Read Awing 2 Pita 3 Bible Online

2 Pita 3 - Awing bible

2 Pita 3

¹Pəshunə́ mə maŋ kɔŋ nə́, lɛ̌ azoŋkə aŋwaʼlə páʼ maŋ ŋwaʼlə̂ nə́ á mbô pəənə́. Á mə́m əŋwaʼlə pɨd pɨ pɛ̌ maŋ fǔəlóʼə á mə́ ghɛd nə́ nə́ kwaŋ əkwaŋ pipə əshîʼnə a məntɨ́ pɨ ńdaŋ ndzaŋ maŋ kwúmtə nə áwɨ́ nə́ mənu məənə́.

²Maŋ loonə̂ lə́ ńgə́ pɨ kwúmtə mənu páʼ məntúmə́sê mimə ŋwaʼ nə́ mə́ nə ńtsáb nə́ á mbô pɨ ə́fɛ́lə á ngoʼ pəchə́ lə́, ḿbɨ ńkə́ ńkwúmtə məntəgə́ mə́ Mmaʼmbîə, a pə́ nə́ nchwádkə əwɛ̂n páʼ məntú mə́ Yeso mə́ kə fɛ̂ nə́ nə́ pɨ lə́.

³Ntsɛɛmbiə anu lə́ ńgə́ atûə azə́ənə́ a shib ńtsɔ́ʼnə ńgə́, ndwigtə mbî ə́ yǐ tə́ koʼə̂ lə́ pɨ pətsə́ pó yǐəə, ḿbə́ pɨ páʼ pö ghɛd nə́ mənu mɔ́b ńdzoŋ á pə́ anu na mbɨ əzɔb ə́ lɔ nə́. Pó yǒ ńnyignə̂ áwə́ənə́,

⁴ə́ pítə áwɨ́ ńgə́, “A nə ńdaʼnə̂ ńgə́ a yǐ yǐəə kɨ a nə ńkě laʼnə̂? A chî lə́ əfo? Pətǎ pə́ pətǎ pɛn pə́ nə ḿbɛ́dtə ńkwúkə, lə́ anuə atsəmə a kə́ ńchî tsɔʼə ndzaŋ a nə ńchî nə́ ə́fɛ́d ndzaŋ pə́ nə ńtsoŋkə̂ nə́ mbîə.”

⁵Pö ghɛlə̂ ándó pó kě jî ńgə́ a kə pə́ ngoʼ pəchə́, Əsê a sáʼ ńgə́, nəpó pó ndəsê chî wɨ́, pɨ́d kə́ ńchî əwɨ́ pó lə́. Ndəsê kə fɛ́d lə́ á mə́m nkǐə, pə́ lɔg nkǐ ńtsoŋkə̂ wə́.

⁶Pə́ kə kə́ ńdaŋ lə́ tsɔʼə nə́ nkǐə, nə́ nkǐə awɛ̌nkǐ wə́ ńdɔg ńtsəŋkə̂ mbî ə́ kə chî nə́ əghâ wə́.

⁷Lə́ nəpó pó ndəsê chî wɨ́ əghâ nə́ lə́, lə́ kə́ ńdɔʼkə̂ tsɔʼə mətɨ mə́ atsáb páʼ a fɛ́d nə á ntso Əsê, ńjî ńgə́ a yǒ ńtsəŋkə̂ nə́ mógə́. Pə́ lɔʼkə̂ nəpó pó ndəsê lə́ ḿbyáabə lə́ alě Əsê a yǒ nə́ tsɔ́ʼtə əsáʼ pɨ pó kě nə́ Əsê pɔ́g pó ə́ tsəŋkə̂ ághóobə́.

⁸Lə́, pəlimə́ mə maŋ kɔŋ nə́, kɔ nə́ ləgnə̂ táʼə anu ghɛn ńgə́, táʼə alě á mbô Mmaʼmbî pó ngoʼ nchuʼ lə kě ənu pɛ̌ pô, á mbô yí mənu mɨ mɛ́n mbɛ̌ lə́ táʼə.

⁹Mmaʼmbîə a kě lɛ́ɛlə á mə́ néŋ nə́ ndaʼnə əjǐə á mə́mə afaʼ, ndzaŋ pɨ pətsə́ pó kwaŋ nə́ lə́ pô. A pɨ ńtúg lə́ awaamə́ntɨ́ nə́ pɨ, ńdoonə̂ ńgə́ ŋwu ntsəmə a fɛ́lə á mə́m təpɔŋ, kɔ pə́ tsəŋkə̂ ŋwu tsə̌.

