Read Awing 1 Pita 5 Bible Online

1 Pita 5 - Awing bible

1 Pita 5

¹Lə́ á pə́ ńgə́, maŋ póʼmbô nə́ mətûə á mə́m pəənə́, ńté ńgə́ maŋ kə́ ḿbə́ lə́ nətûə. Maŋ tséebə ándó ŋwu páʼ a nə ńdzɨ́ nə́ ńkə́ ḿbí ndzaŋ Yeso a nə ńdzɨ́ nə́ ngə́ʼə, maŋ yǐ kə́ chîə á mə́m nəgháʼ nə́ ndɛd páʼ wə́ələ́ á yǐ nə́ yǐəə. Maŋ póʼmbô á mbô pɨ ńgə́,

²nə́ tə́ ńtseŋnə̂ məmbéŋ mə́ Əsê mə́ páʼ a fɛ̂ nə́ á mbô pɨ lə́, kɔ nə́ tə́ faʼə̂ pə́ ándó pə́ fyáalə wɨ́ ə́fyád nə́, ə́faʼə̂ pə́ ndzaŋə ándó Əsê a lɔ nə́ ńgə́ nə́ faʼə̂. Faʼ nə́ afaʼə azə́ənə́, kɔ nə́ tə́ ńnáŋə tsɔʼə pə́pə̌ ntsɔ́ʼəfaʼə, faʼ nə́ ándó pɨ pó pyádnə nə́ ńtúg ntə́əmə á mə́ faʼ nə́.

³Kɔ nə́ tə́ ńjíʼə pɨ páʼ pɨ̈ náŋ nə́ ághóobə́, lə́ chî nə́ ándó fiʼə á mə́m məmbéŋə.

⁴Lə́, əghâ ándó əfo pətseŋnə a yǒ nə́ ńgyǐəə, nə́ yǒ kwáalə lɛ nəfɔ nəgháʼ páʼ wə́ələ́ á yǒ nə́ kë shwəgtə̂ pô.

⁵Tsɔʼə nə́ ndú yi wɨ́, pɨ nkaŋŋwu nə́ chîə á mə́ zóʼnə nə́ pətəkaŋə́. Atsóokə́mbəəmə a shib ńchîə á mə́m pɨ pətsəmə ándó atsəʼə́ afaʼ nə́ wê nə́ á mə́ faʼ nə́ á mbô məmbɨ mɨ́ ndzaŋ páʼ aŋwaʼlə Əsê á sóŋ nə́ ńgə́, “Əsê a kǐ pɨ páʼ pó ŋáŋkə nə́ mbɨ əzoobə́, lə́ ḿbə́ fɛ̂ apɔŋə́ntə́əmə á mbô pɨ pó tsóokə nə́ mbɨ əzoobə́.”

⁶Tsóokə nə́ mbɨ əzəənə́ á mbi Əsê páʼ a túg nə́ mətəənə, ńjî ńgə́ a yǐ ŋ́ŋáŋkə áwɨ́ nə́ əjǐ ndɛd páʼ a kɔŋ nə́.

⁷Fɛ̂ nə́ mənu mətsəm mə̈ tsɛ nə́ áwə́ənə́ á mbô yí ńté ńgə́ lə́ yi páʼ a lɔg nə́ ndɛd nə́ pəənə́.

⁸Kɔ nə́ tə́ ńdê, tə́ nə́ ḿbyáb əliʼə́, ngaŋ kəpa ə́wɨ́ Dɛbəələ á tə́ ńgéelə ə́fuʼ əliʼə́ ándó sáambaŋ nji tə́ nə́ ńdzáŋə yə́ á tə́ ńnáŋə ŋwunə á mə́ kɔ́d nə́.

⁹Tɨ́ nə́ ńtyantə̂ á mə́m mbimə́ əzəənə́, ńkǐə yə́, ńté ńgə́ nə́ jî ńgə́ pəlim pə́ənə́ á mə́m mbî ntsəm pó kə́ ńtə́ ńdaŋə̂ tsɔʼə á mə́m ntê məngə́ʼ zəənə́.

¹⁰Lə́ ndzaŋ páʼ pɨ yǐ nə́ zɨ́ ngə́ʼ nə́ mɔ́ akəmə ndɛd lə́, Əsê páʼ a túg nə́ apɔŋə́ntə́əmə atsəm, yí páʼ ä fóŋ nə́ áwɨ́ ńgə́ nə́ yǐ ńkwúnə á mə́m nəgháʼ əyǐ páʼ á mɛdnə̂ nə́ ńdaŋə̂ á mə́m Klisto, a yǐ ghɛd nə́ koʼnə̂ ńgɛn ə́fyagə̂, ə́ kə́ ghɛd nə́ tɨ́ ńtyantə̂, ə́ pɨ ə́fɛ̂ mətəənə a mbô pəənə́, ə́ kə́ ghɛd məŋaŋ mɨ́ mə́ tɨ́ ńtyantə̂;

¹¹Á mbô yí mətɨ mətsəm mə́ chî ə́wɨ́ tə ḿmɛdnə̂! Amɛn.

¹²Silasə ndim əwɛ̂n páʼ a faʼ nə́ á mbô Klisto nə́ ntɨ́ yí ətsəm lə́, lə́ kwá yí ńkwáalə mə pəg yi ŋwaʼlə̂ mɔ́ akəmə aŋwaʼlə ghɛnə́ á mbô pəənə́. Maŋ loonə̂ lə́ á mə́ néŋ nə́ məntɨ́ mɨ́ ə́ kə́ fiʼtə̂ áwɨ́ ńgə́ lɛ̌ ndə̌ŋdəŋə́ apɔŋə́ntə́əmə Əsê. Tɨ́ nə́ ńtyantə̂ á mə́m ə́wə́.

¹³Nkyeetə pɔ́ pə́ Klisto páʼ ə́ chî nə́ Babilɔn páʼ Əsê a nə ńtsɔ́ʼ nə́ ághóobə́ ándó a nə ńtsɔ́ʼ nə́ áwɨ́ lə́, pó túmə achaʼtə á mbô pəənə́, móonə mə Magə á mə́m mbimə́ a kə́ ńtúmə achaʼtə á mbô pəənə́.

¹⁴Ŋwu ntsəmə á mə́m pəənə́ a chaʼtə̂ mɔ́mɛ́ əyǐ ńchwegə̂ yí nə́ akɔŋnə. Ńgə́ mbwɔ́dnə ə́ chîə tətɨ pɨ pətsəm páʼ nə́ chî nə́ á mə́m Klisto.