Read Awing 1 Jɔnə 2 Bible Online

1 Jɔnə 2 - Awing bible

1 Jɔnə 2

¹Póonə mə, maŋ ŋwaʼlə̂ aŋwaʼlə zəənə́ á mbô pɨ lə́ ńgə́ kɔ nə́ ghɛlə̂ təpɔŋə. Lə́ mbɔʼ ŋwu tsə̌ ghɛlə̂ təpɔŋ, tə ḿbə́ pɛn túgə ŋwunə ä póʼ nə́ mbô á mbô Tǎ ńté áwɛ̂nə, lə́ Yeso Klisto, yí páʼə a tɨ́ nə́ ndə̌ŋdəŋ lə́.

²Pə́ laŋ lə́ á mə́m Yeso ńdəgnə̂ pətəpɔŋ pɛnə̂, lə́ kě tsɔʼə pətəpɔŋ pɛn pô, lə́ pipə́ ŋwu ntsəmə.

³Təmbɔʼ pɛn zóʼnə məntəgə́ mə́ Əsê, á pyádnə nɨd ńgə́ pɛn jîə yə́.

⁴Mbɔʼ ŋwu tsə̌ a sóŋ ńgə́, “Maŋ jîə yí” ḿbə́ ńchî məntəgə́ mí tə́ zoŋə̂ pô, mbô ŋwu zə́ lə́ ngaŋntsəələ, ndə̌ŋdəŋ yitsə̌ á kě mə́m yí chî pô.

⁵Lə́ ŋwu ntsəmə ándó a zóʼnə nə́ atséebə ají, lə́ ŋwunə ándó a kɔŋ nə́ Əsê ńgɛn ə́fyagə̂. Lɛ̌ anuə á yǐ nə́ nɨd ńgə́ pɛn chîə á mə́m Əsê:

⁶Ŋwu ntsəmə a sóŋ nə́ ńgə́ a chîə á mə́m Əsê, nchîmbî əjǐ chîə mə́ chî nə́ ándó yi Yeso Klisto.

⁷Pəshunə́ mə maŋ kɔŋ nə́, ntəgə́ zɨ maŋ ŋwaʼlə̂ nə́ á mbô pɨ lə́ kě yi fî pô, lə́ yi ndɛnə. Lə́ yi páʼ pɨ kə túg nə́ ə́fɛ́lə á nəchwaakənə́ lə́. Ntəgə́ zɨ yi ndɛn lə́ nkɨ pɨ kə pɛ́d nə́ tə ńdzóʼə.[2]

⁸Lə́, ntəgə́ maŋ ŋwaʼlə̂ nə́ á mbô pɨ lə́ yi fîə, páʼ pə̈ zɨ́ nə́ ndə̌ŋdəŋ əyǐ lə́ á mə́m Klisto, ńkə́ ńdzə́ənə á mə́m pəənə́, ńté ńgə́ ndzəmə zə́ tə́ ńdaŋə̂ yə́, chigə nkyaʼə á pɛ́d ńtə́ ńkɛ́lə.[3]

⁹Ŋwu ntsəmə a sóŋ nə́ ńgə́ a chîə á mə́m nkyaʼ mbɨ ḿbeenə̂ ndim əyǐ, a pɛ́d lə́ á mə́m ndzəmə́ tə ńkoʼ əghâ nə́.

¹⁰Ŋwu ntsəm páʼ a kɔŋ nə́ ndim əyǐ a chîə mə́m nkyaʼə, ńdaŋ ə́lɨ́d ajûtsə́ á kě chîə á mə́m yí mbɔʼ á ghɛd a ghɛlə̂ təpɔŋ pô.

¹¹Lə́ ŋwu páʼ a pa nə́ ndim əyǐ a chîə mə́m ndzəmə́, a nyinə̂ lə́ á mə́m wə́, tə ńkě jîə aliʼə́ a ghɛn nə wɨ́ pô, ńté ńgə́ ndzəmə́ zə́ ə́ ghɛd əmə́g mí mə́ fəgə̂.

