Read Awing Iblus 13 Bible Online

Iblus 13 - Awing bible

Iblus 13

¹Ghɛn nə́ nə́ mbiə á mə́ tə́ nə́ kɔŋə̂ məmbɨ mə́ənə́ ándó pɔ́ pə́ Klisto.

²Kwúmtə nə́ á mə́ tə́ nə́ lɔgə̂ pəghəənə a məláʼ pəənə́. Pətsə́ pɨ pə́ kə faʼ ə́lɨ́d tə ńdɔg pətseŋpə́ndɛ́pə́sê á məláʼ pô ńkě jî pô.

³Kwúmtə nə́ pɨ páʼ pó chî nə́ á nkáʼə́tsáŋə, ándó lə́ chî pɨ̌ po á nkáʼə́tsáŋ lə́. Kwúmtə nə́ pɨ páʼ pó tə́ nə́ ńdzɨ́ ngə́ʼə, ándó lə́ zə́ənə pɨ̌ po ńdzɨ́ ngə́ʼ lə́.

⁴Ŋwu ntsəmə ándó a pɛ́d nə́ tə ńdzɔ́ʼə a ghóʼkə mbɨ əjǐə, ŋwu mbyâŋnə pó ngwě əyǐ shib ńchîə mə́ túg nə́ məmbɨ mɔ́b nə́ ntɨ́ əghɔ́b ətsəmə. Əsê a yǒ tsɔ́ʼtə əsáʼ pɨ páʼ pö zɔ́ʼ nə́ ndzɔʼə́ tə apímnə ńkə́ ḿbə́ nə́ yi pɨ páʼ pó jî nə́ mə̂ghabə.

⁵Kɔ nə́ pímə anuə akɔŋə́nkéebə á chîə á mə́m nchîmbî əzəənə́, ajúmə atsəm pɨ túg nə́, a koʼnə̂ á mbô pəənə́. Ńté ńgə́ Əsê a sóŋ ńgə́, “Maŋ láʼ kě áwɨ́ mɛdtə̂ pô; Maŋ láʼ kě áwɨ́ ləgnə̂ pô.”

⁶Ńdaŋ ə́lɨ́d təmbɔʼ pɛn sóŋ tsɔʼə tə apɔ́g ńgə́, “Mmaʼmbî lə́ nkwáalə mə, təmbɔʼ maŋ kě pɔ́g pô. Təmbɔʼ ŋwunə a ghɛlə̂ akə̂ nə́ maŋə?”

⁷Kwúmtə nə́ mətû mə́ənə́, pi páʼ pó nə náŋkə nə́ nkɨ Əsê á mbô pəənə́. Kwúmtə nə́ ndzaŋ nchîmbî əzɔb kə chî nə́ pó pɔŋə̂ kwûə, ńtíʼ fiʼkə̂ ndzaŋ pó nə ńtúg nə́ mbimə́ nə́ Əsê.

⁸Yeso Klisto a chî lə́ tsɔʼə ndzaŋ a kə chî nə́ á əzoonə́ pó ə́sɛ̂n tə mɛdnə̂.

⁹Kɔ pɨ pí pɨ pó tə́ ńdzéʼkə áwɨ́ nə́ mbǒʼḿbóʼ məntəgə́ mə̈ ghɛd nə́ nə́ fankə̂ ndú əwə́ənə́, a pɔŋ ńgə́ məntɨ́ mɛ́n mə́ tɨ́ ńtyantə̂ nə́ apɔŋə́ntə́əmə Əsê, ńkě pə́ á mə́ tə́ nə́ zóʼnə məntəgə́ ńté məjî pô, ńté ńgə́ pɨ páʼ pó nə̈ ńdzóʼnə nə́ məntəgə́ mɨ́d mə́, mə́ nə ńkě ághɔ́b kwá pô.

¹⁰Pəpépə́sê páʼ pö faʼ nə́ á mə́m aliʼə́ghóʼkə́sê Pəjus pó kě túg mətəənə á mə́ jî nə́ ajûtsə́ páʼ pə́ fyaʼ nə́ Əsê ə́wɨ́ á nəpá pɛn pô.

¹¹Mbêsê yi Ngweŋ Pəjusə ä yǐəə nə́ achǐə məna Chigə Aliʼ yə Ŋwaʼ nə á mə́ fɛ̂ nə́ zə́ələ́ ándó afyaʼə́nu ńté pətəpɔŋə, lə́ na mbɨ məna zɨ́d zə́ pə̈ toonə̂ lə́ á ndzəmə apeŋ pə́lə́glə́.

¹²Ńté zɨ́d zəənə́ anu, Yeso a nə ńkə́ ńkwû lə́ á ndzəmə apeŋ tə́kɔʼ tɔ̂ŋ ńjî ńgə́ a sogə̂ təpɔŋ pɨ nə́ ajíə achǐə.

¹³Lə́ á pə́ ńgə́ pɛn fɛ́d ńgɛnə̂ apeŋə́ á ndzəm pə́lə́glə́ ńkə́ ńkwá məndzɔmnə páʼ a kə kwá nə́ lə́.

