Read Awing Iblus 11 Bible Online

Iblus 11 - Awing bible

Iblus 11

¹Mə túg nə́ mbimə́ lə́ mə jî nə́ tə atû tə koʼlə̂ ńgə́ anu pɛn túg nə́ akwaŋ ńtə́ ḿbyáabə, á yǐ lɔgə̂ aliʼə́, lə́ mə chígə́ nə́ jî ńgə́ mənu pɛn kě nə́ tə́ ńdzə́ənə lə́, mə́ chî ə́wə́.

²Lə́ kə ghɛd mbimə́ ngǎŋ ngoʼ pəchə́ kə túg nə́, Əsê a tíʼ ḿbímə ághóobə́.

³Lə́ ghɛd mbimə́ atûə azɛ̂nə tsɔ́ʼnə ńgə́ pə́ kə tsoŋkə̂ mbî ńdaŋ lə́ á mə́mə atséebə á fɛ́d nə́ ntso Əsê, ńdaŋ ə́lɨ́d ajú páʼ mbɔʼ pə́ zə́ənə zɨ́d pə́ kə lɔg lə́ yi páʼ təmbɔʼ pə́ kě zɨ́ ńtsoŋkə̂ ə́wə́.

⁴Lə́ kə ghɛd mbimə́ Abɛɛlə a fɛ̂ əpúmə afyaʼə́nu əpíə á mbô Əsê ə́ chínə ńtsɛɛlə̂ pi Kɛnə. Ńdaŋə̂ á mə́m mbimə́ əjǐ a kə ghɛd Əsê a lɔgə̂ yə́ ándó ŋwu páʼ a tɨ́ nə́ ndə̌ŋdəŋə́, ńté ńgə́ Əsê nə́ nkɔ̌ʼmbɨ yə́ a kə pí əpúmə afyaʼə́nu əpíə. Ńdaŋə̂ á mə́m mbimə́ Abɛɛlə a pɛ́lə ńtséebə páʼ a kə pǎ nə́ tə ńkwû lə́.[6]

⁵Lə́ kə ghɛd mbimə́ ńgə́ kɔ Enokə a kwûə, pə́ kə lɔgə̂ yí ńkɔ́ʼə á mbô Əsê, ŋwu tsə̌ á kě yí pɨ ńdzɨ́ pô, ńté ńgə́ Əsê a kə lɔgə̂ yí ńkɔ́ʼə. Aŋwaʼlə Əsê á sóŋ ńgə́ pə́ kə jǐ tə́ lɔgə̂ Enok ə́ kɔ́ʼ ghɛn nə́ yə́ á nəpó lə́, á pěʼ ńgɛd mbɨ Əsê ə́ pɔŋə̂

⁶Ŋwunə á kě nə́ mbimə́ túg pô á pyádnə ńtyantə̂ á mbô yə́ á mə́ ghɛd nə́ anu Əsê kɔŋ nə́. Ńté ńgə́ ŋwu ntsəmə ándó ä yǐ nə́ á mbô Əsê a shib ńtúg mbimə́ ńgə́ Əsê a chî ə́wə́, ńkə̈ ə́fɛ̂ ntsɔ́ʼəfaʼ pəənə́ ándó pö chwa nə́ yə́.

⁷Lə́ kə ghɛd mbimə́ Nwâ a zóʼə akwantə Əsê ńté mənu mə́ yǒ nə́ lɔgə̂ aliʼə́ á mbiə, mənu páʼ a kě nə́ tə́ ńdzə́ənə pô. A kə zóʼnə Əsê, ńkóomə apáŋ páʼ pópə ngwud əjǐ kə kwú nə́ á mə́m ə́wɨ́ ńchwáalə. Ńdaŋ ə́lɨ́d pə́ kə tsəŋkə̂ mbîə, Nwâ tíʼ ńkwá mə tɨ́ nə́ ndə̌ŋdəŋə́ á mbô Əsê páʼ mə́ laŋ nə́ lə́ á mə́m mbimə́.

⁸Lə́ kə ghɛd mbimə́ Ablaam a zóʼnə Əsê əghâ ándó Əsê a kə sóŋ nə́ nə́ yí ńgə́ a fɛ́d ńgɛnə̂ á mə́mə aláʼ a kə laʼnə̂ nə́ yi ńgə́ a yǐ fɛ̂ nə́ yí lə́. Á tíʼ fɛ́lə aláʼə atú yí ńkě jîə aliʼ páʼ a ghɛn nə́ ə́wɨ́ pô.

