Read Awing 1 Pita 1 Bible Online

1 Pita 1 - Awing bible

1 Pita 1

¹Aŋwaʼlə zəənə́ a lǒo lə́ mbô Pita a pə́ nə́ ntú Yeso Klisto, ńgɛnə̂ mbô pɔ́ pə́ Əsê pə́ kə fɨ́dkə nə́ ághɔ́b, pó tíʼ ə́shamnə̂ ńchîə á mə́m mboʼ Pontus, Galatya, Kapadosya, Esya, ḿbɨ́ ḿbə́ nə Bitinya.

²Pə́ nə ńtsɔ́ʼə áwɨ́ ndzoŋ lə́ nə Əsê a pə́ nə́ Tǎ a kə lɔ́btə nə́, ńgɛd pɨ pə́ pɨ pipə ŋwaʼ nə́ ńdaŋ nə́ Ajwiə ajíə, ńjî ńgə́ mbɔʼ pɨ zóʼnə Yeso Klisto pə́ tíʼ fyáamə achǐə ají nə́ pɛnə̂. Ńgə́ apɔŋə́ntə́əmə a Əsê pó mbwɔ́dnə ə́ pə́ əzɨ tə ńnə́ənə.

³Pɛn fɛ̂ ndǎ á mbô Əsê páʼə a kə́ nə́ ḿbə́ Tǎ pə Mmaʼmbî əwɛ̂n Yeso Klisto! Ńdaŋ nə akóolə́mə́lə́ŋə ají yə tə ndɛn a fɛ̂ nchîmbî yi fîə á mbô pɛn nə́ mə júmkə nə́ Yeso Klisto á nəwûə. Zəənə́ a tíʼ ńgɛd pɛn lwɛ́nkə nə́ akwaŋ ńtə́ ḿbyáabə á chî nə́ mbîə,

⁴ńdaŋ ə́lɨ́d pɛn tíʼə ḿbyáabə á mə́ kwá nə́ afoʼə mbwɔ́dnə páʼ Əsê a lɔʼkə̂ nə́ zə́ələ́ á mbô pɨ píə á nəpóolə, páʼ mbɔʼ a kě lə̂ kɨ ḿbə́g kɨ shwəgtə̂ pô.

⁵Afoʼ yəwə́ á chî lə́ á mbô pəənə́, pɨ páʼ Əsê a lɔg nə́ mətɨ mí ńkɨ́ʼtə áwɨ́ əwɨ́ ńté ńgə́ nə́ túg mbimə́, tə koʼ nə́ ndɛd páʼ nə yǒ nə́ jî nchwadkə́ páʼ pə́ yǒ nə́ kyaʼə̂ zə́ələ́ á ndwegtə mbî lə́.

⁶Ńté zɨ, nə́ chîə á mə́ tə́ nə́ kɔŋtə̂, nə pǎ nə́ tə ńchî əghâ nə́ á mə́ zɨ́ nə́ ngə́ʼ nə́ mɔ́ akəmə ndɛd ńté əkwaʼlə mənu páʼ ə́ chî nə́ á mə́ yǐ nə́ á mbô pɨ lə́.

⁷Ngə́ʼ zɨ lə́ mə́ jwə́ʼ nə́ ə́zɨ́ ńgə́ mbimə́ əzɨ lɛ ḿbə́ tsɔʼə ndə̌ŋdəŋ mbimə́? A pə́ pə́ gôlə páʼə a pə́ nə́ ajú mbɔʼ á pə́g, pə̈ jwə́ʼə wɨ́d lə́ nə́ mógə́; lə́ pə́ ńgə́, mbimə́ zɨ páʼ zɨ́d səglə̂ nə́ ńtsɛɛlə̂ gôlə, pə́ yǐ shib jwə́ʼə zə́ələ́, ńjî ńgə́ mbɔʼ zɨ́d koʼnə̂ pə́ tíʼ ŋ́ŋáŋkə wɨ́ əfɛ̂ nəgháʼə á mbô pɨ, pópə ngóʼkə Alě pə́ yǐ nə́ ńkyaʼə̂ anu ńté Yeso Klisto.