¹⁴Ńté ńgə́ tə́kɔʼ tɔ̂ŋ yitsə̌ á kě ə́wɨ́ chî páʼ a mɛdnə̂ nə́ á mbô pɛnə̂ á ndú ndəsê pô, pɛn náŋə lə́ tə́kɔʼ tɔ̂ŋ páʼ á chî nə́ mə́ yǐ nə́ lə́.

¹⁵Ńdaŋə̂ á ndzəm Yeso pɛn chîə á mə́ tə́ nə́ ghɛnə̂ nə́ mbi ə́ ghɛlə̂ afyaʼə́nu ŋ́ŋáŋkə Əsê, á chî lə́ ándó nənta nə́ atǐ nə́ əkwub ntso páʼ nə́ sóŋ nə́ anu ńté əlɛ́n yə́.

¹⁶Kɔ nə ləgnə̂ á mə́ tə́ nə́ ghɛd əshîʼnə ə́ kə́ tə́ gheebə̂ apô á tətɨ pəənə́, ńté ńgə́ ndɛn mənu ghɛn lə́ ə́fyaʼmə́nu páʼ ə̈ ghɛd nə́ mbɨ Əsê pɔŋə̂.

¹⁷Zóʼnə nə́ mətû mə́ənə́ ńkə́ ńdzoŋ mənu pö sóŋ nə́ ńgə́ pɨ faʼə̂. Pó tə́ ḿbyáabə məntɨ́ mɨ́ tsɔʼə tə jwitə̂ ńté ńgə́ pó yǒ fiʼtə̂ á mbô Əsê ndzaŋ pó nə faʼ nə́. Təmbɔʼ pɨ tə́ ńdzóʼnə ághɔ́b pó faʼə̂ afaʼə azɔ́b nə́ akɔŋtə, mbɔʼ á chî ə́lɨ́d pô, pó tíʼə ə́faʼə̂ nə́ afɨnə, zə́ yǐ ə́ kě áwɨ́ nə́ anu yətsə́ kwá pô.

¹⁸Ghɛn nə́ nə́ mbiə á mə́ chaʼtə̂ nə́ Əsê atû pəgə́. Pəg pyádnə ńjî ńgə́ məntɨ́ mə́g mə́ ŋwaʼ ńté ńgə́ pəg loonə̂ á mə́ faʼ nə́ anu páʼ á koʼnə̂ nə́ əghâ ntsəmə.

¹⁹Maŋ lánə ńchígə́ ḿbóʼmbô á mbô pɨ ńgə́ nə́ tə́ ńchaʼtə́sê ńgə́ təmbɔʼ Əsê a pɨ ńdzaŋkə̂ ḿbɨnkə̂ mə á mbô pəənə́.

²⁰Nə́ əghâ nə́, ńgə́ Əsê mbwɔ́dnə páʼ ə́ kə júmkə nə́ Mmaʼmbî Yeso á nəwû, yí páʼ a pə́ nə́ tə́kɔʼ ntseŋnə məmbéŋ, ńdaŋə̂ á mə́m achǐə əka yi mɛdnə̂ nə́,

²¹ńgə́ a fɛ̂ ajú yə əshîʼnə atsəmə á mbô pɨ ńjî ńgə́ təmbɔʼ nə́ faʼə̂ anu páʼ ä lɔ nə́. Ńgə́ á laŋə̂ á mə́m Yeso Klisto ə́faʼə̂ anuə atsəmə á mə́m pɛn páʼə á pɔŋ nə́ yə́. Ńgə́ Nəgháʼə á pə́ yi Klisto tə ńgɛn ḿmɛdnə̂! Amɛn.

²²Pəlimə́ mə, maŋ póʼmbô á mbô pɨ ńgə́ nə́ wam ntɨ́ ńjwə́ʼtə atsáb zɨ páʼ a yǐ nə́ néŋ ntɨ́ əwə́ənə́, ńté ńgə́ aŋwaʼlə zɨ maŋ ŋwaʼlə̂ nə́ á mbô pɨ lə́ á kě tə́shú sag pô.

²³Maŋ loonə̂ ńgə́ pɨ jî ńgə́ ndim əwɛ̂n Timoti á kə fɛ́lə á nkáʼə atsáŋə. Təmbɔʼ a zaŋkə̂ ńgyǐ, tə ḿbə́ maŋ yǐ yǐ lə́ pəg yí nə́ ndɛd maŋ tə́ nə́ ńgyǐəə á mə́ zɨ́ nə́ áwə́ənə́.

²⁴Fɛ̂ nə́ achaʼtə azə́gə́ á mbô mətû mɨ́ mətsəm ńkə́ ə́fɛ̂ nə́ pɨ pə́ Əsê pətsəmə. Pəlim pó chî nə́ á Itali pó túmə achaʼtə á mbô pəənə́.

²⁵Ńgə́ apɔŋə́ntə́əmə Əsê á chî nə́ pɨ pətsəmə.