Read Awing 2 Jɔnə 1 Bible Online

2 Jɔnə 1 - Awing bible

2 Jɔnə 1

¹Aŋwaʼlə zəənə́ á lǒo lə́ á mbô nətû nə́ nkyeetə pɔ́ pə́ Əsê, ńgɛnə̂ á mbô Mǎ pə́ tsɔ́ʼ nə́ yə́, pópə pɔ́ píə, yí páʼ maŋ kɔŋ nə́ yí ndə̌ŋdəŋə́. Yí lə́ kě tsɔʼə maŋ kɔŋ pô, pɨ páʼ pó jî nə́ ndə̌ŋdəŋ pó kə́ ńkɔŋə̂ a yə́,

²ńté ńgə́ ndə̌ŋdəŋ a chîə á mə́m pɛnə̂, ə́ yǒ kə́ chîə á mə́m pɛn tə mɛdnə̂.

³Ńgə́ Əsê páʼ a pə́ nə́ Tǎ pó Yeso Klisto páʼ a pə́ nə́ Mɔ́ Tǎ, pó fɛ̂ apɔŋə́ntɨ́ pópə akóolə́mə́lə́ŋ nə́ mbwɔ́dnə á mbô pɛnə̂, ńgə́ pɨ́d pə́ pəpɛ́nə á mə́m ndə̌ŋdəŋ nə́ akɔŋnə.

⁴Maŋ nə ḿbyádnə ńkɔŋtə̂ ndzaŋ maŋ nə ńdzɨ́ nə́ pɔ́ pó pətsə́ pó tə́ ńdzoŋə̂ ndə̌ŋdəŋ tsɔʼə ndzaŋ Tǎ a nə sóŋ nə́ á mbô pɛnə̂.

⁵Ńdaŋ ə́lɨ́d maŋ póʼmbô á mbô gho mǎ maŋ kɔŋ nə́, ńgə́: pɛn kɔŋ məmbɨ mɛ́nə. Lɛ̌ kě ntəgə́ yi fî páʼ mäŋ ŋwaʼlə̂ nə́ á mbô gho pô; lə́ ntəgə́ páʼ pɛn nə ńtúg nə́ ə́fɛ́lə á nəchwaakənə́ mbîə.

⁶Akɔŋnə zɨ páʼ mäŋ tsáb nə́ ńté lə́ á sóŋə lə́ ńgə́, pɛn shib ńtúg nchîmbî ə́ zoŋ nə́ pə́ məntəgə́ mə́ Əsê. Ntəgə́ zɨ páʼ pɨ pətsəm nə ńdzóʼ nə́ ə́fɛ́lə á nəchwaakənə́ lə́ ńgə́, pɨ pətsəm nə́ shib ńchîə á mə́mə akɔŋnə.

⁷Ngaŋmə́fɨg yi nɨ́ nə́ pɛ́d tə ńnyinə̂ á mə́m mbî ntsəmə, pɨ páʼ pó kě nə́ pí ńgə́ Yeso Klisto a nə ńgyǐ lə́ á mə́m na mbɨ pô; ntê ŋwu zə́ lə́ ngaŋməfɨgə ńkə́ ḿbə́ ngaŋkə́pa Klisto.

⁸Lɔg nə́ ndɛd nə́ məmbɨ mə́ənə́, ńjî ńgə́ nə́ kě yǐ ḿbéŋkə ajú páʼ nə́[1] faʼ nə́ ńté pô, lə́ nə́ yǐ kwá ntsɔ́ʼəfaʼ əzɨ ntsəmə.

⁹Ŋwu páʼ a lɔ nə́ á mə́ laŋ nə́ ghɛnə̂ á mbi, ńkě á mə́m ndzeʼkə́ Klisto mɛdnə̂ pô, a kě Əsê á mə́m yí túg pô. Lə́ ŋwu ntsəm páʼ a mɛdnə̂ nə́ á mə́m ndzeʼkə́ Klisto, a túgə Tǎ pó Móonə.

¹⁰Təmbɔʼ ŋwu tsə̌ a yǐəə á mbô pɨ páʼ a kě nə́ á pə́ nə́ ndzeʼkə́ zɨ yǐ pô, kɔ nə́ lɔgə̂ yə́ á ndɛ̂ pəənə́, kɔ nə kə́ ńchaʼtə̂ yə́;

¹¹ńté ńgə́ ŋwu páʼ á chaʼtə̂ nə́ yí, a néŋə apô ajíə á mə́m mənu mə́ təpɔŋ páʼ ä ghɛd nə́ lə́.

¹²Maŋ túg mənu mimə nɨ́ nə́ á mə́ sóŋ nə́ á mbô pəənə́, lə́ maŋ kě yǐ lɔgə̂ aŋwaʼlə pó nkɔŋə́ aŋwaʼlə ŋ́ŋwaʼlə̂ wɨ́ pô; lə́ maŋ túgə akwaŋ ńtə́ ḿbyáabə ńgə́ maŋ yǐ yǐ ə́zə́ənə áwɨ́ pɛn lɔg ndɛd ńtsáb, ńjî ńgə́ akɔŋtə azɛ̂nə á lwɛ́nkə.

¹³Pɔ́ pə́ mɔ́mɛ́ əgho yi məngyě páʼ Əsê a tsɔ́ʼ nə́ pó tə́ ńchaʼtə̂ áwə́ənə́.