Read Awing Akyaʼəmə́nuə 12 Bible Online

Akyaʼəmə́nuə 12 - Awing bible

Akyaʼəmə́nuə 12

¹Ajú tsə́ ḿbyádnə ə́səglə̂ ńkə́ ńkɨʼnə̂ á tíʼ ńgabkə̂ ə́fɛ́lə nəpóolə ándó akyeʼə́nuə. Lə́ nə ḿbə́ məngyě yitsə̌ a atsəʼə́ ajíə á pə́ mə́numə, sáŋə á chîə á mətɛ́n mə́ məko yə́, a wê lɛ nəfɔ pɔ́ pə́ sáŋ ntsɔb pɛ̌.

²A nə ńtíʼə ḿbáatə á mə́ pî nə́, mbɛ́n mə́ mɔ́ pópə ngə́ʼ ghɛlə̂ á tíʼə ńkyéŋə.

³Yitsə̌ ajúmə á kɨʼnə̂ nə́ ḿbə́ akyeʼə́nuə a kə́ ḿbɨ́ ńgabkə̂ ə́fɛ́lə á nəpóolə. Lə́ nə ḿbə́ mɛ́ paŋ na yitsə̌ pə́ fóŋə nə́ dəlagɔn ńtúg ətû pɛn asaambɛ̂ nə́ məndɔ́ŋ mɛ́n nəghə́mə, ətû pí ətsəmə a nə ńgwê pəlɛ pə́ nəfoonə.[61]

⁴Pə kə ghabtə̂ pɔ́ pə́ sáŋə á nəpó nə́ əliʼ pɛ́n teelə́, á lɔgə̂ asaŋə́ ají ńdzəgə̂ táʼə aliʼ ə́wɨ́ ńkwɛlə̂ á ndu mbîə. Á kə tə́əmə á mbi məngyě wə́ ńtə́ ḿbyáabə ńjî ńgə́ a pîə mɔ́ əyǐə a kɔ́lə yə́.[62]

⁵Məngyě wə́ a tíʼ ḿbîə mɔ́ mbyâŋnə, páʼ a yǐ nə́ sáʼ ətú mbî ətsəm nə́ mətəənə. Lə́ pə́ pə̂ ńkwáalə á mɔ́ yi wɨ́ nə́ mətɨ ńdɔg ńgɛn nə́ yə́ á mbô Əsê, á aləŋənə́fɔ yə́.

⁶Məngyě wə́ a kəələ̂ yí ńgɛnə̂ á kɔŋ məŋkwâʼlə̌, aliʼ Əsê a nə ńtsoŋkə̂ nə́ á mbô yə́, páʼ pə́ yǐ nə́ túgə yí əshîʼnə tə koʼ əlě mbî táʼ tɔsə nə́ nkɛd pɛ̌ nə́ məghə́m mɛn ntogə́.

⁷Ntso tíʼ ńgwǔəə á nəpóolə, Mayikɛl pópə pətseŋpə́ndɛ́pə́sê pí pó póʼnə Satanə, Satan pópə pəpí pətseŋpə́ndɛ̂ kə́ ńtə́ ḿbóʼnə ághóobə́.[63]

⁸Lə́ pə́ kə tsɛɛlə̂ Satanə, ńkě pɨ ḿbí ńgə́ pópə pətseŋpə́ndɛ̂ pí pɨ ńchîə á nəpó pô,

⁹pə́ tíʼ ə́fógə mɛ́ na wə́ pə́ fóŋ nə́ nə́ dəlagɔn lə́ ḿmaʼə̂ apeŋə́. Lə́ yí páʼ á nə ḿbə́ nə ndɛn nó lə́, pə fóŋə yí ńgə́ Dɛbəələ kɨ Satan páʼ a kə́ fɨg nə́ mbî ntsəm lə́. Pə́ kə maʼə̂ yə́ á ndu mbî pó pətseŋpə́ndɛ̂ pí pətsəmə.[64]

