Read Awing 1 Jɔnə 1 Bible Online

1 Jɔnə 1 - Awing bible

1 Jɔnə 1

¹Pəg ŋwaʼlə̂ aŋwaʼlə zəənə́ á mbô pɨ ńté lə́ atsáb páʼ ä fɛ̂ nə́ nchîmbîə, zə́ələ́ á kə chî wɨ́ ə́fɛ́lə á nəchwaakənə́. Pəg kə zóʼə anu ńté atsáb zɨ ńkə́ ńdzɨ́ nə́ əmə́g mə́gə́. Lə́ ndə̌ŋdəŋə́, pəg kə zə́ənə zə́ələ́, mbô mə́g mə́ kə́ ńkwumə̂.

²Əghâ nchîmbî zɨ kə fɛ́d nə́ əshîsaŋ lə́, pəg zə́ənə zə́ələ́. Lə́ ghɛd ə́lɨ́d pəg tséebə anu ńté zɨ́d ə́fiʼtə̂ anu ńté nchîmbî páʼ ə́ mɛdnə̂ nə́ ngǎ mɔʼə́, páʼ ə́ kə chî nə́ pó Tǎ, pə́ ghɛd pəg jîə zə́ələ́.

³Anu pəg zɨ nə́ ńkə́ ńdzóʼ lə́ zɨ́d pəg kə́ nə́ fiʼtə̂ áwə́ənə́. Ńjî ńgə́ pɨ yǐ ḿbegə̂ áwə́gə́ á mə́m nkyeetə pəg túg nə́ pə̂gpə Tǎ, ńdzoŋ ḿbéenə Mɔ́ əyǐ wə́ a pə́ nə́ Yeso Klisto lə́.

⁴Pəg ŋwaʼlə̂ aŋwaʼlə zɨ lə́ ńjî ńgə́ akɔŋtə azɛ̂nə[1] á lwɛ́nkə.

⁵Nə əghâ nə́ lɛ̌ nkɨ páʼ pəg zóʼ nə́ á mbô Mɔ́ əyǐ ńtíʼə ə́fiʼtə̂ áwə́ənə́. Nkɨ yi wɨ́ lə́ ńgə́: Əsê lə́ nkyaʼə, ndzəmə́ yi ndaʼ ə́ kě nə́ yí chî pô.

⁶Mbɔʼ pɛn sóŋ ńgə́ pɛn chîə nəkaʼ pɛn po, ḿbɨ ńkə́ ńchîə mə́m ndzəmə́, tsɔʼə əghâ wɨ́, lə́ á pə́ ńgə́ atséebə azɛ̂n lə́ ntsəələ, ngɛdmə́nu əwɛ̂n ə́ kě kə́ ńkoʼ pô.

⁷Lə́, mbɔʼ pɛn chîə á mə́m nkyaʼ, tsɔʼə ndzaŋə a chî nə́ á mə́m nkyaʼ, pɛn tíʼ ńchîə nəkaʼ pɛ̌npə pɔ́pə́mɛ́ pətsəmə, achǐə Yeso a pə́ nə́ Mɔ́ əyǐə á yǐ sog pətəpɔŋ pɛnə̂.

⁸Mbɔʼ pɛn sóŋ ńgə́ pɛn kě təpɔŋ ghɛd, pɛn fɨgə̂ lə́ mbɨ əzɛnə̂, á pə́ ńgə́ ndə̌ŋdəŋə́ á kě mə́m pɛn chî pô.

⁹Lə́ təmbɔʼ pɛn kyéŋə á mbô Əsê ńgə́ a ləgnə̂ pətəpɔŋ pɛn, a yǐ ńdɔʼkə̂ ndaʼnə əjǐ ə́faʼə̂ anu páʼ a koʼnə̂ nə́: ńdəgnə̂ əfankəmə́nu əpɛ̂n ńtíʼ sogə̂ áwɛ̂nə á mə́m mənu mə́ təpɔŋ mətsəmə.

¹⁰Mbɔʼ pɛn sóŋ ńgə́ pɛn kě təpɔŋ ghɛd, a pə́ ńgə́ pɛn ghɛd Əsê tíʼ ngaŋntsəələ, atséebə ajíə á kě mə́m pɛn kə́ ńchî pô.