Read Awing Akyaʼəmə́nuə 1 Bible Online

Akyaʼəmə́nuə 1 - Awing bible

Akyaʼəmə́nuə 1

¹Mənu pə́ ŋwaʼlə̂ nə́ á mə́mə aŋwaʼlə zɨ lə́ mənuə ándó Yeso Klisto a kə kyaʼ nə́ á mbô Jɔnə. Əsê a nə ńkyaʼ mənu məənə́ á mbô Yeso Klisto lə́ á mə́ laŋ nə́ ə́lɨ́d nɨd ngaŋə́faʼ əjí nə́ mənu páʼ mə yǐ nə́ lɔgə̂ aliʼə́ á mə́m mɔ́ akəmə ndɛlə́. Klisto a kə ghɛd ngaŋəfaʼ əyǐ Jɔnə a jî mənu mɨ ńdaŋ lə́ nə́ ntseŋndɛ̂ əyǐ páʼ a kə tú nə́ á mbô yə́,

²Jɔnə a tíʼ fiʼtə̂ anuə atsəm páʼ a nə ńdzɨ́ nə́; lɛ̌ mənu mimə wɨ́ páʼ ä fiʼtə̂ nə́ ńté nkɨ páʼ ə́ kə lǒo nə́ á mbô Əsê ḿbɨ́ ńkə ńté ndə̌ŋdəŋ páʼ Yeso Klisto a nə̈ ńkyaʼ nə́.

³Mbɔŋə yə ŋwunə ándó páʼ a fóŋ nə́ aŋwaʼlə zəənə́, mbɔŋə a kə ḿbə́ yə pəənə ándó pó jwə́ʼtə mənu mɨ əghâ nə́ pó mi mə́ yǒ nə́ ə́lɔgə̂ aliʼə́, ńkə́ ńdzóʼnə anu pə́ ŋwaʼlə̂ nə́ á mə́mə aŋwaʼlə zəənə́! Ńté ńgə́ ndɛd ə́ páatə páʼ mənu mɨ mətsəm mə́ yǐ nə́ lɔgə̂ aliʼə́.

⁴Aŋwaʼlə zəənə́ á lǒo lə́ á mbô maŋ Jɔn ńgɛnə̂ á mbô mənkyeetə mə́ pɔ́ pə́ Əsê mə́ asaambɛ̂ á mboʼ Esya.[1] Apɔŋə́ntɨ́ pó mbwɔ́dnə lə́ əzɨ páʼ ə́ lǒo nə́ á mbô Əsê, Əsê páʼ ə́ chî nə́ əghâ nə́, páʼ a nə ḿbɛ́d nə́ tə ńchî ə́wə́, páʼ a kə́ nə́ ńchîə á mə́ yǐ nə́. Apɔŋə́ntɨ́ pó mbwɔ́dnə zɨ kə́ ńdǒo á mbô əjwi pə́ pɛ́n asaambɛ̂ á mbi aləŋə nəfoonə Əsê lə́

⁵ńkə́ ńdǒo á mbô Yeso Klisto ŋwunə ä sóŋ nə́ tsɔʼə anuə a zɨ́ nə́ ńkə́ ḿbí ńgə́ lə́ ndə̌ŋdəŋə́, ntsɛɛmbi ŋwu pə́ nə ńjúmkə nə́ yə́ nəwûə, ḿbɨ́ ḿbə́ ŋwunə ä sáʼ nə́ pəfo pə́ mbîə.[2] A kɔŋə̂ áwɛ̂nə, ńdaŋə̂ á mə́m nəwû əyǐ a fógə áwɛ̂nə á mə́m təpɔŋ əwɛ̂nə.

⁶Ńtíʼ ńgɛd ńgə́ pɛn pə́ aláʼə á pə́ nə́ yə pəpépə́sê á mbô Əsê a pə́ nə́ Tǎ əyǐə. Nəgháʼ pó mətɨ ə́ chîə á mbô Yeso Klisto tə mbî láʼ měe! Amɛn.

⁷Náŋ nə́, a tə́ ńgyǐəə á mə́mə alə́mə, ŋwu ntsəmə a yǐ zə́ənə́ yə́, ńdzoŋ ḿbeg pəənə ándó pó kə sɔb nə́ yə́. Ətú mbî ətsəmə á ndu mbî ə́ yǒ kyéŋ té yə́. A yǒ pə́ lə́ ə́lə́ələ́![3]

⁸“Maŋ lə́ nəchwaakənə́ ńkə́ ḿbə́ nəlwigtənə́” lə́ sóŋ Mmaʼmbîə, Əsê páʼ ə́ tsɛ nə́ ajúmə atsəmə, páʼ a chî nə́ əghâ nə́, páʼ a nə ḿbɛ́d nə́ tə ńchîə, páʼ a kə́ nə́ ńchîə á mə́ yǐ nə́.[4]

⁹Maŋ lə́ Jɔnə, ḿbə́ mɔ́mɛ́ əwəənə́, ndzaŋ maŋ pə́ nə́ ndzoŋ ndzəm Yeso lə́, pɛn pətsəm nɔd ńdzɨ́ ngə́ʼ ńté Yeso, páʼ pɛn kə́ nə́ ńnoolə̂ ńgwam ntɨ́ ńtə́ ńdzɨ́ ngə́ʼ páʼ zɨ́d zoŋ nə́ pəənə ándó pó chî nə́ á mə́mə Anuənə́foonə ajíə. Pə́ nə ńgwaamə̂ mə ńnéŋə á mə́m kyádkənkǐ yitsə̌ pə́ fóŋə nə́ Patmos, ńté ńgə́ maŋ nə́ ńnáŋkə atséebə Əsê pó ndə̌ŋdəŋ páʼ Yeso a nə̈ ńkyaʼ nə́ lə́.

