Read Awing Iblus 12 Bible Online

Iblus 12 - Awing bible

Iblus 12

¹Ńgɛn nə́ pɛn, pɛn túgə tə́kɔʼə apoŋə pɨ zəənə́ aliʼə́ nə́ lɛ̌ pó líblə nə́ áwɛ̂n, pɨ pó zɨ́ nə́ ńkə́ ḿbí ńgə́ lə́ ndə̌ŋdəŋə́. Lə́ pə́ ńgə́, pɛn myaʼ mənu mətsəmə ándó mə́ kɨ́ʼtə nə́ áwɛ̂nə, ḿbɨ ńkə́ ḿmɛdtə̂ təpɔŋ wə́ páʼ á chigə nə́ ńtyantə̂ áwɛ̂nə mə́ myaʼ nə́ lə́, ńtíʼ ńgwam ntə́əmə á mə́ kə nə́ ndə̌ páʼ ə́ chî nə́ á mbi pɛn lə́.

²Pɛn tə́g əmə́g mɛn nə́ Yeso, páʼ a pə́ nə́ ŋwu páʼ mbimə́ əzɛn ə́ zə́ʼnə nə́ nə́ yí ə́fɛ́lə á nəchwaakənə́ tə ńgɛn ńdwigtə̂. A kə kě tsɔ́ʼ mbô wɨ́ ńté atǐə apagləpaglə pô! a kə pɨ ńgwam lə́ á pə́ ntɨ́ ńté akɔŋtə páʼ a nə ńtə́ nə́ ḿbyáabə yə́. A kə kě anu yətsə́ kwaŋ ńté əsə́ənə ándó ə́ chî nə́ wɨ́ á mə́ kwû nə́ atǐə apagləpaglə pô; Nə́ pə əghâ nə́ a náanə á əlá apô yə təənə aləŋənə́foonə Əsê.

³Kwaŋ nə́ mənu páʼ a kə laŋ nə́ á mə́m ə́wə́, ndzaŋə ándó a kə wam nə́ ntə́əmə á mə́m kəpa pɨ pə́ təpɔŋ pó kə nɨd nə́ yə́! Ńdaŋ ə́lɨ́d kɔ nə pí mbɨ əzɨ ə́ pwɔ́d pɨ myaʼə̂.

⁴Á mə́m ngə́ʼ əzɨ pɨ zɨ́ nə́ zɨ́d ńté təpɔŋ, pɨ kě kə́ póʼnə tə koʼə̂ aliʼ pə́ jwítə nə́ áwɨ́ pô.

⁵Nə́ ləgnə̂ áwə́ənə́ atsáb páʼ Əsê a tsáb nə á mbô pəənə́ á mə́ lɔg nə́ ńnéŋ ntɨ́ ə́wɨ́ wə́ ándó pɔ́ pí lə́?[7] “Móonə mə, jwə́ʼtə əghâ ándó Mmaʼmbîə a tə́ nə́ ńtə́gtə gho, Kɔ mbô mó mə́ póolə á əghâ á tə́ nə́ ə́sáʼə gho nə́ ndú yi záŋ nə́.

⁶Ńté ńgə́ Mmaʼmbîə a tə́gtə ŋwu ntsəm páʼ a kɔŋ nə́ yí nə́ ndú yi záŋ nə́, ńkə́ ńnéŋə atsáŋə a mbɨ ŋwu ntsəm páʼ a pí nə́ yí ńgə́ lə́ mɔ́ əyǐə.”[8]

⁷Túg nə́ asəgə́ndzɔʼə á mə́m ngə́ʼ ntsəm nə́ chî nə́ á mə́m ə́wɨ́, ńdɔg ńgə́ lə́ ndú yi záŋ nə́ ándó tǎ á tə́gtə nə́ áwɨ́ wə́. Məngə́ʼ nə́ laŋ nə́ á mə́m ə́wɨ́ mə́ nəələ̂ lə́ ńgə́ Əsê a túgə áwɨ́ lə́ ándó pɔ́ píə. Əwə móonə a chî ə́wɨ́ páʼ tǎ əyǐə a kě nə́ yí tə́gtə nə́ ndú yi záŋ nə́ pô?

⁸Təmbɔʼ á chîə áwɨ́ tə́ tə́gtə nə́ ndú yi záŋ nə́ ándó a tə́gtə nə́ pɔ́ pí pətsəm pô, á pə́ ńgə́ pɨ kě lə́ pî əyǐ pô, pɨ lə́ pə pîə məyeŋə́.

