Read Awing Judə 1 Bible Online

Judə 1 - Awing bible

Judə 1

¹Aŋwaʼlə zəənə́ á lǒo lə́ á mbô maŋ Judə, ngaŋəfaʼ Yeso Klisto ńkə́ ḿbɨ́ ḿbə́ mɔ́mɛ́ Jɛmsə; Maŋ ŋwaʼlə̂ lə́ á mbô pɨ páʼ Əsê a fóŋ nə́ ághóobə́, pó lə́ pɨ páʼ Tǎ Əsê a kɔŋ nə́, Yeso Klisto a kə́ ńtə́ ńnáŋə ághóobə́;

²Ńgə́ akóolə́mə́lə́ŋ pópə mbwɔ́dnə nə́ akɔŋnə chîə á mə́m pɨ tə ńdwɛ́nkə.

³Pəshunə́ mə maŋ kɔŋ nə́, maŋ kə pyádnə fǔəlóʼə á mə́ ŋwaʼlə̂ nə́ á mbô pɨ ńté nchwadkə́ páʼ pɛn kyeetə̂ nə́ ńchîə á mə́m ə́wɨ́ lə́. Maŋ zɨ́ ńgə́ a koʼnə̂ á mə́ ŋwaʼlə̂ nə́ á mbô pɨ ńnéŋ məntɨ́ mɨ́, ńgə́ nə ghɛn nə́ mbi ḿbóʼnə nə́ á mə́ túg nə́ mbimə́ páʼ Əsê a kə pɛ́d nə́ tə ə́fɛ̂ á mbô pɨ pí ngǎ mɔʼə́ lə́.

⁴Ńté ńgə́ pɨ pətsə́ pə́ kě nə́ Əsë pɔ́gə pô, pó pánə ńkwúnə á mə́m pɛn, pɛn kě jî pô, pɨ páʼ pó píʼkə nə́ nkɨ ńté apɔŋə́ntə́əmə Əsê əzɛ̂n, á mə́ laŋ nə́ ə́lɨ́d ə́lyáŋ məndú mə́ təpɔŋ mɔ́b ə́wə́, ńtíʼ ńkǐə ághóobə́ Yeso Klisto, páʼ a pə́ nə́ ndaʼ Tǎ Afaʼ əwɛ̂n ńkə́ ḿbə́ Mmaʼmbî əwɛ̂nə. Ə́fɛ́lə á nəfɛdnə́ lə́ aŋwaʼlə Əsê a fiʼtə̂ ndzaŋ pə́ yǒ nə́ lə́g əsáʼ əghɔ́b pó wǔ əsáʼə.

⁵Nə́ pǎtə ńjî ndɛn mənu ghɛn lə́, maŋ loonə̂ á mə́ kwúmtə nə́ áwɨ́ ndzaŋ páʼ Mmaʼmbîə a kə chwádkə nə́ pɔ́ pə́ Islɛlə á Ijibə, lə́ ḿbə́ ḿməgtə̂ lə́ ńtíʼ ńtsəŋkə̂ pɨ páʼ pó nə ńkě nə́ ńtɨ́ nə́ yí néŋ pô.

⁶Kwúmtə nə́ pətseŋpə́ndɛ́pə́sê páʼ pó nə ńkě nə́ pímə á mə́ chî nə́ tsɔʼə nə́ aliʼ pó túg nə́ mətɨ wɨ́ pô, lə́ ḿmyaʼə̂ azóobə́ aliʼ pó nə ńchî nə́ ə́wə́: pə́ nə ńkwúlə ághɔ́b nə́ məŋkɛd mə́ atəənə́ páʼ pó láʼ nə́ kě ə́wɨ́ fɛ́d pô, ńnéŋə ághóobə́ á mə́m ḿbî ndzəmə́ á ndəsê. Aliʼ Əsê lɔʼkə̂ nə́ ághɔ́b ə́wɨ́, ḿbyáabə tə́kɔʼə Alě asáʼə́məsáʼ wə́.

⁷Kwúmtə nə́ Sodom pó Gomolya, ńdzoŋ ḿbá pətɔ̂ŋ pə́ kə páatə nə́. Ngaŋə́láʼ yi ə́wɨ́ ə́ nə ə́faʼə̂ ándó pətseŋpə́ndɛ́pə́sê pə́ pó kə faʼ nə́ lə́, ńtíʼ ńnéŋ mbɨ əzoobə́ á mə́mə anǔəndzɔ́ʼə́ tə apímnə, pópə mətsə́ mənu mə́ təpɔŋə; pö zɨ́ ngə́ʼə á mə́m móg tə láʼ měe ándó akwantə əshîsaŋə á mbô ŋwu ntsəmə.

