Read Awing Iblus 9 Bible Online

Iblus 9 - Awing bible

Iblus 9

¹Ntsɛɛmbi əka wə́ á nə ńtúg pənoŋkə pə̈ zoŋ nə́ pɨ́d ńgóʼkə Əsê, ńkə́ ńtúgə aliʼə́ á ndu mbî páʼ lə́ tsoŋkə̂ nə́ ŋwu mbî, pə́ ghóʼkə nə́ Əsê ə́wə́.

²Pə́ kə kwúd Ntaŋə́, yǐ ndzəmə apeŋ wə́ pə́ nə̈ fóŋ nə́ ńgə́ Aliʼ yə Ŋwaʼ nə́ lə́. Á mə́m ntaŋ wɨ́d wə́ lə́ kə chîə aliʼə́ atə́gə́lámə, pó təpɛlə nə́ apéenə məkálə́ páʼ pə́ kə̈ fɛ̂ nə́ á mbô Əsê.

³Á ndzəmə azoŋkə apagə atsəʼ zɨ́d zə́ ntaŋ nə́ ńchî ə́wɨ́ páʼ pə́ nə fóŋ nə́ nə́ Chigə Aliʼ yə Ŋwaʼ nə́.

⁴Á mə́m ntaŋ wɨ́d wə́ nəpá nə́ Əsê páʼ pə́ tsoŋkə̂ nə́ zɨ́d nə́ gôlə ńdɔgə̈ ńtoonə̂ aleŋ ə́wɨ́ nə́ kə chî ə́wɨ́. Nkwum Əka ə́ kə kə́ ńchî ə́wə́, pə́ ghɛd mbɨ əjǐ nə́ gôlə. Ambáŋə́ á kə chîə á mə́m ə́wɨ́ pə́ kə kə́ nə́ ńgɛd nə́ gôlə, mana[4] wə́ a kə chîə á mə́mə ambáŋə́ yi wə́. Mbaŋ Alɔn páʼ məfǔ mə́ nə ńchúʼ nə́ á mə́ tô nə́ ə́wə́, ḿbɨ ḿbá məngɔʼ mə̂ mɛ́n mbɛ̌ páʼ Əsê a nə ŋwaʼlə̂ nə́ məntəgə́ ə́wɨ́ lə́ mə́ kə ńchîə mə́m ə́wə́.

⁵Á ndu nkwum ə́wə́ əpú páʼ Əsê a tsoŋkə̂ nə́ ə́ túg nə́ mbab ə́ chî ə́wə́ á mə́ nɨd nə́ ńgə́ Əsê a chîə á aliʼ yəwə́, ńdɔg mbab mɔ́b ńkə́bkə akə́pkə páʼ pə́ kə fóŋ nə́ nə́ aliʼə́ akóolə́mə́lə́ŋə. Lə́ nə́ əghâ nə́, lɛ̌ kě ndɛd təmbɔʼ pə́ tyáatə anuə atsəm pô.

⁶Lɛ̌ ndzaŋə ándó pə́ kə tyáŋtə nə́ mənu mimə wɨ́ lə́, pəpépə́sê pó zá ńkwúnə á mə́m Ntaŋ ə́ chî nə́ apeŋ lə́ ə́faʼə̂ afaʼə azɔ́b ə́wɨ́ əlětsəmə.

⁷Lə́ tsɔʼə Mbêsê yi Ngweŋ páʼ a nə̈ ńkwú nə́ á mə́m Ntaŋ yi mə́mə, ä kə kwúnə wɨ́ lə́ tsɔʼə táʼ ngǎ atû ngoʼ mbîə. A tə́ ńkwúnə ə́wɨ́ lə́ a túgə achǐə, ńkwú ə́fyaʼə́nu ə́wɨ́ á mbô Əsê ńté pətəpɔŋ píə ńkə́ ńté pí pə́ pɔ́ pə́ Islɛl pó kə ghɛd nə́ ḿbə́ ńkě jî ńgə́ pó ghɛlə̂ təpɔŋ pô.

⁸Ajwǐəsê á pyádnə̈ ńdzéʼkə á ŋwaʼ ńdaŋə̂ á mə́m mənu mɨ mətsəm pə́ tyáŋtə nə́ lə́ ńgə́, ndúmə á mə́ kwú nə́ á mə́m chigə Aliʼ yə Ŋwaʼ nə ə́ kě kə́ ŋáʼnə pô, ḿbə́ ńté lə́ ńgə́ Ntaŋ yə apeŋ ə́ kə́ ḿbɛ́d ńtɨ́ tsɔʼə tɨ́ nə́.

⁹Zəənə́ á nəələ̂ lə́ mənu mə́ laŋ nə́ nə́ mbî əghâ nə́. Á nəələ̂ lə́ ńgə́ əkáŋsê pə̂ pə́ fɛ̂ nə́ á mbô Əsê pópə məna mə́ afyaʼə́nu mə́ pə́ fɛ̂ nə́ á mbô yí lə́ təmbɔʼ mə́ kě ghɛd məntɨ́ mə́ pɨ pó fɛ̂ nə́ lə́ mə́ koʼnə̂ ńgɛn ə́fyag pô.

