Read Awing Jɛmsə 3 Bible Online

Jɛmsə 3 - Awing bible

Jɛmsə 3

¹Pəlimə́ mə! Á kě pɔŋ ńgə́ pɨ pipə nɨ́ nə́ á mə́m pɨ pó náŋə á mə́ pə́ nə́ pəzéʼkə pô, ńté ńgə́ nə́ jî ńgə́ pəgə́ ándó pəg pə́ nə́ pəzéʼkə lə́, pə́ yǒ tə́ tsɔ́ʼtə əsáʼ əwə́g lə́ ə́ pyádnə lɔg ndɛd ə́wɨ́ tsɛɛlə̂ yi ŋwu ntsəmə.

²Ńté ńgə́ pɛn pətsəm ghɛd əfankəmə́nu pi nɨ́ nə́, təmbɔʼ ŋwunə a chîə afankə yitsə̈ ghɛlə̂ nə́ atséebə ají pô, tə ḿbə́ lə́ ŋwu páʼ a koʼnə̂ nə́ ńgɛn ə́fyagə̂, ńkə́ ńchî təmbɔʼ a wam mbɨ əjǐ nə́ ndú ətsəmə.

³Pɛ̈n néŋə atəənə́ a ntso ləəmə́ lə́ ńgə́ a zóʼnə áwɛ̂nə, pɛn kə́ ńchî təmbɔʼ pɛn ghɛd a ghɛn ndú ətsəm pɛn kɔŋ nə́.

⁴Kwaŋ nə́ ndzaŋ páʼ apáŋə́nkǐə a fáŋ nə́ ńchîə, chigə tə́kɔʼ sə́mə ä chǐə ázə́ələ́ á mə́m nkǐə, pə̈ lɔgə̂ lə́ tsɔʼə mɔ́ luda[1] ə́ sɛdkə̂ atûə ají ə́wə́, zə́ələ́ á tíʼə̈ ńgɛn ndú ətsəm páʼ ŋwunə a soŋ nə́ á lɔ nə́ ńgə́ a ghɛn ə́wə́.

⁵Lə́ tsɔʼə ə́lɨ́d ndzaŋ alə́əmə á pǎ nə́ tə ḿbə́ mɔ́ kə́nyaŋə́ alamə́ a mbɨ lə́, ḿbə́ ńtəələ̂ nə́ pətə́kɔʼ pə́ mənuə; kwaŋ nə́ ndzaŋ páʼ mɔ́ alə́əmə móg lyǎ ä tɔ nə́ á mɛ́ akoobə́!

⁶Alə́əmə chî lə́ ándó mógə́, lə́ aliʼ təpɔŋə á lwɛ́nkə nə́ ə́wə́ á mə́m əlam mbɨ əpɛ́nə, ńtíʼə ńgeebə̂ təpɔŋ wə́ á mə́m mbɨ əzɛn ntsəmə. Ä tɔ nchîmbî əzɛn ntsəm ə́fɛ́lə nəchwaakənə́ tə ńgɛn ḿməg, nə́ móg páʼ ə́ fɛ́d nə́ lə́ á mə́m móg Satanə.

⁷Ŋwu məsɔŋə́ a jîə á mə́ tsóokə nə́ ntɨ́ məneemə, ńkə́ ńtsóokə ntɨ́ məna mimə nɨ́ nə́ Əsê kə tsoŋkə̂ nə́, məna mimə akɔb pópə pəsə́ŋ ḿbá mbô mənó ntsəm pópə məshûə;

⁸Lə́ ŋwu mbîə á pə́ ńkě chî təmbɔʼ a lɔg ndɛd nə́ alɨ́ pô. Alə́əmə á túgə təpɔŋə, ńkě chî təmbɔʼ pə́ ghɛd zə́ələ́ zóʼnə pô, ḿbɨ ńtúg ndíʼ təpɔŋ tə ńdúnə.

⁹Pɛn lɔgə̂ lə́ alɨ̈ ŋ́ŋáŋkə Mmaʼmbî əwɛ̂n ə́wə́, á pə́ nə́ Tǎ, ńkə̈ ńdɔgə̂ zɨ́d ə́fóŋ ndɔ ə́wə́ á mbɨ pɨ pə́ ghɛd nə́ ághɔ́b pó fî Əsê.

¹⁰Atsáb páʼ á ŋáŋkə nə́ Əsê pópə yi páʼ á fóŋ nə́ ndoonə á mbɨ pɨ ä ə́fɛ́lə lə́ tsɔʼə nə́ táʼ ntsoolə. Pəlimə́ mə, kɔ á pə́ ə́lə́ələ́.

¹¹Təmbɔʼ nkǐ yi féŋtə nə́ pó yi tsə́g nə́ ə́fɛ́lə á mə́m táʼ nələ́g nə́ nkǐə?

¹²Pəlimə́ mə! Təmbɔʼ atǐə figə á kě mənta mə́ olifə zə́m pô, kɨ təmbɔʼ atǐə glebə á kě mənta mə́ fig zə́m pô? Kɨ təmbɔʼ nələ́g nə́ nkǐ yi nə́ tsə́g nə́ ə́ fɛ̂ nkǐ yi féŋtə nə́?

¹³Ŋwu tsə̌ a chîə tətɨ pɨ páʼ a túg nə́ ayáŋ, atûə yə́ á kə́ ńtsɔ́ʼnə? A chîə á mə́ nɨd nə́ zɨ lə́ nə́ nchîmbî yi əshîʼnə pó ngɛdmə́nu yi əshîʼnə páʼ a faʼ nə́ nə́ atsóokə́mbɨ pó ayáŋə.

¹⁴Lə́ təmbɔʼ gho túgə ŋwéetə́, ńkə̈ náŋə tsɔʼə ńgə́ ape pə́ azô, ńtúgə achánə pópə əkeelə́ á mə́m ntɨ́ gho, kɔ tə́ ńkɔ́ʼkə mbɨ əzo ńtíʼə ńtsɨ́d ntsɨd nə́ anu páʼ á pə́ nə́ ndə̌ŋdəŋə́.

¹⁵Mbô ajíənu zɨ ə́ kě lə́ á nəpó lǒo ńtsó pô, lə́ yə́ mbîə, Ajwiə á kě ə́wɨ́ chî pô, á lǒo lə́ á pə́ á mbô dɛbəələ.

¹⁶Aliʼə́ atsəm páʼ ŋwéetə́ á chî nə́ ə́wɨ́ pópə ndzaŋ ŋwunə a náŋ nə́ tsɔʼə ape ají, ajwaʼlə pópə ntê təpɔŋ ntsəm ə́ kə́ ńchî ə́wə́.

¹⁷Lə́ ajíənu páʼ ä lǒo nə́ á nəpó á pěʼ ḿbeg ŋ́ŋwaʼə̂ (ńkě ndɔtí túg pô), á túg mbwɔ́dnə, ńtúgə atsóokə́mbəəmə, ńkɔŋ əghəənə, ńdwɛ́nkə nə́ akóolə́mə́lə́ŋ ńkə́ ńdzə́mə mənta mə́ atǐ mimə əshîʼnə. Ńkě atóŋə́mbî pó məfɨg túg pô.

¹⁸Mə tɨ́ nə́ ndə̌ŋdəŋ lə́ mənta mə́ atǐ ngaŋə́kwɛlə̂ mbwɔ́dnə ə́ pǐ nə́ nə́ mbwɔ́dnə.