¹⁰Lə́ Alěmbîə Mmaʼmbîə a yǒ yǐ lə́ ándó ndzə̌lə. A yǒ pə́ alě yə wɨ́ lə́ məpó mə́ zɔd nə́ tə́kɔʼ ngye tə ńgɛn ḿbéŋə. Əpú ətsəm ə́ chî nə́ nəpóolə ándó pɔ́ pə́ sáŋ pópə mə́nu, ə́ kɛ́d tə ḿměe. Ndu ndəsê pópə ajúmə atsəm wɨ́ ə́ kə́ ńkɛ́d tə měe.

¹¹Ndzaŋə ándó Əsê yǒ nə́ tsəŋkə̂ ndɛn əpú ghɛn nə ndú ghɛn lə́, pɨ chîə mə́ pə́ nə́ lə́ zə́ənə́ mbô pəənə? Pɨ chîə mə́ fɛ̂ nə́ nchîmbî əzəənə́ á mbô Əsê ə́ kə́ tɨ́ ŋwaʼə̂,

¹²ndzaŋ pɨ tə́ nə́ ḿbyáabə Alěmbîə Əsê lə́, kə́ ńnáŋ ndú ətsəmə á mə́ ghɛd nə́ ńgə́ zə́ələ́ á zaŋkə̂ ńgyǐəə. Lə́ Alě ándó məpó mə́ yǒ nə́ kɛ́d měe, əpú ətsəmə á nəpóolə ándó pəsáŋ kɨ, mənu ə́ lə́ŋə.

¹³Lə́, pɛn pyáabə lə́ ajú páʼ Əsê kə laʼnə̂ nə́: məpó mimə fî pópə mbî yi fî páʼ anuə atsəmə á yǐ nə́ tíʼ ndə̌ŋdəŋ wə́.

¹⁴Pəlim, lə́ pə́ ńgə́ ndzaŋ nə̈ pyáb nə́ Alě zə́ lə́, náŋ nə́ ndú ətsəmə á mə́ ŋwaʼ nə́ ə́ kə́ chî tə kɔntə á mbi Əsê, ə́ kə́ ə́túg mbwɔ́dnə pɨ po.

¹⁵Náŋ nə́ awaamə́ntə́əmə Mmaʼmbîə á pə́ ándó ndú yitsə̌ páʼ a fɛ̂ nə́ á mbô pɛn ńgə́ pɛn laŋ wɨ́ ńchwáalə. Tsɔʼə ndzaŋ ndim əwɛ̂n Pɔl pɛn kɔŋ nə́, a kə ŋwaʼlə̂ nə́ á mbô pɨ ńdaŋə̂ á mə́mə ayáŋ Əsê a kə fɛ̂ nə́ á mbô yí lə́.

¹⁶Lɛ̌ anu páʼ ä sóŋ nə́ mə́m əŋwaʼlə əpí ətsəm əghâ a tə nə́ ŋ́ŋwaʼlə̂ ńté anu zəənə́. Mənu mimə tyantə̂ nə́ mətsə́ mə́ chîə á mə́m əŋwaʼlə pí, páʼ əkəkóg pópə pɨ pó kě nə́ tɨ́ ńtyantə̂ pô, pó tyáatə nə́ nə́ məfɨgə, tsɔʼə ndzaŋ pó kə́ nə́ ńgɛlə̂ nə́ pətsə́ əliʼ əŋwaʼlə á mə́mə aŋwaʼlə Əsê. Ńdaŋ ə́lɨ́d pó tsəŋkə̂ mbɨ əzoobə́ á ngǎ pó.

¹⁷Lə́ pəlim, pɨ pɛ́dtə ńjîə zəənə́, lɔg nə́ ndɛd ńgə́ kɔ afankə́nuə pɨ pó kě nə́ noŋkə zoŋə̂ pô á jwaʼlə̂ wɨ́ ńgɛd pɨ chiʼnə̂ á nətɨnə́ pəənə́.

¹⁸Lə́ ghɛn nə́ nə́ mbiə á mə́ kwéŋ nə́ á mə́mə apɔŋə́ntɨ́ pó ajíənuə a Mmaʼmbî əwɛ̂n páʼ a pə́ nə́ Nchwádkə Yeso Klisto. Nəgháʼə a chî lə́ á mbô yí əghâ nə́ tə ḿmɛdnə̂! Amɛn.