə́ kə gháʼ nə́ ńtsɛ yi pətseŋpə́ndɛ̂ píə.

⁵Ńté ńgə́ Əsê nə ńkě kə́ láʼə sóŋə nə́ ntseŋndɛ̂ əyǐ yitsə̌ ńgə́, “Gho lə́ Móonə mə, ə́sɛ̂n maŋ tíʼ ḿbə́ lə́ Tǎ əgho.” Kɨ Əsê kě kə́ láʼə ə́sóŋə nə́ ntseŋndɛ̂ əyǐ yitsə̌ ńgə́: “Maŋ yǐ pə́ lə́ Tǎ əyǐə, a kə́ ḿbə́ Móonə mə.”

⁶Lə́ a kə pə́ əghâ Əsê kə tə́ nə́ ńdoonə̂ á mə́ tú nə Mɔ́ nətû əyǐə á mə́m mbî lə́, ə́sóŋ ńgə́, “Pətseŋ pə́ ndɛ̂ pə́ pə́ nə́ pipə́ Əsê pətsəm pə́ yǐ shib ghóʼkə yə́.”

⁷Lɛ̌ anu páʼ Əsê sóŋ nə́ ńté pətseŋpə́ndɛ́pə́sê: “Əsê ghɛd pətseŋpə́ndɛ̂ pí pó pə́ kəfəələ, ḿbɨ́ ńgɛd ngaŋə́faʼ əjí pə́ alə́əmə mógə́.”

⁸Lə́ ńtíʼ ńgɛn nə́ Mɔ́, Əsê sóŋ ńgə́, “O Əsê, anuə nəfoonə azô a yǐ mɛdnə̂ ngǎ mɔʼə́! Gho sáʼə pɨ pó nə əsêndú páʼ ə́ tɨ́ nə́ ndə̌ŋdəŋə́.

⁹Gho kɔŋə̂ anu páʼ a koʼnə̂ nə́, ḿbeenə̂ yə tə koʼə̂. Lə́ ghɛd ə́lɨ́d Əsê páʼ ə́ pə́ nə́ Əsê əzo tsɔ́ʼə gho ḿbɨ ə́fɛ̂ akɔŋtə ngóʼkə á lánə ńgáʼ ńtsɛ ndzaŋ á fɛ̂ nə́ á mbô ngaŋmə́ko əzô.”

¹⁰A pɨ ńkə́ sóŋ ńgə́, “Gho Mmaʼmbî, ə́fɛ́lə a nəfɛdnə́, lə́ tsoŋkə̂ gho ńtsoŋkə̂ mbîə, ńdɔg lə́ tsɔʼə mbô mó ńtsoŋkə̂ nəpó wə́.

¹¹Əpú pɨ ətsəm ə́ yǒ péŋə, lə́ gho pə́ mɛdnə̂, pɨ́d yǒ lɛnə̂, ə́sɛɛkə̂ ándó ətsəʼə́.

¹²Pɨ yǒ píʼtə pə́ələ́ ándó tə́sɛ atsəʼə́ əfə́gə, pə́ tíʼ ńkwúblə pə́ələ́ ándó ətsəʼə́. Lə́ gho pə́ ńkě kwúblə pô, ńdáʼ ńkě kə́ ńdɛn pô.”

¹³Əsê a kě kə́ láʼə ə́sóŋə nə́ ntseŋndɛ̂ əyǐ yitsə̌ ńgə́, “Náanə aliʼ ghɛnə́ á əlá apô maŋ yə təənə, tə ńkoʼ əghâ maŋ yǒ nə́ noŋkə̂ ngaŋkə́pa əzô ándó ajúmə tə́gə məkoolə á nətɛ́n nə́ məko gho.”

¹⁴Pətseŋpə́ndɛ́pə́sê lə́ pěʼ ḿbə́ mbə̂kə̂? Lə́ əjwi páʼ ə́ faʼ nə́ mbô Əsê, ä túmə ághɔ́b ńgə́ pó tə́ ńkwáalə pɨ páʼ pó yǒ nə́ kwá nchwadkə́.