Read Awing Akyaʼəmə́nuə 11 Bible Online

Akyaʼəmə́nuə 11 - Awing bible

Akyaʼəmə́nuə 11

¹Pə́ kə tíʼ fɛ̂ akəmə ajú tsə̌ nə́ maŋ á chîə ándó mbaŋə afiʼə́púmə, pə́ tíʼ sóŋ nə́ maŋ ńgə́, “Ghɛn fiʼ ndɛ̂ páʼ ə́ pə́ nə́ yi Əsê pó nəpéenə, ndzoŋ sháŋ pɨ pö ghóʼkə nə́ á Ndɛ̂sê.[51]

²Lə́ kɔ pə́ fiʼə̂ atətá á ndzəmə apeŋə́, ńté ńgə́ pə́ fɛ̂ zə́ələ́ á mbô Pətəjǐsê, ńjî ńgə́ pó lɔg sáŋ məghə́m nəkwa nə́ sáŋ pɛ̌ ńchúʼtə tə́kɔʼ tɔ̂ŋ yi ŋwaʼ nə́ wə́.[52]

³Maŋ yǐ tú pəənə́ mə pɛ́n pɛ̌ pó kə zɨ́ nə́ ńkə́ ḿbí lə́, pó wê atsəʼə́ afɨnə ńnáŋkə anuə á yǒ nə́ lɔgə̂ aliʼ nə́ əlěmbî táʼ tɔsə nə́ nkɛd pɛ̌ nə́ məghə́m mɛ́n ntogə́.”

⁴Pɨ pə́ pɛ́n pɛ̌ pó kə zɨ́ nə́ ńkə́ ḿbí lə, pó kə pə́ lə́ ətǐ olif pə́ pɛ́n pɛ̌ ndzoŋ ḿbə́ nə́ əpúmə atə́gə́lam pə́ pɛ̌ páʼ ə́ tɨ́ nə́ á mbi Mmaʼmbîə á ndu mbîə.[53]

⁵Mbɔʼ ŋwu tsə̌ tə́ ńdoonə̂ mə́ límkə nə́ ághɔ́b, móg fɛ́lə á ntso pó ńtsəŋkə̂ ngaŋkə́pa əzóobə́; nə́ ndú wɨ́d ghɛn ŋwu ntsəm páʼ a tə́ nə́ ńdoonə̂ mə́ límkə nə́ ághɔ́b pə́ yǐ jwítə yə́.

⁶Pó túg mətəənə á mə́ kə́bkə nə́ nəpó ńgə́ kɔ mbəŋ lô, nə́ əghâ ándó pó tə́ nə́ náŋkə anuə á yǐ nə́ laŋə̂. Pó kə́ ńtúg mətəənə á ndu pəsáʼə əsê pə́ nkǐə, á mə́ ghɛd nə́ pɨ́d pə́ sɛlə̂ achǐə; ńkə́ ńtúg mətɨ mbɔʼ pó maʼ ntê əpúmə́tsəŋkə ŋwu məsɔŋ ntsəmə á ndu mbî, ḿbégnə ndɛn ngǎ ətsəm pó kɔŋ nə́.[54]

⁷Ndzaŋ pó kə məgtə̂ nə́ á mə́ náŋkə nə́ nkɨ Əsê ndzaŋ pə́ kə sóŋ nə́ ńgə́ pó náŋkə lə́, na zə́ páʼ ə́ fɛ́d nə́ á mə́mə atéemə́təndwegtə lə́, ə́ yǐ ḿbóʼnə pó po, ńtsɛɛlə̂ ághɔ́b ńkə́ ńjwítə ághóobə́.[55]

⁸Əkwû əpɔ́b ə́ tíʼ noŋtə̂ á alaŋə́ á tə́kɔʼ tɔ̂ŋ wə̂, aliʼ páʼ pə́ kə kwumtə̂ nə́ Mmaʼmbî əghɔb ə́wə́. Əlɛ́n páʼ wɨ́d tɨ́ nə́ nə́ əlɛ́n tə́kɔʼ tɔ̂ŋ yi wɨ́ lə́ Sodom kɨ Ijibə.[56]

⁹Pɨ pó fɛ́dkə nə́ atúmə atú, ə́fɛ́dkə məla məla, ńtsáb ətsáb ətúmə, ḿbá ndzaŋ ŋwu məsɔŋ ntsəm, pó yǒ tíʼə ńnáŋ əkwû póobə́ á mə́m əlě mbî teelə́ nə́ akəm ə́ kě pí ńgə́ pə́ twə́ŋ pô.

¹⁰Pɨ pə́ mbî pó yǒ pyádnə kɔŋtə̂ ndzaŋ pɨ pɨ pɛ́n pɛ̌ pó kwúkə nə́ lə̂. Pó yǒ jî məjî kɔŋtə̂ ə́ kə́ tú əpúmə akɔŋtə á mbô pɔ́pə́mɛ́ póobə́, ńté ńgə́ məntúmə́sê mɨ mɛ́n mbɛ̌ mə́ kə yǐ nə́ ngə́ʼ yi nɨ́ nə́ á mə́m pɨ pə́ chî nə́ ndu mbîə.

