Read Awing Iblus 10 Bible Online

Iblus 10 - Awing bible

Iblus 10

¹Ndzaŋə ándó noŋkə á túg nə́ tsɔʼə mə́lə́glə mənu mimə əshîʼnə páʼ mə́ yǐ nə́ yǐ lə́, ńkě pə́ chigə anu yə ə́wɨ́ lə́, təmbɔʼ pɛn kě lɔg tsɔʼə afyaʼə́nu pə̈ ghɛd nə́ məngoʼə́ á məngoʼ lə́ ńgɛd pɨ pə́ yǐ nə́ á mbô Əsê pó koʼ ńgɛn ə́fyag pô.

²Təmbɔʼ pəənə ándó pó ghóʼkə nə́ Əsê ńkə́ ə́sogə̂ təpɔŋ əghɔb tə á ŋwáʼ, tə ḿbə́ mbɔʼ pó kě pɨ ńtúgə akóolə́sɨ́ yətsə́ ńté pətəpɔŋ pɔ́b pô, afyaʼə́nu atsəmə á kə́ měe.

³Ndzaŋ pə́ ghɛd nə́ əfyaʼmə́nu pɨ lɛ̌ lə́, pɨ́d kwúmtə pɨ nə́ pətəpɔŋ pɔ́b ngoʼ ətsəm ngoʼ ətsəmə.

⁴Ńté ńgə́ təmbɔʼ achǐə pəlú pə́ na pópə achǐə məmbéŋ á láʼ ńkě təpɔŋ sog pô.

⁵Lɛ̌ anu páʼ á ghɛd nə́ Yeso a kə tə́ ńgyǐəə á mə́m mbî, ə́sóŋə á mbô Əsê ńgə́, “Gho kě tə ndɔ ə́fyaʼmə́nu pópə akáŋə́sê pô, Lə́ gho tsoŋkə̂ na mbɨ ńnoŋkə̂ á mbô maŋə.

⁶Gho kě kɔŋtə̂ ńté əpú pə́ tɔ nə́ pə́ələ́ á ndu nəpá pópə pi pə́ fɛ̂ nə́ pɨ́d ńté pətəpɔŋ pô.

⁷Maŋ tíʼ ə́sóŋ ńgə́, ‘Maŋ ghɛnə̂, á mə́ faʼ nə́ anu páʼ gho lɔ nə́ ńgə́ maŋ faʼə̂ á ḿbə́ Əsê mə, tsɔʼə ndzaŋə ándó pə́ ŋwaʼlə̂ nə́ á mə́mə aŋwaʼlə Pənoŋkə ńté mə’ ”

⁸Á mə́ chwáakə nə́, á sóŋ ńgə́, “Gho kě tə ńdoonə̂ kɨ ńkě kə́ ńkɔŋ əfyaʼmə́nu pópə əkáŋsê pə̈ tɔ nə́ á mə́ sog nə́ təpɔŋ pô.” (Pə̈ fɛ̂ ndɛn əkáŋsê pɨ ńdzoŋə̂ lə́ noŋkə.)

⁹A tíʼ ḿbɨ ḿbegtə̂ ńgə́, “Maŋ yǐ lə́ á mə́ faʼ nə́ anu gho lɔ nə́.” A kə myaʼ mənu mə́ ntsɛɛmbi ńtíʼ ńnéŋə mi páʼ mə́ zoŋkə̂ nə́ aliʼ yə́.

¹⁰Ńté ńgə́ Yeso Klisto a kə faʼə̂ anu páʼ Əsê kə lɔ nə́ ńgə́ a faʼə̂, pə́ tíʼ ə́sogə̂ təpɔŋ əwɛ̂n pɛn ŋwaʼ ńdaŋə̂ á mə́m na mbɨ əjǐ páʼ a kə fɛ̂ nə́ ngǎ mɔʼə́ ándó akáŋə́sê.

¹¹Mbêsê Pəjusə ntsəm a faʼə̂ afaʼə ají əlě ntsəm, ə́fyaʼə̂ táʼə anu ḿbégnə; lə́ əfyaʼmə́nu pɨ lɛ̌ pə́ ńkě chî təmbɔʼ pɨ́d láʼ sogə̂ təpɔŋ pô.

¹²Lə́ Klisto a kə fyaʼə́nu táʼ ngǎ ńté pətəpɔŋə; afyaʼə́nu páʼ á ghɛd nə́ anuə á lê nə́ nkóŋə, á tíʼ ńnáanə yə́ á əlá apô Əsê yə təənə.

¹³Ńtíʼ fɛ́d lə́ələ́ á tíʼə ḿbyáb ndzaŋ Əsê a yǐ nə́ ghɛd ngaŋkə́pa əjí ə́ tíʼ ḿbə́ ajúmə atə́gtə məkoolə ajíə.