¹²Póonə mə, maŋ ŋwaʼlə̂ á mbô pɨ ńté ńgə́ pə́ ləgnə̂ pətəpɔŋ pɨ́ ńté əlɛ́n Klisto.

¹³Pətǎ, maŋ ŋwaʼlə̂ á mbô pɨ ńté ńgə́, pɨ jîə yí páʼ a kə chî nə́ ə́wɨ́ ə́fɛ́lə nəchwaakənə́ lə́. Nkaŋ ŋwu, maŋ ŋwaʼlə̂ á mbô pɨ ńté ńgə́ pɨ tsɛɛlə̂ Ngɛdtəpɔŋ wə́.

¹⁴Póonə mə, maŋ ŋwaʼlə̂ á mbô pɨ ńté ńgə́ pɨ jîə Tǎ. Pətǎ, maŋ ŋwaʼlə̂ á mbô pɨ ńté ńgə́ pɨ jǐə yí páʼ a kə chî nə́ ə́wɨ́ ə́fɛ́lə nəchwaakənə́. Nkaŋ ŋwu, maŋ ŋwaʼlə̂ á mbô pɨ ńté ńgə́ pɨ tyantə̂, atséebə Əsê á chîə á mə́m pəənə́, pɨ tsɛɛlə̂ Ngɛdtəpɔŋ wə́.

¹⁵Kɔ nə́ kɔŋ mbîə, kɨ ńkɔŋə̂ ajûtsə́ á pə́ nə́ yə mbîə. Mbɔʼ gho kɔŋ mbî, tə ḿbə́ gho kě akɔŋnə ńté Tǎ túg pô.

¹⁶Ajúmə atsəmə á pə́ nə́ yə mbîə, mənuə ándó na mbɨ ə́ lwaʼ nə̈ ə́wɨ́, əpú pɨ pə̈ zɨ́ nə́ ńkə́ ńdoonə̂, ḿbɨ ḿbə́ nə ajúmə atsəmə á ndu mbî ghɛn páʼ pɨ pə̈ tɨd nə ńté. Anu zɨ yitsə̌ a kě lə́ á mbô Tǎ fɛ́d pô, pɨ́d ətsəm fɛ́d lə́ á mə́m mbîə.

¹⁷Mbî pópə ajúmə atsəm a chî nə́ á mə́m wɨ́ pɨ pó lɔ nə́, ə́ laŋə̂ lə́ laŋ nə́; ŋwunə a pə́ nə̈ ə́faʼə̂ anu páʼ Əsê á lɔ nə́ a yǐ chîə á mbî tə mɛdnə̂.

¹⁸Póonə mə, ndwigtə ə́ páatə! Pə́ kə fiʼtə̂ wɨ́ ńgə́ ngaŋkəpa Klisto a yǐ yǐəə. Nə́ pə əghâ nə́ ngaŋkə́pa Klisto yi nɨ́ nə́ pɛn ḿbɛ́dtə ńgyǐəə. Lɛ̌ anuə a nɨd nə́ ńgə́ ndwigtə ə́ páatə lə́.

¹⁹Pɨ pɨ pó kə kě pyádnə ḿbə́ lə́ pɨ pə́ nkyeetə əzɛ̂n pô. Lə́ ghɛd ə́lɨ́d pó kə mɛdtə̂ áwɛ̂n lə̂. Mbɔʼ pó kə pyádnə ḿbə́ pɨ pə́ nkyeetə əzɛ̂n, tə ḿbə́ pó kə mɛdnə̂ pɛn po. Lə́ po pə́ mɛdtə̂ áwɛ̂n ńjî ńgə́ á ŋwaʼə̂ á əshîsaŋ ńgə́ ŋwu əghɔb yitsə̌ a kə kě pyádnə ḿbə́ lə́ ŋwu nkyeetə əwɛ̂n pô.

²⁰Lə́, nə́ pə́ ńtúgə Ajwǐəsê páʼ Klisto a kwɛd nə́ á ndu pəənə́, ńdaŋ ə́lɨ́d pɨ pətsəm jîə ndə̌ŋdəŋə́.

