Read Awing 1 Jɔnə 4 Bible Online

1 Jɔnə 4 - Awing bible

1 Jɔnə 4

¹Pəshunə́ mə maŋ kɔŋ nə́, kɔ nə́ néŋ ntɨ́ əwɨ́ nə́ ŋwu ntsəm páʼə ä sóŋ nə́ ńgə́ a túgə Ajwiə, lə́, jwə́ʼ nə́ ághóobə́ á mə́ jî nə́ ńgə́ ajwi pó túg nə́ lə́ a lǒo lə́ á mbô Əsê. Ńté ńgə́ məntúmə́sê mə́ məfɨgə mimə nɨ́ nə́ mə́ fɛ́d ńchîə apeŋ ndú ətsəmə.

²Lɛ̌ ndzaŋ pɨ yǐ nə́ ghɛd pɔŋə̂ jî ńgə́ Ajwi lə́ yə Əsê kɨ lə́ kě yə Əsê pô, ŋwu ntsəm páʼ a pí nə́ ńgə́ Yeso Klisto a kə yǐəə á mə́m na mbɨ, Ajwi páʼ a túg nə́ á lǒo lə́ á mbô Əsê.

³Ajwiə atsəm á kě nə́ Yeso kə́ ḿbí pô, á kě lǒo lə́ á mbô Əsê pô, á lǒo lə́ mbô Ngaŋkəpa Klisto, pɨ nə ńdzóʼ ńgə́ zə́ələ́ á yǐ yǐəə, á pɛn ḿbɛ́d tə́ chîə á mə́m mbî əghâ nə́.

⁴Lə́ nə́ póonə mə, pɨ chî lə́ á mbô Əsê, ńkə́ ḿbɛ́d tə ńtsɛ məntúmə́sê mə́ məfɨgə, ńté ńgə́ Ajwi páʼ á chî nə́ á mə́m pɨ á tyantə̂ ńtsɛɛlə̂ ajwi páʼ á chî nə́ á mə́m pɨ pə́ mbîə.

⁵Məntúmə́sê mə́ məfɨg mɨ lə́ pɨ pə́ mbîə, ńtséebə ńté lə́ mənu mə́ mbîə, mbî ə́ kə́ ńjwə́ʼtə atséebə azóobə́.

⁶Lə́ pɛn chî lə́ á mbô Əsê, ŋwu ntsəmə a jî nə́ Əsê a zóʼə á mbô pəgə́; ŋwu ntsəmə ándó a kě nə́ á mbô Əsê chî pô, a kě á mbô pəg kə́ ńdzóʼə pô. Lə́ ndzaŋ təmbɔʼ pɛn jîə ajwiə ndə̌ŋdəŋ pó yi páʼ á kě nə́ ndə̌ŋdəŋ pô.

⁷Pəshunə́ mə maŋ kɔŋ nə́, pɛn kɔŋ məmbɨ mɛ́n ńté ńgə́ akɔŋnə a lǒo lə́ á mbô Əsê. Ŋwu ntsəm páʼ a kɔŋ nə́ pɨ lə́ mɔ́ Əsê, ńkə́ ńjî Əsê.

⁸Ŋwu páʼ a kě nə́ pɨ kɔŋ pô a kě Əsê jî pô, ńté ńgə́ Əsê lə́ akɔŋnə.

⁹Lɛ̌ ndzaŋ Əsê a nɨd nə́ akɔŋnə ajíə á mbô pɛnə̂, a nə ńtú ndaʼ mɔ́ əyǐə á mə́m mbî ńjî ńgə́ təmbɔʼ pɛn túg nchîmbî ńdaŋ nə́ yə́.

¹⁰Lɛ̌ lə́ ajú páʼ akɔŋnə á pə́ nə́ zə́ələ́: lə́ kě á pə́ ńgə́ pɛn kɔŋ Əsê pô, lə́ ńté ńgə́ a nə ńkɔŋə̂ áwɛ̂n ńtíʼ ńtúmə Mɔ́ əyǐə ándó ajúmə afyaʼə́nu pə́ kə laŋ nə́ ə́wɨ́ ńdəgnə̂ pətəpɔŋ pɛnə̂.