⁹Ńgɛn nə́ pətǎ pɛ́nə á ndu mbî, pó kə̈ tə́gtə áwɛ̂n nə́ ndú yi záŋ nə́, pɛn kə̈ ńdzóʼnə ághóobə́. Pɛn kě pɨ ḿbyádnə ńchîə mə́ zóʼnə nə́ Tǎ əwɛ̂n yə ajwi lə́ zóʼnə nə́ ńjî ńgə́ pɛn chîə á mbî?

¹⁰Pətǎ pɛ́nə á ndu mbî pó kə̈ tə́gtə áwɛ̂n nə́ ndú yi záŋ nə́, nə́ mɔ́ akəmə ndɛlə́, ńtə́gtə pə́ nə́ ndú páʼ ə́ yǐ nə́ pɔŋə̂ pə́ ághóobə́, lə́ Əsê a pə́ ńtə́gtə áwɛ̂n lə́ nə́ ndú páʼ ə́ pɔŋ nə́ á mbô pɛnə̂, ńjî ńgə́ pɛn kə́ ŋwaʼə̂ ándó yə́.

¹¹Á pə́ əghâ ándó pə́ tə́ nə́ ńtə́gtə áwɛ̂n nə́ ndú yi záŋ nə́ lə́, á chîə á mbô pɛn əghâ ə́wə́ ándó anu təmbɔʼ á ghɛd pɛn sɔbnə̂, ńkě kɔŋtə̂ kɔŋtə̂ nə́ pô. Lə́ ndzaŋ ndɛd yi nə́ ńdaŋ lə́, pəənə ándó pə́ tə́gtə nə́ ághɔ́b nə́ ndú ghɛn, pó túg ntsɔ́ʼəfaʼ ə́ túg nə́ mbwɔ́dnə páʼ ə́ pə́ nə́ mə́ tɨ́ nə́ ndə̌ŋdəŋə́.

¹²Ŋáŋkə nə́ mbô mɨ́ mə́ ká nə́ lə́, ḿbɨ shǐ məkwəʼtə́ mɨ́ mə́ pɛ́nkə nə́ lə́;[9]

¹³Ghɛn nə́ nə́ mbiə á mə́ nyi nə́ nə́ əlaŋə́ páʼ ə́ tɨ́ nə́ ndə̌ŋdəŋə́, ńjî ńgə́ kɔ ako yə neʼ nə́ á pə́ʼnə, á féŋtə féŋtə nə́.[10]

¹⁴Náŋ ndú ətsəmə á mə́ chî nə́ nə́ mbwɔ́dnə pɨ pə́ ŋwu ntsəmə, ńkə́ ńnáŋ ndú ətsəmə á mə́ chî nə́ nchîmbî páʼ ə́ ŋwaʼ nə́, ńté ńgə́ ŋwu tsə̌ a yǒ kě Mmaʼmbî zɨ́ tə ghə́ a ŋwaʼ pô.

¹⁵Zɨ́ nə́ ńgə́ kɔ ŋwu tsə̌ myaʼə̂ apɔŋə́ntə́əmə Əsê, kɔ ŋwu tsə̌ á mə́m pəənə́ a chîə ándó atǐ yə lwǐ nə́ páʼ mbɔʼ zə́ələ́ á kɔ́ʼ, á lɔg ndíʼ əyí ńgyǐ nə́ məngə́ʼ mimə nɨ́ nə́[11].

¹⁶Zɨ́ nə́ ńgə́ kɔ ŋwu tsə̌ á chîə ándó Esau páʼ a nə ńchî nə́ á mə́m ndzɔʼə́ tə apímnə kɨ ńkě Əsê kə́ ḿbɔ́g pô, yí páʼ a kə fi nə́ aliʼə́ ajíə ándó mɔ́ nətû ńté akáŋə́mə́jîə.

¹⁷Nə́ jî ńgə́ á kə pɨ ńnáanə tə ńkoʼ ndɛd yitsə̌ ńtə́ ńdoonə̂ mə́ kwá nə́ afoʼ tǎ əyǐə a kə fɛ̂ nə́ nə́ yí lə́, pə́ pə́ ńkəmə̂ yí ńté ńgə́ a kə kě ndú yitsə̌ túgə á mə́ kwúblə nə́ anu páʼ a kə ghɛd nə́ pô, a kə pǎ nə́ tə ńdoonə̂ zɨ́d nə́ nəkyéŋə á mə́g yí lə́.