¹⁰Á nə ḿbə́ alě Mmaʼmbî lə́ Ajwiə á kwúnə á mə́m maŋə, maŋ tíʼ ńdzóʼə tə́kɔʼ ngye yitsə̌ ə́ chûə ándó nəpaŋə, ńtíʼə ńtséebə á ndzəm maŋə.

¹¹Ngye yi wɨ́ ə́ sóŋ ńgə́, “Ŋwaʼlə̂ ajú páʼ gho zɨ́ nə́, ńtíʼ ńtúmə aŋwaʼlə yi wɨ á mbô mənkyeetə mə́ pɔ́ pə́ Əsê mə́ páʼ mə́ chî nə́ á mə́m pətə́kɔʼ pə́ tɔ̂ŋ pɨ pɛnə̂ asaambɛ̂: pɨd lə́ Ɛfesus, Səmiləna, Pəgamo, Tiyatila, Sadis, Filadefya, Lawodesya.”

¹²Maŋ sɛdnə̂ á mə́ zɨ́ nə́ ńgə́ lə́ tsáb əwə á mbô maŋə, ńtíʼ ńdzə́ənə á pə́ əpú pə̈ tə́g nə́ lamə á ndu wɨ́, pɛnə̂ asaambɛ̂ pə lɔgə̂ gôlə ńtsoŋkə̂ ə́wə́,

¹³Tətɨ əpúmə atə́gə́lam pə̂, ajûtsə́ á tɨ́ ə́wə́ ándó ŋwu mbîə, ńgwê tə́sɛ atsəʼə́ á tsó nə́ ńkoʼə̂ á ətád məko yə́, ḿbɨ́ ńkwúlə aŋkəndá pə́ tsoŋkə̂ nə́ nə́ gôlə á ngyéŋ yə́[5]

¹⁴Mənoŋ mə́ atû mí mə́ fógə ándó fufu apagə atsəʼə́, ə́fógə ńgə́ púu ándó məwəŋə́, əmə́g mí mə́ kɛ́lə ándó mógə́,[6]

¹⁵məko mí mə́ nə ńchîə ándó məngɔʼ mimə ŋwaŋkə̂ nə́, ńkɛ́lə ńchîə ándó pə́ lɔg móg ə́sog ə́wə́, ngye əjǐ ə́ chîə ándó mənkǐ mə́ tə́ ńtsóolə,[7]

¹⁶Á mə́mə apô ají yə tɨ́ a túg pɔ́ pə́ sáŋ pɛ́nə asaambɛ̂ ə́wɨ́, á ntso yí ŋwíŋ ntso mətû mətû páʼ ə́ pyádnə nə́ ńtsə́g məlá mə́ mbɛ̌, ə́ fɛ́d ə́wɨ́, əshî əyí ə́ ŋwaʼə̂ ándó mə́nu ntɨ ənumnə á pyádnə nə́ ńtə́ ńtɛ̂.

¹⁷Əghâ maŋ nə ńdzɨ́ nə́ yí lə́, ńgwǔəə á məko yí ńtíʼ ńchîə ándó akwûə ŋwunə. A tíʼ noŋkə̂ apô ají yə təənə á ndu maŋ ə́sóŋ ńgə́, “Kɔ pɔ́gə, maŋ lə́ nəchwaakənə́ ńkə́ ḿbə́ ndwigtə,”[8]

¹⁸Maŋ lə́ yí páʼ maŋ chî nə́ á mbîə, maŋ nə ńkwûə, lə́ nə́ pə əghâ nə́ maŋ pɛn ḿbɨ́ ńchîə á mbî tə yǒ ḿmɛdnə̂, maŋ túg mətəənə á ndu nəwû ńkə́ ńtúg mətəənə á ndumə aláʼə pəkwûə.

¹⁹Nə́ pə əghâ nə́, ŋwaʼlə̂ mənu páʼ gho zɨ́ nə́, yi páʼ á lɔg nə́ aliʼ əghâ nə́, pópə yi á yǒ nə́ yǐəə.

²⁰Lɛ̌ anuə nəlyaŋnə́ páʼ ä sóŋ nə́ anu ńté pɔ́ pə́ sáŋ pə́ pɛ́nə asaambɛ̂ páʼ gho zɨ́ nə́ apô maŋ yə tɨ lə́, ḿbá əpúmə atə́gə́lam pə̂ pɛ́nə asaambɛ̂ páʼ pə́ tsoŋkə̂ nə́ nə́ gôlə lə́, pɔ́ pəsáŋ pɨ pɛ́nə asaambɛ̂ lə́ pətseŋpə́ndɛ́pə́sê pə́ mənkyeetə mə́ pɔ́ pə́ Əsê mə́ asaambɛ̂, ətə́gtə́lam pə́ asaambɛ̂ ə́ pə́ mənkyeetə mə́ pɔ́ pə́ Əsê mə́ asaambɛ̂.