⁸Tsɔʼə nə́ ndú wɨ́d wə́, pɨ pɨ pö sóŋə ńgə́ pó lê ndzəəmə atəəmə́tɨ́ ńtíʼ ńdaŋ ə́lɨ́d ə́féŋkə mbɨ əzoobə́, pó wág mətɨ mə́ əsê, ńtíʼə ńdzɔmtə̂ pǐə ándó pó túg nə́ nəgháʼə á nəpóolə.

⁹Tsɔʼə əfo pətseŋpə́ndɛ́pə́sê pə́ nə fóŋ nə́ nə́ Mayikɛl, a nə ńkě ə́lɨ́d faʼ pô. Á nə ḿbə́ əghâ a nə sáʼnə nə́ pó Dɛbəəl lə́, nə ndɛd páʼ pó yí nə ńdzɔŋnə̂ nə́ akwûə Mosisə lə́, Mayikɛɛlə a nə ńkě tə́ ńdoonə̂ á mə́ lə́g nə́ əsáʼ əyí nə́ atséebə ndzɔmnə pô, lə́ ḿbə́ ə́sóŋ nə́ yí ńgə́, “Mmaʼmbî a yǐ ə́sáʼə gho!”

¹⁰Lə́ pɨ pɨ pö kwáalə anuə atsəm páʼ atûə azóobə́ kě nə́ wɨ́ lá pô lə́ nə́ ndzɔmnə; mənu páʼ pó jî nə́ ńdaŋə̂ pə́ ndzaŋ na mbɨ əzɔb fiʼtə̂ nə́ ághóobə́, tsɔʼə ándó məna mə́ akɔb lə́, lə́ mənu páʼ mə́ jwítə nə́ ághóobə́.

¹¹Á yǐ pə́gə á mbô pó pə́ ə́lɛ́! Pó zoŋə̂ lə́ ndú páʼ Kɛnə a nə ńgɛn nə́ ə́wə́. Ńté nkáb, pó fɛ̂ mbɨ əzɔb nə́ afankə́nu páʼ Balaamə a nə ńgɛd nə́ lə́. Pó kǐ Əsê ándó Kola a nə ńkǐ nə́ Əsê, pə́ yǒ kə́ tsəŋkə̂ ághóobə́ ándó pə́ kə kə́ nə́ ńtsəŋkə̂ Kola.

¹²Mənu mə́ təpɔŋ páʼ pó ghɛd nə́ ńkě əsɨ́ kóolə pô, mə́ ghɛd pó chîə ándó əpab ndɔtíə tətɨ pɨ əghâ ándó pɨ tə́ nə́ ńkyeetə̂ á mə jî nə́ məjî mə́ akɔŋnə mə́ənə́. Pó náŋə lə́ tsɔʼə məmbɨ móobə́. Pó chî lə́ ándó alə́m páʼ kəfəələ á twá nə́, á pə́ ńkě nə́ mbəŋ yitsə̌ tə́ ńgyǐəə pô, pó chî lə ándó atǐ páʼ təmbɔʼ a kě mənta zə́m pô. Pó chî lə́ ándó mətǐ mə́ alu páʼ pə́ soŋ nə́ ńtsɔ́ʼtə nə́ məŋaŋ mí, mə́ kwéʼnə ńkwû tə ḿměe.

¹³Pó chî lə́ ándó atyǎntə kəfɨd mə́m nkǐə, təpɔŋ əghɔb pó ghɛd nə́ tə əsɨ́ yi ndaʼ yitsə̌ á chîə ándó məfuʼfuʼə. Pó chî lə́ ándó pɔ́ pə́ sáŋ páʼ pó nyi nə́ ńkě ndú pó ghɛn nə́ ə́wɨ́ tə́ ńjîə pô. Əsê a lɔʼkə̂ aliʼə́ á mbô pó páʼ á mɛdnə̂ nə́, zə́ələ́ á chî lə́ á mə́mə apɛ́lə ndzəmə́ páʼ á chígə́ nə́ ə́shǐəə.

¹⁴Enok páʼ a chî nə́ a mə́mə akɔʼə asaambɛ̂ á mə́m ngwud Adam, a kə sóŋə á ngoʼ pəchə́ ńté ághɔ́b ńgə́, “Mmaʼmbîə a yǒ yǐ nə́ pətseŋpə́ndɛ̂ pí pi ŋwaʼ nə́ pətɔsə

¹⁵ńjî ńgə́ pó sáʼ əsáʼ ŋwu ntsəmə, ə́ ghɛd pó pətsəm pó wǔ əsáʼ ńté mənu pó kə ghɛd nə́ tsɔʼə tə pɔ́g Əsê, ə́ pɨ kə́ té mənu mə́ chígə́ nə́ ḿbə́g páʼ pətəpɔ́gsê, ngaŋə́ghɛlə təpɔŋ pó kə tsáb nə́ ńté yə́!”