²¹Maŋ ŋwaʼlə̂ aŋwaʼlə zəənə́ á mbô pɨ ńkě ŋwaʼlə̂ ńté lə́ ńgə́ pɨ kě ndə̌ŋdəŋ jî po, maŋ ŋwaʼlə̂ ńté lə́ pə́ ńgə́ pɨ jîə ndə̌ŋdəŋə́. Pɨ kə́ ńjî ńgə́ ntsɨd yitsə̌ kě mə́m ndə̌ŋdəŋ chî pô.

²²Lə́ əwə a pə́ nə́ ngaŋntsɨd yi wə́? Lə́ yí wə́ ä sóŋ nə́ ńgə́ Yeso kě lə́ Yi Ńtsəʼ Nə́ wə́ pô. Ntê ŋwu zə́ lə́ Ngaŋkəpa Klisto. Yi páʼə a kǐ nə́ Tǎ ńkə́ nkǐə Móonə.

²³Ńté ńgə́ ŋwu ntsəmə a kǐ nə́ Móonə a kə́ ńkǐə Tǎ, ŋwunə ándó a kə́ nə́ ḿbímə Mɔ́, a kə́ ńtúgə Tǎ.

²⁴Jɨ́ nə́ ńgə́ nkɨ ətsəm pɨ kə zóʼ nə́ ə́fɛ́lə nəchwaakənə́ nə́ lɔʼkə̂ áwə́ələ́ á ntɨ́ pəənə́. Mbɔʼ nə́ lɔʼkə̂ nkɨ wə́, nə jî ńgə́ pɨ yǐ chîə nəkaʼ əghâ ətsəm pɨ pə́ Mɔ́, ńdzoŋ ḿbéenə Tǎ.

²⁵Lɛ̌ ajú Klisto nə́ nkɔ̌ʼmbɨ əyí a kə laʼnə̂ nə́ ńgə́ á yǐ fɛ̂ nə́ pɛnə̂, á pə́ nə́ nchîmbî páʼ ə́ mɛdnə̂ nə́ ngǎ mɔʼə́.

²⁶Maŋ ŋwaʼlə̂ zəənə́ á mbô pɨ ńté lə́ pəənə ándó pó lɔ nə́ á mə́ fɨg nə́ áwə́ənə́.

²⁷Lə́ ńgɛn nə́ pɨ, Klisto a pɛ́dtə ńkwɛlə̂ ajwiə ajíə á ndu pəənə́. Ndzaŋə Ajwiə ajíə a kə́ nə́ ńchî tsɔʼə á mə́m pɨ lə́, ŋwu tsə̌ a kě pɨ ńchî mbɔʼ á zéʼkə wɨ́ pô. Ńté ńgə́ Ajwiə ajíə zéʼkə wɨ́ nə́ anuə atsəmə, mənu a zéʼkə nə́ lə́ ndə̌ŋdəŋə́, ńkě ntsɨd pô. Zóʼnə nə́ ndzeʼkə́ Ajwi ńjî ńgə́ nə mɛdnə̂ a nəkaʼ pɨ̌pə Klisto.

²⁸Lə́ lə́ələ́ á ḿbə́ póonə mə, mɛdnə̂ nə́ á nəkaʼ pɨ pó ńjî ńgə́ məntɨ́ mə́g mə́ yǐ ńtyantə̂ əghâ páʼ a yǐ nə́ ńgyǐəə, ńkɔ tíʼə ńdyáŋ mbɨ əzəənə́ á mbô yə́ á mə́m əsɨ́ Alě á yǒ nə́ yǐəə.

²⁹Nə́ jî ńgə́ Klisto a tɨ́ ndə̌ŋdəŋə́; nə́ chîə á mə́ jî nə́ ńgə́ ŋwu ntsəm páʼ ä faʼ nə́ anu páʼ á koʼnə̂ nə́ lə́ mɔ́ Əsê.