Read Awing 2 Pita 1 Bible Online

2 Pita 1 - Awing bible

2 Pita 1

¹Aŋwaʼlə zəənə́ a lǒo lə́ á mbô maŋ Saamun Pita. Maŋ lə́ ngaŋəfaʼ Yeso Klisto ńkə́ ḿbə́ ntû əyǐə. Mäŋ ŋwaʼlə̂ lə́ á mbô pəənə ándó pə́ kə fɛ̂ nə́ mbimə́ á mbô pó páʼ ə́ səglə̂ nə́ ándó əzɛn əzɨ, ńdaŋ nə́ mə tɨ́ nə́ ndə̌ŋdəŋ mə́ Əsê əzɛ̂n pó Nchwádkə əwɛ̂n Yeso Klisto.

²Ńgə́ apɔŋə́ntə́əmə Əsê yə weŋ pó mbwɔ́dnə əjǐ ə́ chîə á tətɨ pəənə́, ńdaŋ nə́ ajíənuə azɨ́ ńté Əsê pó Mmaʼmbî əwɛ̂n Yeso.

³Mətɨ mə́ Əsê mə́ lǒo nə́ á nəpó, mə́ fɛ̂ ajúmə atsəm páʼ pɛn chî nə́ mə́ túg nə́ lɔg ghɛd ńgə́ nchîmbî əzɛ̂n ə́ pə́ ndə̌ŋdəŋ nchîmbî páʼ ə́ pɔ́g nə́ Əsê, ńdaŋ nə́ ajíənuə azɛ̂n ńté yi wə́ páʼ a kə fóŋ nə́ áwɛ̂n əfɛ̂ əzɛn əseenə á mə́m nəgháʼ əyǐ pó əpɔŋ yə́.

⁴Nə́ ndú ghɛn á fɛ̂ chigə ntɨ məfɛ̂nə yi səglə̂ nə́ páʼ a kə laʼnə̂ nə́ lə́ nə́ pɛnə̂, ńjî ńgə́ ńdaŋ nə́ məfɛ̂nə mɨ nə́ chî mbɔʼ nə́ lə́ʼə lwaʼ pəngyě yi ntsəŋkə nə́ páʼ a chî nə́ á ndu mbî leenə́, ńjî ńgə́ əghâ tsə́ nə́ láʼ ńdzɨ́ əseenə á mə́ chî nə́ ándó Əsê.

⁵Ńté anu zɨ́d zɨ nə́ fǔəlóʼə á mə́ ghɛd nə́ mənu mimə əshîʼnə ə́ pegə̂ á mə́m mbimə́ əzəənə́, á mə́m mənu mimə əshîʼnə mɨ peg nə́ ajíənu ə́wə́.

⁶Á mə́mə ajíənuə azɨ́ peg nə́ awaamə́mbɨ ə́wə́, á mə́mə awaamə́mbəəmə azɨ́ peg nə́ asəgə́ndzɔʼ ə́wə́, á mə́mə asəgə́ndzɔʼ azɨ́ peg nə́ apɔ́gə Əsê ə́wə́,

⁷á mə́mə apɔ́gə́sê, peg nə́ ntɨ́ yi əshîʼnə ńté pəlim pə́ənə́, ndzaŋ nə́ túg nə́ ntɨ́ yi əshîʼnə ńté pəlim pɨ́ lə́, peg nə́ akɔŋnə ə́wə́.

⁸Lɛ̌ mənu nə́ chî nə́ mə́ túg nə́, lə́ mbɔʼ nə́ túgə mɨ́d mə́ yǐ ńgɛd nə́ faʼ əshîʼnə ńkə́ ńdzə́m mənta á mə́mə ajíənuə azɨ́ ńté Mmaʼmbî əwɛ̂n Yeso Klisto.

⁹Lə́ ŋwu páʼ a kě nə́ mənu mɨ túg pô á chî lə́ ándó ŋwu páʼ a kě nə́ əliʼ chigə ńdzə́ənə pô, ńkə́ ńdəgnə̂ yí ńgə́ Əsê a nə sog pətəpɔŋ pí páʼ a nə ńgɛd nə́ á ntsɛɛmbiə.

¹⁰Pəlimə́ mə, lə́ á pə́ ńgə́ nə́ fǔəlóʼə á mə́ ghɛd nə́ ńgə́ ndzaŋ Əsê a kə fóŋ nə́ wɨ́ ńkə́ ńtsɔ́ʼə áwɨ́ lə́, zə́ələ́ á mɛdnə̂ lə́ələ́; mbɔʼ nə́ ghɛd ə́lɨ́d, nə́ láʼ ńkě mbimə́ əzɨ myaʼ pô.