⁹Ńdaŋə̂ á mə́m mbimə́ a nə ńchîə ándó ngəənə á aláʼə atú Əsê kə laʼnə̂ nə́ yí wɨ́ lə́. A kə̈ chîə á mə́m məntaŋə́, tsɔʼə ándó Azig pó Jekɔb páʼ Əsê a kə kə́ nə́ fɛ̂ ndaʼnə zəənə́ á mbô pó lə́.

¹⁰Ńté ńgə́ Ablaamə a nə ńtə́ ḿbyáabə tə́kɔʼ tɔ̂ŋ páʼ Əsê a kə lɔ́btə nə́ áwɨ́d ńkə́ ḿbóomə, tə́kɔʼ tɔ̂ŋ páʼ á túg nə́ əchîndɛ̂ páʼ lə́ pɔ́ nə́ Əsê.

¹¹Lə́ nə́ ńgɛd mbimə́ Sala á chî nə́ móonə, páʼ ndɛd əjǐ kə pǎ nə́ tə ńdaŋə̂ á mə́ chî nə́ nə́ mɔ́ lə́. A kə jî ńgə́ Əsê yǐ faʼə̂ anu a kə sóŋ nə́ ńgə́ a yǐ faʼ ə́ tíʼ lɔʼkə̂ ndaʼnə əjǐə.

¹²Ablaam a nə ḿbǎtə ńdɛn tə ńtíʼ ńchîə á ntso nəwû lə́, yí táʼ ŋwu, a kə fɛ̂ ngwud páʼ ə́ kə nɨ́ nə́ tə ńchîə ándó pɔ́ pə́ sáŋ pə́ chî nə́ atǐə, ńkə́ ńnə́ənə ándó wáakə́ páʼ á chî nə́ á nkǎŋkǐ təmbɔʼ pə́ kě sháŋ pô.

¹³Pɨ pɨ pətsəm pə́ kə kwû lə́ á mə́m mbimə́. Pó nə ńkě ajú páʼ Əsê a kə laʼnə̂ nə́ ághɔ́b əwɨ́ lə́ kwá pô, lə́ ḿbə́ ńtɨ́ tsɔʼə á ndi yi sɛ ńdzə́ənə á pɨ́d ńkə́ ḿbímə pə́ələ́, ńtíʼ ə́sóŋə á əshîsaŋ ńgə́ pó lə́ pəghəənə ńkə́ ḿbə́ pɨ pə́ atúmə á ndu mbîə.

¹⁴Pəənə ándó pó tsáb nə́ nə́ ndú ghɛn, pó ghɛlə̂ á ŋwaʼ ńgə́ pó tə́ náŋə aláʼ páʼ á pə́ nə́ azóobə́.

¹⁵Pó nə ńkě pɨ ńtə́ ńkwaŋə̂ aláʼ pó nə fɛ́d nə́ əwɨ́ lə́ pô, təmbɔʼ pó nə ńtə́ ńkwaŋə̂, tə ḿbə́ pó nə ḿbɨ́ ńtúg əseenə á mə́ pɨ nə́.

¹⁶Aláʼ pó kə pyáb nə́ lə́, á kə pɔŋ ńtsɛɛlə̂ yə wɨ́ ńté ńgə́ lə́ kə pə́ yə nəpóolə, ńdaŋ ə́lɨ́d Əsê a kě əsɨ́ yitsə̌ túgə á mə́ zóʼ nə́ pó fóŋə yí nə́ Əsê əzɔb pô, ńté ńgə́ a tsoŋkə̂ tə́kɔʼ tɔ̂ŋ ńdɔʼkə̂ á mbô pó.

¹⁷Lə́ nə ńgɛd mbimə́ Ablaam a lɔgə̂ a mɔ́ əyǐ Azig ə́fyaʼə́nu əwɨ́ nə́ ndɛd páʼ Əsê a kə mɔ nə́ yí lə́. Ablaamə a nə ḿbə́ lə́ ŋwu páʼ Əsê a kə ghɛd nə́ ndaʼnə zə́ á mbô yí, lə́ a pɛ́d ḿbímə á mə́ lɔg nə́ ndaʼ mɔ́ əyǐ ə́fyaʼə́nu ə́wə́.

¹⁸Əsê a nə sóŋə á mbô yí ńgə́, “Gho yǐ laŋ lə́ á ndzəm Azig ə́ túg ngwud páʼ maŋ nə ńdaʼnə̂ nə́ gho əwɨ́ lə́.”