¹⁸Pɨ kě yǐ lə́ ándó pɨ pə́ Islɛl páʼ pó kə ghɛn nə́ ńtéekə ajú páʼ təmbɔʼ pó zóʼə á mə́m na mbɨ pô; ńtéekə nkwəənə Sinayi páʼ móg kə̈ kɛ́d nə́ á ndu ə́wə́, ńkə́ ńtéekə ndzəmə́, pó shíshí alə́m nə́ ntɨ sə́mə,

¹⁹ńtéekə ngye nəpaŋ ḿbɨ ńkə́ ńtéekə ngye ŋwunə. Əghâ ándó pó nə ńdzóʼ nə́ ngye ŋwu lə́, ḿbóʼmbô ə́sóŋ ńgə́ pó kě kɔŋə̂ á mə́ pɨ nə́ zóʼ nkɨ yitsə́ pô,

²⁰ńté ńgə́ á kə tyantə̂ á mbô pó á mə́ zóʼ nə́ ətsáb pə́ kə tsáb nə́ nə́ pó páʼ zə́ələ́ kə̈ sóŋ nə́ ńgə́, “Təmbɔʼ á pə́ pə́ na yətsə́ páʼ ə́ kwum nə́ nkwəənə pə́ shib ńtə́mtə zɨ́d nə́ məngɔʼ ńjwítə.”

²¹Pó kə zə́ənə aliʼ yə wɨ́ tə á néŋə apɔ́gə á məntɨ́ pó, tə Mosisə a sóŋ ńgə́, “Maŋ pɔ́g tə ńtíʼə ḿbɛ́nkə!”

²²Nə́ pɨ ńgyǐəə áwɨ́ lə́ pə́ á Nkwəənə Zayɔnə, á tə́kɔʼ tɔ̂ŋ Əsê, Əsê páʼ ə́ chî nə́ mbîə. Lə́ aliʼ páʼ pə́ fóŋ nə́ nə́ Jɛlusalɛm nəpó lə́, páʼ pətseŋpə́ndɛ́pə́sê pə́ chî nə́ ə́wɨ́ ńkoʼ pə tɔsə ńkyeetə̂ ńkɔŋtə̂.

²³Pɨ yǐ lə́ á nkyeetə mɔ́ nətû Əsê, pí páʼ pə́ ŋwaʼlə̂ nə́ məlɛ́n móobə́ á nəpóolə. Nə́ yǐ lə́ á mbô Əsê páʼ ə́ pə́ nə́ ńtsɔ́ʼtə əsáʼ ŋwu ntsəmə, ńkə́ ńgyǐ lə́ á mbô əjwi pɨ pipə əshîʼnə páʼ pə́ ghɛd nə́ pó koʼnə̂ ńgɛn ə́fyagə̂.

²⁴Nə́ yǐ lə́ á mbô Yeso páʼ a kə tyáŋtə nə́ əka yi fîə, ḿbɨ ńdzoŋ lə́ achǐ pə́ kə fyámtə nə́, zə́ələ́ ä tséebə ńgyǐəə nə́ apɔŋə́ntə́əmə, ńtsɛɛlə̂ achǐə Abɛɛlə.

²⁵Lɔg nə́ ndɛd, kɔ nə́ kǐə á mə́ jwə́ʼtə nə́ ngye ŋwu páʼ ä tsáb nə́. Pɨ páʼ pó kə kǐ nə́ ághóobə́ á mə́ jwə́ʼtə ngye ŋwu wə́ páʼ ä fɛ̂ nə́ nkɨ Əsê lə́, pó nə ńkě chî təmbɔʼ pó lə́ʼ pô. Ndú yətsə́ ə́ yǒ kě kwéʼnə chî təmbɔʼ pɛn lə́ʼ pô, páʼ təmbɔʼ pɛn kǐəə atséebə ŋwu páʼ a lǒo nə́ á nəpó lə́ pô.

²⁶Ngye əjǐ ə́ nə ńchiʼ mbî nə́ ndɛd zɨ́d zə̂, nə́ pə́ əghâ nə́ a pɛn ńdaʼnə̂ ńgə́, “Maŋ kě lə́ tsɔʼə mbî ngǎ yitsə̌ yǐ chiʼ pô maŋ yǐ kə chiʼ nəpóolə.[12]”

²⁷Aliʼə́ atsáb zɨ ńgə́, “ngǎ yitsə̌” a lánə nɨd lə́ ńgə́, əpú páʼ pə́ kə tsoŋkə̂ nə́ pə́ələ́, pə́ chiʼ ə́fógtə, ńjî ńgə́ əpú mbɔʼ ə́ kě chiʼnə̂ pô ə́ tíʼ ḿbɛ́lə.

²⁸Pɛn tíʼ ə́fɛ̂ ndǎ ńté ńgə́ pɛn kwáalə aliʼənə́fɔ páʼ mbɔʼ pə́ kě zɨ́d chiʼ pô. Pɛn fɛ̂ ndǎ ńkə́ ńgóʼkə Əsê nə́ ndú páʼ a kɔŋ nə́, nə́ ngóʼkə pópə apɔ́gə.

²⁹Ńté ńgə́ Əsê əzɛ̂n lə́ móg páʼ ə́ tsəŋkə̂ nə́.