Read Awing Iblus 2 Bible Online

Iblus 2 - Awing bible

Iblus 2

¹Lə́ ghɛd ə́lɨ́d pɛn chîə mə́ chígə́ nə́ waamə̂ ndə̌ŋdəŋ wə́ pɛn kə zóʼ nə́ lə́ ə́ tyantə̂, ńjî ńgə́ kɔ pɛn yǒ mɛdtə̂ wə́ələ́.

²Nkɨ páʼ pətseŋpə́ndɛ́pə́sê pə́ kə fɛ̂ nə́ nə́ pətǎ pə́ pətǎ pɛn lə́ kə pə́ ndə̌ŋdəŋə́, pɨ pətsəm pó kə kě nə́ wɨ́d zoŋ pô kɨ ńkě wɨ́d zóʼnə pô, pə́ yǐ fɛ̂ atsáŋə azɔ́b ndzaŋ á pěʼ nə́ ńchîə á mə́ chî nə́.

³Pɛn yǐ lánə lə́ʼ lə́ ə́lɛ́ páʼ mbɔʼ pɛn chîə atû nə́ ntɨ nchwadkə́ ghɛn tə́gə? Lə́ kə pə́ Mmaʼmbî páʼ a kə peg nə́ fiʼtə̂ anu ńté nchwadkə́ zəənə́, pəənə ándó pó kə zóʼ nə́ atséebə ají pó kə nəələ̂ áwə́g ńgə́ lə́ ndə̌ŋdəŋə́.

⁴Tsɔʼə əghâ yi əwɨ́ Əsê a peg əjǐ mbəəmə á mə́m pó ándó ŋwu páʼə a kə jɨ́ nə́ ńkə́ ḿbí ńgə́ lə́ ndə̌ŋdəŋə́, ńdaŋ nə́ əkɨʼnəmə́nu pópə mənu mimə yɛ́d nə́ yɛ́d nə́ ḿbɨ́ ḿbə́ nə́ ndzaŋ páʼ a kə ghabtə̂ nə́ məfɛ̂nə mə́ Ajwǐəsê tsɔʼə ndzaŋ páʼ a lɔ nə́.

⁵Əsê a nə ńkě náakə pətseŋpə́ndɛ̂ pí ńgə́ pó pə́ mətûə á mə́m mbî ə́ yǐ nə́ yǐ lə́ pô, mbî yi fî zə́ páʼ pɛn tsáb nə́ ńté lə́.

⁶Lə́ á chîə á mə́mə aŋwaʼlə Əsê aliʼ yətsə́ ńgə́, “Ŋwu mbî lə́ akə̂ páʼ ghö kwúmtə nə́ yə́; Kɨ mɔ́ ŋwu, páʼ gho tíʼ nə̈ ńdɔg ndɛd nə́ yə́?

⁷Gho nə ńtsóokə yí nə́ mɔ́ akəmə ndɛd ńtíʼ ńgɛd pətseŋpə́ndɛ́pə́sê pó tsɛɛlə̂ yə́, gho pɛn fɛ̂ nəgháʼ pó ngóʼkə á mbô yə́.

⁸Gho nə ńgɛd ajúmə atsəmə á chîə á nətɛ́n nə́ məko yə́.” Á sóŋ ńgə́, “ajúmə atsəmə a kə chîə á nətɛ́n nə́ məko yí lə́;” zəənə́ á sóŋə lə́ ajúmə atsəmə. Lə́ nə́ əghâ nə́ pɛn kě zɨ́ ajúmə atsəmə á pɛ́dtə ńchîə á nətɛ́n yí pô.

⁹Lə́ pɛn zɨ́ Yeso, páʼ a nə ḿbə́ nə́ nə́ mɔ́ akəmə ndɛd yitsə̌ Əsê a tsóokə yí, pətseŋpə́ndɛ̂ pí pó tsɛɛlə̂ yə́. A kə ghɛd ə́lɨ́d lə́ ńjî ńgə́ ńdaŋə̂ á mə́mə apɔŋə́ntə́əmə Əsê, a kwû ńté ŋwu ntsəmə. Pɛn zə́ənə yí əghâ nə́ á náanə á aləŋənə́fɔ yə́ á mə́m nəgháʼ pó ngóʼkə ńté ngə́ʼ páʼ a nə ńdzɨ́ nə́ ńtíʼ ńkwûə.

