Read Awing 1 Pita 3 Bible Online

1 Pita 3 - Awing bible

1 Pita 3

¹Tsɔʼə nə́ ndú wɨ́d wə́ pɨ pəngyě nə́ chîə á mə́ shib nə́ zóʼnə pəlú pə́ənə́, ńjî ńgə́ təmbɔʼ pó pətsə́ ə́ chî ntɨ́ nə́ atséebə Əsê néŋ pô, pó yǐ ńdzə́ənə mbɔ́ əwɨ ńtíʼ ńkwúblə ńnéŋ ntɨ́ nə́ Əsê, tə ghə́ nə́ sóŋə anu yitsə́ á mbô pó,

²ńté ńgə́ pó yǐ zɨ́ ndzaŋ mbɔ́ əwəənə́ á ŋwaʼ nə́ (ńkě ndɔtí túg pô) ə́ kə́ ə́ túgə apɔ́gə Əsê.

³Kɔ nə́ lɔg məshu mə́ ndzəmə apeŋə́ a mə́ tsoŋkə̂ nə́ məmbɨ mɨ́ əwɨ́ mə́ pɔŋə̂, ándó ndú páʼ nə́ tsoŋkə̂ nə́ ətû pɨ əwɨ́ kɨ məféŋ pópə məndeʼ mə́ gôlə nə́ ətsəʼ nə́ wê nə́,

⁴Lə́ məshu mɨ́ mə́ chîə á mə́ fɛ́d nə́ lə́ á mə́m məntɨ́ pəənə́, ntê məshu zɨ kě lɛnə̂ pô, ńgɛlə̂ mənu ndǎ ndǎ, ńkě afyaʼə́ loonə̂ pô, lə́ ajú páʼ á pyádnə ə́səglə̂ á mbi Əsê.

⁵Ńté ńgə́ pəngyě pó nə ŋwaʼ nə́ ntsɛɛmbi, páʼ pó nə túg nə́ akwaŋ ńtə́ ḿbyáabə nə́ Əsê, pó nə ńchî ńgɛlə̂ məshu lə́ nə́ ndú ghɛn ńgə́; pó zóʼnə pəlú póobə́.

⁶Sala a nə ńchî lə́ tsɔʼə ə́lə́ələ́, a nə ńdzóʼnə Ablaam tə ńtíʼə ə́fóŋə yí nə́, “mmaʼmbî əyǐə.” Pɨ tíʼ əghâ nə́ ḿbə́ lə́ pɔ́ pí páʼ təmbɔʼ nə́ faʼ əshîʼnə ńkə́ ńchîə anu yətsə̌ tə́ pɔ́gə pô.

⁷Pɨ mbyâŋnə, á mə́ kə́ nə́ chî pɨ̌pə pəngyě pɨ́, nə́ chîə á mə́ jî nə́ ńgə́ pəngyě pó pwɔ́dkə ńtsɛɛlə̂ áwə́ənə́. Nə́ chîə á mə́ túg nə́ ághɔ́b nə́ ngóʼkə ńté ńgə́ pó yǒ kə́ kwáalə azɔ́b məfɛ̂nə mə́ nchîmbîə mə́ Əsê a yǒ nə́ fɛ̂ nə́ pɨ lə́. Faʼ nə́ ə́leenə́, ńjî ńgə́ ajûtsə́ á yǐ ńkě achaʼtə́sê azɨ́ jwaʼ pô.

⁸Á mə́ lwigtə̂ nə́, pɨ pətsəm chîə á mə́ túg nə́ á táʼ mbóomə, pó táʼə akwaŋə; ə́ kɔŋ məmbɨ mə́ənə́ ándó pəlimə́, ə́ túg ntɨ́ yi əshîʼnə á mə́m pɨ, ə́ kə́ ńtúgə atsóokə́mbəəmə á tətɨ pəənə́.

⁹Kɔ gho kwígə təpɔŋ nə́ təpɔŋə, kɨ ə́sóŋ nə́ ŋwunə a sóŋ nə́ nə́ gho ńgə́ anuə təpɔŋə yǐ zoŋə̂ gho ńgə́, anuə təpɔŋə á yǐ kə́ zoŋə̂ yə́. Á tíʼə ə́lɨ́d gho sóŋə pə́ ńgə́ afoʼə á yǐ zoŋə̂ ngaŋ ńté ńgə́ afoʼ lə́ ajú páʼ Əsê a kə laʼnə̂ nə́ áwɨ́ ə́wɨ́ əghâ páʼ a kə fóŋ nə́ áwə́ənə́.

¹⁰Ndzaŋ páʼ aŋwaʼlə Əsê a sóŋ nə́ ńgə́! “Ŋwu ntsəm páʼ a lɔ nə́ á mə́ chî nə́ nchîmbî yi əshîʼnə ńkə́ kɔŋə̂ á mə́ zɨ́ nə́ əlě mbî pi əshîʼnə, a chîə á mə́ shib nə́ myaʼə̂ á mə́ tsáb nə́ ətsáb təpɔŋ ə́ kə́ mɛdtə̂ á mə́ tsɨd nə́ ntsəələ.

