Read Awing Jɛmsə 2 Bible Online

Jɛmsə 2 - Awing bible

Jɛmsə 2

¹Pəlimə́ mə, ándó pɨ pó túg nə́ mbimə́ á mə́m Mmaʼmbî əwɛ̂n Yeso Klisto, yi páʼ a túg nə́ nəgháʼ lə́, kɔ pɛn tə́ náŋə pɨ tsɔʼə á əshî ńkɔŋə̂ pətsɨ́ ḿbeenə̂ pətsə́.

²Təmbɔʼ ngaŋnkáb páʼ a wê nə́ əféŋ pə́ tsoŋkə̂ nə́ nə́ gôl pópə ətsəʼ pi əshîʼnə a yǐəə á mə́m nkyeetə pɨ, əfə́m páʼ a wê nə́ əpí ətsəʼ ə́ kě pɔŋ pô a kə́ ńgyǐəə ají,

³pɨ tíʼ ńgóʼkə a ŋwu páʼ a wê nə́ ətsəʼ pipə əshîʼnə lə́, ə́sóŋ nə́ yí ńgə́ “náanə nə́ aləŋ yə əshîʼnə zəənə́ aliʼə́ nə” ə́sóŋə á mbô mbóŋ wə̂ ńgə́, “Tə́əmə aliʼ wə̂, kɨ yǐ ńnáanə á nəpɛnə́ məko maŋə á ndəsê,”

⁴pɨ pɛ́dtə ńnəələ̂ á tətɨ pɨ ńgə́ ŋwu tsə̌ a tsɛɛlə̂ yitsə̌, ńtíʼ ńchúʼə á mə́ tsɔ́ʼtə nə́ əsáʼ pɨ nə́ akwaŋə təpɔŋ páʼ nə́ túg nə́.

⁵Pəlimə́ maŋ kɔŋ nə́, jwə́ʼtə nə́! Əsê a nə ńtsɔ́ʼ lə́ pəənə ándó pó póŋ nə́ á mə́m mbî ghɛn ńjî ńgə́ pó pə́ pəfoʼə á mə́m mbimə́ ńtíʼ ńtúgə aliʼə́ á mə́mə anuə nəfoonə ají páʼ a nə ńdaʼnə̂ nə́ pɨ pó kɔŋ nə́ yə́.

⁶Lə́ pɨ pə́ ńgwág pəpóŋə; Lə́ kě pəfoʼ pó néŋ nə́ ngə́ʼə á mbɨ pɨ pô, lə́ kě pó páʼ pö lɔg nə́ áwɨ́ ńgɛnə̂ nə́ əliʼə́ asáʼə́məsáʼ pô?

⁷Lə́ kě pó pəfoʼ páʼ pó zɔmtə̂ nə́ əlɛ́n ngóʼkə ə́wə́ páʼ pə́ nə́ fɛ̂ nə́ á mbô pɨ lə́ pô.

⁸Nə́ yǐ ghɛd lə́ chigə anu yə əshîʼnə páʼ təmbɔʼ pɨ tə́ ńdzóʼnə noŋkə anuə nəfɔ páʼ a fɛ́d nə́ á mə́mə atséebə Əsê ńgə́, “Kɔŋə̂ ngaŋnəpad əgho ándó mbɨ əzo.”

⁹Lə́ təmbɔʼ pɨ tə́ ńnáŋə pɨ tsɔʼə əshî ńkɔŋə̂ pətsɨ́ ḿbeenə̂ pətsɨ́, nə́ jî ńgə́ nə́ ghɛlə̂ lə́ təpɔŋ, noŋkə á kə́ ńgwaamə̂ áwə́ənə́ ándó pɨ páʼ pó fankə̂ nə́ noŋkə.

¹⁰Ŋwu ntsəm páʼ a fankə̂ nə́ táʼ noŋkə, a jî ńgə́ a fankə̂ pɨ́d pətsəmə.

¹¹Ńté ńgə́ ŋwu páʼ a sóŋ nə́ ńgə́, “Kɔ jîə mə̂ghabə” a nə ńkə́ ə́sóŋ ńgə́, “Kɔ jwítə” lə́ təmbɔʼ gho chîə mə̂ghabə jî pô ḿbə́ ńjwítə ŋwu, jî ńgə́ gho fankə̂ noŋkə.

¹²Nə́ tə́ ńtséebə ńkə́ ńtə́ faʼə̂ mənuə ándó pɨ pə́ yǒ nə́ tsɔ́ʼtə əsáʼ əghɔ́b ə́zoŋə̂ noŋkə páʼ á fóg nə́ áwɛ̂nə atsáŋ lə́.

¹³Ńté ńgə́ Əsê yǒ kě túgə akóolə́mə́lə́ŋ əghâ páʼ a tə́ nə́ ńtsɔ́ʼtə əsáʼ ŋwu a kě nə́ akóolə́mə́lə́ŋ á ndu pətsə́ pɨ túg pô; lə́ akóolə́mə́lə́ŋə a pə́ ńtsɛ ńtsɔ́ʼtə əsáʼə.