¹⁴A kə tíʼ ńdɔgə̂ táʼə afyaʼə́nu ńgɛd pəənə ándó páʼ pə́ sog nə́ pətəpɔŋ pɔ́b pó ŋwaʼ, pó tíʼ ńkoʼnə̂ ńgɛn ə́fyag tə mɛdnə̂.

¹⁵Ajwǐəsê a kə́ ńdzɨ́ ńkə́ ḿbí ńgə́ lə́ ndə̌ŋdəŋə́, ńtíʼ ə́sóŋə á mbô pɛnə̂; ńchwáakə ə́sóŋ ńgə́,

¹⁶“Mmaʼmbîə a sóŋ ńgə́, lɛ̌ əka yi fî wə́ maŋ yǐ nə́ waalə̂ wɨ́d pə̌gpo əghâ alě yəwə́ a koʼ nə́: Maŋ yǐ néŋ pənoŋkə mə á mə́m məntɨ́ pó, Ŋ́ŋwaʼlə̂ pə́ələ́ á atû pó.”

¹⁷Á pɨ ńkə́ ńgə́, “Maŋ láʼ kě pətəpɔŋ pɔ́b pópə əfankəmə́nu pɔ́b kwúmtə pô.”

¹⁸Nə́ əghâ nə́ ándó pə́ ləgnə̂ nə́ pətəpɔŋ lə́, pə́ kě pɨ ńchîə á mə́ fɛ̂ nə́ akáŋə́sê yətsə́ ńté pətəpɔŋ pô.

¹⁹Pəlimə́ mə, təmbɔʼ pɛn laŋə̂ á mə́m nəwû Yeso, anu yətsə́ a kě áwɛ̂n waamə̂ á mə́ kwú nə á mə́mə Aliʼ páʼ á Chígə́ nə́ Ŋwaʼ lə́ pô.

²⁰A kə ŋáʼ ndú yi fîə á mbô pɛnə̂, ndú páʼ wɨ́d túg nə́ nchîmbî ńdaŋ nə́ apagə atsəʼə́, lə́ pə́ ńgə́ ńdaŋ nə́ mbɨ əjǐə.

²¹Pɛn túgə ntɨ mbêsê páʼ a náŋ nə́ ndɛ̂sê.

²²Á pə́ ńgə́ pɛn yǐ ḿbáatə Əsê nə́ ntɨ́ páʼ ə́ túg nə́ ndə̌ŋdəŋ pó mbimə́ yi ńtyantə̂ nə́, ńdzoŋ ḿbá məntɨ́ páʼ pə́ sog nə́ mɨ́d ə́fóg əsɨ́ pópə pətəpɔŋ ə́wə́, ḿbɨ ḿbə́ nə́ məmbɨ pə́ sog nə́ nə́ nkǐ yi ŋwaʼ nə́.

²³Pɛn waamə̂ akwaŋ pɛn túg nə́ ázɨ́d ńtə́ ḿbyáabə lə́ ńtyantə̂, ńté ńgə́ təmbɔʼ pɛn néŋə á ntɨ́ pɛn tə apɔ́g yə ndaʼ ńgə́ Əsê á yǐ zoŋ ndaʼnə əjǐ.

²⁴Pɛn túg ndɛd nə́ pɔ́pə́mɛ́ pɛ́nə. Á mə́ kwá nə́ məmbɨ mɛn, ńnəələ̂ akɔŋnə ə́ kə́ faʼ əshîʼnə.

²⁵Kɔ pɛn mɛdtə̂ mbɔ́ əwɛ̂nə á mə́ tə́ nə́ kyeetə̂ táʼə aliʼə́, ndzaŋə ándó pɨ pətsə́ pö faʼ nə́ lə́. Pɛn pɨ ńnéŋə pə́ məntɨ́ mə́ pɔ́pə́mɛ́ pɛn ńgɛn nə́ mbiə, ndzaŋə ándó pɨ zɨ nə́ ńgə́ Alěmbîə Mmaʼmbîə á tə́ ńgyǐəə ḿbáatə lə́.

²⁶Afyaʼə́nu yətsə́ á kě ə́wɨ́ pɨ ńchî páʼ á yǐ nə́ pɨ sog pətəpɔŋ mbɔʼ pɛn jîə ndə̌ŋdəŋ ḿbɨ́ ḿbɛ́d ńgɛn nə́ mbiə á mə́ ghɛd nə́ təpɔŋ nə́ məjînə̌ pô

²⁷Lə́, ndaʼə anu páʼ á tíʼ nə́ ḿbɛ́lə á mbô pó lə́ mə́ náanə nə́ ə́ túgə apɔ́g ə́ tə́ pyáb ńtsɔ́ʼtə əsáʼ páʼ ə́ tə́ nə́ ńgyǐəə lə́, pópə atyǎntə móg páʼ á yǐ nə́ tsəŋkə̂ pəənə ándó pó kǐ nə́ Əsê.

