Read Awing 2 Pita 2 Bible Online

2 Pita 2 - Awing bible

2 Pita 2

¹Məntû mə́ Əsê mə́ məfɨgə mə́ nə ńchîə a ndzɔʼ pɨ pə́ ntsɛɛmbiə, tsɔʼə nə́ ndú wɨ́d wə́ pəzéʼkə pə́ məfɨg yǒ kə́ chîə a ndzɔʼ pəənə́. Pó yǒ zéʼkə áwɨ́ nə́ məntəgə́ mə́ kě nə́ ndə̌ŋdəŋ pô, páʼ mə́ yǐ nə́ tsəŋkə̂ áwə́ənə́, ə́ kǐəə ághóobə́ Tǎ páʼ a nə ńtsóʼ nə́ atûə azóobə́, ə́ tíʼ ghabkə̂ tsəŋkə̂ mbɨ əzɔb tsɔʼə əghâ wə́.

²Pɨ pipə nɨ́ nə́ pó yǒ zoŋə̂ ághɔ́b məndú mə́ ndzɔʼə́ tə apímnə móobə́, ə́ tíʼ laŋ nə́ mənu pó ghɛd nə́ mɨ́d, pɨ pipə nɨ́ nə́ pó yǒ tséebə təpɔŋ ə́ té Ndú ndə̌ŋdəŋə́.

³Ńdaŋə̂ á mə́m əfóʼńdé əghɔ́b, pəzéʼkə pə́ məfɨgə pɨ pó yǒ jîə ape á mə́m pɨ ə́laŋ nə́ ətsáb məfɨgə pó fiʼtə̂ nə́ áwə́ənə́, ŋwu páʼ a chî nə́ mə́ tsɔ́ʼtə nə́ əsáʼ əghóobə́ a nə ńkɔ́g ńchî əwɨ́ ńtə́ ḿbyáabə tə ndi sagə̂, ŋwu páʼ a chî nə́ mə́ Tsəŋkə̂ nə́ ághóobə́ a kě tə́ ńdê pô.

⁴Əsê a nə ńkě mɛdtə̂ pətseŋpə́ndɛ̂ páʼ pó nə ńgɛd nə́ təpɔŋ pô, lə́ ḿbə́ ḿmyaʼə̂ ághóobə́ á mə́m tə́kɔʼ mógə́, aliʼ páʼ pə təŋtə̂ nə́ ághɔ́b nə́ məŋkɛd mə́ atəənə́ á mə́m ndzəmə́ ńtə́ ḿbyáabə Alě atsɔ́ʼtə́sáʼə.

⁵Əsê a nə ńkě ḿmɛdtə̂ mbî ə́ kə peg nə́ ńchîə á ntsɛɛmbi pô, lə́ ḿbə́ ńgɛd nkǐ kɔ́ʼ ə́fəg pɨ páʼ pó nə ńkě nə́ Əsê pɔ́g pô, ndaʼ pəənə a nə ńchwádkə nə́ lə́ nə ḿbə́ Nwâ, ŋwu páʼ a nə̈ ńdzéʼkə anu ńté mə tɨ́ nə́ ndə̌ŋdəŋə́, ḿbá pətsɨ́ pɨ pɛn asaambɛ̂ ə́wə́.

⁶Əsê a nə ńgɛd pɨ pə́ Sodom nə Gomolya pó wǔ əsáʼə a tíʼ ńtsəŋkə̂ aláʼə azɔ́b nə́ mógə́, ńtíʼ ńgɛd pó chîə ándó fiʼnəghɔlə anu páʼ a yǒ nə́ ghɛd pɨ páʼ pó kě nə́ Əsê pɔ́g pô.

⁷Əsê a nə ńchwádkə Lɔlə, páʼ a nə ḿbə́ nə́ ŋwu yi əshîʼnə, ńkě tə́ ńkɔŋtə̂ tsɔʼə mɔ́ aliʼ nə́ ntê təpɔŋ páʼ pɨ pɨ pó kě nə́ pənoŋkə zoŋə̂ pô pó ghɛd nə́.