¹¹Nə́ ndú ghɛn pə́ yǐ fɛ̂ əsa ətsəmə á mbô pɛn mbɔʼ pɛn kwúnə á mə́m nəfɔ yi nə́ mɛdnə̂ nə́ páʼ nə́ pə́ nə́ yi nə́ Mmaʼmbî əwɛ̂nə a pə́ nə́ Nchwádkə əwɛn Yeso Klisto lə́.

¹²Lə́ pə́ ńgə́, maŋ yǐ zá kwúmtə wɨ́ nə́ mənu məənə́, nə́ pǎ nə́ tə ḿbɛ́d tə ńjîə mɨ́d, ńkə́ ńtɨ́ ńtyantə̂ á mə́m ndə̌ŋdəŋ pɨ kə kwá nə́ lə́.

¹³Maŋ kwaŋ ńgə́ a koʼnə̂ á mbô maŋə á mə́ ghɛd nə́ pɨ tə́ ńkwúmtə mənu mɨ tə koʼ nə́ ndɛd ntsəm páʼ maŋ chî nə́ mbîə.

¹⁴Maŋ jî ńgə́ tsɔʼə ngǎ pɛ̌ maŋ tsɔ́ʼ na mbɨ əzɨ ə̈ kwû nə́ lɛ ḿmɛdtə̂, tsɔʼə ndzaŋ Mmaʼmbî Yeso Klisto əwɛ̂n a nə ə́fiʼtə̂ nə́ mə.

¹⁵Maŋ yǐ fǔəlóʼ nə́ ndú ətsəm ńgə́ əghâ maŋ ghɛn nə́ mə pɨ pɛ́d ńchî mbɔʼ nə́ kwúmtə mənu məənə́.

¹⁶Pəg nə ńkě lɔg lə́ pəpóʼ páʼ pɨ pó kə maʼ nə́ á mə́ fiʼtə̂ nə́ áwɨ́ ndzaŋ Mmaʼmbî əwɛ̂n Yeso Klisto á yǒ nə́ yǐ nə́ mətɨ pô. Pəg lə́ pɨ páʼ pó kə́ zɨ́ nə́ ndzaŋə a gháʼ nə́ ńkə́ ḿbí ńgə́ lə́ ndə̌ŋdəŋə́,

¹⁷pəg nə́ ńchî əwɨ́ əghâ ándó Əsê páʼ a pə́ nə́ Tǎ a nə fɛ̂ nə́ ngóʼkə əjǐ pó nəgháʼ əyǐə, əghâ ándó ngye nə ńdǒo nə́ nəpóolə á mbô yí páʼ A Túg nə́ Nəgháʼ Ntsəm ə́sóŋ ńgə́, “Lɛ̌ Móonə mə páʼ maŋ kɔŋ nə́, mäŋ kɔŋtə̂ ńté yə́.”

¹⁸Pəg nə́ nkɔ̌ʼmbɨ əwə́g nə ńdzóʼ ngye zɨ lǒo nəpó ńtsóolə, əghâ ándó pə̌gpo kə chî nə́ á nkwəənə yi ŋwaʼ nə́ lə́.

¹⁹Ńdaŋ ə́lɨ́d atûə azə́gə́ á kě pɨ ńkoʼlə̂ ńté nkɨ páʼ məntú mə́ Əsê mə́ nə ńnáŋkə nə́ lə́ pô. Nə́ yǐ ńnáŋ ndú ətsəmə á mə́ lɔg nə́ ndɛd ə́wə́, ńté ńgə́ wɨ́d chî lə́ ándó nkyaʼ ə́ kɛ́d nə́ aliʼə́ ndzəmə́, tə koʼ nə́ əghâ páʼ mbî fóg nə́, nkyaʼ məsânə páʼ ə́ tɛ̂ nə́ ándó mɔ́ sáŋ ə́ ŋwaʼə̂ á məntɨ́ pəənə́.

²⁰Nə chîə á mə́ jî nə́ á ntsɛɛmbiə anu ghɛn ńgə́, ŋwu tsə́ a kě wɨ́ chî mbɔʼ a tyáatə atséebə ntûsê yətsə́ á mə́mə aŋwaʼlə Əsê nə́ ajíənuə ajíə ngǎ yí pô.

²¹Ńté ńgə́ atséebə ntûsê yətsə́ a kě wɨ́ chî páʼ zə́ələ́ fɛ́d nə́ pə́ á mə́mə anu ŋwu mbîə a lɔ nə́ pô, lə́, lə́ kə chîə Ajwǐəsê ńchîə nətû pɨ əghâ pó kə náŋkə nə́ nkɨ páʼ wɨ́d lǒo nə́ á mbô Əsê.