Read Awing Jɛmsə 5 Bible Online

Jɛmsə 5 - Awing bible

Jɛmsə 5

¹Nə́ pə́ əghâ nə́, pɨ pəfoʼ, jwéʼtə nə́ anu maŋ sóŋ nə́, tə́ nə́ ńkyéŋə ńtûə ḿbóʼ ngoŋ nə́ məngə́ʼ mə́ yǐ nə́ yǐəə á mbô pəənə́;

²Afoʼə azə́ənə́ á lə̂ yə́, əsəʼ pɨ ńjî ətsəʼ pə́ənə́.

³Ate á kɔ́d nkáb əzəənə́, ate á tə́əmə á mə́ nɨd nə́ ndɛn mənu mətsəm pɨ ghɛd nə́, zə́ələ́ á yǒ kɔ́d na mbɨ əzəənə́ ándó mógə́. Pɨ chwíʼtə apeʼə azɨ́ ńdɔg ńtə́ ḿbyáb ndwigtə əlě mbî pəənə́.

⁴Nə́ kě mənkáb mə́ pɨ pó faʼ nə́ á mə́m əfɔ pɨ tû pô. Jwéʼtə nə́ anu pó sóŋ nə́, nəkyéŋ pɨ páʼ pó foʼ nə́ məjî mɨ́, á kwúnə á nətôglə Əsê páʼ á pə́ nə́ Mmaʼmbî ńtsɛɛlə̂ ajúmə atsəm lə́.

⁵Nchîmbî əzəənə́ á ndu mbî ə́ lwɛ́nkə nə́ əpú məshu pópə mə zóʼ nə́ əshîʼnə; Nə́ ghɛd mbɨ əzɨ ə́ fáŋ ńkoʼ ńtíʼə ḿbyáabə alě pə́ yǒ nə́ ə́sə́ələ áwə́ənə́.

⁶Nə́ sáʼ məsáʼ mə́ pɨ páʼ pó kě nə́ anu yətsə́ jî, ńgɛd pó wǔ əsáʼ nə́ jwítə ághóobə́, pó kě anu yətsə́ nə́ pɨ kə́ ńgɛd pô.

⁷Pəlimə́ mə, túg nə́ asəgə́ndzɔʼ tə ńkoʼ əghâ Mmaʼmbîə a ghɛd nə́ ńgyǐəə. Zɨ́ nə́ ndzaŋ ngaŋə́líʼə́líʼ ə́ túg nə́ asəgə́ndzɔʼ ḿbyáabə ńgə́ mbəŋ ə́ lôo á ndəsê ə́fɛ̂ məjî mimə əshîʼnə, ndíʼ məjîə a kə́ ńtúgə asəgə́ndzɔ̈ʼ ḿbyáabə alu pó məgheemə́.

⁸Nə́ kə́ ńchîə á mə́ túg nə́ asəgə́ndzɔʼ ə́ kə́ tɨ́ tyantə̂ ńté ńgə́ əlě mbî páʼ Mmaʼmbîə a yǐ nə́ yǐ ə́ páatə.

⁹Pəlimə́ mə, kɔ nə́ fɛ̂ fid ńté pəlim pəənə́, ńjî ńgə́ Əsê a yǒ ńkě məsáʼ mɨ́ tsɔ́ʼtə pô. Əsáʼməsáʼə a tə́əmə á ntsǒndɛ̂ ńtə́ ńdoonə̂ á mə́ kwú nə́ á ndɛ̂.

¹⁰Pəlimə́ mə, kwúmtə nə́ məntú mə́ Əsê pó nə́ ńtsáb nə́ ńté əlɛ́n Mmaʼmbîə. Lɔg nə́ ághóobə́ ándó afiʼkə pɨ pó túg nə́ awaamə́ntɨ́ pópə asəgə́ndzɔʼ əghâ pó chî nə́ á mə́m ngə́ʼə.