¹⁰Ńté ńgə́ lə́ kə pə́ tsɔʼə mənu ńté məjî pó məloʼ ḿbɨ ḿbə́ nə́ pənoŋkə páʼ pə̈ ghɛd nə́ mbɨ ŋwu ŋwaʼə̂. Lə́ tsɔʼə pənoŋkə ándó pɨ́d pə́ nɨd nə́ lə́ tsɔʼə á ndzəmə apeŋə́, pi pɛn zoŋ nə́ pɨ́d tsɔʼə əghâ nə́, əyǐ kě pɨ́d zoŋə̂ əghâ ándó Əsê a yǐ nə́ ńkwúblə mənu mɨ́d mə́ tíʼ mimə fîə.

¹¹Lə́ Klisto a nə ḿbɛ́d tə ńgyǐəə ándó Mbêsê yi ngweŋ mənu mə́ əshîʼnə páʼ mə́ chî nə́ aliʼə́ nə́. Ntaŋ páʼ ä faʼ nə́ ə́wɨ́ ə́ tsɛɛlə̂ yitsə̌ ntaŋ wə́ ńkə́ ńkoʼnə̂ ńgɛn ə́fyagə̂, lə́ kě ntaŋ páʼ lə́ tsoŋkə̂ nə́ ŋwu mbî pô, á nəələ̂ ńgə́ lə́ kě ajú pə́ tsoŋkə̂ nə́ pə́ á ndu mbî ghɛn pô.

¹²Əghâ ándó Klisto a nə ńdaŋ nə́ á mə́m ntaŋ wə́ ńtíʼ ńkwúnə á mə́m Chigə Aliʼ yə Ŋwaʼ nə táʼ ngǎ mɔʼə́ lə́, a nə ńkě lɔg lə́ achǐə məmbéŋ pópə yə pəlú pə́ na, á mə́ ghɛn nə́ ə́fyaʼə́nu ə́wɨ́ pô, a kə pɨ ńdɔg lə́ ajíə achǐ ə́fyaʼ ə́wə́, ńdaŋ ə́lɨ́d ńtíʼ ńchwádkə áwɛ̂n ngǎ mɔʼə́.

¹³Achǐə a məmbéŋ pópə yə pəlú pə́ na, ḿbɨ ḿbéenə apûə pɔ́ pə́ na pə́ tɔ nə́ ə́fyáamə a ndu pɨ páʼ pó kě nə́ ŋwaʼə̂ á mə́m noŋkə pô, a ghɛd pó ŋwaʼə̂ ḿbə́ ŋwaʼ lə́ á ndzəmə apeŋə́.

¹⁴Ndzaŋ zəənə́ a pə́ nə́ ndə̌ŋdəŋ lə́, achǐə Klisto a kě yǐ faʼ tə ə́ tóokə. Ńdaŋ nə́ Ajwi páʼ a mɛdnə̂ nə́ ngǎ mɔʼə́, Yeso a kə fɛ̂ mbɨ əjǐə á mbô Əsê ándó mbéŋə afyaʼə́nu ə́ koʼnə̂ nə́ ńgɛn ə́fyagə̂. Achǐə ajíə a yǒ ghɛd məntɨ́ mɛn mə́ ŋwaʼ pɛn fɛ́lə á mə́m məfaʼ páʼ mə́ kě nə́ atûə anu yitsə̌ chî pô, ńjî ńgə́ pɛn ghóʼkə Əsê páʼ ə́ chî nə́ á mbîə.

¹⁵Lɛ̌ anu páʼ á ghɛd nə́ Klisto a pə́ ŋwu páʼ ä tyáŋtə nə́ əka yi fîə, ńjî ńgə́ pəənə ándó páʼ Əsê a fóŋ nə́ ághɔ́b təmbɔʼ pó kwáalə afoʼ yə mɛdnə̂ nə́ zə́ páʼ Əsê a kə laʼnə̂ nə́ ághɔ́b ə́wɨ́ lə́: Təmbɔʼ zəənə́ a yǐ nyi lə́ ńté ńgə́ ŋwunə a kə kwûə, ńtíʼ ə́fógə ághóobə́ á mə́m pətəpɔŋ pó kə́ ghɛd nə́ á mə́m əka yǐ ntsɛɛmbiə.

¹⁶Nə́ anu ńté ntəgə́nəwû, pə́ chîə á mə́ nɨd nə́ nə́ məndú mətsəm ńgə́ ŋwunə a kə ŋwaʼlə̂ nə́ zə́ələ́ a kwûə.

¹⁷Ńté ńgə́ ntəgə́nəwû ə̈ kwúnə anu lə́ tsɔʼə páʼ ŋwunə a ghɛd nə́ zɨ́d a kwû nə́, zɨ́d kě chî təmbɔʼ zɨ́d kwúnə anu nə́ ndɛd páʼ ŋwunə a kə ŋwaʼlə̂ nə́ zɨ́d a pɛ́d nə́ á mbî pô.