⁸Nə́ kɔŋə̂ a yí páʼ pɨ nə ḿbǎ nə́ tə ńkě yí kə́ zə́ənə pô lə́, ńkə́ néŋ ntɨ́ nə́ yí páʼ nə́ pǎ nə́ tə ńkě yí əghâ nə́ tə́ ńdzə́ənə pô lə́. Ńdaŋ ə́lɨ́d ńtíʼə ńkɔŋtə̂ nə́ mɛ́ tə́kɔʼ akɔŋtə á ntɨ́ pɨ páʼ á túg nə́ nəgháʼə, yi mbɔʼ atséebə ntsoolə á kě lyaʼtə̂ pô.

⁹Ńté ńgə́ nə tə́ ńkwá nchwadkə́ páʼ zɨ́d yǐ nə́ chwádkə ntɨ́ əwə́ənə́, ḿbə́ anu páʼ á ghɛd nə́ pɨ néŋ ntɨ́ nə́ yə́.

¹⁰Məntú mə́ Əsê páʼ pó nə́ sóŋ nə́ anu ńté apɔŋə́ntə́əmə Əsê páʼ á yǒ nə́ pə́ azɨ́, pó nə́ ḿbyádnə ńdɔg ndɛd ńnáŋə anu ńté ńkə́ ḿbítə mənu ńté nchwadkə́ zəənə́.

¹¹Pó nə ńchwaalə̂ á mə́ zɨ́ nə́ əghâ páʼ Əsê a yǒ nə́ chwádkə pɨ pí, ə́ kə́ zɨ́ ndzaŋ páʼ a yǒ nə́ chwádkə ághóobə́. Lə́ əghâ páʼ Ajwiə Klisto a nə ńtə́ nə́ ńtséebə á mbô pó, ńnɨd ntê ngə́ʼ páʼ Klisto a yǒ nə́ zə́ənə zə́ələ́ pó ntê nəgháʼ páʼ a yǒ nə́ túgə.

¹²Əsê a nə nɨd məntú mí mɨ ńgə́, afaʼ pó nə faʼ nə́, ape a nə ńkě lə́ azɔ́b pô, ape á nə ḿbə́ lə́ azə́ənə́. Ndzaŋ páʼ pó nə sóŋ nə́ mənu mə́ páʼ pɨ zóʼ nə́ əghâ nə́ pɨ pö náŋkə nə́ nkɨ yi əshîʼnə sóŋə á mbô pɨ lə́, ńdaŋə̂ á mə́m mətɨ mə́ Ajwǐəsê pə́ tú nə́ mə́ lǒo nəpó ńtsóolə. Lɛ̌ mənuə ándó tsɔʼə pətseŋpə́ndɛ́pə́sê pó lɔ nə́ ńgə́ atûə azóobə́ á tsɔ́ʼnə nə́ mə́ələ́.

¹³Lə́ á pə́ ńgə́, nə́ ghɛd məntɨ́ mɨ́ mə́ koʼnə̂ á mə́ faʼ nə́. Nə́ tə́ ḿbyáabə, ńnéŋə akwaŋə azə́ənə́ atsəm ńtə́ ḿbyáabə afoʼ páʼ pə́ yǐ nə́ fɛ̂ nə́ pəənə́ á əghâ ándó pə́ yǒ nə́ kyaʼ mənu ə́ té Yeso Klisto.

¹⁴Tə́ nə́ ńdzóʼnə Əsê, kɔ nə pí nchîmbî əzɨ ə́ zoŋ ntê mənu zə̂ mbɨ əzɨ lɔ nə́ lə́, páʼ pɨ kə chî nə́ á mə́m ə́wɨ́ əghâ pɨ kə kě nə́ anu yitsə̌ jî pô lə́

¹⁵Pɨ ŋwaʼ ŋwaʼ nə́ á mə́mə anuə atsəm nə́ faʼ nə́, tsɔʼə ndzaŋ Əsê páʼ a fóŋ nə́ áwə́ənə́ a ŋwaʼ nə́ lə́.

