Read Awing Iblus 7 Bible Online

Iblus 7 - Awing bible

Iblus 7

¹Mɛkisidɛgə ghɛnə́ a nə ḿbə́ lə́ əfo aláʼə salɛmə ńkə́ ḿbə́ Mbêsê yi Əsê páʼ ə́ tsɛ Nə́ Ajúmə Atsəmə. Ndzaŋə ándó Ablaamə a nə ńtə́ nə́ ḿbəənə̂ á ntso ə́wə́ a kə póʼ nə́ pəfo pɛ́n nəkwa ńtsɛɛlə̂ ághɔ́b lə́, Mɛkisidɛgə á jwánə yí ə́fɛ̂ afoʼ nə́ yə́,

²Ablaamə a tíʼ ə́fɛ̂ táʼə ajúmə á mə́m əpú nəghə́m ətsəm páʼ a kə kwá nə á ntsoolə á mbô Mɛkisidɛgə. (Ntsɛɛmbiə anu páʼ əlɛ́n Mɛkisidɛ̈g ə́sóŋ nə́ lə́ ńgə́, “Əfo mə tɨ́ nə́ ndə̌ŋdəŋə́;” ndzaŋ a nə ńkə́ nə́ ḿbɨ́ ḿbə́ əfo Salɛm lə́, əlɛ́n yí kə́ ḿbɨ́ ńkə́ sóŋə lə́ ńgə́, “Əfo Mbwɔ́dnə.”)

³Anu yətsə̌ á kě ə́wɨ́ chî páʼ pə́ ŋwaʼlə̂ nə́ ńté Tǎ kəənə̂ Mǎpə Mɛkisidɛg pô kɨ ńté tǎpətǎ əyǐ pô, anuə kě ə́wɨ́ kə́ ńchî pə́ ŋwaʼlə̂ nə́ ńté ndzaŋ pə́ nə ḿbî nə́ yí kɨ ndzaŋə a nə kwû nə pô. A nə ńchî lə́ ándó Mɔ́ Əsê, ńtíʼ ḿbə́ Mbêsê páʼ a mɛdnə̂ nə́.

⁴Zɨ́ nə́ ndzaŋə ándó a kə pə́ ŋwu yi ngweŋə́! Ablaam páʼ a nə ḿbə́ nə́ tə́kɔʼ tǎpətǎ əwɛ̂n a nə ə́fɛ̂ táʼə ajúmə a mbô yə́ á mə́m əpú nəghə́m ətsəm páʼ a kə kwə̂ nə́ nə́ pə́ələ́ á ntsoolə.

⁵Ngwud Ləbi páʼ pó pə́ nə́ Pəpépə́sê lə́, noŋkə á nɨd ńgə́ pó kwáalə táʼə ajúmə á mə́m əpú nəghə́m ətsəmə á mbô pɔ́ pə́ Islɛl pó pə́ nə́ pəlim əpɔ́b lə́, pó pǎ nə́ tə ńkə́ ḿbə́ tsɔʼə ngwud Ablaam lə́.

⁶Mɛkisidɛgə a nə ńkě fɛ́d lə́ á mə́m ngwud Lɛbi pô, lə́ ḿbə́ ḿbɛ́d ńkwáalə táʼə á mə́m əpú nəghə́mə á mbô Ablaamə ńtíʼ ə́fɛ̂ afoʼ nə́ yə́. Ablaamə a nə́ ḿbə́ lə́ ŋwu páʼ Əsê a kə fɛ̂ nə́ ndaʼnə əjǐə á mbô yə́.

⁷Lə́ kě anu mbɔʼ pə́ tə́ ńkwaŋə̂ kə́káŋ pô ńté ńgə́ ŋwu páʼ ä fɛ̂ nə́ afoʼ a gháʼ ńtsɛɛlə̂ ŋwu páʼ ä fɛ̂ nə́ nə́ yə́.