¹¹Pəshunə́ mə maŋ kɔŋ nə́, təmbɔʼ lɛ̌ pə́ ndzaŋ Əsê a kɔŋ nə́ áwɛ̂n, lə́ á pə́ ńgə́ pɛn chîə á mə́ kɔŋ nə́ məmbɨ mɛ́nə.

¹²Ŋwu tsə̌ a kě Əsê kə láʼə zə́ənə pô; təmbɔʼ pɛn kɔŋ məmbɨ mɛ́n, Əsê a chîə á mə́m pɛn, akɔŋnə ajíə á kə́ ŋwaʼ ńgɛn ə́fyagə̂ á mə́m pɛnə̂.

¹³Lɛ̌ ndzaŋ pɛn jî nə́ ńgə́ pɛn chîə á mə́m Əsê a kə́ ńchîə á mə́m pɛnə̂; a fɛ̂ Ajwiə ajíə á mbô pɛnə̂.

¹⁴Lə́ pɛn zɨ́ ńkə́ fiʼtə̂ pətsə́ pɨ ńgə́ Tǎ a nə ńtúmə Mɔ́ əyǐ ńgə́ a yǐ ḿbə́ Nchwádkə mbîə.

¹⁵Ŋwu ntsəm páʼ a sóŋ nə́ ńgə́ Yeso lə́ Mɔ́ Əsê, Əsê a chî pó yə́, a kə́ ńchî pó Əsê.

¹⁶Pɛn nə́ nkɔ̌ʼmbɨ əwɛ̂n ə́ jî ńkə́ ḿbí mbô akɔŋnə páʼ Əsê a túg nə́ á mbô pɛnə̂. Əsê lə́ akɔŋnə, lə́ ŋwu ntsəm páʼ a chî nə́ á mə́mə akɔŋnə a chî lə́ á mə́m Əsê, Əsê a kə́ ńchîə á mə́m yə́.

¹⁷Pə́ ghɛd akɔŋnə á koʼnə̂ ńgɛn ə́fyagə̂ á mə́m pɛn ńjî ńgə́ pɛn yǒ ńtúg ntə́əmə á Alě Asáʼə́məsáʼə, pɛn yǒ túgə zɨ́d ńté ńgə́ nchîmbî əzɛnə̂ á ndu mbî ghɛn ə́ chî lə́ ándó yi Klisto.

¹⁸Apɔ́g yətsə́ á kě á mə́mə akɔŋnə chî pô; akɔŋnə páʼ á koʼnə̂ ńgɛn ə́fyag ä kəmə̂ apɔ́gə. Lə́ á pə́ ńgə́ akɔŋnə á kë koʼnə̂ ńgɛnə̂ ə́fyagə̂ á mbô ŋwu páʼ a túg nə́ apɔ́g pô, ńté ńgə́ ŋwunə apɔ́gə lə́ ngə́ʼə.

¹⁹Pɛ̈n kɔŋə̂ lə́ ńté ńgə́ Əsê a nə ḿbeg ńkɔŋə̂ áwɛ̂nə.

²⁰Təmbɔʼ ŋwu tsə̌ a sóŋ ńgə́, “Maŋ kɔŋ Əsê,” lə́ ḿbə́ ḿbeenə̂ ndim əyǐ, a pə́ lə́ ngaŋntsəələ. Lə́ pə́ ńgə́ təmbɔʼ a chîə ndim əyǐ páʼ a tə́ nə́ ńdzə́ənə kɔŋ pô, a pə́ ńtíʼ ńkɔŋ Əsê páʼ a kě nə́ tə́ ńdzə́ənə lə́ ə́lɛ́.

²¹Lɛ̌ tíʼ ntəgə́ páʼ Klisto ä fɛ̂ nə́ nə́ pɛnə̂; ŋwu ntsəm páʼ a kɔŋ nə́ Əsê a chîə mə́ shib nə́ ə́ kɔŋə̂ á ndim əyǐə.