¹¹Ndzaŋə ándó əlě mbî teelə́ nə́ akəm kə laŋ nə́ lə́, ajwi páʼ ä fɛ̂ nə́ nchîmbî á lǒo á mbô Əsê ńgyǐ ńkwúnə á mbɨ pó. Pó lǒo əsê, pɨ pətsəmə ándó pó kə zɨ́ nə́ ághɔ́b pó pɔ́g lɛ tətə.[57]

¹²Məntúmə́sê mə́ mɛ́n mbɛ̌ mə́ zóʼ tə́kɔʼ ngye yitsə̌ á lǒo á nəpó ə́sóŋ nə́ pó ńgə́, “Kɔ́ʼ nə́ ńgyǐəə aliʼə́ nə́!” Ngaŋkə́pa əzɔ́b tíʼə ńnáŋə ághɔ́b ndzaŋ pö kɔ́ʼ nə́ ńgɛnə̂ á nəpóolə á mə́mə alə́mə.[58]

¹³Tsɔʼə əghâ yi wɨ́ ndəsê chiʼnə̂ nə́ apɛ̂. Tə́kɔʼ tɔ̂ŋə a kə ghabnə̂ məlá nəghə́m, pə́ tsəŋkə̂ táʼ əléemə, pɨ tɔsə asaambɛ̂ kwûə. Apuʼə pəənə a túgə apɔ́g lɛ tətə, ńtíʼə ŋ́ŋáŋkə Əsê ə́sóŋə ńgə́, lə́ ndaʼ Əsê nəpó páʼ ə́ gháʼ nə́.[59]

¹⁴Ndɔ páʼ ə́ zoŋkə̂ nə́ yi ntsɛɛmbi ə́ laŋə̂, lə́ yi páʼ ə́ zoŋkə̂ nə́ pɛ́n pɛ̌ ə́ yǐ yǐ tsɔʼə əghâ nə́!

¹⁵Ntseŋndɛ̂sê a zoŋkə̂ nə́ pɛ́n ntogə́ lə́ a tɔ́ŋ nəjí nəpaŋə, pətə́kɔʼ pə́ ngye pə́ fɛ́lə á nəpó ə́sóŋ ńgə́, “Mətəənə á mə́ sáʼ nə́ mbî əghâ nə́ mə́ chî lə́ á mbô Mmaʼmbî əwɛ̂n pó Yi Ńtsəʼ nə́ əyǐə, a yǐ sáʼ tə mɛdnə̂!”[60]

¹⁶Mətû mə́ məghə́m mɛ́n mbɛ̌ nə́ mɛ́n nəkwa pó kə náanə nə́ á ələŋəmə́fɔ pó á mbi Əsê lə́, pó wǔəə əsê ńkə́bkə məshî mɔ̈b ńgóʼkə Əsê,

¹⁷ə́sóŋə ńgə́: “Mmaʼmbîə a pə́ nə́ Əsê a tsɛ nə́ ajúmə atsəm, yí páʼ a pə́ nə́ ə́wɨ́ ńkə́ ḿbə́ yí páʼ a kə pə́ nə́ ə́wɨ́! Pəg fɛ̂ ndǎ á mbô gho ńgə́ gho kwáalə tə́kɔʼ mətɨ əgho tə ńchwáakə á mə́ sáʼ nə́ nəfoonə!

¹⁸Pətəjǐsê pó tə́ fuʼə̂ nə́ azáŋə́ndé ńté ńgə́ ndɛlə́ azáŋə́ndé azô ə́ koʼə̂, ndɛd pə́ yǐ nə́ sáʼ əsáʼ pəkwû ə́ kə́ ńkoʼə̂. Ndɛd gho yǐ nə́ tsɔ́ʼə afaʼə ngaŋə́faʼ əzô ə́ kə́ ńkoʼə̂, yə məntúmə́sê pópə pɨ pó pətsəm, pɨ pətsəmə ándó pó pɔ́g nə́ gho, mɛ́ ŋwu kɨ mɔ́ kə́nyaŋə́. Ndɛd koʼə̂ á mə́ tsəŋkə̂ nə́ pɨ pö tsəŋkə̂ nə́ mbîə!”

¹⁹Pə́ kə ŋáʼ Ndɛ̂sê á nəpóolə, ńtíʼ ńjɨ́ nkwum páʼ əka wə́ kə chî nə́ wɨ́ lə́ á mə́m wə́. Nəfaŋ nə́ tíʼ ńchúʼə mə́ ŋwaŋkə̂ nə́, ńdzoolə̂ ńdzoŋə̂ ə́sáʼkə, ndəsê chiʼnə̂ nə́ apɛ̂, məwəŋ mə́ tíʼə ńtsǒo.