¹⁸Lə́ kə ghɛd ə́lɨ́d tsɔʼə əka yǐ ntsɛɛmbi wə́ ə́ kə kě chî təmbɔʼ wɨ́d kə ńkwúnə anu təghə́ pə́ kwɛlə̂ achǐ pô.

¹⁹Nzdaŋə ándó Mosisə a kə náŋkə nə́ məntəgə́ mə́ mətsəmə á mbô ŋwu ntsəm lə́ ńtíʼ ńdɔgə̂ achǐə pɔ́ pə́ na pópə achǐə məmbéŋ ńgwɛd nə́ nkǐ, ńtíʼ ńdɔg məfag mə́ atǐ yitsə̌ pə́ fóŋə nə́ yisɔb ńkwúd nə́ paŋpaŋə atəshǐ ńtíʼə ńdɔgə̂ ə́fyáamə achǐ zə́ wə́ á ndumə aŋwaʼlə pənoŋkə ńkə́ ə́fyáamə á mbɨ ŋwu ntsəmə.

²⁰Ə́sóŋə ńgə́, “Lɛ̌ achǐ páʼ á leŋkə̂ nə́ əka páʼ Əsê á sóŋ nə́ ńgə́ pɛn zóʼnə áwɨ́d lə́.”[5]

²¹Tsɔʼə nə́ ndú yi ə́wɨ́ Mosisə a kə́ fyáamə achǐ yəwə́ á ndu Ntaŋ pópə əpú ətsəm pə́ nə ńdɔg nə́ ńgóʼkə Əsê ə́wə́.

²²Lə́ ndə̌ŋdəŋ ńgə́ á mə́m noŋkə pə́ kə lɔgə̂ lə́ achǐ ńgɛlə̂ əpú pipə nɨ́ nə́ ə́ ŋwaʼə̂, tə pə́ chîə achǐ kwɛd pô, pə́ kě pətəpɔŋ ləgnə̂ pô.

²³Əpú pipə wɨ́ páʼ pɨd kə pə́ nə́ afîə chigə pɨ́d páʼ chî nə́ nəpó lə́, pə́ kə chîə á mə́ sog nə́ pɨ́d lə́ nə́ ndú wɨ́d wə́. Lə́ əpú nəpó pipə wɨ́ ə́ pə́ ńtə́ ńnáŋə lə́ ajúmə afyaʼə́nu páʼ á pɔŋ nə́ ńtsɛɛlə̂ pəənə́.

²⁴Ńté ńgə́ Klisto a kə kě ghɛn lə́ á mə́mə Aliʼ yə Ŋwaʼ nə́ páʼ ŋwu mbîə a tsoŋkə̂ nə́ nə́ mbô mí pô, pə́ afîə chigə zɨ́d pô. A kə ghɛn lə́ chigə nəpóolə, ńchîə aliʼ yi wɨ́ ńtséebə nə́ əzɛ̌n ngǎ á mbi Əsê.

²⁵Mbêsê yi ngweŋ Pəjusə á kwúnə á mə́m Chigə Aliʼ yə Ŋwaʼ nə́ ngoʼ ətsəm nə́ achǐə neemə. Lə́ Klisto a nə ńkě kwú lə́ ngǎ yi nɨ́ nə́ á mə́ fɛ̂ nə́ mbɨ əjǐ pô.

²⁶Mbɔʼ á pə́ ə́lɨ́d tə ḿbə́ a kə chîə á mə́ zɨ́ nə́ ngə́ʼ ngǎ yi nɨ́ nə́ ə́fɛ́lə ándó pə́ kə tsoŋkə̂ nə́ mbîə. Lə́ ndzaŋə á chî nə́ lə́, a kə yǐ táʼ ngǎ á əghâ ndɛd mbî tíʼ nə́ měe, ńdɔg mbɨ əjǐ ə́fyaʼə́nu wɨ́ ə́fógə təpɔŋ ə́wə́.

²⁷Ŋwu ntsəmə a yǐ shib ə́ kwû táʼ ngǎ, ə́ lǒo ə́wɨ́ Əsê a tsɔ́ʼtə məsáʼ móobə́.

²⁸Tsɔʼə nə́ ndú wɨ́d wə́, pə́ nə ńkə́ fɛ̂ Klisto á mə́ lɔg nə́ ə́fyaʼə́nu ə́wɨ́ táʼ ngǎ á mə́ sog nə́ pətəpɔŋ pə́ pɨ pipə nɨ́ nə́, á yǐ pɨ̌ yǐəə a ngǎ yi ndzəmə, ə́ kě yǐəə a pə́ mə́ sog nə́ pətəpɔŋ pô, ə́ yǐ lə́ mə́ chwádkə nə́ pɨ pó tə́ nə́ ḿbyáabə yə́.