¹⁴Pəlimə́ mə, chigə ape a chî nə́ á mə́m wɨ́ lə́ akə̂ mbɔʼ ŋwunə a sóŋ ńgə́, “Maŋ túg mbimə́” páʼ təmbɔʼ a chîə zɨ́d nəələ̂ á mə́m məfaʼ míə? Təmbɔʼ mbimə́ zɨ́d zə́ ə́ chwádkə yə́?

¹⁵Təmbɔʼ ndim əwɛ̂n yi məngyě kɨ yi mbyâŋnə a póŋə atsəʼə́ á mə́ wê nə́ kɨ məjîə á mə́ jî nə́,

¹⁶zəənə́ yǐ kwáalə ághɔ́b lə́ ə́lɛ́ mbɔʼ gho sóŋ ńgə́, “ghɛn nə́ mbwɔ́dnə, lê ńdumtə̂ ńkə́ ńjî məjî əshîʼnə” tə ghə́ gho fɛ̂ məjî mətsɨ́ kɨ ətsəʼ pətsɨ́ nə́ pó? zə̂ á yǐ kwáalə ághɔ́b lə́ nə́ akə̂ lə́?

¹⁷Lə́ pə ńgə́ mbimə́ á ngǎ yí tə məfaʼ lə́ akwûə mbimə́.

¹⁸Lə́ ŋwunə a yǐ sóŋ ńgə́, “Táʼ ŋwunə a túg mbimə́, yitsə̌ a túg məfaʼə,” Akwe mə lə́ ńgə́, “Nəələ̂ mə ndzaŋ təmbɔʼ ŋwu tsə̌ a túg mbimə́ tə məfaʼə. Maŋ yǐ nəələ̂ áwɨ́ nə́ mbimə́ mə ə́ laŋ lə́ á mə́m məfaʼə mə.”

¹⁹Nə́ pí ńgə́ lə́ chî tsɔʼə táʼ Əsê ə́wɨ́? a pɔŋə̂; Pəpɛ̌sê pó kə́ ḿbímə, ńdzoŋə̈ ḿbɛ́nkə nə́ apɔ́gə.

²⁰Akəkóg, gho loonə̂ lə ńgə́ pə́ nəələ̂ gho ńgə́ mbimə́ tə afaʼ ə́ kě nə́ anu yitsə̌ chî?

²¹Nə́ kwaŋ ńgə́ tǎ pətǎ əwɛ̂n Ablaamə a nə ńtɨ́ ńkoʼnə̂ a mbi Əsê lə́ ə́lɛ́? A nə ńdaŋ lə́ á mə́m məfaʼ mí əghâ ándó a nə fɛ̂ nə́ mɔ́ əyǐ Azigə á nəpá nə́ Əsê?

²²Nə́ kě zɨ́ ńgə́ mbimə́ əjǐ pópə məfaʼ mí nə nɔd ə́faʼə̂ aliʼə́ mɔʼə́? Mbimə́ əjǐ nə ńkoʼnə̂ ńgɛn ə́fyag ńdaŋ lə́ á mə́m məfaʼ míə.

²³Anu páʼ aŋwaʼlə Əsê a nə sóŋ nə́ a tíʼ ńkoʼnə̂ ńgə́, “Ablaam a nə néŋ ntɨ́ əyí nə́ Əsê, ńté mbimə́ əjǐ Əsê a pímə yə́ ándó ŋwu páʼ a tɨ́ nə́ ndə̌ŋdəŋə́.” Ńdaŋ ə́lɨ́d pə́ tíʼ fóŋə Ablaam nə́ əshu Əsê.

²⁴Nə́ zɨ́ əghâ nə́ ńgə́ ŋwunə a tɨ́ ńkoʼnə̂ a mbi Əsê lə́ nə́ məfaʼ míə, ńkě té lə́ tsɔʼə mbimə́ əjǐ pô.

²⁵Lə́ tsɔʼə ndzaŋ a nə ńdaŋ nə́ nə́ akwɛlə zə́ pə́ nə fóŋ nə́ nə́ Laʼab lə́. A nə ńtɨ́ ńkoʼnə̂ a mbi Əsê ńdzoŋ lə́ nə́ məfaʼ míə; ńdaŋ ndzaŋ a nə ńkwá nə́ məntú mə́ pəjus ńgɛd pó laŋ nə́ alaŋə́ yə ndaʼ ńgə́ kɔ ngaŋkə́pa əzɔ́b jwítə ághóobə́.

²⁶Lə́ pə́ ńgə́, ndzaŋə ándó na mbɨ páʼ ə́ kě nə́ ajwi túg ə̈ kwû nə́ lə́, lə́ kə́ ḿbə́ ndzaŋə ándó mbimə́ tə afaʼ ə́ kə́ nə́ ńkwûə.