Read Awing Iblus 8 Bible Online

Iblus 8 - Awing bible

Iblus 8

¹Mɛ́ anu pɛn chígə́ nə́ ə́sóŋə lə́ ńgə́ pɛn túgə Mbêsê yi ngweŋ páʼ a náanə nə́ əlá apô yə təənə á aləŋənə́fɔ Atsɛ pəfo á nəpóolə.

²A faʼə̂ ándó Mbêsê yi Ngweŋə́ á mə́m ndɛ̂sê yi mə́mə, lə́ kə pə́ chigə ntaŋ páʼ lə́ kə kwúd nə́ Mmaʼmbîə, a kě pə́ pə́ mbô mə́ ŋwu məsɔŋ kwúd ńkwúlə áwɨ́d pô.

³Mbêsê yi ngweŋ ntsəm pə́ tsɔ́ʼ nə́ yə́ a chîə á mə fɛ̂ nə́ akáŋə́sê, ə́ kə́ tɔ məna ə́ pêsê ə́wə́, ńdaŋ ə́lɨ́d Mbêsê yi Ngweŋə́ a kə́ ńtúgə ajíə ajú təmbɔʼ a fɛ̂ á mbô Əsê.

⁴Nə́ əghâ nə́, təmbɔʼ a pěʼ ńchî lə́ á mə́m mbî, a kě kwéʼnə ḿbə́ pə́ mbêsê pô, ńté ńgə́ pəpépə́sê pó chî ə́wɨ́ páʼ pó fɛ̂ nə́ akáŋə́sê ndzaŋ páʼ noŋkə Pəjusə a nɨd nə́.

⁵Afaʼ pó faʼ nə́ ándó Pəpépə́sê lə́ chigə afîə ajíə ḿbɨ́ ńkə́ ḿbə́ mə́lə́glə anu páʼ á chî nə́ nəpóolə. Á chî lə́ tsɔʼə ndzaŋ á nə ńchî nə́ nə́ ndɛd Mosisə. A nə ḿbə́ əghâ páʼ a kə tə́ nə́ ńdoonə̂ á mə́ pɔ́ nə́ Ntaŋ yi Ŋwaʼ nə́ wə́ lə́, Əsê a sóŋə á mbô yí ńgə́, “Lɔg ndɛd ńgə́ gho faʼə̂ anuə atsəm tsɔʼə ndzaŋ pə́ kə nɨd nə́ a gho ə́wə́ á ndu nkwəənə.”

⁶Lə́ nə́ əghâ nə́ pə́ fɛ̂ afaʼə a Mbêsê á mbô Yeso páʼ á gháʼ nə́ ńtsɛɛlə̂ azɔ́b yəwə́, tsɔʼə ándó əka páʼ a kə tyáŋtə nə́ áwə́ələ́ á mə́m Əsê pópə pɨ pí, ə́ kə pɔŋ ńtsɛɛlə̂ yi ntsɛɛmbiə, ńté ńgə́ wɨ́d tɨ́ lə́ á ndu ndaʼnə ə́ pɔŋ nə́ ńtsɛɛlə̂ yi ntsɛɛmbiə.

⁷Təmbɔʼə anu yətsə́ á nə ńchî tə́ŋnə nə́ əka yi ntsɛɛmbi wə́ pô, tə ḿbə́ pə́ nə ńkě pɨ ńtə́ náŋə azoŋkə əka pô.

⁸Lə́ Əsê a pə́ fɛ̂ fid nə́ pɨ píə, ə́sóŋ ńgə́; Mmaʼmbîə a sóŋ ńgə́ əlěmbî ə́ tə́ ńgyǐəə, páʼ maŋ yǐ nə́ wad əka yi fî pə̂gpə pɨ pə́ Islɛl ḿbá pɨ pə́ Juda ə́wə́.

⁹Á kě chî lə́ ándó əka maŋ kə wad nə́ pə̂gpə pətǎ pɔ́b lə́ pô əghâ ándó maŋ nə ńgwam nə́ ághɔ́b nə́ apô mə ńdɔgə̂ ághɔ́b ə́fɛ́lə á mə́m aláʼə Ijib lə́ pô, Əka maŋ kə wad nə́ pə̌gpo lə́, pó nə ńkě zoŋə̂ anu wɨ́d kə sóŋ nə́ nə́ ntɨ́ əghɔ́b ətsəm pô, ńdaŋ ə́lɨ́d Mmaʼmbîə a sóŋ ńgə́, maŋ yǐ myaʼə̂ ághóobə́.

¹⁰Mmaʼmbîə á sóŋ ńgə́, lɛ̌ əka páʼ maŋ yǐ nə́ wad pə̂gpə pɔ́ pə́ Islɛlə nə́ əlěmbî páʼ ə́ chî nə́ á mə́ yǐ nə́, Maŋ yǐ néŋ pənoŋkə mə á mə́mə akwaŋə́nuə azóobə́ ə́ kə́ pɨ ŋwaʼlə̂ pə́ələ́ á mə́m məntɨ́ móobə́. Maŋ yǒ pə́ Əsê əzoobə́, pó yǒ ńkə́ ḿbə́ pəənə mə.

¹¹Ŋwunə a kě pɨ ńchîə á mə́ zéʼkə nə́ á ndim əyǐ, kəənə a ngaŋnəpad əyǐ ə́sóŋə nə́ yí ńgə́, Nə́ chîə á mə́ jî nə́ Mmaʼmbîə, Ńté ńgə́ pó pətsəm yǒ jîə mə, ə́ chwáakə nə́ pɨ pə́ chúbnə nə́ pópə pətə́kɔʼ pə́ pəənə.

¹²Maŋ yǒ ləgnə̂ pətəpɔŋ póobə́ ə́ láʼ kě pɨ kwúmtə əfankəmə́nu pɔ́b pô.

¹³Ndzaŋ Əsê a fóŋ nə́ əka ghɛn nə́ yi fî lə́, ńgɛd ntsɛɛmbi əka wə́ a lɛnə̂, ńdaŋ ə́lɨ́d ajúmə atsəmə á pə́ nə́ yə lɛn, ńkě atûə anu yitsə̌ pɨ́ ńchî, tsɔʼə ngǎ pɛ̌ lə́ ŋwunə a kě zɨ́d pɨ ńdzɨ́ pô.