Read Awing Akyaʼəmə́nuə 10 Bible Online

Akyaʼəmə́nuə 10 - Awing bible

Akyaʼəmə́nuə 10

¹Maŋ tíʼ ńdzə́ənə mɛ́ tə́kɔʼ ntseŋndɛ̂sê yitsə̌ a fɛ́lə nəpó ńtə́ ńtsóolə. Alə́mə á kə líblə yə́, nkɔŋ nôngə́m nə ńkwúlə atûə ají ńdíblə, əshî əyí nə ńchîə ándó mə́numə, məko mí mə́ chîə ándó məntɔ́ mə́ ndɛ̂ mə́ mógə́.

²A nə ńtúgə mɔ́ kə́nyaŋə́ aŋwaʼlə yə kádtə nə́ á mbô yə́, á ŋáʼnə; ńtíʼ ńtə́gə akoolə ají yə təənə á ndu nə́ənə, ńtə́gə yə kwaabə á ndu ndəsê,

³ńtíʼ ə́fóŋ nə́ mɛ́ tə́kɔʼ ngye, ngye əjǐ ə́ chîə ándó ngye sáambaŋ páʼ á tə́ nə́ ńkyéŋə. Ndzaŋə a nə fóŋ nə́ lə́, məfaŋ mɛ́n asaambɛ̂ mə́ sáʼkə.

⁴Ndzaŋ məfaŋ mə́ mɛ́n asaambɛ̂ mə́ nə sáʼkə nə́ lə́, maŋ tə́ ńdoonə̂ á mə́ ŋwaʼlə̂ nə́ anu yəwə́, ḿbə́ ńdzóʼ ngye yitsə̌ ə́ lǒo nəpó ə́sóŋ ńgə́, “Lɔʼkə̂ anuə ándó məfaŋ mə́ mɛ́n asaambɛ̂ mə́ sóŋ nə́ lə́, kɔ ŋwaʼlə̂ ázə́ələ́.”

⁵Ntseŋndɛ̂sê wə́ maŋ nə ńdzɨ́ nə́ a tə́gə táʼə akoolə ajíə á ndu nɨ́ ńkə́ ńtə́gə táʼə ndu ndəsê lə́, a tíʼ ŋ́ŋáŋkə apô ají yə təənə á nəpóolə,

⁶ńtíʼ ńgɛlə̂ atyǎntə ndaʼnə nə́ əlɛ́n Əsê páʼ a chî nə́ mbî ḿmɛdnə̂, yí páʼ a tsoŋkə̂ nə́ nəpó pópə ajúmə atsəmə á chî nə́ ə́wə́, ńkə́ ńtsoŋkə̂ ndəsê pópə ajúmə atsəmə á chî nə́ ə́wə́, ḿbéenə nɨ́ pópə ajúmə atsəmə á chî nə́ ə́wə́. Ntseŋndɛ̂sê wə́ a tíʼ ə́sóŋ ńgə́, “Pə́ kě chîə á mə́ pɨ nə́ nyáʼ ə́lɛ́ɛlə pô!

⁷Lə́, əghâ ándó ntseŋndɛ̂sê a zoŋkə̂ nə́ pɛ́n ntogə́ a yǒ nə́ tɔ́ŋ nəpaŋ, əghâ yi wɨ́ lə́ Əsê a məgə̂ anuə nəlyaŋnə́ ajíə, tsɔʼə ndzaŋə ándó a nə fiʼtə̂ nə́ á mbô ngaŋə́faʼ əjí páʼ ə́ pə́ nə́ məntû mí lə́.”

⁸Ngye páʼ maŋ pěʼ nə́ ńdzóʼ ə́ fɛ́lə nəpó lə́, ə́ pɨ ńkə́ ńtsáb nə́ maŋ ngǎ yitsə̌ ə́sóŋ ńgə́, “Ghɛn ńkwáalə aŋwaʼlə yə kádtə nə́ zə́ á ŋ́ŋáʼnə nə́ lə́, á mbô ntseŋndɛ̂sê wə́ páʼ táʼə ako əyǐə á tɨ́ nə́ ndəsê táʼə á tə́əmə á ndu nɨ́ lə́.”[50]

⁹Maŋ tíʼ ńgɛnə̂ á mbô ntseŋndɛ̂sê wə́ ə́sóŋ nə́ yí ńgə́ a fɛ̂ á mɔ́ kə́nyaŋə́ aŋwaʼlə yə kádtə nə́ wə́ á mbô maŋə. A sóŋə á mbô maŋ ńgə́, “Ko zɨ́d ńkɔ́lə, á yǐ tsóolə á nəpəm gho lə́ ə́lwǐəə, ə́ pə́ ləəmə̂ á ntso gho ándó nûə.”

¹⁰Maŋ tíʼ ńkwáalə mɔ́ kə́nyaŋə́ aŋwaʼlə yə kádtə nə́ zə́ á mbô ntseŋndɛ̂ wə́ ńkɔ́lə, á ləəmə̂ ándó nûə á ntso maŋə, lə́ əghâ maŋ nə́ ńkɔ́d nə́ zɨ́d ḿməg, nəpəmə mə nə́ chúʼə á mə́ lwǐ nə́.

¹¹Pə́ tíʼ sóŋ nə́ maŋ ńgə́, “Ngǎ yitsə̌, gho yǐ shib ə́ tə́ náŋkə nkɨ Əsê ə́sóŋə mənu páʼ mə́ yǒ nə́ laŋ nə́ ətú ətú, nə́ mbô ngwud ŋwu məsɔŋ ntsəm, ḿbá ətsáb ətú ətú ḿbɨ́ ḿbə́ nə́ pəfo.”