Read Awing Iblus 5 Bible Online

Iblus 5 - Awing bible

Iblus 5

¹Əsë a tsɔ́ʼə mbêsê yi ngweŋ lə́ á mə́m pɨ pə́ mbîə, ńtíʼ ə́fógə yí ńgə́ a faʼə̂ á mbô Əsê nə́ əlɛ́n əghóobə̈, ə́fyaʼə́nu ḿbəənə̂ fɛ̂ akáŋə́sê ńté pətəpɔŋ póobə́.

²Ndzaŋə ándó yí nə́ nkɔ̌ʼmbɨ yə́ a kə́ nə́ ḿbwɔ́dkə nə́ məndú mimə nɨ́ nə́ lə́, a chî təmbɔʼ a lɔg mənu ndǎ ndǎ pópə pəənə ándó pó kě nə́ anu yitsə̌ jî ńkə̈ fankə̂ mənuə.

³Ńté anu zɨ lɛ, a yǐ shib fɛ̂ əpúmə afyaʼə́nu ńté pətəpɔŋ pí ə́ pɨ kə́ té pətəpɔŋ pə́ pɨ píə.

⁴Ŋwu tsə̌ a kë tsɔ́ʼ mbɨ əjǐə á mə́ wê nə́ aŋkəndɔ́ʼə́ ándó mbêsê yi ngweŋ pô. Təmbɔʼ lə́ fóŋ tsɔʼə Əsê ə́fóŋə ŋwunə ándó mbêsê yi ngweŋə́, tsɔʼə ndzaŋə ándó a nə fóŋ nə́ Alɔn lə́.

⁵Tsɔʼə nə́ ndú wɨ́d wə́, Klisto a nə ńkě aŋkəndɔ́ʼə́ ají lə́ ngǎ yí wê á mə́ pə́ nə́ mbêsê yi ngweŋ pô, lə́ kə sóŋ Əsê á mbô yí ńgə́ “Gho lə́ Móonə mə, ə́sɛ̂n maŋ tíʼ ḿbə́ lə́ Tǎ əgho.”

⁶A kə́ ḿbɨ́ ə́sóŋə aliʼə́ ndaʼ ńgə́, “Gho yǒ pə́ lə́ mbêsê tə mɛdnə̂, ə́laŋ nə́ ngwud pəpépə́sê yí Mɛkisidɛgə.”[1]

⁷Á mə́m nchîmbî əjǐə a ndu ndəsê Yeso a ghɛlə̂ achaʼtə́sê ají, ḿbítə mənuə á mbô Əsê nə́ tə́kɔʼ ngye, ńkyéŋə nkǐ əmə́g kwɛdnə̂, ńté ńgə́ lə́ Əsê təmbɔʼ a chwádkə yə́ á mə́m nəwûə; Ndzaŋə ándó a nə ńtúg nə́ atsóokə́mbɨ ḿbɨ́ ńkə́ ńtə́gə atûə ají nə́ Əsê lə́, Əsê a zóʼə nəkyéŋ əyǐə.

⁸Lə́, a nə ḿbǎtə ḿbə́ Mɔ́ Əsê lə́, ḿbə́ ńdzéʼə á mə́m məngə́ʼ mí ndzaŋ mbɔʼ pə́ zóʼnə.

⁹Ndzaŋ pə́ kə ghɛd nə́ a ŋwaʼ ńgɛn fyag lə́, ńtíʼ ńchîə ándó ndú nchwadkə́ á mbô ŋwu ntsəmə ándó a zóʼnə nə́ yə́,

¹⁰Əsê a tíʼ sóŋ ńgə́ yí lə́ mbêsê yi ngweŋə́ á mə́m ngwud pəpépə́sê páʼ zɨ́d pə́ nə́ yi Mɛkisidɛgə.

¹¹Mənu mimə nɨ́ nə́ mə́ chî ə́wɨ́ təmbɔʼ pɛn sóŋ ńté anu zəənə́, lə́ á pə́ ńtyantə̂ á mə́ tyáatə nə́ anuə á mbô pəənə́, ńté ńgə́ atûə azə́ənə́ a kě tsɔ́ʼnə á mə́ zaŋkə̂ nə́ jîə anu pô.

¹²Pə́ pɛ́dtə ńdzéʼkə áwɨ́ tə ndi chî ə́wɨ́ təmbɔʼ pɨ pěʼ ńtíʼ ḿbə́ pəzéʼkə. Lə́ pɨ pɛ́lə ńkə́ ńnáŋə tsɔʼə ŋwu tsə̌ a zéʼkə áwɨ́ nə́ ntsɛɛmbi məndzeʼkə́ á mə́m nkɨ Əsê. Nə́ pəənə́ á mə́ tə́ nə́ jîə məjî mimə tyantə̂ nə́, pɨ pɛ́lə nɔ́ŋə nəpə́ənə.

¹³Ŋwu ntsəm páʼ á nɔ́ŋ nə́ pə́ nəpɨ́ a pɛ́d lə́ móonə, ńkě anu yətsə̌ jîə á mə́mə anuə á koʼ nə́, kɨ yə tə koʼ pô.

¹⁴Lə́ məjî mimə tyantə̂ nə́ mə́ chî lə́ á mbô pətəkaŋə́, páʼ pó zéʼ nə́ ńtíʼ ńchî təmbɔʼ pó nɨd ńgə́ lɛ̌ anuə təpɔŋ lɛ̌ pə́ yə əshîʼnə.