Read Awing Jɛmsə 4 Bible Online

Jɛmsə 4 - Awing bible

Jɛmsə 4

¹Məntso pópə məlaʼə́ tətɨ pɨ mə́ lǒo lə́ əfo? Lə́ kě alublə á chî nə́ mbɨ pɨ ńdɔ əpú ndu mbî pɨ ḿbóʼnə məlaʼ pô.

²Nə́ loonə̂ mə́ túg nə́ ajúmə, lə́ təmbɔʼ nə́ chîə zɨ́d túg pô, nə́ jwítə, nə́ loonə̂ mə́ túg nə́ əpú pɨ pə́ ndaʼ pə́ túg nə́, ńchî túg pô nə̈ fyaʼnə̂ ḿbóʼnə məlaʼə́. Pɨ kě ajú pɨ lɔ nə́ túg lə́ ńté ńgə́ nə́ kě Əsê pítə pô.

³Lə́ təmbɔʼ nə́ pítə pə́ kě nə́ pɨ fɛ̂ pô ńté ńgə́ nə̈ pítə nə́ akwaŋə təpɔŋə, nə́ pítə əpúmə á mə́ faʼ nə́ mənu páʼ pɨ lublə̂ nə́ nə́ mə́ələ́ á mbɨ pəənə́.

⁴Ngaŋə́jîəmə̂ghabə! Nə́ kě jî ńgə́ pɨ nə́ ghɛd nə́ əshu pɨ pə́ mbî lə́ ngaŋkə́pa Əsê? Pɨ páʼ pó lɔ nə́ á mə́ ghɛd nə́ əshu pópə mbî lə́ ngaŋkə́pa Əsê.

⁵Kɔ nə́ kwaŋ ńgə́ Aŋwaʼlə Əsê á tsáb lə́ atséebə kətaŋ ńgə́, “Ajwi páʼ Əsê a néŋ nə́ á mə́m pɛn lə́ á túgə ŋwéetə́.”

⁶Lə́, apɔŋə́ntɨ́ páʼ Əsê a fɛ̂ nə́ nə́ pɛn lə́ á tsɛɛlə̂ zəənə́. Ndzaŋə aŋwaʼlə Əsê a sóŋ nə́ ńgə́, “Əsê a tsóokə pɨ pó kɔ́ʼkə nə́ mbɨ əzɔb lə́ ḿbə́ fɛ̂ apɔŋə́ntɨ́ nə́ pɨ pó tsóokə nə́ mbɨ əzoobə́.”

⁷Ńdaŋ ə́lɨ́d tsóokə nə́ mbɨ əzəənə́ á mbi Əsê; kǐ nə́ Satanə, a yǐ kəələ̂ áwə́ənə́.

⁸Yǐ nə́ ḿbáatə Əsê, a yǐ kə́ yǐ páatə áwə́ənə́, ngaŋə́ghɛlə təpɔŋ! Sog nə́ mbô mə́ənə́, ngaŋmə́fɨg! ghɛd nə́ məntɨ́ mɨ́ mə́ ŋwaʼə̂

⁹Fɨnə̂ nə́, sɔbnə̂ nə́ ńkə́ ńkyéŋ ḿmɨ́ʼə, kwúblə nə́ nəweŋ əwəənə́ a pə́ nəkyéŋə, ńgɛlə̂ akɔŋtə azə́ənə́ á tíʼə pə́ asɔbnə.

¹⁰Tsóokə nə́ mbɨ əzəənə́ á mbi Mmaʼmbî ńjî ńgə́ á kɔ́ʼkə áwə́ənə́.

¹¹Pəlimə́ mə, kɔ pɨ tə́ ńtséebə təpɔŋ ńté pəlim pə́ənə́. Ŋwu páʼ ä tsáb nə́ təpɔŋ ńté ndim kɨ əsáʼ əsáʼ ndim, a tséebə təpɔŋ ńté lə́ noŋkə ńkə́ sáʼ əsáʼ ńté lə́ noŋkə, lə́ təmbɔʼ gho tə́ ə́sáʼ əsáʼ ńté noŋkə, gho kě lə́ ŋwu gho zóʼnə nə́ noŋkə pô, ńtíʼ ḿbə́ lə́ əsáʼməsáʼə.

¹²Lə́ tsɔʼə Əsê ḿbə́ ndaʼ ŋwu páʼ a fɛ̂ nə́ noŋkə ḿbə́ əsáʼməsáʼə. Lə́ tsɔʼə ndaʼ yí təmbɔʼ a chwádkə ńkə́ ńtsəŋkə̂. Gho kwaŋ ńgə́ gho lə́ əwə á mə́ tsɔ́ʼtə nə́ əsáʼ ndim əgho?

¹³Nə́ əghâ nə́, jwə́ʼtə á mbô maŋə, pɨ nə́ sóŋ nə́ ńgə́, “Ə́sɛ̂n kəənə ngwɛʼə́ pɛn yǒ ghɛnə̂ á tə́kɔʼ tɔ̂ŋ yitsə̌, páʼ pɛn yǒ nə́ chî ə́wɨ́ táʼ ngoʼ ə́ tə́ táŋə məteenə́ ə́ kə́ túgə ape yə nɨ́ nə́.”

¹⁴Pɨ kě jî ndzaŋ páʼ nchîmbî əzɨ yǒ nə́ chîə á ngwɛʼə́ pô! Nchîmbî əzɨ ə́ chî lə́ ándó akə̂? Ə́ chî lə́ ándó mɔ́ alə́m páʼ á kɔ́ʼ nə́ ḿbɨ́ ḿbéŋ tsɔʼə əghâ yi wə́.

¹⁵Anu təmbɔʼ pɨ sóŋ lə́ ńgə́, “Təmbɔʼ á pə́ akwaŋə́nuə Mmaʼmbî tə ḿbə́ pɛn yǐ chî ə́wɨ́ tə ə́faʼə̂ anu zɨ kəənə jǐə.”

¹⁶Lə́ nə́ pə́ əghâ nə́, pɨ tə́ ńtəələ̂ ńkə́ ńkɔ́ʼkə mbəəmə; ntê akɔ́ʼkə mbɨ yi wɨ́ ə́ kě pɔŋ pô.

¹⁷Lə́ələ́ á pə́ ńgə́ ŋwu páʼ a jî nə́ anu yə əshîʼnə páʼ a pěʼ nə́ ńchîə á mə́ faʼ nə́ ḿbə́ ńkě zɨ́d faʼ pô, a ghɛlə̂ təpɔŋə.