Read Awing Jɛmsə 1 Bible Online

Jɛmsə 1 - Awing bible

Jɛmsə 1

¹Aŋwaʼlə zəənə́ lǒo lə́ á mbô Jɛmsə, ngaŋəfaʼ Əsê pó yi Mmaʼmbî Yeso klisto. Lə́ achaʼtə á mbô məla mə́ Islɛlə ntsɔb pɛ̌ páʼ pó shamnə̂ nə́ á mə́m mbî ntsəmə.

²Pəlimə́ mə; lɔg nə́ mbɨ əzɨ ńgə́ pɨ lə́ pəpɔŋ pə́ atû nə́ ndɛd ntsəm páʼ akwaʼlə á téekə nə́ áwə́ənə́,

³ńté ńgə́ nə́ jî ńgə́ təmbɔʼ mbimə́ əzɨ túgə moomə, wə́ələ́ ghɛd nə́ tɨ́ ńtyantə̂ lə́ tyantə̂ nə́.

⁴Nə́ ghɛd ńgə́ asəgə́ndzɔʼə azə́ənə́ ä ghɛnə̂ tsɔʼə nə́ mbiə, ńjî ńgə́ nə́ koʼnə̂ ńgɛn ə́fyag tə ajûtsə́ á kě nə́ pɨ póŋ pô.

⁵Təmbɔʼ ŋwu tsə̌ a póŋə ayáŋ, a pítə á mbô Əsê, páʼ ä fɛ̂ nə́ ayáŋə á mbô ŋwu ntsəm nə́ ntɨ́ ətsəm tsɔʼə tə sáʼə, a yǐ kə́ fɛ̂ nə yə́.

⁶Lə́, a pítə á mə́m mbimə́, tə ghə́ atûə ajíə á koʼlə̂, ńté ńgə́ ŋwu ntsəm páʼ atûə ajíə ä koʼlə̂ nə́ a chî lə ándó kəfɨd páʼ á kɔ́ʼ nə́ á mə́m nkǐə, sə́mə a tíʼə ńtwáamə ńgɛnə̂ nə́ mbi ḿbəənə̂ nə́ ndzəmə.

⁸Ŋwu páʼ atûə ajíə ä koʼlə̂ nə́, ä pɛ́nkə yə́ á mə́mə anuə atsəm, kɔ á kwaŋ ńgə́ Mmaʼmbiə a yǐ fɛ̂ ajûtsə́ á mbô yə́.

⁹Mɔ́mɛ́ páʼ á pə́ nə́ mbóŋ lə́ a tə́ nkɔŋtə̂ əghâ páʼ Əsê a yǐ nə́ ŋ́ŋáŋkə yə́ atǐə,

¹⁰mɔ́mɛ́ páʼ a kə nə́ ḿbə́ əfoʼ lə́ a tə́ ńkɔŋtə̂ nə́ ndɛd páʼ Əsê á tsóokə nə́ yə́ əsê; Ńté ńgə́ əfoʼə a yǒ laŋ lə́ ándó flǎwa páʼ á chî nə́ á mə́m nəyeŋə́.

¹¹Ńté ńgə́ əghâ mə́numə á sáʼ nə́ ńtɛ̂ ńtyantə̂ lə́, á toonə̂ nəyeŋə́ á júmə, flǎwa əyǐə á tíʼ ńkoonə̂ ńkwɛdnə̂, nəpɔŋ əyǐə á tíʼ měe yə́, lə́ ndzaŋə ándó əfoʼə a yǒ nə́ əlaŋə̂ əghâ páʼ a tə́ nə́ náŋə apeʼə ajíə.

¹²Mbɔŋə lə́ yə ŋwu páʼ a túg nə́ asəgə́ndzɔʼə əghâ páʼ moomə a yǐ nə́, ńté ńgə́ əghâ páʼ a tɨ́ nə́ ńtyantə̂ á mə́m mɔ lə́, a yǐ kwá ntsɔ́ʼəfaʼ əjǐ páʼ ə́ pə́ nə́ nchîmbî Əsê a nə ńdaʼnə̂ á mbô pɨ pó kɔŋ nə yə́.

¹³Əghâ páʼ ŋwu tsə̌ a chî nə́ á mə́mə akwaʼlə, kɔ a sóŋ ńgə́, Lə́ akwaʼlə Əsê á kwaʼlə̂ nə́ mə ə́wə́, ńté ńgə́ təmbɔʼ pə́ kě Əsê nə́ təpɔŋ kwaʼlə̂ pô, Əsê nə́ nkɔ̌ʼmbɨ əyə́ a kě ŋwu kə́ ńkwaʼlə̂ pô.

¹⁴Akwaʼlə a yǐəə á mbɨ ŋwu lə́ əghâ páʼ mənu na mbɨ ə̈ lɔ nə́ mə́ legtə̂ nə́ yí ə́soŋtə̂ á tíʼə ńdzoŋə̂ mə́ələ́.

