Read Awing Iblus 4 Bible Online

Iblus 4 - Awing bible

Iblus 4

¹Nə́ əghâ nə́, Əsê a fɛ̂ ndaʼnə nə́ pɛn ńgə́ mbɔʼ pɛn yǐ ńjwítə ndzaŋ a kə sóŋ nə́ lə́. Lə́ pə́ ńgə́ pɛn lɔg ndɛd ńgə́ kɔ pə́ yǐ ńjɨ́ ńgə́ ŋwu əwɛ̂n yitsə̌ a kě koʼnə̂ mbɔʼ á kwúnə á mə́m mə jwitə̂ nə́ mimə wɨ́ pô.

²Ńté ńgə́ pəg nə ńdzóʼ nkɨ yi əshîʼnə wə́ tsɔʼə ndzaŋ pó nə ńkə́ nə́ ńdzóʼə azóobə́. Pó nə ńdzóʼ nkɨ yi ə́wɨ́ lə́, wɨ́d pə́ ńkě əpɔŋ yitsə̌ á mbô pó faʼ pô, ńté ńgə́ pó nə ńdzóʼ lə́ ńkě nə́ mbimə́ kwá pô

³Pɛnə̂ ándó pɛn néŋ nə́ məntɨ́ mɛ́n, pɛn yǐ tíʼ jwitə̂ ndzaŋə ándó Əsê a kə laʼnə̂ nə́ áwɛ̂nə. Lə́ tsɔʼə ndzaŋə ándó Əsê a kə sóŋ nə́ ńgə́, “Ndě mə nə ńdzáŋ, maŋ ghɛd ndaʼnə tə kwúblə: ‘Pó láʼ ə́ kě á mə́mə aliʼə́ ndəsê maŋ nə ńchî nə́ á mə́ ghɛd nə́ pó jwitə̂ ə́wɨ́ lə́ kwú pô!’ ” Afaʼə ajíə á nə ḿbǎtə měe ə́fɛ́lə ándó a nə ńtsoŋkə̂ nə́ mbî lə́, á pə̂ ńkə́ ḿbɛ́d ə́sóŋə zɨ tsɔʼə sóŋ nə́.

⁴Ńté ńgə́ aliʼə́ aŋwaʼlə Əsê yitsə̌ á sóŋə anu ńté alěmbî á zoŋkə̂ nə́ pɛ́n ntogə́ á kə koʼ nə́ ńgə́, “Alěmbî á zoŋkə̂ nə́ pɛ́n ntogə́ á kə koʼ lə́ Əsê a jwitə̂ á mə́m məfaʼ míə.”

⁵Ngǎ yitsə̌ a sóŋə aliʼə́ nə ńgə́, “Pó láʼ kě aliʼə́ nəjwitənə́ maŋ kwú pô.”

⁶Lə́ələ́ pə́ ńgə́ aliʼə́ nəjwitənə́ yəwə́ á pɛ́d ŋ́ŋáʼnə á mbô pɨ pətsə́ á mə́ kwú nə ə́wə́, ńté ńgə́ pɨ páʼ pó nə ḿbeg nə ńdzóʼ nkɨ yi əshîʼnə yi wɨ́ pó nə ńkě ə́wɨ́ kwú ńté atyǎntə atûə.

⁷Pə́ nəələ̂ zɨ lə́ nə́ ndú ńgə́, Əsê a tsɔ́ʼə alěmbî yətsə̌ pə́ fóŋə nə́ “Ə́sɛ̂nə̌.” Məngoʼ mimə nɨ́ nə́ mə́ kə laŋə̂, a tsáb ńté zɨ́d ńdaŋ nə́ Debilə á mə́mə aŋwaʼlə Əsê páʼ pə́ pěʼ nə́ ḿbɛ́d tə sóŋ ńgə́, “Təmbɔʼ gho zóʼ ngye Əsê ə́sɛ̂nə̌, kɔ gho tyantə̂ atûə.”