¹⁰Maŋ tíʼ ńdzóʼ tə́kɔʼ ngye yitsə̌ ə́ fɛ́lə nəpó ə́sóŋ ńgə́, “Əghâ nə́ nchwadkə́ Əsê ə́ yǐəə! Əghâ nə́ Əsê a nɨd mətɨ míə ándó Əfo! Əghâ nə́ Yi Ńtsəʼ nə́ a nɨd mətɨ míə! Ńté ńgə́ ŋwunə ándó ä tɨ́ nə́ á mbi Əsê əzɛ̂n ńnéŋə anu atû pɔ́pə́mɛ́ pɛn á ntɨ̌numnə pó nətúʼ, pə́ fógə yə́ á mə́m nəpóolə.[65]

¹¹Pɔ́pə́mɛ́ pɛn pó kə maʼ ntso ńdaŋ lə́ á mə́m achǐə Mɔ́ Mbéŋ ndzɛlə, ḿbɨ́ ńkə́ ńdaŋə̂ á mə́m ndə̌ŋdəŋ pó kə́ ńnáŋkə, pó kə tsɔ́ʼə á mə́ fɛ̂ nə́ nchîmbî əzɔb ə́ kwûə.

¹²Ńdaŋ ə́lɨ́d nəpó pópə pɨ pə́ chî nə́ ə́wɨ́ pó tə́ ńkɔŋtə̂! Lə́ ngə́ʼ yǐ ńchaanə̂ nə́ á mbô pɨ pə́ chî nə́ ndu mbî pópə pi pə́ chî nə́ á mə́m nə́ənə! Ńté ńgə́ Dɛbəələ a tsó ńgyǐəə á mə́m pəənə́, ńtə́ fuʼə̂ nə́ azáŋə́ndé ńté ńgə́ a jî ńgə́ ndɛd əjǐ pɛ́d ńkəmkə̂.”

¹³Ndzaŋ Satanə a kə leŋ nə́ ńgə́ pə́ maʼə̂ yə́ á ndu mbî lə́, ńchwáakə a mə́ zoŋ nə́ ə́fyáalə məngyě a kə pî nə́ mɔ́ mbyâŋnə wə́ lə́.

¹⁴Pə kə fɛ̂ pətə́kɔʼ pə́ mbab mə́ mbôʼmə́wúmə́ á mbô məngyě wə́ mɛ́n mbɛ̌ ńjî ńgə́ a lɔgə̂ mɨ́d ńdzag ńgɛnə̂ aliʼ yə́ á kɔŋ məŋkwâʼlə̌, aliʼ pə́ yǐ nə́ tə́ lɔg ndɛd nə́ yə́ á mə́m ngoʼ teelə́ nə́ akəmə. Lə́ aliʼ təmbɔʼ Satan wə́ a kě yǐ ńkwú pô.[66]

¹⁵Satan wə́ á ŋáʼ ntso əyí ńkwɛlə̂ awɛ̌nkǐə á ndzəm məngyě wə́, ńjî ńgə́ təmbɔʼ á soŋə̂ yí ńgɛnə̂.

¹⁶Lə́ ndəsê ə́ pə́ ńkwáalə məngyě yi wə́, ŋ́ŋáʼ ntso yí ḿmǐ nkǐ wə́ ə́ kə fɛ́d nə́ á ntso Satan lə́.

¹⁷Satan wə́ a tíʼ ńtúgə tə́kɔʼ azáŋə́ndé nə́ məngyě wə́ ńtíʼ ə́fɛ́d ńgɛnə̂ á mə́ póʼnə nə́ apuʼə ngwulə ajíə; apuʼə ngwud zə́ lə́ pɨ pətsəmə ándó pó zóʼnə nə́ məntəgə́ mə́ Əsê ńkə́ ńdzoŋə̂ ndə̌ŋdəŋ Yeso a kə kyaʼ nə́ lə́ nə́ ntɨ́ əghɔ́b ətsəmə.

¹⁸Satanə a tíʼ ńtə́əmə á nkaŋ nə́ənə.