¹⁶Aŋwaʼlə Əsê á sóŋ ńgə́, “Nə́ ŋwaʼə̂, ńté ńgə́ maŋ kə́ ŋwaʼə̂.”

¹⁷Pɨ fóŋə yí nə́ Tǎ, əghâ ándó pɨ chaʼtə̂ nə́ Əsê á mbô Əsê, páʼ a tsɔ́ʼtə əsáʼ ŋwu ntsəm ndə̌ŋdəŋə́, ńdzoŋ ndzaŋ ŋwu ntsəmə ä faʼ nə́. Lə́ pə́ ńgə́, nə́ megnə̂ apuʼə nchîmbî əzəənə́ á ndu mbî ghɛnə́ ándó pɨ pə́ fɨ́dkə nə́ ághɔ́b, ńtúgə apɔ́gə Əsê.

¹⁸Ńté ńgə́ gho jîə ajú páʼ pə́ nə ńtû nə́ á mə́ chwádkə nə́ gho á mə́m ńté nchîmbî tə əlá əyí páʼ pətǎ pə́ pətǎ pó, pó nə ńdzéʼkə nə́ áwɨ́ ə́wə́. Lə́ nə ńkě ajú páʼ mbɔʼ á pə́gə ándó sɛləba kɨ gôlə pô,

¹⁹pə́ nə ńchwádkə áwɨ́ lə́ nə́ achǐə Klisto páʼ á səglə̂ nə́ ńtsɛɛlə̂ ajúmə atsəmə, a kə chî lə́ ándó mɔ́ mbéŋ ndzɛd páʼ á kě nə́ alɔʼə́ yətsə́ kɨ kɔntə yitsə́ túg pô.

²⁰Əsê a nə ńjǐ tə́ tsoŋkə̂ ndəsê pó nəpó lə́ ḿbɛ́d tə ńtsɔ́ʼə yə́. Pə́ kə kyaʼə̂ anu ńté yí nə́ ndwigtə əlě pɨ ńté atûə azə́ənə́.

²¹Ńdaŋ nə́ yí nə́ néŋ ntɨ́ nə́ Əsê, páʼ a nə ńjúmkə nə́ yə́ á nəwû ńtíʼ ə́fɛ̂ nəgháʼ əyǐə; lə́ pə́ ńgə́ mbimə́ əzɨ pópə akwaŋə azɨ́ ńtə́ ḿbyáabə ə́ tɨ́ lə́ nə́ Əsê.

²²Nə́ pə́ əghâ nə́ ndzaŋ nə́ zóʼnə nə́ ndə̌ŋdəŋ lə́, nə sog məmbɨ mɨ́ mə́ ŋwaʼə̂, ńtíʼ ńtúgə ndə̌ŋdəŋə́ akɔŋnə á mbô pəlim pə́ənə́ á mə́m Klisto, ŋwu ntsəmə a kɔŋə̂ a mɔ́mɛ́ əyǐ tə məfɨgə, nə́ ntɨ́ əyí ətsəmə.

²³Ńté ńgə́ ńdaŋə̂ á mə́mə atséebə Əsê páʼ zə́ələ́ á túg nə́ nchîmbî ńkə́ ḿmɛdnə̂ ngǎ mɔʼə́, pə́ pîə áwɨ́ ngǎ yitsə̌ ándó pɔ́ pə́ tǎ páʼ a kě nə̈ kwûə pô, ńkě pə́ pə́ pipə́ tǎ páʼ a kwû nə́ pô.

²⁴Ndzaŋ páʼ aŋwaʼlə Əsê á sóŋ nə́ ńgə́, “Ŋwu məsɔŋ ntsəmə a chî lə́ ándó nəyeŋə́, nəgháʼ əghɔb ntsəmə á chîə ándó flǎwa. Nəyeŋə́ wə̈ á kwúkə, flǎwa wə̈ á wukə̂ əsê,

²⁵lə́ atséebə Mmaʼmbîə á pə́ ḿmɛdnə̂ ngǎ mɔʼə́.” Atsáb zɨ lə́ Nkɨ yi Əshîʼnə wə́ pə́ kə náŋkə nə́ wə́ələ́ á mbô pɨ lə́.