¹⁹Ablaam a kə jî ńgə́ təmbɔʼ Əsê a júmkə Azigə á nəwûə, nə́ ndú yitsə̌ a kə ḿbɨ ńkwáalə yí páʼə á fɛ́d nə́ á mə́m nəwûə.

²⁰Lə́ nə́ ńgɛd mbimə́ Azigə, a tíʼ sóŋ ńgə́ Jekɔb pó Esau yǒ túgə afoʼə.

²¹Lə́ nə ńgɛd mbimə́ Jekɔbə a tə́əmə á mə́ kwû nə́ ə́sóŋ ńgə́ pɔ́ pə́ Jɔsɛf pó yǒ túgə afoʼə. A kə zə́ʼnə á ndu mbaŋ əjǐ ńtíʼ ńgóʼkə Əsê.

²²Lə́ kə ghɛd mbimə́ Jɔsɛf a tə́əmə mə́ kwû nə́ yí ńtíʼ ńtséebə anu ńté ndzaŋ páʼ pɔ́ pə́ Islɛl pó yǒ nə́ fɛ́lə aláʼə Ijibə, ńtíʼ ə́fiʼtə̂ anu páʼ təmbɔʼ pə́ ghɛd nə́ akwûə ajíə.

²³Lə́ kə ghɛd mbimə́ pətǎ pə́ Mosisə pə́ lɔgə̂ yí ńgɛn ńdɔʼkə̂ nə́ sáŋ zɛ́n teelə́ əghâ ándó pə́ nə ḿbî nə́ yə́. Pó kə zə́ənə á pə́ mɔ́ nəpɔŋə a chî nə́ nə́ yə́, pó kǐə ághóobə́ á mə́ zóʼnə nə́ anu əfo aláʼ wə́ a sóŋ nə́ tə ńkě pɔ́g pô.

²⁴Lə́ kə ghɛd mbimə́, əghâ páʼ Mosisə a nə ńkwíŋ nə́ lə́ ńkǐə yí ńgə́ kɔ pə́ fóŋə yí nə́ mɔ́ mɔ́ əfo Fɛlo yi məngyě.

²⁵A nə ńtsɔ́ʼ mbɨ əjǐə á mə́ zɨ́ nə́ ngə́ʼə á mə́m pɨ pə́ Əsê ńtsɛɛlə̂ á mə́ zóʼ nə́ əshîʼnə á mə́m təpɔŋ nə́ akəmə ndɛlə́.

²⁶A kə zɨ́ ńgə́ təmbɔʼ pə́ wágə yí ńté pə́ Yi páʼ Əsê Tsəʼ nə lə́, á pɔŋ ńtsɛɛlə̂ apeʼə atsəm páʼ a chî nə́ aláʼə Ijibə, ńté ńgə́ a nə ńtə́g əmə́g mí nə́ ńtsɔ́ʼə afaʼ páʼ ə́ pɛ́d nə́ a mbiə.

²⁷Lə́ kə ghɛd mbimə́ Mosisə a fɛ́lə aláʼə Ijib tə ńkě pɔ́g ńgə́ təmbɔʼ əfo aláʼə a záŋ ndě nə́ yí pô. A kə tɨ́ ńtyantə̂ ńté ńgə́ a zɨ́ Əsê páʼ pə́ kě nə́ yí zə́ənə pô.

²⁸Lə́ kə ghɛd mbimə́ Mosisə a tə́ ńgɛlə̂ Alě Ndzáʼkə ńtíʼ sóŋ ńgə́ pə́ fyáamə achǐə á məntso mə́ ndɛ̂ ńjî ńgə́ Ntseŋndɛ̂sê yi Nəwûə a yǐ ńkě pɔ́ pə́ nətû pipə́ mbyâŋnə pə́ pɨ pə́ Islɛlə jwítə pô.

²⁹Lə́ kə ghɛd mbimə́ pɔ́ pə́ Islɛl pó túmə Paŋ Nə́ənə á pə́ ándó pó nyinə̂ á ndu ndəsê, lə́ əghâ ándó pɨ pə́ Ijib pó nə ńtə́ nə́ ńdoonə̂ á mə́ tú nə́ azɔ́b lə́ ḿmɛ́dkə á nkǐə.

³⁰Lə́ kə ghɛd mbimə́ nkáʼ páʼ pə́ kə pɔ́ nə́ á mbəəmə aláʼə Jɛliko ə́ kwɛdnə̂ á ndəsê əghâ ándó pɔ́ pə́ Islɛl pó nə ḿbɛ́n nə́ ńdíblə á wɨ́d əlě mbîə asaambɛ̂ lə́.