⁸Ŋwu yi əshîʼnə wɨ́d ghɛnə́ a nə ńchîə á ndzɔʼ pó, əlě ətsəm á fɨnə̂ ńté ándó ä zɨ́ nə́ ńkə́ ńdzóʼə mənu mə́ təpɔŋ mɔ́b pó ghɛd nə́.

⁹Ńdaŋ ə́lɨ́d Mmaʼmbîə a jî ndzaŋ mbɔʼ á chwádkə pɨ pó pɔ́g nə́ yə́ á mə́m pəmɔ póobə́, ńkə́ ńjî ndzaŋə a lɔʼkə̂ nə́ ngaŋə́ghɛlə təpɔŋə á mə́mə atsáŋə azɔ́b ńtə́ ḿbyáabə Alě Asáʼə́məsáʼə,

¹⁰tə ḿbə́ pə́ nə́, pɨ páʼ pó zoŋ nə́ mənu mə́ féŋkə nə́ mbɨ əzoobə́ ándó lwaʼ nə́ pəngyě, ńtíʼ ńgwágə ághɔ́b mətɨ mə́ Əsê. Pəzéʼkə pə́ məfɨg pɨ pó kě ajú tsə̈ pɔ́gə pô ńkə́ ńtséebə nə́ achánə, ńkě ńgóʼkə yitsə̌ túg ńté pǐə ándó páʼ pó chî nə́ nəpó ńtúgə nəgháʼ lə́ pô; pó pəənə ńdzɔmtə̂ ághɔ́b zɔmtə̂ nə́.

¹¹Tsɔʼə pətseŋpə́ndɛ́pə́sê páʼ pó túg nə́ mətɨ ńkə́ ńgáʼ ńtsɛ pəzéʼkə pə́ məfɨg pɨ, pó kě mənu mə́ təpɔŋ sóŋə nə́ ndzɔmnə ńté ngaŋ nəpó zəənə́ mbi Mmaʼmbî pô.

¹²Lə́ pɨ pɨ pó ghɛlə̂ mənu ándó məna pə́ kě nə́ ághɔ́b zéʼkə pô, ándó məna mə́ akɔb pə́ pî nə́ ághɔ́b lə́ á mə́ wam nə́ jwítə. Pó kwúnə pɨ nə́ ndzɔmnə nə́ anuə atsəm pó kě nə́ jî pô, pə́ yǒ tsəŋkə̂ ághóobə́ ándó məna mə́ akoobə́,

¹³Əsê a yǒ néŋ ngə́ʼə a mbɨ pó ńté ńgə́ pó kə́ nëŋ məngə́ʼə a mbɨ pəənə. Pö kɔŋtə̂ lə́ əghâ pó faʼ nə́ anuə atsəmə á əshîsaŋ páʼ na mbɨ əzɔb lɔ nə́ ńgə́ pó faʼə̂; lə́ əsə́ənə á mbô pɨ páʼ pó po tsɛntə̂ nə́ ńjîə məjîə, əghâ wɨ́ pó tíʼə ńkɔŋtə̂ á mə́m məfɨg móobə́.

¹⁴Əghâ ətsəm pó zɨ́ nə́ məngyě lə́ akwaŋə azóobə́ a kə́ ńgɛn tsɔʼə nə́ anǔəndzɔ́ʼə́. Pó kě mənu mə́ təpɔŋ zɛ́lə pô, pó legtə̂ pɨ páʼ mbimə́ əzɔb pwɔ́d nə́ ńgɛlə̂ pó wǔəə atéemə. Pó zéʼkə məntɨ́ mɔ́b nə́ anuə əfóʼńdé, Ndɔ Əsê ə́ chîə atû pó!