⁸Ńgɛn nə́ ngǎ pəpépə́sê táʼə á mə́m əpú nəghə́m lə́ kwáalə pɨ pə́ mbî páʼ pö kwû nə́, lə́ ḿbə́ ńgɛn nə́ ngǎ Mɛkisidɛg táʼə á mə́m əpú nəghə́m lə́ kə kwá ŋwu páʼ a chî nə́ mbîə, tsɔʼə ndzaŋ páʼ aŋwaʼlə Əsê a sóŋ nə́ lə́.

⁹Ńdaŋ ə́lɨ́d təmbɔʼ ŋwunə a sóŋ ńgə́ Lɛbi nə́ nkɔ̌ʼmbɨ əyí páʼ ä kwá nə́, a kə kə́ ə́fɛ̂ táʼə á mə́m əpú nəghə́m ńdaŋə̂ á ndzəm Ablaamə,

¹⁰Ńté ńgə́ Lɛbi a nə ḿbɛ́lə á nəpəm tǎpətǎ əyǐ Ablaam əghâ ándó Mɛkisidɛgə a kə jwánə nə́ yí lə́.

¹¹Pə́ kə fɛ̂ noŋkə á mbô pɔ́ pə́ Islɛlə ńdaŋ lə́ ndzəm ngwud pəpépə́sê pə́ Lɛbi. Nə́ pə əghâ nə́ təmbɔʼ afaʼə pəpépə́sê pə́ Lɛbi a nə ńkoʼnə̂ ńgɛn ə́fyag, tə ḿbə́ pə́ nə ńkě tə́ ńnáŋə yi ndaʼ mbêsê ńgə́ a yǐ pô, yí páʼ a fɛ́d nə́ á mə́m ngwud pəpépə́sê pə́ Mɛkisidɛgə, ńkě pə́ á mə́m yi Alɔn pô.

¹²Ńté ńgə́ təmbɔʼ pə́ lǎŋtə ńkwúblə ngwud pəpépə́sê, pə́ kə ńchîə á mə́ kwúblə nə́ noŋkə.

¹³Lə́ Ŋwu ghɛn pə́ sóŋ nə́ mənu ńté yí lə́ a fɛ́d lə́ á mə́m ngwud yi ndaʼə, Ŋwu tsə̌ a nə ńkě á mə́m ngwud zɨ́d zɨ kə́ láʼə fɛ́lə ə́faʼə̂ á nəpá əsê pô.

¹⁴Á pyádnə ŋwaʼə̂ əshîsaŋ ńgə́ Mmaʼmbî əwɛ̂nə a nə fɛ́d lə́ nə́ əla Juda, Mosisə a nə ńkě kə́ ə́fóŋ əlɛ́n əla ghɛn əghâ a kə̈ sóŋ nə́ anu ńté pəpépə́sê lə́ pô.

¹⁵Anu yəwə́ á pɨ fɛ́d ńchígə́ ŋ́ŋwaʼə̂, mbêsê yi ndaʼə a yǐ páʼ a chî nə́ ándó Mɛkisidɛgə,

¹⁶a nə ḿbə́ lə́ mbêsê, pə́ kě yí nə́ mbêsê ghɛd ńdzoŋ lə́ pənoŋkə páʼ pɨ pə́ mbî pə́ ghɛd nə́ pô, a nə ḿbə́ mbêsê ńdaŋ lə́ á mə́m mətɨ mə́ nchîmbî páʼ ə́ kě nə́ ndwigtə túg pô.

¹⁷Ńté ńgə́ aŋwaʼlə Əsê á sóŋ ńgə́, “Gho yǐ pə́ mbêsê ə́ mɛdnə̂ á mə́m əla pəpépə́sê pə́ Mɛkisidɛgə.”

¹⁸Pə́ tíʼ ḿmɛdtə̂ á ndɛn məntəgə́ mə́ ńté ńgə́ mɨ́d mə́ kə kě mətɨ túg pô ńkě atûə anu yətsə́ kə́ ńchî pô.

¹⁹Ńté ńgə́ noŋkə Mosisə á nə ńkě chî təmbɔʼ a ghɛlə̂ anu yətsə́ a koʼnə̂ ńgɛn ə́fyag pô. Nə́ pə əghâ nə́ pə́ fɛ̂ akwaŋ ńtə́ ḿbyáabə yə əshîʼnə páʼ pɛn yǐ nə́ laŋə̂ á mə́m ə́wɨ́ ghɛn páatə Əsê.