¹⁶Pɨ pɨ́d pɨ pó zá ŋ́ŋwuntə̂ ḿbəənə̂ fɛ̂ fid nə́ pɨ pipə ndaʼə; pó faʼə̂ lə́ mənu mə́ təpɔŋ páʼ mbɨ əzɔ̈b sóŋ nə́ ńgə́ pó faʼə̂. Pó tóʼkə nkɔn əzoobə́, ḿbəənə̂ ńdɔg ətsáb pipə əshîʼnə ə́fɨgə̂ pɨ ə́wə́, ńjî ńgə́ pó zɨ́ ndú ə́faʼ məmɔ́b mənuə.

¹⁷Lə́, pəlimə́ mə maŋ kɔŋ nə́, kwúmtə nə́ mənuə ándó məntú mə́ Mmaʼmbî əwɛ̂n Yeso Klisto mə́ nə fiʼtə̂ nə́ á wə́ənə́ á ntsɛɛmbi lə́.

¹⁸Pó kə fiʼtə̂ áwɨ́ ńgə́, “Ndwigtə əlě mbî ə́ yǐ yǐ lə́, pɨ pətsə́ pə́ fɛ́d páʼ pó yǒ nə́ ńnyegnə̂ áwə́ənə́, lə́ pɨ pó zoŋ nə́ məmɔ́b mənu páʼ mbɨ əzɔb lɔ nə́, mənu Əsê a kě nə́ kɔŋ pô.”

¹⁹Lə́ pɨ pó shamkə̂ nə́ əliʼə́, pɨ pó zoŋ nə́ pə́ mənu mbɨ əzɔb ə́ sóŋ nə́ ńgə́ pó faʼə̂, pó kě Ajwǐəsê túg pô.

²⁰Lə́, ńgɛn nə́ pɨ, pəshunə́ mə maŋ kɔŋ nə́, ghɛn nə́ nə́ mbiə á mə́ kwíŋkə nə́ mbɨ əzɨ ńdaŋə̂ á mə́m mbimə́ əzɨ ə́ pyádnə nə́ ŋ́ŋwaʼ lə́. Chaʼtə̂ nə́ Əsê nə́ mətɨ mə́ Ajwǐəsê,

²¹ńdɔʼkə̂ məmbɨ mə́ənə́ á mə́mə akɔŋnə Əsê, ndzaŋ pɨ tə́ nə́ ḿbyáabə Mmaʼmbî əwɛ̂n Yeso Klisto ńgə́ a yǐ fɛ̂ áwɨ́ nə́ nchîmbî ə́ mɛdnə̂ nə́ ngǎ mɔʼə́ á mə́mə akóolə́mə́lə́ŋə ajíə.

²²Nəələ̂ akóolə́mə́lə́ŋə á mbô pɨ páʼə atûə azóobə́ á koʼlə̂ nə́;

²³chwádkə nə́ pətsə́ ńdaŋ nə́ mə chúb nə́ ághóobə́ á mə́m mógə́. Ńgɛn nə́ pətsə́ nɨd nə́ akóolə́mə́lə́ŋ ńdzoŋ ḿbegə̂ apɔ́g ə́wə́, lə́ ḿbə́ ḿbá tə ḿbeenə̂ atsəʼ pó wê nə́ zɨ́d ńté ńgə́ ndɔtí mbɨ əzɔb ə́ ghɛd zə́ələ́ jibə̂.

²⁴A mbô yí páʼ a chî nə́ təmbɔʼ a kɨ́ʼtə gho ńgə́ kɔ gho wǔəə, ə́ pɨ lɔgə̂ gho yǐ nə́ gho tə kɔntə pó akɔŋnə á mbi yí páʼ nəgháʼə a chî nə́ ə́wə́,

²⁵á mbô ndaʼ Əsê páʼ a pə́ nə́ Nchwádkə əwɛ̂nə, ńdaŋə̂ á mə́m Yeso Klisto Mmaʼmbî əwɛ̂n, ńgə́ nəgháʼə, nəfoonə, mətəənə, pópə atséebə mətɨ chîə á mbô yí ə́fɛ́lə ándó mbî nə ńdáʼ nə́ ńchúʼ, ḿbeg əghâ nə́ ə́wɨ́, tə mbî ə́ láʼ měe! Amɛn.