²⁸Ŋwu ntsəmə ándó páʼ a kě nə́ pənoŋkə pə́ Mosisə zóʼnə pô, pə́ yǐ jwítə yí tə kě akóolə́mə́lə́ŋ yətsə́ túg pô, páʼ təmbɔʼ pɨ pɛ́n pɛ̌ kɨ pɛ́n teelə́ pó zɨ́ ńkə́ ḿbí ńgə́ a ghɛlə̂ anu yəwə́.

²⁹Ńtíʼ ńgɛd ə́lɛ́ nə́ pəənə ándó pó wág nə́ Mɔ́ Əsê? Pɨ páʼ pó lɔg nə́ achǐə əka Əsê páʼ a kə sog nə́ pətəpɔŋ póobə́ ándó pə́pə̌ ajûtsə́? Pəənə ándó pó zɔmtə̂ nə́ Ajwiə apɔŋə́ntə́əmə, tíʼ nə́ ńkwaŋ tsɔʼə ndzaŋ atsáŋə azóobə́ á yǒ nə́ nɨ́ tə chîə!

³⁰Ńté ńgə́ pɛn jîə ŋwu páʼ a kə sóŋ nə́ ńgə́, “Maŋ yǐ kwígə, maŋ yǐ pəŋə̂,” a nə ḿbɨ ńkə́ ə́sóŋ ńgə́, “Mmaʼmbîə a yǐ tsɔ́ʼtə əsáʼ pɨ píə.”

³¹Lə́ chigə anu yə pɔ́g nə́ á mə́ kwú nə́ mbô mə́ Əsê páʼ a chî nə́ mbîə!

³²Kwúmtə nə́ ndzaŋ mənu mə́ kə chî nə́ á mbô pəənə́ á ntsɛɛmbiə. Á kə pə́ nə́ əlě pipə wɨ́ ndzaŋə ándó nkyaʼ Əsê ə́ nə nɨd nə́ á mə́m pɨ lə́, nə́ zɨ́ məngə́ʼ mimə nɨ́ nə́, lə́ məngə́ʼ mimə wɨ́ mə́ kě wɨ́ tsɛ pô.

³³Məndɛd mətsə́ mə́ kə chî ə́wɨ́ páʼ pə́ nə̈ ńdzɔmtə̂ nə́ áwə́ənə́ á əshîsaŋ ńkə́ nəələ̂ áwɨ́ nə ngə́ʼə, nə́ mətsə́ məndɛd pɨ pí ńgə́ pə́ tsaŋkə̂ áwə́ənə́ ándó pə́ tsaŋkə̂ nə́ pətsɨ́ pɨ lə́.

³⁴Pɨ nə ńjɨ́ ngə́ʼ páʼ ngaŋə́tsáŋ jɨ́ nə́ zə́ələ́, əghâ ándó pə́ kə kwá nə́ apeʼə azɨ́ nə́ wam ntə́əmə á mə́m péŋ əwɨ nə́ akɔŋtə, ńté ńgə́ nə́ jî ńgə́ nə́ pɨ ḿbɛ́d ńtúgə ajûtsə́ páʼ á pɔŋ nə́ ńtsɛ ə́lə́ələ́, ajú páʼ á yǐ nə́ mɛdnə̂ ngǎ mɔʼə́.

³⁵Lə́ pə́ ńgə́, chî nə́ tsɔʼə ndzaŋ pɨ kə chî nə́ á ntsɛɛmbi lə́ ńkɔ tə́ ḿbɔ́gə anu yitsə̌, ńgɛn nə́ mbiə á mə́ túg nə́ ntə́əmə, ńté ńgə́ wɨ́d yǐ fɛ̂ tə́kɔʼ ntsɔ́ʼəfaʼə á mbô pəənə́.

³⁶Pɨ chîə á mə́ túg nə́ awaamə́ntə́əmə, ńjî ńgə́ nə́ chî təmbɔʼ nə́ faʼə̂ anu Əsê a lɔ nə́, ńkwáalə ajú páʼ a kə laʼnə̂ nə́ áwɨ́ lə́.

³⁷Ńté ńgə́ aŋwaʼlə Əsê á sóŋ ńgə́, “Lə́ tsɔʼə mɔ́ akəmtə ndɛlə́ á pɛ́d nə́, yí páʼ a yǐ nə́ yǐ lə́, a yǐ yǐəə, a yǐ kě lɛ́ɛlə pô.

³⁸Pəənə mə páʼ pó tɨ́ nə́ ndə̌ŋdəŋ, pó yǒ néŋ ntɨ́ nə́ yí ə́ chîə mbîə. Lə́ mbɔʼ ŋwu əghɔb yətsə́ a pɨ nə́ ndzəm, maŋ yǐ ńkě kɔŋtə̂ ńté yí pô.”

³⁹Pɛn kě lə́ pɨ páʼ pɛn yǐ nə́ pɨ nə́ ndzəm ə́ tíʼ péŋ pô, pɛn túg lə́ mbimə́ ə́ tíʼ chwáalə.