¹⁵Pó myaʼ ndu əghɔ́b páʼ ə́ koʼnə̂ nə́ ńtíʼ ḿbéŋə ághóobə́; pó zoŋ ndú páʼ Balaam mɔ́ Beolə a nə ńdaŋ nə́ ə́wə́, yí páʼ a nə ńkɔŋ nə́ nkáb pə́ fɛ̂ nə́ nə́ yí ńté mənu mə́ təpɔŋ páʼ ä ghɛd nə́.

¹⁶Lə́ pə́ nə ə́sáʼə yí ńté təpɔŋ əyǐə. Chípóʼ njakasə əjǐ nə ńtséebə á mbô yí nə́ ngye ŋwunə, ə́sóŋ nə́ ntûsê wə́ ńgə́ a pɨ nə́ ndzəm nə́ mənu mə́ apɛ̌lə.

¹⁷Pɨ pɨ pó chî lə́ ándó sáʼə́sê nkǐə a júm nə́, ḿbɨ ńchîə ándó alə́m páʼ kəfəələ ä tɛ́n nə́ ńnyinə̂ nə́ zə́ələ́. Əsê a lɔʼkə̂ aliʼə́ á mbô pó á mə́m mbî pəkwû, á sɛ́n nə́ tə ŋ́ŋɔ́ŋə.

¹⁸Pó lwɛ́nkə nə́ akɔ́ʼkə mbəəmə, ḿbəənə̂ ńtsáb əkəghə ətséebə, pó lɔg mbɨ əzɔb ə́ zog nə́ ághɔ́b nə́ anǔəndzɔ́ʼə́ á mə́ soŋtə̂ nə́ pɨ pó pɛ́d nə̈ ə́fɛ́lə a ndzɔʼ pɨ páʼ pə́ chî nə́ á mə́m təpɔŋə.

¹⁹Pö laʼnə̂ ághɔ́b ńgə́ pó yǐ fógə ághóobə́ á mə́mə apoʼə, pó nə́ nkɔ̌ʼmbɨ əghɔ́b pɨ ḿbə́ əpoʼə á mə́m jîmbəglə́; ńté ńgə́ ŋwu lə́ apoʼə á mə́m ajúmə atsəm páʼ á tyantə̂ nə́ ńtsɛ mətɨ míə.

²⁰Təmbɔʼ pɨ pə́ fɛ́lə ághóobə́ á mə́m ngɛdmə́nu ə́ féŋkə nə́ á mə́m mbî ńdaŋ nə́ ajíənuə azɔ́b á lǒo nə́ á mbô Mmaʼmbî əwɛ̂n ḿbə́ Nchwádkə əwɛ̂n Yeso Klisto, nga yitsə̌ pó pɨ ḿbəənə̂ á mə́m mənu mɨ tə ə́fɛ́lə ághóobə́ á mə́m ə́wɨ́ kə́káŋ, a kwéʼnə ḿbə́gə á mbô pó á ndwegtə ńtsɛ ndzaŋ pó kə peg nə́ ńchîə.

²¹A nə ḿběʼ ḿbyádnə ḿbɔŋ ńgə́ kɔ pó jî mənu mə́ tɨ́ nə́ ndə̌ŋdəŋ ńtsɛɛlə̂ á mə́ jî nə́ mɨ́d, ə́ pɨ tə́m nkadtə əghɔ́b ə́ tíʼ ḿmyaʼ ntəgə́ yi ŋwaʼ nə́ páʼ pə́ kə fɛ̂ nə́ á mbô pó lə́.

²²Anuə a kə laŋ nə́ á mbɨ pó á nəələ̂ lə́ ńgə́ ətsábnə́múʼ pɨ lə́ ndə̌ŋdəŋ ńgə́, “Ngwû pɨ ḿbɨ ńjîə ajǎʼkə ajíə. Kwúna pə́ sog nə́ á pɨ ḿbɨ ńtə́ ńkadlə̂ yə́ á mə́m nətwáabə.”