¹¹Pó chîə á mə́ shib nə́ ə́fɛ́lə á mə́m təpɔŋ ə́ tə́ faʼ əshîʼnə; Pó chîə á mə́ chwa nə́ mbwɔ́dnə ə́ kə́ tə́ zoŋə̂ ázə́ələ́.

¹²Ńté ńgə́ Əsê a tə́g əmə́g mí lə́ nə́ pɨ pó tɨ́ nə́ ndə̌ŋdəŋə́, ńkə̈ ńjwə́ʼtə achaʼtə́sê azóobə́. Lə́ ḿbə́ sɛdkə̂ əshî əyí nə́ pɨ pö ghɛd nə́ təpɔŋə.”

¹³Lə́ əwə mbɔʼ á límkə áwɨ́ páʼ təmbɔʼ nə́ tə́gə atûə á mə́ faʼ nə́ anu yə əshîʼnə?

¹⁴Lə́ təmbɔʼ nə́ zɨ́ ngə́ʼ ńté pə́ mə faʼ nə́ əshîʼnə, afoʼə á pə́ azə́ənə́. Kɔ nə́ tə́ ḿbɔ́gə ŋwu tsə̌, kɔ anu yətsə́ á tə́ ńjwaʼə̂ áwə́ənə́.

¹⁵Á mə́m məntɨ́ pɨ kɔŋ nə́ Klisto ńkə́ ńdɔgə̂ yə́ ándó Mmaʼmbîə. Tɨ́ nə́ ńkoʼnə̂ ndɛd ntsəm á mə́ kwěe nə́ ŋwu ntsəm páʼ a pítə nə́ á wɨ́ nə́ anu ńté akwaŋ ńtə́ ḿbyáabə páʼ nə́ túg nə́ zə́ələ́ á mə́m pɨ lə́.

¹⁶Lə́ nə́ faʼə̂ ázɨ́d nə́ atsóokə́mbɨ ńkɔ kə́ ńtúgə awágə. Nə́ ghɛd məntɨ́ mɨ́ mə́ ŋwaʼə̂, ńjî ńgə́ təmbɔʼ pə́ zɔmtə̂ áwɨ́, pɨ pó tsáb nə́ təpɔŋ ńté mbɔ́ əwɨ yi əshîʼnə ándó ngaŋə́zoŋə́ndzəm Klisto, əsɨ́ ə́ yǐ ńkóolə ághɔ́b nə́ mənu pó sóŋ nə́.

¹⁷Ńté ńgə́ á pɔŋə̂ á mə́ zɨ́ nə́ ngə́ʼ ńgə́ ŋwunə faʼ əshîʼnə, páʼ təmbɔʼ lə́ pə́ anu Əsê lɔ nə́, ńtsɛɛlə̂ á mə́ jɨ́ nə́ ngə́ʼ ńgə́ ŋwunə a ghɛlə̂ təpɔŋə.

¹⁸Ńté ńgə́ Klisto nə́ nkɔ̌ʼmbɨ yə́ a nə ńkwû ńté pətəpɔŋ pɨ́ táʼ ngǎ, ə́láʼ kě pɨ kwû pô. Ŋwu yi əshîʼnə ńté pɨ pə́ təpɔŋə, ńjî ńgə́ mbɔʼ á laŋ ə́lɨ́d ńkwáalə áwɨ́ ńgɛd nə́ ghɛnə̂ á mbô Əsê. Pə́ kə jwítə na mbɨ əjǐə, lə́ Əsê á pə́ ńjúmkə ajwiə ajíə, á mə́m nəwûə,

¹⁹á mə́mə ajwi, a kə́ ńgɛn ə́sóŋə anǔəsê á mbô əjwi páʼ ə́ chî nə́ atsáŋə.

²⁰Lɛ̌ nə́ ḿbə́ əjwi pɨ páʼ pó kə kě nə́ Əsê zóʼnə pô, páʼ Əsê a nə ńgwam nə́ ntɨ́ ḿbyáabə. Nə́ ndɛd páʼ Nwâ a kə tə́ nə́ ḿbóomə apáŋə ají lə́, á mə́mə apáŋ yə wɨ́ pɨ pə́ nə ńkě nɨ́ pô, lə́ nə ḿbə́ tsɔʼə pɨ nəfeemə́ páʼ pó nə ńchwád nə́ ńdaŋ nə́ nkǐə.

²¹Zəənə́ a kə̈ nəələ̂ lə́ ándó akwáalə́nkǐ páʼ ä tíʼ nə́ ńchwádkə áwɨ́ əghâ nə́ leenə́, á nə ńkě nə́ pə́ lə́ mə sog nə́ ndɔtí páʼ ə́ chî nə́ akwub pɨ pô, lə́ nə ḿbə́ ńdaʼnə̂ páʼ pɛn kə ghɛd nə́ á mbô Əsê nə́ ntɨ́ yi əshîʼnə. Ndaʼnə zɨ ə́ chwádkə áwɨ́ ńdaŋə̂ nə́ mə júmkə nə́ Yeso Klisto á nəwûə,

²²páʼ a nə ńgɛn nə́ nəpó ńtíʼ ńnáanə əlá apô Əsê yə təənə, əsáʼə pətseŋpə́ndɛ́pə́sê pətsəm pópə mətû mətsəm mə́ chî nə́ nəpóolə, nə́ aliʼə́ mətəənə atsəmə.