³¹Lə́ nə ńgɛd mbimə́ Laʼab páʼ a kə pə́ nə́ akwɛlə lə́ a kě kwû pópə pəənə ándó pó nə ńkǐ nə́ á mə́ zóʼnə nə́ Əsê lə́ pô, ńté ńgə́ a nə ńdɔg pɔ́ pə́ Islɛl pó kə ghɛn nə́ á mə́ jwə́ʼtə nə́ əliʼ lə́ á ndɛ̂ yí ándó pəghɨ píə.

³²Təmbɔʼ maŋ ghɛn nə́ mbi? Ndɛd kě ə́wə́ á mbô maŋ chîə á mə́ tə́ nə́ sóŋə anu ńté Gidion nə́ Balag nə́ Samsən nə́ Jefta nə́ Debilə nə́ Samuɛl pópə Məntúmə́sê pô.

³³Ńdaŋə̂ á mə́m mbimə́ pó kə póʼnə pəfo pə́ aláʼ pətsə́ ńtsɛɛlə̂ ághóobə́. Pó kə faʼə̂ anuə á koʼnə̂ nə́ ńkə́ ńkwáalə ajú Əsê a kə laʼnə̂ nə́ ághóobə́; pó kə tsɛ́d məntso mə́ pəsáambaŋə,

³⁴ḿbə́gtə məmóg mimə tyantə̂ nə́, ńkə́ ńdə́ʼ pə́ kě ághɔ́b nə́ məŋwíŋ mə́ ntso jwítə pô. Pó kə pwɔ́dkə ńgyǐ ḿbɨ ńtyantə̂, ḿbyádnə ńjîə apóʼnə ntso, ḿmaʼ ntso ńtsɛ ngaŋə́maʼə́ntso yi ətú pi ndaʼə.

³⁵Ńdaŋə̂ á mə́m mbimə́ pə́ júmkə pəlim pə́ pəngyě páʼ pó kwû nə́ ə́fɛ̂ á mbô pô. Pə́ kə nɨd pətsə́ nə́ ngə́ʼə, pó kǐə ághɔ́b ńgə́ kɔ pə́ fógə ághóobə́ atsáŋə, pó kə ghɛd ə́lɨ́d lə́ ńjî ńgə́ pó yǐ ńjúmnə nəwû ńtúg nchîmbî ə́ tsɛ nə́ yi ntsɛɛmbiə.

³⁶Pə́ kə nyegnə̂ pətsə́ ḿbɨ ə́shúmə ághóobə́, ńkwúlə pətsə́ nə́ məŋkɛd mə́ atəənə́ ńdɔg ńgɛnə̂ atsáŋə.

³⁷Pə́ kə tə́mtə ághɔ́b nə́ məngɔʼə, ə́sə́ələ pətsə́ əkəm pɛ̌, ńjwítə pətsə́ nə́ məŋwíŋ mə́ ntsoolə. Pó kə kéelə ńnyinə̂ ńgwê lə́ ngwub mbéŋ ndɔ́ŋ kɨ ngwub mbéŋ ndzɛlə, ḿbə́ pəpóŋə, pə̈ tsaŋkə̂ ághóobə́ ḿbəənə̂ ńnəələ̂ ághɔ́b nə́ ngə́ʼə.

³⁸Mbî kə kě á mbô pó koʼnə̂ pô! pó tíʼə̈ ńkéelə ńnyinə̂ á ndu pəkɔŋ pə́ məŋkwâʼlə̌ pópə məsəgə́ ándó ngaŋə́kəələ́ ntsoolə, ńdê ághóobə́ á mə́m əghəʼ ngɔʼ pópə məngɔ́lə á ndəsê.

³⁹Pə́ kə pǎtə ńtséʼ mbimə́ pɨ pɨ lɛ titi lə́, pó pə́ ńkě ajú páʼ pə́ laʼnə̂ nə́ lə́ kwá pô,

⁴⁰ńté ńgə́ Əsê a kə lɔ́btə chigə tə́kɔʼə anu ńdɔʼkə̂ ńté áwɛ̂n páʼ á pɔŋ nə́ ńtsɛɛlə̂ yi pɛn kwaŋ nə́. Akwaŋə yə́ á kə pə́ lə́ ńgə́ a yǒ noolə̂ áwɛ̂n po lə́ nɔd nə́ ghɛd pɛn koʼnə̂ ńgɛn fyagə̂.