⁸Təmbɔʼ Joshwa a nə ńgɛd pɨ pə́ wɨ́ pó jwitə̂ nə́ ndú páʼ Əsê a nə ńdaʼnə̂ nə́, tə ḿbə́ Əsê a nə ńkě pɨ ńtsáb ngǎ yitsə̌ ńté alěmbî yətsə́ pô.

⁹Á pə́ ńgə́, alěláʼə́sê a pɨ ḿbɛ́lə á mbô pɨ pə́ Əsê á mə́ jwitə̂ nə́.

¹⁰Ńté ńgə́ ŋwu ntsəm páʼ á kwú nə́ á mə́m nəjwitənə́ Əsê, a yǐ kə́ jwitə̂ á mə́m məmí məfaʼ tsɔʼə ndzaŋ páʼ Əsê a nə ńjwitə̂ nə́ á mə́m məfaʼ mí lə́.

¹¹Lə́ á pə́ ńgə́ pɛn chîə á mə́ fǔ nə alóʼə mə́ kwú nə́ á mə́m nəjwitənə́ yi wə́, ńjî ńgə́ kɔ ŋwu əwɛ̂n yitsə̌ a yǐ ńgwǔ ńdaŋə̂ á mə́mə atyǎntə atûə ándó pó.

¹²Atséebə Əsê a chîə á mbî ńkə́ ńtə́ ə́faʼə̂, ńtsə́g ńtsɛ ŋwíŋ ntso mətû mətû ntsəmə. Zɨ́d kə́ʼə tsɔʼə məndú mətsəmə, tə ńgɛn ńkoʼə̂ aliʼə́ ándó mə́lə́glə ŋwu pó ajwiə ají jwánə nə́ ə́wə́, tə ńkə́ ńkoʼə̂ aliʼ páʼ nələŋə́ pó mənyɔ́ŋ jwánə nə́ əwə. Á jî mənu pɨ pə́ lɔ nə́ á ntɨ́ pó, pópə əkwaŋ ə́ chî nə́ á ntɨ́ pó.

¹³Anu yətsə́ á kě ə́wɨ́ chî təmbɔʼ pə́ lyáŋ Əsê ə́wɨ́ pô, ajúmə atsəmə ándó pə́ tsoŋkə̂ nə́ á mə́m mbî, á noŋnə̂ lə́ əshîsaŋə á mbi Əsê á tə́ ńdzə́ənə. Lə́ á mbô yí páʼ pɛn pətsəm chî nə́ á mə́ fiʼtə̂ nə́ ndzaŋ pɛn nə faʼ nə́.

¹⁴Lə́ pə́ ńgə́ pɛn tíʼ ńtɨ́ ńtyantə̂ á mə́m mbimə́ pɛn chî nə́ á mə́m wɨ́ lə́, ńté ńgə́ pɛn túgə ntɨ mbêsê yi ngweŋ páʼ a ghɛn nə́ tə ńchî chigə pó Əsê; Lə́ Yeso páʼ a pə́ nə́ Mɔ́ Əsê lə́.

¹⁵Ńté ńgə́ pɛn kě túg lə́ a Mbêsê yi Ngweŋ páʼ a kě nə́ chî təmbɔʼ a kó mələ́ŋ mɛn əghâ pɛn fankə̂ nə́ anu pô. Lə́, pɛn pɨ ńtúg lə́ Mbêsê yi Ngweŋ páʼ pə́ kə kwaʼlə̂ nə́ yí nə́ məndú mətsəm pə́ pɛ́d nə́ tə ńkwaʼlə̂ áwɛ̂n ə́wə́, lə́ á pə́ ńkě təpɔŋ ghɛd pô.

¹⁶Lə́ á pə́ ńgə́, kɔ pɛn túgə apɔ́g yətsə́, ńgyǐ ḿbáatə aləŋə nəfoonə Əsê, aliʼ páʼ apɔŋə́ntə́əmə á chî nə́ ə́wə́. Pɛn yǐ yǐ ə́wɨ́ lə́ ə́ kwáalə akóolə́mə́lə́ŋ ə́ kə́ zə́ənə apɔŋə́ntɨ́ páʼ mbɔʼ á kwáalə áwɛ̂n əghâ ətsəm pɛn lɔ nə́.