¹⁵Mənu mə́ təpɔŋ mi mbɨ ŋwu ə̈ lɔ nə́ lə́ mɨ́d mə̈ tíʼə nə́ ḿbîə təpɔŋə, əghâ təpɔŋə á kwéŋ nə́ əshîʼnə wə́ələ́ pîə nəwûə.

¹⁶Pəlimə́ mə maŋ kɔŋ nə́, kɔ ŋwu tsə̌ a fɨgə̂ áwə́ənə́!

¹⁷Ajú yə əshîʼnə atsəm pó məfɛ̂nə mimə əshîʼnə mətsəm mə́ lǒo lə́ nəpóolə atǐə, ńdǒo lə́ á mbô Əsê ńtsóolə, ŋwu páʼ a tsoŋkə̂ nə́ nkyaʼ, a chî nə́ nəpóolə, yí nə nkɔ̌ʼmbɨ əyí a kë kwúblə pô, ńkě kə́ ńkwúblə ándó mə́lə́glə á kwúblə nə́ lə́ pô.

¹⁸Lə́ kə kɔŋ yí ńtíʼ ńgɛd pɛn pə́ pɔ́ pí ńdaŋə̂ á mə́mə atséebə ají yə ndə̌ŋdəŋə́, ńjî ńgə́ pɛn túgə á ntsɛɛmbi aliʼə́ á mə́m əpú pí ətsəm páʼ a tsoŋkə̂ nə́.

¹⁹Pəlimə́ mə maŋ kɔŋ nə́, kwúmtə nə́ ńgə́! ŋwu ntsəmə á mə́m pəənə́ a chîə a mə́ tə́ nə́ zaŋkə̂ jwə́ʼtə, ə́ pə́ kě zaŋkə̂ tséebə pô, ə́ kě kə́ zaŋkə̂ záŋ ndě pô.

²⁰Təmbɔʼ ŋwunə a tə́ ńdzáŋ ndě a kě mənu mə́ Əsê mə́ tɨ́ nə́ ndə̌ŋdəŋ lə́ faʼ pô.

²¹Lə́ pə́ ńgə́ gho myaʼ mənu mimə ndɔtí pópə mənu mimə təpɔŋə, ḿbímə atséebə Əsê páʼ pə́ pǐ nə́ á məntɨ́ pəənə́. Lə́ atsáb yə wɨ́ páʼ á chî nə́ mbɔʼ á chwádkə áwə́ənə́.

²²Kɔ gho fɨg mbɨ əzo tsɔʼə a mə́ tə́ nə́ jwə́ʼtə atséebə ajíə, nə́ kə́ ńtə́ ńnéŋə ázə́ələ́ á mə́mə afaʼə.

²³Ŋwu ntsəm páʼ a jwə́ʼtə nə́ atsáb yə wɨ́ ḿbə́ ńchîə á mə́mə afaʼ néŋ pô a chî lə́ ándó ŋwu páʼ a náŋ nə́ akyaʼə́shî ńtíʼə ńdzɨ́ ndzaŋ mbɨ əjǐ chî nə́.

²⁴A náŋ ndzaŋ mbɨ əjǐ ə́ chî nə́ ńtíʼ ə́sɛdnə̂ ńtə́ ńgɛnə̂ ḿbɛ́dtə ńdəgnə̂ yí ndzaŋ mbɨ əjǐ pěʼ nə́ ńchîə.

²⁵Lə́ ŋwu ntsəm páʼ ä náŋ nə́ noŋkə wə́ a koʼnə̂ nə́ ńgɛn fyag lə́ əshîʼnə, noŋkə wə́ ä fóg nə́ pəənə atsáŋ lə́, ńkə́ ńgɛn nə́ mbiə á mə́ zoŋ nə́ wɨ́d ńkë jwə́ʼtə tsɔʼə jwə́ʼtə nə́ ńdəgnə̂ pô ńkə́ néŋə á mə́mə afaʼ, Əsê yǒ fɛ̂ afoʼ nə́ pó á mə́mə anu pó faʼ nə́.

²⁶Ŋwu ntsəm páʼ a kwaŋ nə́ ńgə́ yí lə́ ŋwu Əsê, təmbɔʼ a chî jî ndzaŋ təmbɔʼ a lɔg ndɛd nə́ alə́əmə ají pô tə ḿbə́ anǔəsê ají lə́ ənukə́taŋ a kə́ fɨgə̂ lə́ mbɨ əjǐə.

²⁷Ajú páʼ Əsê a pə́ nə́ Tǎ a lɔg nə́ ńgə́ lə́ chigə anǔəsê, páʼ a kě nə́ ndɔtí túg ńkə́ ńkoʼnə̂ lə́ zəənə́: á mə́ lɔg nə́ ndɛd nə́ pətǐ pópə pəkog á mə́m ngə́ʼ əzoobə́, ə́ kə́ lɔʼkə̂ nchîmbî əzo nə́ ndú ńgə́ kɔ təpɔŋ mə́m mbîə á kwú ə́wə́.