¹¹Pɛn fóŋə ághɔ́b nə́ pɨ pó kɔŋtə̂ nə́ lə́ ńté ńgə́ pó túgə asəgə́ndzɔʼə. Pɨ nə ńdzóʼ ndzaŋ Jobə a túg nə́ asəgə́ndzɔʼə, ḿbɨ ńkə́ ńdzóʼ ndzaŋ Əsê a nə fɛ̂ nə́ apeʼ nə́ yə́ á ndwigtə. Ńté ńgə́ Mmaʼmbî a lwɛ́nkə nə́ akóolə́mə́lə́ŋ pó apɔŋə́ntə́əmə.

¹²Pəlimə́ mə, mɛ́ anu páʼ á chî nə́ ə́wɨ́ lə́ ńgə́, kɔ nə́ wad əka əghâ nə́ tə́ nə́ ńgɛd ndaʼnə. Kɔ zɔ nə́ əlɛ́n nəpó kɨ nə́ yi ndu mbî kɨ nə́ əlɛ́nə ajûtsə́. Ghɛd “Ə̂” əgho á pə́ ə̂, “Ngá” əgho á kə́ ḿbə́ ngá, ńjî ńgə́ kɔ Əsê a yǐ ńtsɔ́ʼtə əsáʼ əgho, gho wǔəə.

¹³Ŋwu tsə̌ a ndzɔʼ pəənə́ a chîə á mə́m ngə́ʼ? A chaʼtə́sê. Ŋwu tsə̌ a tə́ nkɔŋtə̂? A tə́ ńdzoobə̂ mənkǐ ŋ́ŋáŋkə Əsê.

¹⁴Ŋwu tsə̌ a chî ə́wɨ́ páʼ a tə́ nə́ ńgoonə̂? A chîə á mə́ fóŋ nə́ mətû mə́ nkyeetə pɔ́ pə́ Əsê páʼ pó yǐ nə́ chaʼtə́sê nə́ pó ə́ tíʼ zɔ́ʼə ághɔ́b nə́ məghɔ́d nə́ əlɛ́n Mmaʼmbîə.

¹⁵Achaʼtə́sê pə́ chaʼtə̂ nə́, nə́ mbimə́ a yǐ tsóʼə a ngɔ yí wə́, Mmaʼmbî a pɨ ńgɛd ngɔ yi wə́ a lǒo; pə́ ləgnə̂ pətəpɔŋ pí páʼ a nə ńgɛd nə́.

¹⁶Lə́ á pə́ ńgə́ fiʼtə̂ pətəpɔŋ pó á mbô táʼ táʼ ŋwunə ńkə́ ńchaʼtə́sê á mbô ŋwu ntsəmə, ńjî ńgə́ pɨ yǐ féŋtə; Lə́ á pə́ achaʼtə́sê ŋwu páʼ a tɨ́ nə́ ndə̌ŋdəŋə́ a túg mətɨ ńkə́ ńtə́ ḿbyádnə ə́faʼə̂.

¹⁷Elayija a nə ḿbə́ tsɔʼə ŋwunə ándó pɛnə̂. A nə ńchaʼtə́sê nə́ ntɨ́ əyí ətsəm ńgə́ kɔ mbəŋ lô, mbəŋ kě kə́ ńdô á mə́m aláʼ nə́ ngoʼ teelə́ nə́ asánə pô.

¹⁸A kə́ ḿbɨ ńchaʼtə́sê nəpó nə́ tsóokə mbəŋ ndəsê tíʼ ńgɛd məjî mə́ kɔ́ʼə.

¹⁹Pəlimə́ mə, təmbɔʼ táʼ ŋwunə á mə́m pəənə́ a fɛ́lə yə́ á mə́m ndə̌ŋdəŋ, ŋwu tsə̌ a pɨ ḿbɨnkə̂ yə́ á mə́m wɨ́!

²⁰á kwúmtə ńgə́ ŋwu ntsəm páʼ a pɨ nə́ ḿbɨnkə̂ a ngɛdtəpɔŋə á mə́m ndə̌ŋdəŋ a chwádkə ajwiə ajíə a mə́m nəwûə, ńkə́ ńgɛd pə́ ləgnə̂ pətəpɔŋ pipə nɨ́ nə́.