¹⁰Á nə ńkoʼnə̂ ńgə́ Əsê páʼ ä tsoŋkə̂ nə́ ajúmə atsəm ńkə̈ ńdɔʼkə̂ ajúmə atsəm, lə́ yí páʼ a yǐ nə́ ghɛd Yeso a koʼnə̂ ńgɛn ə́fyag ńdaŋə̂ á mə́m ngə́ʼə. Ńjî ńgə́ mbɔʼ a laŋ ə́lɨ́d ńgɛd pɔ̂ŋkə̂ pipə nɨ́ nə́ pó jɨ́ əseenə á mə́m nəgháʼ əyǐə. Ńté ńgə́ Yeso lə́ ŋwu páʼ a nɨd nə́ ághɔ́b nə́ ndú mbɔʼ pó laŋ wɨ́ ńjî nchwadkə́.

¹¹A ghɛd pɨ pə́ ŋwaʼə̂ á mə́m pətəpɔŋ póobə́, yí pópə pɨ pətsəm páʼ pə́ ghɛd nə́ pó ŋwaʼ lə́, pó po túg lə́ táʼ Tǎ. Lə́ ghɛd ə́lɨ́d Yeso a kě tə́ ńkó əsɨ́ yitsə̌ á mə́ fóŋ nə́ ághɔ́b nə́ pəlim pí pô.

¹²A Sóŋə á mbô Əsê ńgə́, “Maŋ yǐ tsáb té gho á mbô pəlimə́ mə, maŋ yǐ ŋáŋkə gho á mə́m nkyeetə əzoobə́.”

¹³A kə́ ḿbɨ́ ə́sóŋ ńgə́, “Maŋ yǐ fɛ̂ ntə́əmə mə á mbô Əsê tə pɔ́gə anu yitsə̌.” A kə́ ḿbɨ ə́sóŋ ńgə́, “Maŋ ghɛnə́ aliʼə́ nə́ pə̂gpə pɔ́ pə́ Əsê a fɛ̂ nə́ á mbô maŋə.”

¹⁴Ndzaŋə ándó pɔ́ pɨ pó pə́ nə́ na mbɨ pó achǐ lə́, Yeso nə́ əyí nkɔ̌ʼmbəəmə, a sɛdnə̂ ńtíʼ ńchîə ándó pó ńkə́ ńtúg na mbɨ pó achǐə. A kə ghɛd ə́lɛ̌ lə́ ńjî ńgə́ təmbɔʼ á laŋə̂ á mə́m nəwû əyǐ ńtsəŋkə̂ mətɨ mə́ Dɛbəəl páʼ a túg nə́ mətəənə á mə́ jwítə nə́,

¹⁵nə́ ndú ghɛn á fóg pəənə ándó pó kə chî nə́ á mə́mə apoʼ nə́ nchîmbî əzɔb ntsə̈m ḿbɔ́gə nəwûə.

¹⁶Á ŋwaʼə̂ á mbô pɛn ńgə́ a kə kě kwá lə́ pətseŋpə́ndɛ́pə́sê pô, a kə kwá lə́ ngwud Ablaamə.

¹⁷Zəənə́ ä nəələ̂ lə́ ńgə́ a tíʼ ńchîə ándó pəlim pí pipə́ mbyâŋnə pópə pipə́ pəngyě nə́ ndú ətsəmə, ńjî ńgə́ a chîə ándó Mbêsê yi Ngweŋ əghoobə́ ä faʼ nə́ nə́ ntɨ́ yí ətsəmə á mbô Əsê ńkə́ ńtúgə akóolə́mə́lə́ŋə, ńjî ńgə́ pə́ laŋ ə́lɨ́d ńdəgnə̂ pətəpɔŋ pə́ pəənə.

¹⁸Nə́ əghâ nə́ təmbɔʼ a Kwáalə ŋwu ntsəmə ándó pə̈ kwaʼlə̂ nə́ yí, ńté ńgə́ a kə kə́ ńdaŋə̂ á mə́mə akwaʼlə ńkə́ ńdzɨ́ ngə́ʼə.