²⁰Á mə́ pegtə̂ nə́, atyǎntə ndaʼnə Əsê á kə́ ńchî ə́wə́. Atyǎntə ndaʼnə ándó zəənə́ a nə ńkě wɨ́ chî əghâ pə́ kə lɔg nə́ pətsə́ pɨ ńgɛlə̂ pəpépə́sê ə́wɨ́ lə́ pô.

²¹Lə́ Yeso a kə pímə mbêsê ńdaŋ lə́ nə́ atyǎntə ndaʼnə əghâ páʼ Əsê a kə sóŋ nə́ á mbô yí ńgə́, “Mmaʼmbîə a ghɛlə̂ atyǎntə ndaʼnə; mbɔʼ á kě ntɨ́ əyí kwúblə pô: ‘Gho yǒ pə́ lə́ mbêsê tə mɛdnə̂.’ ”

²²Kwúblə ghɛnə́ a ghɛd Yeso a tíʼ ńchîə ándó ŋwu pə́ tə́g nə́ yə́ mə́ nɨd nə́ ńgə́ əka yi əshîʼnə yǐ yǐəə.

²³Yitsə̌ kwúblə á pɨ ńkə́ ńchî ə́wɨ́ ńté ńgə́ pətsə́ pəpépə́sê pə́ pó kə nə́ənə, ńté ńgə́ pó kə̈ kwúkə ńkě chî təmbɔʼ pó ghɛn nə́ mbi nə́ afaʼə azɔ́b pô.

²⁴Afaʼə Yeso ándó mbêsê á yǐ mɛdnə̂ ngǎ mɔʼə́ ńté ńgə́ yí nə́ nkɔ̌ʼmbɨ əyí a kə́ ńchîə á mbî mɛdnə̂.

²⁵Ńdaŋ ə́lɨ́d a chî təmbɔʼ a chwádkə ŋwu ntsəm əghâ ətsəm páʼ a tə́ nə́ ńgɛnə̂ á mbô Əsê ńdaŋ nə́ yí, ńté ńgə́ a chîə mbî mɛdnə̂ á mə́ tə́ nə́ póʼmbô á mbô Əsê té ághóobə́.

²⁶Yeso lə́ mbêsê yi ngweŋ páʼ a fɛ̂ nə ajú páʼ pɛn lɔ nə́. A ŋwaʼə̂ á mbi Əsê, a kě kɔntə yitsə̌ kəənə təpɔŋ yitsə̌ á mə́m yí túg pô; pə́ tsɔ́ʼə yí ə́fógə á mə́m ngaŋə́ghɛlə təpɔŋ ńtíʼ ńkɔ́ʼkə yə́ a kɔ́ʼ ńdaŋ məpóolə.

²⁷Á kě chî lə́ ándó pətsə́ pəpépə́sê pə́ pô, a kě chîə á mə́ tə́ nə́ fyaʼə́nu əlě ətsəm ńté pəpí pətəpɔŋ, ə́ tíʼ zoŋkə̂ nə́ pətəpɔŋ pə́ pɨ pətsə́ pô. Əghâ a kə fɛ̂ nə́ mbɨ əjǐ lə́, ńgɛlə̂ táʼə afyaʼə́nu, táʼ ngǎ, páʼ a láʼ nə́ kě pɨ pégnə pô.

²⁸Noŋkə Mosisə á tsɔ́ʼtə pəənə ándó pó kě nə́ koʼnə̂ ńgɛn ə́fyag pô ńdɔgə̂ ńgɛlə̂ pəpépə́sê pipə weŋ ə́wə́. Lə́ ndaʼnə Əsê páʼ a kə ghɛd nə́ zɨ́d ḿbegə̂ atyǎntə ndaʼnə, páʼ zə́ələ́ á kə yǐ nə́ a ndzəm Noŋkə, zə́ələ́ á tsɔ́ʼə Mɔ́ Əsê páʼ pə́ kə ghɛd nə́ yə́ a koʼnə̂ ńgɛn ə́fyagə̂.